Peter Landshuter
I bin ja kanner wou … I bin ja kanner wou … Obber wenni in der Fußgängerzone an an Wahlblakaad verbei laaf, wou mi anner su ohgrinsd, dassin am läibsdn anna neihaua meecherd, und i zufälli a Blassdigg-Diedn mid a boor digge Eddings, oder a a Farb-Schbridds-Bisdohln däbei hädd, dann kennerds vielleichd scho sa, dassi … I bin ja kanner wou … Obber wenni in an grässern Sohl drinhogg und vonna aff der Bühna anner schdedd und a Reed häld und blous a Gschmarri und a Gwaaf derzilld, dassmer äs Messer in der Huusndaschn aufgäih kennerd, und i zufälli in su ann Babier-Schärmiddsl a boor faule Domaadn odder a a schdingerds Gaggella däbei hädd, dann kennerds vielleichd scho sa, dassi … I bin ja kanner wou … Obber wenni vuur unserm Familien-Kombjuuder hogg und a weng wos schreib und des a weng wou hie schbeichern mecherd und iech an neia Ordner odder a neia Dadei ohliehng wollerd und dann immer blous sinngemäs kummd, dass des eds grood ned gäihd und i sollerd hold wos anderschds dou, wos obber a ned gäihd und underm Sofa odder a neeber mir zufälli a Vuur schloochhammer schdennerd odder di Balkondier odder äs Fensder grood offn wär, dann kennerds vielleichd scho saa, dassi …
161