Momenti di speranza

Ciao nona Rina!

Cara Nona, t’as fenì de tribolé. Sarà chero passé per Digonera e no te vedei plu rodé da dute le pert, picola e sclëta, ma co nen nierf da fè nvidia. Sarà chero rué sot cesa e no vedei plu sun viere doi gragn oglei che ciala ju e delongo davò sentì dut che cor ju per sciala per vignì a ne giourì la porta. Sarà chero co se n jon no te vedei plu sun pont a ne saludé co la mán fin cánche se outa davovia.

T’es stada na Nona formidabile: da co mi e mia sorela son nascius, no t’as fat auter che pensé a nos. Duc i libri de miei studi te me i as finanziei ti, te m’as scinché l clarin, te n’as tres daidé. “Olà esto ades? Esto content? Bon bon”, e col rosare nte ‘scarsela’ te dijeve “pree po ogni di che la ve vède begn”.

Ades pò se n crësce n pesc ence duc i fonc del bosch da Digonera, che mefo ti te sas ulache l é le meio tace.

T’es stada furba fin al ultimo: t’as dezedù de te n jì mpruma che tache l peso inviern, con “dut chel fret e dut chel trafico ju nte stradon”.

T’as lascé sol l Nono Bepo, che con suoi 95 agn “de pura saggezza” l m’à dit “Ci vosto, come che i diseva na ota, la tiera la stropa po begn via dut”.

L plu gran diotelpaie l va a

N ricordo de Paula Maiera

mia mere e al Zio Sandro che i t’à rencuré fin al ultimo e t’as podù te ndormenzé nte tuo let de cesa. Ades te pos te n sté n pesc lassù, pro n gran bánch da fornel dagnára ciaut senza mossei continué a tizé, a te la conté con tue sorele e tuo fradel.

Paussa n pesc Nona, e preia ncora per nos da colassù.

Tuo neou