Luah-lâng，kui khóng-sik ê àm-mî，thinn-tshinn hi-bî，tshing-hong
khin-khó，jıt-sî ê sio-luah lóng hōo tshue kah pàng buē-kì。
A-tshing tsham-ka in ko-tiong ê iânn-tuī，tsiah-ē koh tàm hak-hāu khùn kuè-mê。Gōo-lâu tsáu-lông tshun kuí pha tiān-hué ū toh，i tsıt-ê-lâng
seh-lâi-seh-khì，bīn-sik tām-poh-á iu-iu，nā-ū siánn-mih tāi-tsì that tī
sim-kuann-thâu ê khuánn。Lû-tsháng-tsháng ê tshiū-iánn sio-phuānn，i
seh kàu līng-guā tsıt-pâi kàu-sik，tsáu-lông-bué hia khiā tsıt-ê lâng-iánn
bīn-sık-bīn-sık。
「It-hiân sian-pái！」
「Ooh！á-buē khùn--ooh？」
It-hiân bûn-bûn-á tshiò kā ìn，i sī sann-nî tann pit-giap ê hak-tiúnn
in tsiah ê sian-pái pit-giap liáu-āu，lóng koh ē tńg-lâi kā iânn-tuī
tàu-sann-kāng i lâng lò，bīn-iông iù-siù piau-tì。
「Liam-mi beh khùn--ah，siūnn-kóng tshuaih kiânn-kiânn--leh」
Tsıt-ê khuànn-tioh sian-pái，A-tshing ê sim suî
phıh-phok-phıh-phok-thiàu，tsit-khuán tsìng-thâu m-sī thâu-tsıt-pái，mā
m-tsai sī uì tang-sî khai-sí--ê
Tsûn-nî，kâng hit-khuán ut-luah ê ē-poo，peh-gueh ê jıt-thâu kā
siā-thuân-phok-lám-huē hiânn kah tsiânn lāu-jiat，tann lıp-hak ê A-tshing
tuè tông-oh lâi seh-khuànn ū siánn-mih siā-thuân thang hó-sńg--ê。
「Huan-gîng lâi liû-im-siā！」
「Pan-liân-huē！Pan-liân-huē！Tshuā lí tsiūnn-suann-loh-hái bē hiō-hué ！ 」
「Hak-tī！Beh-lâi tā-thuân-siā bô？Hioh-kuânn ē-tàng tâng-tsê khì
tâi-pak tshit-thô--ooh！」
「Kuánn-kín lâi tông-kun-siā！」
Huān-sè sī siunn tshá，A-tshing thâu-khak gông-gông nā tioh-sua，
siūnn-beh tńg-khì kàu-sik hioh tsıt-ē，m-koh i ê tông-oh tsá tiō sńg kah
m-tsai-lâng khì--ah。
I tsıt-ê-lâng kiânn，suah in-uī m-bat-lōo seh-lîng-long seh-kui-poo，
ka-tsài ū tú-tioh sian-pái lâi kā tshuā-lōo。
「Lí tó tsıt pan？」
「 tsap-it-pan。」
Sin-thé bô-sóng-khuài sóo-tì，A-tshing kui-lōo bô-khì tsù-ì sian-pái sī
senn-tsò înn--ê ah-sī pínn--ê，kan-na tsai-iánn i phāinn tī kha-tsiah-āu ê
miâ-pâi sóo-siá ê miâ：It-hiân。
「Kàu-ui--ah，lí ū iàu-kín--bô？Bīn-sik tsiânn bái--neh！Ah-sī beh-khì
pó-kiān-sik？」
「Bô-iàu-kín......guá sió-hioh tsıt-ê tiō hó，to-siā sian-pái。」
Bué-á tsiah tsai-iánn，guân-lâi i sī jī-nî ê sian-pái，mā-sī A-tshing in
thian-bûn-siā ê kàn-pōo。
「Thài-iông-hē ê hîng-tshinn tiō kan-na thinn-ông-tshinn siōng tik-piat，
in-uī i bē-giàn kah pat-lâng sio-siâng，i si the--leh ná tshia-lián án-ne
tsū-tsuán，sóo-í ū-ê sǹg-tshinn-ūn--ê tiō-ē kóng i sī tshòng-sin、kik-bīng
ê tshinn 」
Khùn-tàu ê khì-bī iá-buē suànn，m-tsai sī thang-á-guā sio-hong-hong ê
nâ-kiû-siann thàu pi-á-siann khí-khí-loh-loh，ah-sī It-hiân sian-pái leh kóng-khò kha tshù-bī ê khuánn，
A-tshing pí pîng-siông-sî koh kha tsing-sîn，tsing-sîn kah hâm pinn-á
si-si-sut-sut ê siann lóng thiann kah tsiânn bîng。
「Thiann-kóng iū koh-ū hak-muē hiòng It-hiân sian-pái piáu-peh--ah neh
「Kám-ū-iánn？」
「Gún pîng-iú kóng--ê，i kóng tī āu-piah uî-tshiûnn hia khuànn-tioh--ê」
「Guá thiann lâng kóng tsoh-jıt mā-ū tsıt-ê jī-nî ê tsa-poo hiòng i……」
Hong-siann sì-kè pue，suah lóng bô puànn-ê iánn，A-tshing tuì
tsit-tsióng îng-á-uē bô-siánn ū hìng-tshù，lıp-siā liáu-āu，i kan-na
kuan-sim thian-bûn kah liap-iánn，tak-put-sî tō lâi-kàu siā-pān tshíng-kàu
It-hiân，hā-khò liáu-āu mā-ē tuè i lâu tàm hak-hāu liān-sıp tshau-tsok
khì-tsâi。 -
「Tsún-pī lâi tsáu--ah！Kha-kín--ê，bô，lín bué-pan-tshia ē kuánn bē-hù
Tē-jī hak-kî ê uah-tāng muá-muá-muá，lâu-hāu ê sî-kan bē-su liû-tshinn
，A-tshing thiann-tioh sian-pái ê huan-hù kuánn-kín kā mıh-kiānn siu hōo
hó-sè，tuè tak-ke lâi-kàu kàu-sik guā，It-hiân sian-pái ah-āu kuainn-hué，
gán-tsîng ná hiông-hiông hōo oo-pòo tah khí-lâi hit-khuán。
「A ！」
「Ná-ē tsiah oo--ah！」A-ûn sian-pái kah it-nî ê A-sim nng-lâng huah kah
tuā-sè-siann，hāi tak-ke tshuah tsıt leh。
「Huān-sè sī kìng-uī iū koh bē-kì-tsit，kā tsáu-lông-hué tsóng
kuainn-tiàu--ah…… 」It-hiân kā tshiú-ki-á ê tshiú-tiān tiám-toh，kā
thôo-kha tshio hōo kng。
「Tshù-bī–ooh……thiann-kóng àm-sî-á ê hak-hāu tsiânn nāu-jiat。」
「Guá bat thiann sian-pái，thé-iok-tsoo hia ê piān-sóo 」
「Mài-koh kóng--ah-lah！hia tán--leh lán ē king-kuè！」
Kah A-tshing kâng-pan ê Tshuan-á hām līng-guā tsıt-ê hak-tiúnn khiā
pinn-á leh kā in heh-kiann，A-ûn kah It-hiân kâng-pan ，nng-lâng bē-su
uānn-thiap--ê，pîng-siông-sî khuànn khí-lâi tsiânn khiàng，siūnn-bē-kàu
sī tsiah-ní bô-tánn，i kā A-sim ê tshiú liah ân-ân，tshiú-ki-á ê tiān-hué ná tshio ná tshuah。
「Tán--leh tak-ke sing mài kiò pún-miâ，nng-ê nng-ê sio khan kiânn
tsò-hué，mā mài khì pué pat-lâng ê king-kah-thâu……」It-hiân kóng。
「Lí kiò-sī kóng tsit-má sī leh sńg iânn-tuī ê iā-sik uah-tāng--nih！」
「Bô，lí sī hi-bāng tán--leh lâng lú kiânn lú tsē--nih-ah？hannh？
Khóo-ûn……」
「Hó hó hó hó hó！Kín-lâi-kiânn！Kín-lâi-kiânn！」
Pún-té m-kiann kuí ê A-tshing hōo in bú tsıt-ê mā khai-sí khí ke-bó-phuê
，khuànn tak-ke leh tap-tshuì-kóo，khì-hun ū ke khah khin-sang，tān-sī
uat-thâu khuànn-tioh It-hiân giâm-siok ê piáu-tsîng，hāi i iū koh
sió-khuá-á kiann-kiann。
「Lín nng-ê tsa-bóo tuè Tshua tuè in nng-ê，hōo-in tshuā-thâu，gún
nng-lâng ah-bué。」
Kóng-suah，It-hiân kiânn lâi-kàu A-tshing sin-pinn，khan i ê tshiú。
Iā-sik ná tshun-bū kā in pau kah bâ-bâ，líng-hong liô ki leh khoo-si-á，
bô-lâng kánn kóng-uē，A-tshing mā m-kánn sì-kè oo-peh-khuànn，
kha-pōo tuè tshiú-tiān-kng，Sian-pái ê tshiú-un uì tshiú-té thuân lâi-kàu i
phok-phok-tshíng ê sim，kín-tiunn ê khì-hun ak tī he sio-sio ê kám-kak，
hōo sim-hue ê ínn àm-tsīng leh huat
Tôo-su-kuán siōng iap-thiap ê thang-á-pinn，A-tshing koo tsıt-ê-lâng tsē
tī hia tsún-pī kî-bué-khó，ing-ia tī khong-tiong siám-sih，tsheh suî hong
hian，A-tshing ná hiông-hiông siūnn-tioh siánn-mih ê khuánn，thâu giah
khài khuànn，thang-á-guā sann-nî ê sian-pái uī-tioh bîn-á-tsài ê tāi-hak
khó-tshì，phāinn tsheh-pau thê-tsá lî-khui hak-hāu。
Siūnn-tioh thâu-tsıt-pái tī kâng tsit-uī tú-tioh It-hiân，nng-lâng tsò-hué，kā
kái bē-tshut ê sǹg-sit，tsıt-tê koh tsıt-tê，bué-á kái tsoh tsıt-tsióng kuàn-sì
。Tsıt-kang kuè-liáu tsıt-kang，i sing tsoh thian-bûn-siā ê kàn-pōo mā beh
puànn-tang--ah，pinn-á-uī suah khang-khang，ta-hioh ûn-ûn-á lî-ki，lak tī
sim-té kui-tui ê hi-bî......
「Sian-pái！Pit-giap khuài-lok！」
「To-siā。」
Tshenn-hioh suî hong iô，jıt-hue-á iā kui kha-pinn，A-tshing beh kā i ê
miâ tshiam tī It-hiân ê tsè-hok tíng-bīn，m-koh It-hiân lâng-iân siunn hó
khì--ah，kui niá peh-sik ê tsè-hok í-king hőng tshiam kah muá-muá-sī，
tshuē bô puànn-uī hó。
It-hiân kā i sann-á-tē tíng hit luí ké-âng-hue pak khài，giap uì A-tshing ê
sann-á-tē。
「Mê-nî tiō uānn lí--ah。」
「Bô-ài--lah tsin m-kam--neh 」
Nng-lâng khiā sio uá，A-tshing m-kánn giah-thâu kā khuànn，tsıt-uē
tsıt-pit，thâu-lê-lê kā i ê miâ khik hōo hó-sè，khik-tī âng-hue niū tshut-lâi ê uī。
「Án-ne guá mê-nî bô-huat-tōo thè lí tshiam-miâ。」It-hiân ná leh sai-nai ê
khuánn。
「Bô……tiō tsit-má tshiam-tshiam--leh！」
「Sam-pat，lí koh ài tshīng lâi siōng-khò--eh！」
「Hó--lah！guá ē tsuan-kang lâu kâng-khuánn tsit-uī hōo--lí，tán-lí
hioh-ká tńg-lâi tshiam。」
「Hó，lán í-king sio-iok--ah-ooh。」
Nng-lâng tsíng-thâu-á sio-kau tsoh iok-sok，siáu-liân ê bīn，ní tioh
hōng-hông-hue ê âng……
Ka-tsài puànn-mî-á bīn âng sī khuànn bē-tshing，A-tshing kiânn kàu
It-hiân pinn-á ，khuànn i giah siòng-ki hip kah tsiânn lok-thiòng，kóng
kin-á-jıt gueh-niû tsiânn kng，sóo-í i tsiah ē tàm leh tsia hip。
「Án-ne kám hip ū mih？」
「Beh tshì khuànn-māi bô？」
Kóng suah，A-tshing suî tsiap kuè siòng-ki，tuè It-hiân khí-lıp kàu
lâu-bué-tíng。
「Ooh！tsiah ū-kàu lòng-khuah--ê！」
「M-bat lâi-kuè--hoonh？guá nā sim-tsîng bô hó lóng-ē thau-thau-á peh
khí--lâi tsiah。」
Bô-pinn ê thinn ē-tàng tshàng tsē-tsē pì-bıt，nng-lâng ná kiânn ná hip，
hip-tioh kuí-liap thinn-tshinn hīnn-gú，seh liáu kuí liàn，A-tshing suah
thòo tsıt-ê tuā-khuì。
「Guá koh án-nuá hip mā-sī hip su--lâng......」
Gueh-kng poh-poh tshu tsoh té，nng lâng the piah tsē，guân-lâi A-tshing
sī khuànn-tioh in liap-iánn-tsoo kâng-kài ê A-nâ sóo hip ê siòng-phìnn，
hip liáu ū-iánn lī-hāi，ka-tī sıt-tsāi sī bô-huat-tōo pí-pīng，kám-kak
sim-siann ak-tsak kah liâm-liâm tsoh tsıt hué，m-tsai beh án-nuá kóng
tshut tshuì。
「Thâu-tú-tsiah guá tiō leh siūnn，kám-sī guá tsin-tsiànn bô hit-ê
thian-hūn，tān-sī......」
「Nā in-uī án-ne tiō kā hòng-khì sī tsin m-kam-guān，tioh--bô？」
A-tshing bô-ìn puàn-kù-uē。
「Tse tāi-piáu lí tuì liap-iánn tsin tuì-tiōng，sī tsin-sim kah-ì。」
A-tshing tshiú-thâu ê siòng-ki hōo sian-pái tsiap tó tńg-khì，thiann-tioh
sian-pái leh kā o-ló，kóng ū kuí-nā tiunn khak-sıt sī hip liáu bē-bái，i
suah siūnn kóng sian-pái sī beh kā an-uì tsiah án-ne kóng--ê。
「Bô–ah，tshiūnn tsit-tiunn tiō bô kài hó。」
「Uī-siánn-mıh？」
「Pòo-kiok bô tiōng-tiám。」
「Lí ū-kàu giâm-keh！」
A-tshing khí gín-á-sìng leh tiunn，It-hiân bô-huat i，kè-siok khuànn
siòng-phìnn leh kóng。
「Kî-sıt A-nâ i tsap-huè tiō khai-sí leh sńg hip-siòng-ki--ah，tse tíng kái
tsiah-png i ka-tī kóng--ê，tsū sè-hàn kàu tann，lí sóo khuànn tioh ê sī i
liap-tsik tshit-tang ê kang-hu。Lí tsiah tann khai-sí niâ，beh kā jiok kuè
pún-té tiō kha khùn-lân…… 」
It-hiân tshun-tshiú khing-khing-á so A-tshing ê thâu-khak，koh kè-siok
kóng。
「Tān-sī，nā koh kian-tshî gōo、lak-tang kuè，lí tiō ē tsìn-pōo kah kah i
kâng-khuán，huān-sè ē koh pí i koh kha lī-hāi。lí tsuat-tuì ū tsâi-tiāu，ài siong-sìn lí ka-tī，tsai--bô？」
A-tshing tìm-thâu kā ìn，bak-sái kâm bak-kînn。
Sian-pái tsıt-kù-uē bē-su un-tsuânn-tsuí，kā that tī A-tshing
sim-kuann-thâu ê kat lóng tshiâng suànn-liáu-liáu，i siang-tshiú mooh
kha-thâu-hu kā puàn-ê-bīn am khài，kiann sim-té hit-ê pì-bıt ē hōo
sian-pái khuànn-hiān-hiān
A-tshing thiann It-hiân beh kà i tsıt-pōo，i khì guā-kháu siōng-khò
oh-tioh--ê。
「Hit-ê sian-sinn kóng liap-iánn siōng tiōng-iàu--ê，m-sī kan-na iōng
bak-tsiu khuànn，koh ài iōng hīnn-á khì thiann。」
「Thiann？」
「Tioh，sè-kan bān-but lóng ū sim-siann。」
I tuè sian-pái bak-tsiu kheh-kheh，kā tshuán-khuì pàng hōo khin，nâ-tiân
khe-huānn，tsháu-á leh ha-hì，sì-khoo-lián-tńg lóng-sī bîn-bāng ê
tiām-tsing。
Kuè tsıt-khùn-á，It-hiân thau-thau-á kā bak-tsiu thí hōo khui，khuànn
A-tshing iá-bē tshénn，m-kánn tín-tāng。
Leh bîn-bāng--ê huān-sè sī i，It-hiân siūnn bô，tú-tsiah i tshiú ná-sī khì
hōo siánn-mih suànn giú tioh ê khuánn，ná-ē bô-tiunn-bô-tî khì so
A-tshing ê thâu-khak。
Thâu-mng iù-iù ê kám-kak iá-koh lâu tī tshiú-té，i ê sim ná hőng iô-kuè ê
khitsui，iûnn tī iā-sik ê po-lê au-á。
Siūnn-tioh A-tshing hit luí pún-té bô-tsu-bô-bī ná ping-kak ê gán-sîn lāi，
bē-su thinn-lông-tshinn ê tshinn-kng iū-koh toh-leh siám-sih，i bat
khuànn-kuè，kah hit-sî kâng-khuán……
Tsap-gueh tann khai-sí âng ê nńg-poo，siā-thuân ngiâ-sin tshuā siā-uân
lâi hái-pinn-á tshit-thô，peh-sua ê kha-liah muá-muá-sī，hái-íng pinn-á
tàu lāu-jiat，thâu-tsıt-pái tsoh liap-iánn-tsoo ê It-hiân siòng-ki giah-leh，kā
tak-ke ê tshiò-iông thàu nâ-kok ê sio-loh siu tsoh tsıt-bak-nih。
「Ná-ē tsıt-ê-lâng tsē tī tsia？」Khuànn A-tshing ná leh siòng siánn-mih
siòng kah gōng-sîn khì--ah，It-hiân suî tsē i pinn-á tsò-hué siàn-hong。
「In-uī thinn-sik tsiânn suí。」
「Lí kám tsai-iánn kok-guā kā jıt-thâu beh loh-suann ê tsit-tuānn sî-kan
hō tsoh Magic Hour？」
A-tshing iô-thâu。
「Beh-īng siòng-ki kì-lok khuànn-māi--bô？
「Kám-ē-sái？」
Tiō-sī tī A-tshing khin-khin-á kā siat-tah tshıh lueh liáu，hit-ê bô-tsí-sî ê
sùn-kan，hit-ê gán-sîn，It-hiân tshuē-tioh i guān-ì tsai kui-sì-lâng khì
tui-kiû ê hit liap tshinn ná hin thian-bûn ê kho-hak-ka
hit-khuán A-tshing khai-sí tuì hip-siòng ū hìng-tshù，ū-uē thang kóng
，nng-lâng mā lú-kiânn-lú-uá，sóo-í hit-àm tsiah-ū ki-huē，thang
khan-tioh A-tshing sió-khuá-á tshoo-phuê ê tshiú -
Keh-tńg-nî，jī-nî ê pan-kip nâ-kiû kuan-kun-sài，A-tshing in pan su bô
kuí-hun，i kian-tshî piànn-kàu tsuè-āu tsıt liap sann-hun-kiû tâu-lıp，i
thiàu uì khong-tiong ê hîng-iánn，tuì It-hiân lâi-kóng，sī pí gōo-gueh ê
jıt-thâu koh kha tshiah-iānn，ná-tsún siunn kuè uá-kīn，huān-sè sıt-kóo ē
kui-tsoo iûnn-khì，puah loh loh--lâi。Khiā pinn-á iōng kiànn-thâu kā kì-lok
，ka-tī tshàng tī sim-lāi tsai-tsai tiō hó。
「Án-ne tiō hó。」 -
Bô-tiānn-tioh iōng tshian-lí-kiànn tiō-ū huat-tōo khuànn--tioh ，A-tshing tī
i tsè-hok tshiam-miâ ê sî，kám-sī kâng hit-khuán ê gán-sîn？
Siang-tshiú tshah tī khòo-tē-á，hōng-hông-hue ê phang-bī，m-kam ê
sim-tsîng kik tsoh sai-pak-hōo ê sng-hûn，i siūnn-beh tsai-iánn，tān-sī i
íng-uán m-tsai-iánn，tiō tshin-tshiūnn A-tshing m-tsai
siā-thuân-phok-lám-huē hit-kang，
tshénn-khài khuànn-tioh toh-tíng hit
kuàn ka-iâm-ping-sah-suh ，sī It-hiân tsuan-kang beh bé hōo i--ê...... －－
It-hiân ná hōo siánn-mih giú tò tńg-lâi hit-khuán，tsiah huat-hiān sī
A-tshing khùn-khí--ah，thâu khuè tī i king-thâu tíng，sè-lī ê tshuán-khuì，
bô-hông-pī ê bīn-iông，hōo i thiann-tioh ka-tī hit-ê lú-lâi-lú-bîng ê sim-ì。
Kā sî-kan tiām-tiām-á pàng-buē-kì，gueh-niû iá-koh tī hia，guân-lâi，hōo
gueh-kng phak kú mā-sī ē sio-luah。