SISKÁLDÂS 28

TOIMÂTTEIJEE: fabrizio brecciaroli fabrizio.brecciaroli@gmail.com

+358 41 713 2612

KUÁSTIDEIJEE: www.anaraskielaservi.fi

MÁCCUM: susanna kaartinen susanna.kaartinen@gmail.com

Čäällimkulttuur nanosmitmist lii šoddâm stuorrâ já tehálâš uási Anarâškielâ seervi tooimâst, já onnáá peeivi anarâškielâ várás lii huksejuumin noonâ luuhâm- já čäällimkulttuur. Fáállun láá jo motomeh čäällimareenah: Anarâš-lostâ, Loostâš, Wikipedia já tääl meiddei Anarâš aavis. Ađai jis tun halijdah čäälliđ maidnii, te tuu čallui kávnoo vissásávt-uv hiäivulâš almostittemsaje.

Taan Lostiist Iida čielgee, maggaar lii toimâtteijee argâ já maht puáhtá šoddâđ toimâtteijen. Jis tun lijkkuuh-uv čälimân, tust láá ain uđđâ jurduuh já tun lah kiddiistum tast, mii maailmist já jieijâd pirrâsist tábáhtuvá, te tun lah jo toimâtteijee já tun kolgâččih ruokkâdávt čäliškyettiđ. Čäällimfáádá já tekstâtiijpâ tun puávtáh jieš valjiđ. Tun puávtáh čäälliđ ovdâmerkkân uđđâs aavisân, äššiteevstâ Wikipedian teikâ nooveel uđđâ nooveelantologian, mii almostuvá anarâškielân ive loopâst.

Jis tust láá pyereh sosiaalliih tááiđuh já tun lijkkuuh sárnumân, te tun puávtáh sahhiittâllâđ ulmuid tegu Tomi lii porgâm taan Lostii várás. Sun lii sahhiittâllâm nuorâ nissoonkuáhtá, kiäh tutkâv sämikielâid Debrecen ollâopâttuvâst. Bettina já Ivett lává pargoost suomâ-ugrâlii lájádâsâst, kost lii lamaš máhđulâš luuhâđ já tutkâđ tavesämikielâ 1990-lovo rääjist. Sunnuu mielâst lii tehálâš tutkâđ sämikielâid já išediđ toi iäláskitmist.

Toimâtteijee puáhtá čäälliđ meiddei jieškote-uvlágánijd reportaasijd – ovdâmerkkân mottoom luámumääđhist. Taan Lostiist mun muštâlâm jieččân peivimohheest Perugiast, mii lii suulân 160 000 ässee kaavpug Umbria kuávlust Italia koskâuásist, já Tuuli muštâl luámumäđhistis Kreetast, kost sun eelij moonnâm ive. Ij kuittâggin taarbâš vyelgiđ Euroop nubebel, vâi pesâččij čäälliđ reportaas. Tom puáhtá aaibâs pyereest čäälliđ meiddei mottoom mohheest Suomâst teikâ joba Säämist. Ovdâmerkkân taan Lostii loopâst Sonja čáálá nisonij miäcástemmohheest, mon sun taha jyehi ive skipárijnis, já Jasmina muštâl mijjân tast, maht kiđđâ lâi ovdánmin Jyväskylä kuávlust cuáŋuimáánu loopâst já magareh loddetoornah tobbeen láá.

Čäällim lii hitruu, já mielâkiddiivááh fáádáh láá aaibâs jyehi saajeest. Toppii toimâtteijee kappeer, piejâ tom uáivásâd já keččâl čäälliđ maidnii. Kii tiätá… tast sáttá joba šoddâđ tuu uđđâ astoäigitoimâ!