PALOMA GARCÍA. AUTORA DE “LA SIDRA ROJA, ENTRE LA EXCELENCIA Y EL VICIO”

Paloma García nel so llagar de Perlora.

La “Sidra Roja” nun ye collorá. Eso ye lo primero que me sosprende cuando voi visitar el llagar caseru de Paloma García en Perlora, resclavu del que fore un gran llagar industrial n’otra dómina… pero yá toi adelantándome

Decía, que la Sidra Roja nun ye collorá, ye más bien anaranxao, comu les vaques roxes o los rapacinos roxos del país. “Llamámosla asina, sidra roja, en perfectu castellán, porque ye como apaecía na prensa de la época, por eso uso esa espresión nel llibru” aclara, y ye que de prensa precisamente va’l llibru que vien de presentar Paloma, un trabayu de más de cincu años d’investigación nel que recueye l’apaición de la sidra típico de Carreño na prensa dende la referencia más antigua fasta’l 1950. ¿Qu’estrema entós esta sidra del resto? Cuerpu, mucílagu, taninos, arume, persistencia, fuercia y sí, un collor ambar escuro. La sidra roxo ye reconocible al primer culín y foron les sos carauterístiques organoléptiques, xunto cola so mayor gradación, les quey valieron la so fama, tantu pa bien –la escelencia- comu pa mal –el viciu-. El llagar ye agora caseru, ocupando’l baxu la panera y lo que fuere la cuadra. Ocho pipes con nome propiu sosteníes por pegollos y un llagar fechu a man na época de Felix Vega, tíu de Paloma, fíu y nietu de llagareros que mos acompanga arguyosu del so llegáu. “El tornu vien de Mieres, les maeres ficímosles nosotros, los carneros, les marranes, too”. Teo de reconocer qu’ehí necesité que me desplicaren qué son les marranes y los carneros. “Equí facemos sídra desde antes de que yo tenga usu de razón” cuenta Paloma, refiriéndose al pasáu sidreru familiar. “Polo menos dende José Vega Suárez, güelu de mio güela, hai constancia de que se facía sidra en casa, primero pa consumu familiar, como n’otres tantes cases d’Asturies. Depués ya fue cuando’l fíu de José, Víctor de la Vega, dio una proyeición más industrial, llevaba la sidra a Xixón, a Lluanco...”. Nel llagar guarden alcordances d’entós, la sidre apaez nos cartelinos comu Fábrica de Sidra Natural Víctor Vega García, pero conocíase pol mote de la familia, ‘Cagareales’. A la so muerte, nel 52, los fíos nun siguen col llagar. “Mio güela casó con un criáu que vino de Zamora a trabayar nel llagar, como tanta xente forastera que venía a trabayar en llagares -esti yera un llagar, como decía’l mio güelu “importante”-. Al morrer el patrón na familia nadie tira pol negociu familiar y nel 64 véndese

l’últimu gran tonel, en El Turia, depués dedíquense a la agricultura, ganadería y demás, pero sigue faciéndose en casa”. Llegaos a esti puntu Félix sirve tres culinos. Ún ye de sidra industrial DO, de Peñón, otra d’un tonel de carbayu francés y l’otru de pipa de zrezal. Les desemeyances salten a la vista, el collor ya’l cuerpu son evidentes, pero tamién l’aguante ye mayor y espalma con más fuercia, especialmente nel tercer culín, el de zrezal, aunque te fecho coles mesmes variedaes de mazana que’l segundu, destacando la de Rodiles, esclusiva de la zona. Sométenme a esamen, creo qu’aprobé. Depués de dexar la sidra desvanecer, prebamos primero la de zrezal, tien un secante mui marcáu, un acedín afrutao que dexa munchu regustu y pide más. El recuerdu de la sidra nun marcha fácil y aguanta en boca. El segundu, de carbayu francés, ye más seco y amaderao, más fuerte, pero al tiempu mui llimpio, potente pero desvanezse enantes. Finalmente la de Peñón, que perdió muncho arume por dexar reposar el culete… rico tamién, un pocu asemeyada a la segunda que probemos… pero nidiamente estremada. Por supuesto, quiero saber ónde ta’l trucu. Ríense. “El secretu de la sidra, toos venis polo mesmo y nun hai tal secretu. Nun tien más que ser la sidra sobre la madre, que ta fecho con mazanes que nun les hai nel mercáu y que son autóctones, que ta mayao con una máquina de maera, comu enantes, apretao nun llagar, comu enantes, y sacao la sidra, comu enantes”.

Paloma García y Félix Vega na pumarada, col llibru sobre la Sidra Roxa

De zorga a drecha, culín de sidra Peñón, sidra roxo de pipa “francés” y de pipa “zrezal”

Pero sí qu’acaben confesándome un pequeñu secretu: el suelu. El propiu mantu de Carreño, la pizarra de boniana, l’altu conteníu en fierro, la caliza roxo, tolo que tien el suelu nel que se llanten los pumares dende tiempu inmemorial –l’añu pasáu pañaron mazanes d’árboles que tienen 50 años- apurre a eses mazanes unes propiedaes que son estremaes. La tierra ye fundamental. La maera influye tamién abondo, tanto pa bien comu pa mal, de qué árbol seya y cómu se trate. “Si te das cuenta esti tonel (señala’l rotulau a tiza col nome de ‘Maliayu’) ye de castañu montés, ye una pipa que se fizo a azuela, a la manera antigua, vien de los antiguos toneleros de Breceña y tien más de 50 años. Esta otra, col nome de Francés, ye de carbayu francés, les pipes vienen del vino pero tratémosles a la manera antigua, llavándoles con cal, pa que puean amparar la sidra. La maera siempres aporta propiedaes, ca maera tien un matiz y aporta un arume determináu”. “El viejo”, ye la so pipa más antigua, tamién de castañu montés, comu ‘El Grande’. Pente’l restu destaca la pipa de zrezal, “ya mio güela, fía de Víctor Vega, lo decía, la sidra fecho en zrezal tien una sequedá y un cuerpu especial”. L’usu d’esta maera, desplica, perdióse polo delicao que ye, “pero ta documentao yá en Villaviciosa dende’l sieglu XVIII, con Frai Toribio de la Pumarada y Toyos que falaba de lo bones que son les pipes de zrezal”. La importancia de la hestoria d’esta familia y d’esti llagar radica en que cuenta al tiempu la hestoria de la sidra roxo, la so produción pa consumu propiu, el saltu a nivel industrial, que tien muncho que ver tamién cola llegada la lluz a la parroquia, l’apaición de fasta 7 llagares industriales nun alrodiu d’un km, tol desendolcu qu’hebio, la so sonadía, el so espardimientu pelos vecinos conceyos de Xixón y Castrillón, llegando a Madrid y pasando incluso a ultramar, a Cuba, col llagareru Bernardo Rodríguez, Bernardo ‘El Cantu’. Ya’l so declive posterior, col preslle de tolos llagares industriales y la so pervivencia na mayoría de les families de la rodiada, onde tovía güei se fae sidra. “Nun entiendo la historia de la familia de manera independiente, pue ser la historia de tolos vecinos de Carreño cola so historia llagarera”. De Bernardo ‘El Cantu’, llagareru de Prendes, cuéntenme que se caltién un tonel de 1912, que según la prensa de la época rompióse en Xixón, compráu por Tino Bengocoechea pa espichalu nel so almacén. Esi ye’l tipu d’informaciones que recueye’l llibru, un viaxe pela sidra de la man de la sidra en prensa, una obra áxil qu’engancha y a la que siempres se puede volver a buscar una curiosidá. “Yo digo que ye como un llibru de cromos” diz con modestia, seique la obra va muncho más acuallá, ye un compendiu de documentación hemerográfica, una introdución a la cara más amigable y cercana del estudiu hestóricu, porque ¿qué hai más fácil d’entender pa la xente que nun tien mayor conocimientu que lo que llee na prensa? Nel parámetru cronolóxicu nel que mos movemos

hai más de cien artículos publicaos que traten sobre’l tema de la sidra o la manzana de Carreño, ya seya demonizándola o emponderándola. La fama de la sidra roxo -Sidra Roja, apaez na prensa- trascendió, pa bien y pa mal, como plantega nel llibru, “Pente la escelencia y el viciu”. La prensa de la época, desplica Paloma, xuega col sensacionalismu, comu faen los periódicos d’agora, pa llegar a determináu tipu de xente. Si queríen centrase nel consumu poníente’l titular “Atención secañosos, rómpese un tonel en Casa Piñera” o “Sidreros, hai sidra de Perlora, del llagar de Ramón de Rodiles” o “Superior sidra de Carreño del afamáu llagareru” y nun sabemos de quién ye. Si s’emponderaba yera poles sos virtudes ya’l mesmu José de Villalaín, en 1919, na so Topografía Médica de Carreño fala de les bondaes de la sidra de Carreño. Pero si yera un periódicu más moralista el tonu yera bien otru: ye una sidra fuerte, d’alta gradación alcólica y pol abusu escesivu de la bebida, que tampoco yera exclusivu de Carreño, venceyábase’l consumu de sidra cola violencia, comu recueye otru de los apartaos del llibru, “La crónica negra de la sidra roja”. Los círculos hixenistes escontra l’alcol ya’l discursu moralista de la ilesia cientrábase nos efeutos nocivos del “viciu del alcol”. La demonización venía tamién porque taba rellacionada con una dómina de movilización obrero “los patronos lo que queríen yera controlar a la masa obrera, entós decíen que perdíen el tiempu nes tabernes dándose al alcol y a otros vicios” L’ultimu apartáu del llibru ciéntrase más nos llugares onde se consume la sidra, en qué puntos, en qué chigres, en qué cases de comida, en qué espacios de sociabilidá se distribuye, merenderos, llagares, dientro’l conceyu, fuera… qué afición teníen los sidreros y entendíos en sidra, por qué carauterísitiques físiques la valoraben, los taninos, el saborgu, el cuerpu… “yera una sidra pa homes, decíen, frente a la de muyerina”. Esti llibru ye parte d’un programa d’investigación más ampliu que tien abiertu y qu’abarca munchos puntos de vista y fontes de documentación.Pero tovía hai muncho trabayu que facer, diz Paloma, “ignoramos más de lo que sabemos y tenemos que saber onde lo buscar, d’ehí la importancia de buscar los testimonios orales, porque la xente se nos va y solo queden les pieces y a veces ya nin eso”. Espera que tola información que ta recoyendo, inclu-

Felix Vega echando un culín nel so llagar.

yendo grabaciones y testimonios, pueda dir dalgún día al Archivu de Fontes Orales o a la Cátedra de la Sidra de Luis Benito García Álvarez, que tien una llinia d’investigación abierta en relación cola captación de testimonios orales de la sidra. Resalta que “hai espublizaciones feches dende munchos campos, como l’antropoloxía o la etnoloxía, como los de Inaciu Llavona, pero cuasi na dende’l puntu de vista de la historia, si nun ye pola tesis doctoral de Luis Benito y agora el trabayu que ta faciendo dende la Cátedra de la Sidra de la Universidá d’Uviéu. Ta faciendo cantera y abordando’l tema de la cultura sidrera dende tolos ámbetos, bioloxía, xeoloxía, xeografía, importantísimo p’algamar el Padremuñu Inmaterial de la Humanidá, ya que cuantu más ampliu seya l’espectru demuestra la interdisciplinaridá qu’hai”.