Ngā Mate o te Wā Tēnei te whakairi i ngā parekawakawa o ngā mate mai i te tī, te tā o te motu, otirā i te ao, kia mihi tahitia, kia tangihia e tātou ngā waihotanga o rātou mā. Tē taea te kaikinikini, te hotuhotu, te pātukiuki o te whatumanawa te whakarērea mō rātou kua haere atu rā ki tikitiki o Rangi. Ko wai i māturuturu ai i ngā kamo, kia apatari ai, kia kawe ai koutou i tō koutou haerenga, ki Hawaiki nui, ki Hawaiki roa, ki Hawaiki pāmamao, ki te iwi nui i te pō e whanga nei i a koutou. Āwhiowhio mai te hau mate ki ngā tōpito o te motu, otirā o te ao. Tūkauati a Hau Mate ki ngā uri o Hine Pūkohurangi, ngā tamariki o te kohu, ā, kapohia a Akakura Williams rātou ko Rameka Teepa ko Henare Heremea. Mahue ai te aroha me te mamae e ngau kino nei i ō rātou whānau. Moi mai rā koutou. Toro atu tēnei hau ki te tōtara haemata o te Tai Rāwhiti, ki te kāhika hītawetawe o Te Aitanga o Hauiti. Ko koe tērā e Parekura, te manu taupua, te rākau taumatua o tō iwi, o te motu hoki i whakatauira mai i te tika me te pono ki a tātou. Āwhiorangi hoki tēnei hau ki te uri o Whareponga a Hinerangi, te kaingākau o te
whānau o Te Herenga Waka, o tō whānau hoki. Tēnei te aitua, te mamae i pā mai i kaikini i a mātou o te whānau o Te Herenga Waka, otirā ki a tātou katoa. Moe mai rā e hine, whakangaro atu rā. Ki a koe hoki Jacqui Te Kani, te ringa whero o Te Rōpū Wahine Toko i te Ora, mōteatea ana ngā ngākau mōhou rā. Kapohia te uri o Ngāti Raukawa a Lydia Tuhono, ā, te koromatua o Tainui Marae a John Tohukai Tuhono e tēnei hau weriweri o Mate. E koro Hone kua tae koe ki to putiputi, Te Pua Kakara o Kereru ,whakatopa atu rā kōrua. Haere, haere, whakangaro atu rā. Maringi mai ana ngā roimata mō koutou katoa kua rūpeke ki te pae o maumahara. Tēnei te hau o aituā, kua āmiomio mai i te motu, e whakangaeke ai te ngākau. Tēnei te mihi, te tangi o tātou ngā kanohi o rātou mā. Hoki atu rā koutou ki te huinga o te kahurangi, ki te Kāpunipuni o te wairua, kei reira koutou okioki ai. Tēnei hoki te mihi, te aroha, te whakaaro mahaki e tuku ana ki a koutou ki o koutou whānau hoki.
55