Schüelerschirene

Mis erscht Schüelerschirene ha n i i de Halde hene miterlebt. Di grössere Schüeler hönd zoberscht im Högg obe möse starte, ond s Ziel ischt i de Stross one i de Halde hene gse. Wiä sönd mer doch stolz gse, wo mer s erscht Mol im Lebe e richtigi Startnummere hönd töre aalegge wiä di richtige Schiirennfahrer.

D Erscht- ond d Zweitklässler hönd Massestart gha, da hässt, ali sönd anere Räie gstande ond denn of Kommando mitenand gstartet. Da Rene vo de Chlinschte ischt mee en Langlauf gse, s Gländ ischt mee oder weniger ebe gse, söss wäret sowiso ali öbernand iä gstrolet. Zom Täl het s no Stigige dine gha, wo mer het möse uetrepple. Da Rene isch mer dromm elend lang vorcho, aber i ha denn knapp gwone. Mer het jo chöne gsiä, wer zerscht im Ziil gse ischt.

Da Schiirene ischt amel e ghörigs Alössli gse ond s halb Dorf ischt i d Halde hendere go luege, wiä eeri Sprössling abegfaare sönd. Do het s natürli au Träne ond Enttüschige gee. A enn Bueb magi mi bsine, der ischt ase verrockt gse, will sini Schii gär nüd glaufe sönd. Er het im Ziil one gfluechet wiä en Rohrspatz ond diä Schii omenand gworfe. För da Schiirene het mer alles gee, ond jede het gment, er heg de besser Wachs drof. Au böglet het mer diä Schii, ond d Schrübli vo de Kante möse aazüche, das s nüd bremset het.

Am Schluss vom Rene, wo ali Resultat bekannt gse sönd, isch denn s Rangverlese im Harmoniesaal gse. Jede het e paar Wienerli öbercho ond Tee, ond denn sönd ali de Räie nor abeglese worde. Jede het en Priis öbercho, dr Erscht het zerscht töre an Gobetisch go

Schwester Greth zuvorderst, sie wurde Erste am Schülerskirennen.

en Priis uslese, de Letscht het halt no da möse nee, wo öbrigblebe ischt. Seb ischt aber meischtens nüd s Lätzescht gse. Als Priis het s nüd ase vill Choschtligs gha, öppe en Bleistiftspitzer, Tokowachs, Tiki, Föferböle oder söss näbes Gfätterlizüg. Aber mer hönd üs doch ab jedem Zockerbole gfreut, ond di Erschte hönd meischtens de gröscht Ramsch usglese. Of de Priis ond de Rang ischt mer amel scho stolz gse. Spöter sönd denn diä Schirene am Schilift Löschwendi döregfüert worde. Do het s ke Massestart me gee, ond es het weniger Zueschauer gha. Nor ond nor hönd au nüme gär ali mitgmacht, ond will s all weniger Schnee get, kennt mer diä Schirene no no vo früener.