DIABIERNA 7 FEBRUARI 2014
DIARIO
PAGINA 19
Castigo mas tanto condicional, pa gulidor di bolita ORANJESTAD(AAN): Diahuebs sospechoso Z.L.W a presenta dilanti di huez na corte di husticia, debi na e hecho cu el a wordo acusa di di exportacion di cocaina riba 20 di October 2013. Despues cu huez a repasa procesverbal di e caso, fiscal a presenta e evidencia y a bin cu su exigencia di castigo. Fiscal a pidi un castigo incondicional di 8 luna contra e sospechoso. Peter Mohamed a presenta e defensa pa e mucha muher cu a guli bolita y el a pidi huez pa tene cuenta cu e hecho cu Z.W nunca antes a haya su mes den problema cu husticia y cu el a coopera mesora cu e investigacion. Tambe el a pidi huez pa tene cuenta cu e hecho cu Z.W tin un trabao caba y ta hasiendo tambe trabao di boluntario. Huez na final a tene cuenta cu esaki y a duna Z.W un castigo di 8 luna, di cual solamente e parti cu Z. A sinta caba den detencion preventivo ta incondiciona. E resto lo colga riba su cabez como un castigo condicional.
PAGINA 20 E siete candidatanan ta den pleno preparacion pa nan presentacion
Aruba ta cla pa eligi su Reina Hubenil pa Carnaval 60
ORANJESTAD (AAN): Eleccion di nos Reina Hubenil pa Carnaval 60 ta den porta. Diabierna awo na Aruba Entertainment Center henter pueblo di Aruba lo tin oportunidad di cera conoci cu e Reina Hubenil. Un total di 7 hoben lo participa den un di e eleccionnan mas spera cu tin pa cu e temporada aki celebrando 60 aña di nos dushi carnaval. E 7 hobennan ta candidata number 1; Lynn Xen Angela di Champagne Carnival Group; candidata number 2; Shandy Robles de Medina di OPC Carnival Group, candidata number 3; Shakira Quandt di e districto di Santa Cruz, candidata num-
ber 4; Shaindra Ashby di Royal Carnival Group, candidata number 5; Dana Arendsz di T.O.B, candidata number 6; Gabriela Croes representando districto di Oranjestad y candidata number 7; Sammy van Eenennaam den representacion di Reina Escolar a pasa den un training intensivo pa duna un tremendo show diabierna awor. E training a tuma luga diamars ultimo di 5:30 p.m. pa 7:00 p.m. E hobennan a sa di demostra ya caba nan entusiasmo pa loke ta bay bira e anochi final caminda e hurado lo tin un tarea hopi dificil di scoge nos Reina Hubenil di Carnaval 60. A repasa e reglanan di eleccion, timing pa
DIARIO speech y baile. Esaki lo duna e hobennan mas siguridad ariba escenario. Stichting Arubaanse Carnaval ta anuncia cu ticketnan ta obtenibel na oficina di SAC na Dakota, como tambe na porta diabierna na Aruba Entertainment Center. Ticketnan pa seccion VIP ta costa Afl. 25 pa persona y pa publico general ta solamente Afl. 10 pa persona. E eleccion pa scoge Aruba su Reina Hubenil pa e celebracion di diamanta ta cuminsa pa 7:30 p.m. Carnaval di Aruba a nace na aña 1954 caba, como tal e aña aki nos ta celebra 60 aña cu anualmente pueblo ta bini hunto pa mustra nos creatividad, ambiente y folklore manera nos so por. Na aña 1955 varios club y districtonan a bini hunto pa organiza e carnaval y di eynan a eligi e prome Reina di Carnaval. E parada grandi tradicional a cuminsa desde aña 1957. Pero tabata dia 11 di november 1966 (11-11-66) pa 11:11am cu a funda Stichting Arubaanse Carnaval, SAC. Desde e tempo ey e fundacion, forma pa un grupo grandi di boluntarionan cu hopi entusiasmo, ta traha duro pa organiza e diferente eventonan cu ta atrae un publico grandi di nos mesun ciudadanonan pero tambe turistanan. SAC ta gradici tur sponsor cu a contribui na loke ta bay bira
DIABIERNA 7 FEBRUARI 2014
un anochi di gala y alegria, hopi colorido y hubenil, nan ta: Setar N.V., Aruba Bank, Island Asia Store, Trash By Ronchi, Revlon, Romar Trading, Renaissance Resort, Aruba Tourism Authority, PwC, WEB Aruba N.V., Insel Air, Balashi, Compra N.V., Tec INC., J.H. Yee'S Asian
Bistro, DShop, Pelican Adventures, Super Shopping, Geekay Department Store, Maggy’s y The Mill Resort. Pa mas informacion di SAC y di tur evento di carnaval, subi Facebook, riba e pagina facebook.com/stichtingarubaansecarnaval.
DIABIERNA 7 FEBRUARI 2014
PAGINA 47
DIARIO
Durante conferencia di prensa y media tour
Aruba Caiso & Soca Monarch bon promovi na St. Maarten
ORANJESTAD (AAN): Siman pasa un delegacion di Musica a biaha pa Sint Maarten hunto cu Insel Air pa asina promove e Aruba Caiso & Soca Monarch 2014. E promocion tabata consisti di un conferencia di prensa na Divi Little Bay Hotel y un tour na diferente emisora radial tanto na e banda Hulandes como e banda Frances di e isla. E conferencia di prensa tabata bon atendi pa diferente miembronan di prensa di e dos corantnan di e isla, website di noticia y canal di television di banda frances. Durante e conferencia di prensa a splica cu mirando cu mayoria buelo for di Sint Maarten pa Aruba ta yen durante e ultimo fin di siman di Carnaval e evento aki ta un oportunidad ideal pa toch celebra cu Aruba su Carnaval 60. E agencianan di biahe ta e puntonan di benta pa por cumpra pakete cu ta inclui biahe cu Insel Air y estadia. E siguiente dia a bishita entre otro e emisoranan radial PJD-2 The Voice of Sint Maarten unda cu Lady Grace a combersa pa un mey ora largo cu Clyde Burke ( Musica ), Inky Richardson ( Musica ) , Tita Iglesias ( Insel Air ) y Mark Benson Denz ( Infinity Media Aruba – Pr Musica ). Lady Grace
ta un personalidad di radio hopi popular na e isla y ta procedente di Aruba tambe. Despues a continua pa e banda frances pa un entrevista na 95.9 FM SOS Radio. Apesar cu e radio ta ubica na e parti Frances e ta gosa di un sintonia masal tambe na e parti Hulandes. Finalmente a tene un entrevista na studionan di Laser 101. Esaki tabata durante e programa di e popular dj Gee Money. E anochinan di pre final lo ta dianan 11,12,13 di Februari 2014 cuminando pa 7 or di anochi. Dia 11 lo tey The Aruba Invaders, Hot Ones Band, BMS, Upgrade, Simpletmente Pabo, Duro, The Failures y Le Groove. Dia 12 lo tey Perfect Sound, Xqizit Band, NBO, Virus Band, The Hotel Band, Dushi Band, Robert y Su Solo Banda, Impak Band y OREO. Dia 13 lo tey Tsunami, Contagious, Talentoso Band, D’-licious, ‘N Fuzion, Zeta Band, This and That, XC-Lanz, Paraketo y Youth Xtreme. E anochi final lo ta dia 15. Tur anochi lo tuma lugar den e Carnival Village. Entradanan pa e festival ta obtenibel na tur 195 rebendedor di Lotto pa solamente 20 Florin pa cada anochi di pre final y 40 Florin pa e anochi final.
PAGINA 60
DIARIO
Cu variacion completo di auto, tur den stock
Autonights tabata exitoso na Garage Centraal Aruba
ORANJESTAD (AAN): Riba Diahuebs, Garage Centraal Aruba a celebra exitosamente su edicion mas reciente di “Autonights” “Autonights” a ser crea pa esnan cu tin trabao of obligacionnan cu ta evita pa nan por busca e información nan mester pa un auto nobo. Garage Centraal Aruba ta keda habri te cu 9’or di anochi, cla pa ricibi esnan cu desea di busca e auto nan desea. Garage Centraal Aruba cu Autonights ta ofrece e trankilidad cu e clientela mester pa cera conoci mas de cerca cu e auto di nan deseo, den un ambiente agradabel. Y adicionalmente na e momento aki tin un stock completo den henter e rango di autonan tanto Hyundai como Isuzu, di tal manera cu no tin nodo di warda pa lunanan largo prome cu haya un auto. Den e evenemento celebra ayera anochi tabatin un cantidad grandi di hende cu a presenta pa busca informacion pa autonan, cu banconan constantemente ocupa cu
clientenan, y e team di sales completo ocupa di manera constante pa por yuda esnan interesa den un auto. Garage Centraal kier extende un sincero palabra di danki na tur esnan cu a deposita un biaha mas nan confianza den e autonan Hyundai, Isuzu, y tur e variación di autonan segunda mano cu tin disponibel. Un palabra di gradicimento tambe ta bay na tur e banconan cu di manera entusiastico a presenta pa ofrece nan servicionan, y finalmente na e crew di Garage Centraal Aruba cu a sa di mantene un nivel di energía y profesionalismo durante e evenemento aki. Finalmente, e invitacion mas cordial a ser haci pa esnan cu no a haya oportunidad di pasa Diahuebs anochi pa asisti na Garage Centraal Aruba su showroom, como cu a ser informa cu stock ta disponibel den cantidadnan suficiente na e momento aki, di tal manera cu esnan cu desea un auto nobo por core esaki di inmediato.
DIABIERNA 7 FEBRUARI 2014