UNGT FÓLK Í PÓLITÍK

Ungt fólk á erindi í stjórnmálum, og tækifærin eru mörg á sveitarstjórnarstiginu fyrir ungt og efnilegt fólk til að stíga sín fyrstu skref. Það gerir þeim kleift að hafa raunveruleg áhrif á sitt nærumhverfi og öðlast þekkingu og reynslu. Framsókn hefur lengi veitt ungu fólki tækifæri til að láta rödd sína heyrast og blómstra í stjórnmálum. Þetta hefur flokkurinn fengið lof fyrir ásamt því að hafa verið honum til góðs. Það er mikilvægt að taka ekki skref aftur á bak í þeim efnum

Framsókn bauð fram í 26 sveitarfélögum um allt land en þar mátti finna ungt framsóknarfólk á listum í þeim sveitarfélögum ásamt þeim sveitarfélögum þar sem engan B lista var að finna. Augljóst er að staða ungs fólks innan Framsóknar er sterk og að Framsókn treystir ungu fólki til áhrifa.

Ungt fólk vill sæti við borðið

Ungmenni þurfa tækifæri til að taka þátt í pólitískri umræðu. Áhugi ungs fólks á að láta sig málin varða er mikill og hefur framboð á ungu fólki aukist til muna á undanförnum árum með fjölgun áskorana sem varða framtíð þeirra. Áberandi baráttumál eru jafnrétti samfélagshópa og loftslagsmálin. Ungt fólk krefst þess að fá sæti við borðið svo það geti haft raunveruleg áhrif á ákvarðanatöku um málefni sem varða framtíð þeirra og komandi kynslóða.

Ungt fólk er traustsins vert

Unga fólkið býr hér og mun erfa landið. Því er aðkallandi að þessi hópur hafi sterka rödd til þess að berjast fyrir hagsmunamálum nútímans og framtíðarinnar. Viðhorfsbreyting þarf að verða í samfélaginu þar sem hætt er að líta á ungt fólk sem annars flokks samfélagsþegna sem hafi hvorki þá reynslu né þekkingu til að hafa áhrif.

Samfélagið þarf að opna augun og sjá þann hag sem er fólginn í að hleypa yngra fólki að

Ungt fólk sem er virkt í pólitík er talið vera besta hvatningin fyrir jafnaldra þeirra til að taka þátt. Pólitísk þátttaka getur verið af hvaða tagi sem er og hefur lengi verið talin mjög þroskandi fyrir ungmenni ásamt því að nýtast þeim vel seinna meir. Samband ungra Framsóknarmanna (SUF) gegnir mikilvægu hlutverki í starfi Framsóknar. Okkar samfélag býr yfir mörgu ungu og frambærilegu fólki sem hefur skýra framtíðarsýn og sterkar skoðanir. Við verðum að veita þeim vettvang og traust til þess að koma sínum áherslum á framfæri