Cadernos gastronómicos 32
CHOCO CON ARROZ
Ingredientes (para 6 persoas): • 1 cebola • 1 pemento • allo (3 ou catro dentes) • 1 tomate natural • pementón (1 ou 2 culleradas de café) • caldo de peixe • aceite de oliva virxe • 1 kg. de choco • un pequeno toque de pementón picante • sal • 1 folla de loureiro • arroz • 1 vaso de viño branco
Elaboración Nunha tixola botamos o aceite e pochamos o allo, a cebola e o pemento. Cando xa colle cor, engadimos o tomate, o pementón e a folla de loureiro. Cando xa nos parece que colleu a textura que queremos, engadimos o choco en anacos pequenos. Removemos ata que empeza a amolecer. Botamos un vaso de caldo de peixe e mais o vaso de viño e deixamos cocer (10 minutos). Se nos gusta o sabor picante, engadimos un chisco de pementón. Botamos o arroz e removemos para que colla o sabor do choco e do pochado. IES MENDIÑO
Primavera 2019
Sen que se queime, engadimos o resto o caldo tendo en conta a cantidade de arroz . (Xa sabedes, o dobre de caldo ca de arroz). En canto ao sal, probamos primeiro porque o caldo xa ten sal, así que a gusto do consumidor. E a esperar (20 minutos). O tempo de cocción é estimativo, así que probade antes de apagar o lume. Pepe Piñeiro (Departamento de Galego)
IES MENDIÑO
Cadernos gastronómicos 32
ESPAGUETTIS CON AMEIXAS
Ingredientes • ¾ de quilo de ameixas babosas (ou doutra clase) • un par de dentes de allo • unha cullerada sopeira de fariña • 300ml de caldo de peixe (ou auga e media pastilla de caldo) • 75ml de viño branco • 350g de espaguettis • 1 litro e medio de auga • aceite • perexil • sal • 1 folla de loureiro • colorante ou azafrán • pementa branca moída.
Elaboración Poñer en remollo as ameixas co sal durante 30-60 minutos para que solten a area; colocar no cesto e aclarar ben. Reservar. Picar os allos e o perexil todo miudiño e fritilos nun pouco de aceite. Engadir a fariña. Pochar dous minutos remexendo para que non teña sabor a cru. A continuación, botamos o caldo de peixe, o viño branco, o colorante ou azafrán e a pementa branca; trituramos todo; engadimos o loureiro e deixamos cocer 5 minutos. Cando ligue a salsa e se reduza en pouco, engadimos as ameixas ben escorridas e cocémolas na salsa ata que abran. Cocemos a pasta en auga con sal e un chorro de aceite, durante uns oito minutos. Escorrémola; botámola nunha pota coa salsa e deixámola cociñar todo durante dous minutos a lume forte ciscándolle por riba o perexil picado. Alexandre Corujeira (4º ESO) IES MENDIÑO
Primavera 2019
GUISO DE COSTELAS CON PATACAS Ingredientes • 1kg costela de porco • 1 cebola • 3 dentes de allo • 6 patacas grandes • 1 tomate grande • 1 folla de loureiro • ½ pemento bermello • Sal e pementa negra • azafrán • aceite de oliva virxe
Elaboración Cortamos a costela en anacos máis ou menos grandes. Nunha pota quentamos 3 ou 4 culleradas de aceite de oliva extra. Douramos a costela por todos os lados ata que queden ben seladas. Retiramos e reservamos. Pelamos a cebola e os allos e troceamos en dados pequenos. Botamos na pota a cebola e os allos , sofritimos a fogo medio-alto removendo para que non se queime. Mentres a cebola se cociña, cortamos o pemento vermello e engadímolo xunto cunha folla de loureiro. Lavamos o tomate; cortámolo en anacos e engadímolo á pota. Pelamos as patacas e cortámolas en anacos. Agregamos as patacas e as costelas que tiñamos reservadas. Incorporamos un vaso de auga, o sal, a pementa negra e o azafrán. Removemos todo e deixamos que se evapore parte do líquido a lume medio-baixo. Engadimos dous vasos de auga e deixamos cocer a lume medio durante 30 min. Apagamos e deixamos repousar durante 5 min. IES MENDIÑO
A allada
Cadernos gastronómicos 32
A allada é o gran mollo da cociña galega. Ou mellor: é o único. Rustrido (con cebola) e allada son os únicos prebes realmente orixinais, autóctonos. Non coñezo outro, como non sexa algunha adaptación máis ou menos feliz, coma tal, o mollo verde, aquel que comiamos, anos hai, en Casa Jesusa. No libro de Jorge Víctor Sueiro La cocina moderna en Galicia vén unha receita sinxela de allada con coliflor e bacallau e que procede do restaurante Combarro de Madrid. Quéntase o aceite e, cando está morno, engádese allo e loureiro. Cando os allos están dourados, engádese o pemento e o vinagre e déixase ferver todo un pedazo. Enfríase con auga de ferver o bacallau. X. Rodríguez Baixeras, Diario de comidas.
IES MENDIÑO
Primavera 2019
MASA DE EMPANADA Ingredientes • 700 gr. de fariña • 200 ml. de aceite de xirasol • 200 ml. de leite • Sal • Pementón
Elaboración Mesturamos a fariña co leite e remexemos. Engadimos logo o aceite, e sal e pementón ao gusto. Amasamos ata que se despegue das mans e quede suave. Deixamos repousar 15-20 minutos. Dividimos a masa en dúas partes e estiramos. Poñemos papel de forno sobre unha placa. Enchemos co recheo que se desexe. Cubrimos coa outra parte estirada e enrolamos os bordes do xeito tradicional. Facemos un buraquiño no centro da superficie da empanada e poñemos un roliño de masa ao redor do mesmo. Picamos o resto da superficie cun garfo. Pintamos con ovo batido e forneamos uns 45-50 minutos (o tempo depende do forno) a 180º. Rosa González. (Departamento de Galego) IES MENDIÑO
Cadernos gastronómicos 32
PEIXE SAPO CON AMEIXAS
Ingredientes • Peixe Sapo • Ameixas • Unhas verduras para facer o caldo de peixe • Cebola • Allo • Pemento vermello • Patacas • Fariña • Sal, pementa e aceite de oliva
Elaboración Preparamos un caldo de peixe coa cabeza do peixe sapo e unas verduriñas (allo, porro ou cebola, perexil, unha cenoira, sal e unas bolas de pementa branca. Cun pouco de apio tamén queda rico). Cocémolo 20-30 minutos. Coámolo e reservamos. Nunha cazola poñemos a pochar en aceite de oliva cebola e allo picados. Engadimos pemento vermello troceado e salgamos. Ao estar pochado, regamos cun pouco de viño branco e reducimos. Engadimos o caldo de peixe e deixamos cocer un pouco. Logo triturámolo todo para que nos quede unha salsiña densa. IES MENDIÑO
Primavera 2019
Toramos a cola do peixe sapo, salgamos e pasámolos por un pouco de fariña. Marcamos os toros nunha tixola con aceite. Só deixamos que se doure por fóra. Reservamos. Cortamos en rodas dun dedo de grosor unhas patacas e fritímolas un pouco noutra tixola. Reservamos. Poñer a salsa triturada na cazola. Meter nela as patacas e os toros de peixe sapo. Deixar que ferva 10 minutos e botar as ameixas. Dar outro fervor para que abran e servir. Rosa González. (Departamento de Galego)
Os mozos mariñeiros da fiada lémbranse rindo alleos de coidados; cheira a aceite e pemento requeimados rustido de xurés en caldeirada. Conta o patrón nun corro a trebonada do ano setenta –historia de afogados–, e empuxándose, inando, entran mollados os homes dunha “lancha de enviada”. Pasa de man en man a xerra roiba de albariño, e namentres cae a choiva e o vento fai tembrar a casa enteira, detrás do mosrtrador clarexa o ceo nas trenzas de ouro, no mirar sereo, na surrisa de luz da taberneira. Ramón Cabanillas
IES MENDIÑO
Cadernos gastronómicos 32
PEMENTOS RECHEOS
Ingredientes (Para 4 persoas) • 4 pementos vermellos grandes • 400g de carne de tenreira picada (1 soa vez) • Un chourizo e 150g de xamón • 1 cebola • 2 ovos cocidos • Un bote pequeno de salsa de tomate concentrada
Elaboración Sofríase a cebola picada e a carne. Mestúrase o xamón e o chourizo picadiños e o tomate. Por último, engádenselle os ovos cortados en pequenos anacos. Con esta mestura énchense os pementos aos que previamente se lles quitou toda a semente. Dispóñense nunha fonte de forno e bótaselles un pouco de sal e un pouco de aceite de oliva virxe. Póñense a lume medio (170º)uns 45 minutos. Pódense acompañar con arroz branco ou patata cocida. Carmen Álvarez (Departamento de Economía)
IES MENDIÑO
Primavera 2019
POLBO Á FEIRA
Ingredientes • un polbo duns 2 ou 3 quilos de peso, previamente cocido • pementón doce e picante • 3 ou 4 patacas medianas • Sal gordo • Aceite de oliva
Elaboración Póñense a cocer as patacas; bótanse en abundante auga nunha pota cun bo puñadiño de sal. Póñense ao lume ata que fervan e déixanse cocer unha media hora (comprobamos que estean listas cando as picamos cun coitelo e este sae da pataca sen dificultade). Déixanse arrefriar e logo, pélanse. Despois córtanse en rodelas de aproximadamente 1cm de espesor e colócanse de base nun prato ou fonte (o mellor sería facelo nun prato de madeira como é tradicional pero se non se ten, tamén vale un de cerámica) Córtase o polbo en pequenos anacos, sobre un dedo de espesor (é mellor facelo cunhas tesoiras)e ponse enriba das patacas. Finalmente, ciscáselle o pementón e, enriba, un bo chorro de aceite de oliva (mellor se é extravirxe) e engádeselle o sal. E... listo! Xa temos o noso polbo á feira. Lidia Rodríguez (4º ESO)
IES MENDIÑO
Cadernos gastronómicos 32
ARROZ CON COCOCHAS E AMEIXAS Ingredientes Allo, cebola, pemento vermello e verde, porro, tomate pera, AOVE, cocochas de pescada, ameixas babosas, unha “gindilla” (opcional) Ingredientes para o caldo. Porro, viño branco, cebola, pementos tomate, calquera marisco (caranguexos, cabezas de lagostino…), peixe (cabeza de sapo, cola de congro, etc)
Elaboración do caldo Poñemos aceite de oliva a quentar. Botamos a dourar un dente de allo partido en catro anacos, unha cebola tamén en catro anacos, un pemento, medio porro (a parte de arriba co verde) . Cando estea un pouco dourado botamos os caranguexos (ou o marisco que sexa) e o peixe cortado en anacos grandes. Regamos con albariño e deixamos que se evapore o alcol e que reduza un pouco. Despois botamos tomate partido en 4 anacos deixamos que se faga. Engadimos a auga (a que precisemos en función das persoas que coman). Deixamos ferver a lume lento semitapado. Retiramos cada certo tempo a escuma que se faga. Unha vez cocido todo (sobre media hora) retiramos, colamos e deixamos repousar. 2 Elaboración do arroz Poñemos a quentar o aceite. Namentres picamos ben o fino allo, a cebola, pemento verde e vermello e un ou dous tomates pera (mellor sen pel) Deixamos dourar a lume lento durante 20 ou 30 min. Cando estea todo “ben pochado” botamos arroz bomba e removemos. Despois incorporamos dous vasos e medio de caldo por cada vaso de arroz (algo máis se nos gusta caldoso). Engadimos sal En canto levante fervura contamos 18 minutos Cando falten 10 minutos para o final, incorporamos as cocochas e as ameixas. E deixamos que se faga. Unha vez pasados os 18 minutos tapamos e deixamos repousar 3 ou 4 min.
Manu Lourenzo (Departamento de Lingua Galega) IES MENDIÑO
Primavera 2019
A PANNA COTTA DE MANGO A panna cotta ou panacota é un doce típico de Italia. Unha sobremesa moi suave, sinxela e rápida de preparar. É ideal para facer no verán ou mesmo na primavera, pois é cando o mango comeza a chegar aos mercados. Ademais, resulta unha receita moi refrescante para os días calorosos. E inda por riba, ao ser tan fácil e rápida de preparar, pódete salvar de calquera imprevisto e quedarás como un auténtico chef. Ingredientes • láminas de xelatina • leite • nata • azucre • vainilla • mango • zume de lima • herba boa
Elaboración Primeiramente, hidratamos as láminas de xelatina. Para iso, métense nun bol con auga fría durante un par de minutos. Mentres, ponse a ferver o leite, a nata e o azucre nun cazo amplo. Pódeselle engadir un chisco de vainilla, para darlle un toque especial. Resérvase. Cando o leite comece a ferver, engádeselle a xelatina remollada e reméxese todo ben cunhas variñas para que se integren ben todos os ingredientes. IES MENDIÑO
Cadernos gastronómicos 32
Cómpre asegurarse, ao escoller o mango, que estea maduro. Canto máis amarelo estea, máis maduro e listo para comer. Pélase e pícase unha pequena parte en dados pequenos que servirán para montar o prato; o resto tritúrase cunha batedora, xunto co zume de lima e resérvase. Finalmente, móntase a panacota de mango. Nun vaso sérvese unha primeira capa do puré de mango e lima; logo bótaselle enriba outra capa da panacota duns dous centímetros de grosor e vólvese engadir outra de puré de mango. Termínase con outra de panacota e decórase con mango picado por enriba. Logo métese no frigorífico ata que todo quede firme. Á hora de servir, decórase cunha poliña de herba boa que lle vai dar un toque fresquiño. Clara Carrera (4º ESO)
Doce de primavera doce de leite eu só penso na receita para terte. Ainhoa García (4º ESO) Xardíns de pensamentos cabazas e amor preparando sopiña á luz do solpor. Ainhoa García (4º ESO)
IES MENDIÑO
Primavera 2019
BISCOITO DE CHOCOLATE
Ingredientes 1 iogurt (o vaso servirá de medida para o resto dos ingredientes) 1 medida de azucre 1 medida de fariña ½ medida de cacao en po ½ medida de aceite 2 ovos. 1 cullerada de levadura en po
Elaboración Poñemos nun cunco o iogurt, o aceite e o azucre. Batemos continuamente a mestura. Engadimos un ovo, seguimos batendo e agregamos o outro. Unha vez que estea todo ben mesturado, incorporamos a fariña, a levadura e o cacao. Traballamos a fondo a masa ata que quede todo ben ligado. Dispoñemos entón a mestura nun molde previamente untado con manteiga e introducímolo no forno durante 30 minutos. Desmoldamos e botámoslle por riba azucre glas, que se pode obter triturando azucre normal no batedor coa coitela picadora. Pode servirse acompañado con nata montada ou marmelada de laranxa.
IES MENDIÑO
Cadernos gastronómicos 32
COMO CALQUERA OUTRA TARDE
Arrecendía nada máis entrar pola porta. Arredor da mesa da cociña estaba a miña avoa, todos os meus tíos e os meus curmáns cando nós chegamos. Rapidamente nos fixeron un oco aos catro e nos ofreceron toda a variedade de postres que estiveran cociñando a tía Teresa e a avoa. O motivo daquela reunión familiar non ía máis alá de que era o 6 de abril e se cumprían tres anos da morte do meu avó, e sempre é un xeito de agarimo celebrar unha xuntanza na súa memoria.
O meu tío Antón dispúñase a contar unha anécdota que lle sucedera ao avó mentres ía un día cos fillos no seu barco pola ría de Vigo, así que eu collín un anaco de leite frito, que tan ben lle sae aínda a día de hoxe á miña querida avoa, con ese toque a canela. Durante horas estivemos charlando, rindo e recordando vivencias do pasado da familia, moitas das cales eu non coñecía; e ata sacamos albumes de fotos nas que saía o tío Carlos cun traxe de baño na cabeza! Había fotografías da voda dos avós, da comuñón de miña nai, das vacacións en Viveiro e de todas as carreiras que gañaron os meus tíos e a miña nai cando corrían. E é que o meu avó fora un home de ben, máis que querido por todos na vila de Redondela, e a súa perda supuxo unha gran tristura para todos os que trataran con José Amoedo. Pero basta de poñerse melancólicos. Aquela tarde todos o pasamos moi ben entre lembranzas e merendas. O leite frito rematouse en nada, igual que a bica de limón e as torradas. Claro está, o café para os maiores e o chocolate quente para os máis cativos acompañaba de marabilla naquela tarde de Semana Santa. Puiden poñerme ao día coa miña curmá Lucía, xa que había tres meses que non nos IES MENDIÑO
Primavera 2019
viamos. O que ten o bacharelato, que absorbe o tempo ata case quedares sen el! Creo que vou lembrar aquela tarde para sempre; foi máxica! Non sei se foi o día, o estarmos todos xuntos de novo, o ambiente tranquilo que se percibía ou o que... pero sentinme como cando era unha nena, unha cativa inocente rodeada de toda a súa familia. Acórdome de que, un chisco antes de despedirnos e marchar, sacamos a sorpresa para o curmán máis cativo: Brais, un ovo de Pascua de Toy Story, case máis grande ca el e cun xoguete desmontable no interior. Como rimos coa festa que fixo o pequeno!
Agora, case un ano despois, véñenme á cabeza recordos bonitos deste estilo, debe ser porque se acerca a data. A data de Pascua, quero dicir, que xa teño aviso da miña avoa para ir merendar leite frito este sábado. Claudia. Kaulback Amoedo (2ºBach)
IES MENDIÑO
Cadernos gastronómicos 32
BROWNIE DE CHOCOLATE Ingredientes • 100g. de chocolate • 100g. de manteiga • 5 ovos • 2 tazas de azucre • 3/4 de taza de fariña • 1 culleradiña de esencia de vainilla • 1 taza de noces picada
Elaboración Primeiro poñemos a quentar o forno a 180º e, mentres quenta, nun molde, poñemos un pouco de manteiga para que os ingredientes non se peguen. Despois temos que fundir o chocolate e a manteiga a baño de maría e, unha vez derretido, déixase arrefriar. Agora batemos cunha batedora es ovos, o azucre, a fariña e a vainilla, incorporando os ingredientes un a un e baténdoos todos ben. Unha vez que a mestura está lista, engadimos o chocolate e as noces previamente picadas. Botamos todo no molde e levámolo ao forno uns 30-35 minutos, aínda que é aconsellable comprobar o estado cun escarvadentes. Unha vez no seu punto, deixamos arrefriar un pouco antes de retiralo do molde. Cortamos en porcións e decoramos por enriba con máis anacos de noces e chocolate branco. Noa Casal (4º ESO) IES MENDIÑO
Primavera 2019
FILLOAS DE LEITE
Ingredientes • 500ml de leite • 3 ovos • 200g de fariña • 1 cullerada de azucre • 1 cullerada de anís doce (opcional) • Un petisco de sal • Manteiga ou margarina (sen sal) ou aceite
Elaboración Primeiro poñemos todos os ingredientes na xerra da batedora e mesturamos ben. Gardamos a masa no frigorífico durante uns 30 minutos. Unha vez que a masa repousou, imos preparar as filloas. Empregaremos unha tixola plana, mellor antiadherente. Untamos a base con manteiga, margarina ou aceite. Cando estea quente, vertemos unha cullerada de masa e movemos a tixola para que se estenda por toda a superficie. Cando os bordes comecen a dourarse e saíran as burbulliñas, cos dedos ou cunha espátula, damoslle a volta; deixamos que se faga polo outro lado e listas para comer. Pédense tomar as filloas con azucre e canela, con azucre glass, con mel, ou rechealas de crema de chocolate, de marmelada ou de xamón e queixo. Noa Cabaleiro (4º ESO)
IES MENDIÑO
Cadernos gastronómicos 32
GALLETAS ANZAC
Son unhas galletas moi populares en Australia e Nova Zelanda. Chámanse “Anzac” en conmemoración do día 25 de abril, día de Anzac, cando se celebra o aniversario da primeira grande acción militar das forzas australianas e de Nova Zelanda durante a Primeira Guerra Mundial. Dicíase que estas galletas eran enviadas polas mulleres dos soldados no estranxeiro porque os ingredientes non se estropeaban con facilidade e así as galletas aguantaban o longo transporte naval. Ingredientes (para 2 galletas) • 85g de copos de avea • 85g de coco desecado • 100g de fariña • 100g de azucre • 100g de manteiga sen sal • 1 culleradas grandes de melaza (mel de caña) • 1 culleradiña de café de bicarbonato sódico • 2 culleradiñas de auga fervendo.
Elaboración Quecer o forno a 180º Nunha cunca botar a avea, a fariña, o coco e o azucre. Nun cazo derreter a manteiga coa melaza (dando voltas cunha culler). Nas dúas culleradas de auga fervendo, disolver o bicarbonato e engadirlle á mestura de manteiga (fóra do lume e aos poucos). Facer un oco nos ingredientes secos e botar os ingredientes líquidos. Mesturar ben coa axuda cunha culler ata obter unha masa mol e uniforme. IES MENDIÑO
Primavera 2019
Estirar a masa ata acadar un grosor duns 0,2 cm entre dous papeis de forno e cortar círculos con axuda dun cortador (deixalos separados para que mentres estean no forno non se pequen uns a outros). Meter no forno uns 15 minutos ata que estean douradas. Pousalas nunha rella ata que se enfríen totalmente. OLLO: Fóra do forno seguen pasándose, polo tanto sacalas cando xa teñan caloriña; se as deixamos demasiado tempo queimaranse. O tempo necesario dependerá do grosor da galleta e cada forno. Angeles Vázquez (Departamento de Relixión)
Mais xa de Bras na cociña roxe o rixón na sartén, ferven a cachón os potes e cheira a aurego e prixel. Preparada no sobrado unha mesa de oito pes, con catro mantés cuberta porque non chega un manté, fumegan enriba dela tres barcales, todos tres de chourizos cugulados, lacón e vaca, a escoller. Panochas por onde queira de pan albeiro se ven, bicas de centeo e millo pra gusto de quen quixer; e nun curruncho, con netos alá por corenta e seis, toupa de chea unha cántara de purrela como a mel. M. Curros Enríquez IES MENDIÑO
Cadernos gastronómicos 32
GALLETAS BLANCO E NEGRO MAKTUB Ingredientes • 250g chocolate Nestlé Postres • 55g manteiga • 100g azucre • 210g fariña • 2 ovos • ½ culleriña vainilla en po • ½ culleriña de lévedo • 1 pouquiño de sal • azucre glas.
Elaboración Fundir o chocolate ao baño maría no microondas, engadir a manteiga; reservar. Bater os ovos e o azucre ata que dobren o seu volume e se poñan brancos; engadir a vainilla e verter o chocolate e a manteiga que tiñamos reservado. Xuntar pouco a pouco a fariña xunto co lévedo e o sal; unir á mestura anterior, sen traballar demasiado, só ata que se una. Deixar en repouso no frigorífico durante unha hora. Formar bólas pequenas (podemos facelo medindo a cantidade cunha culleriña para coller sempre a mesma cantidade), pasalas polo azucre glas ata que queden ben cubertas,; poñelas nunha fonte para o forno, arredadas entre si. Deixalas a 170º ata que se poñan brancas. Deben quedar crocantes por fóra e moles por dentro. Arrefriar encol dunha rella. Angeles Vázquez (Departamento de Relixión) IES MENDIÑO
Primavera 2019
PAN DE SODA
Ingredientes 400g de fariña triga integral 75g de fariña branca de repostería 25g de copos de avea 1 culleriña de sal 1 culleriña de aceite de oliva 3 culleriñas de mel 3 iogures naturais ½ vaso de auga 1 culleriña de bicarbonato (9g)
Elaboración Prendemos o forno a 230º. Nun cunco botamos as fariñas e os copos de avea. Remexemos e, a continuación, engadimos o bicarbonato, o sal, o aceite e o mel. Remexemos novamente. Batemos os iogures e engadímosllos ao anterior. Mesturamos ben todos os ingredientes e botámoslle a auga aos poucos. Debemos mesturar unicamente, non amasar. Debe quedarnos unha masa pegañenta. Botámola nun molde previamente untado con aceite e fariña. Por último, mollamos a masa por riba e botamos tamén uns copos de avea na parte superior. Enfornamos 20 minutos a 230º e logo outros 20 a 200º. Variante: pódese engadir á masa outro tipo de sementes (liñaza, sésamo,...) e queda moi bo. Cristina Castro (Departamento de Inglés) IES MENDIÑO
Cadernos gastronómicos 32
QUEIQUE
Ingredientes • 4 ovos • 1 sobre de lévedo en po • 1 iogurt natural • 1 limón relado • a medida de 4 vasos de iogurt de fariña • a medida de 3 vasos de iogurt de azucre • medida de 3 vasos de iogurt de aceite de fritir.
Elaboración Nun recipiente bótase o iogurt, a fariña, o limón, ó lévedo e o aceite. Mestúrase todo moi ben. Noutro recipiente bótase a azucre os ovos, bátense tamén moi ben. Mesturamos todo batendo o conxunto. Botamos toda esta masa nun molde engraxado e metémola nun forno quentando previamente durante 10 minutos a 180ª. Retiramos aos 25 minutos cando a masa estea cocida. Adrián Carrera Mnez.(4º ESO)
Margaridas e mapoulas preparando infusións coa flora autóctona que engrosa ilusións. Ainhoa García e Clara Fernández(4º ESO)
IES MENDIÑO
Primavera 2019
TORTA DE QUEIXO
Ingredientes • dúas tarrinas de queixo Philadelphia • 1 bote de 250 ml de nata • 6 culleradas de azucre • 1 sobre de xelatina Royal • 1 paquete de galletas • 300ml de auga • 150g de margarina
Preparación para a base da torta: Derretemos a manteiga. Coa picadora, trituramos as galletas e engadísmolle por enriba a manteiga derretida. Botamos a mestura de manteiga e galletas pola base dun molde. Apretamos contra o fondo coa axuda dunha culler. Introducímola na neveira mentres facemos a crema de queixo. Preparación da crema: Nun bol botamos as dúas tarrinas de crema de queixo. Engadimos a metade do bote de leite condensado e mesturamos coa batedora. Vertemos o contido dun sobre de xelatina neutra nun bol que estea seco. De 300 ml de auga fría, separamos unha taciña e engadímoslla á xelatina. Poñemos o resto da auga nun cazo ao lume ata que ferva. Retiramos e verquemos a auga no recipiente onde deixaramos a xelatina. Removemos ata a súa completa disolución. Mesturamos coa crema de queixo e o resto do leite condensado. Batemos lixeiramente toda a mestura para que quede homoxénea. Montamos a nata; batemos o azucre e a nata coas variñas ata que quede compacta. Mesturamos a nata montada coa mestura do queixo. Sacamos o recipiente coa base galleta da neveira e botamos a crema de queixo. Voltámolo introducir na neveira unhas tres ou catro horas. Nerea Cabaleiro (4º ESO) IES MENDIÑO
EQUIPO DE DINAMIZACIÓN LINGÜÍSTICA DEPARTAMENTO DE LINGUA E LITERATURA GALEGA BIBLIOTECA IES MENDIÑO