Sýn bauð 50% af kostnaðarmati

Vodafone sér áfram um fjarskiptaþjónustu Hafnarfjarðarbæjar

Hafnarfjarðarbær og Vodafone hafa undirritað nýjan samning til þriggja ára um síma­ og fjarskiptaþjónustu fyrir bæinn með heimild til framlengingar um að hámarki tvö ár. Vodafone hefur séð um síma­ og fjarskiptaþjónustu Hafnarfjarðarbæjar frá árinu 2006. Útboðsgögn voru send til fyrirtækja á fjarskiptamarkaði sem hafa rammasamning við Ríkiskaup og voru tilboð opnuð í júlí 2022. Tvö tilboð bárust, annars vegar frá Símanum og hins vegar frá Sýn hf. sem rekur Vodafone.

Kostnaðaráætlun hljóðaði upp á 2,6 milljónir króna. Tilboð Sýnar var um 1,3 milljónum króna undir kostnaðarmati eða 1.302.770 kr. og helgaðist hagstætt tilboð aðallega af breytingum á tækni og notkun og aukinni áherslu á sölu á gagnamagni umfram tengingar. Síma­ og fjarskiptaþjónusta Vodafone fyrir Hafnarfjarðarbæ tekur til allra vöruflokka, farsíma, fastlínu, gagnatenginga, gagnaflutnings og leigu á viðeigandi búnaði fyrir tengingar.

Þormóður hættir

Nýr skipulagsfulltrúi verður brátt ráðinn

Þormóður Sveinsson skipulagsfulltrúi hefur sagt starfi sínu sem skipulagsfulltrúi eftir 8 ára starf en hann hafði áður starfað sem arkitekt á skrifstofu skipulags­ og byggingarfulltrúa í Hafnarfirði og m.a. hjá Plús arkitektum frá 2005 og hjá byggingarfulltrúanum í Reykjavík.

Staða skipulagsfulltrúa, sem er yfirmaður skipulagsmála, hefur verið auglýst og var umsóknarfrestur til 9. febrúar sl.

Ekki hefur borist svar frá Hafnarfjarðarbæ um fjölda umsókna eða hver staðan er í ráðningaferlinu.