（白話字版）陳明仁台語文學前導讀冊討論會成果刊物

P e̍ h - ō e - j

ī版

做伙讀冊、唱歌，講咱ê話－

112年高雄市母語推廣與友善語言計畫

文化部國家語言整體發展方案支持

指導單位

主辦單位

承辦單位

合作單位

陳明仁 台語文學前導讀冊討論會 「陳明仁台語文學選前導讀冊討論會」是由高雄文學館、打狗台語開

講社、台文博覽會於2023年夏季合作辦理。閱讀書目為台語文作 家陳明仁的《陳明仁台語文學選》。透過六次讀書會所閱讀的篇章有

〈 牽 尪 姨 〉 、 〈 G ō n g 淸 - - á 買 獎 券 t i o̍ h 大 獎 〉 、 〈 A- c h h û n 〉 、 〈Ia-so͘榮--á ê婚姻〉、〈老歲á人〉、〈二二八新娘〉；每次讀書會由兩

位打狗台語開講社讀冊組成員領讀，每位參加者輪流唸誦文章，再 由領讀人複念一次，確認台語發音；也會討論作者寫作意圖與台語 文用詞。

本份刊物為「陳明仁台語文學選前導讀冊討論會」成果刊物，內文文 字為白話字（POJ）；內容分別有本系列閱讀篇章的簡介，並邀請六

位參加者分享讀書、討論心得，及領讀人的閱讀分享，邀請大家一 同來認識作家陳明仁的作品！

關於

陳明仁

Tân Bêng-jîn tī 80 nî-tāi siū chèng-tī pek-hāi liáu, ì-gōa tī kaⁿ-ga̍k--ni̍h o̍h tio̍h Tâi-gí-bûn su-siá, tī 90 nî-tāi

si̍t-chiān Tâi-gí bûn-ha̍k chhòng-chok, koh tâu-ji̍p

Tâi-gí-bûn ūn-tōng. Tû-liáu chhòng-pān chhut-miâ ê Tâi-bûn khan-bu̍t “Tâi-bûn Bóng-pò” tam-jīm chóng

phian-chip, mā tam-jīm “Tâi-oân-jī” cha̍p-chì ê chóng

phian-chip, tùi Tâi-gí bûn-ha̍k hoat-tián, Tâi-gí-bûn phó͘-ki̍p-hòa ê kòng-hiàn put-chí-á tōa.

陳明仁台語文 篇章簡介 “Khan Ang-î”

Teh kóng chú-kak A-chiáng án-chóaⁿ khì chò ang-î ê kòe-têng.

Chhím-thâu-á tha̍k, kán-ná sī teh kóng nn̄g ang-á-chiá ê tāi-chì, khêng-si̍t sī teh kóng “khan ang-î” chit-khoán ē thong-lêng ê

lâng chò siáⁿ-mih sit-thâu, tùi hit sî Tâi-oân-lâng ū siáⁿ-mih ì-gī. Mā ū siāu-kài chi̍t-kóa khan-bông, khan ang-î kap siu-kiaⁿ

ê gî-sek, lóng bô kāng. “Khan ang-î” chit-khoán hong-sio̍k sī

lán pêⁿ-po͘-cho̍k chū-té to̍h ū--ê, mā ē-tàng kóng sī chi̍t-chióng sìn-gióng, chong-kàu, sim-lí-tī-liâu hit-khoán ì-gī, an-tah lâng ê sim-chêng.

“Gōng-chheng--á Bé Chióng-kǹg Tio̍h Tōa-chióng”

Chit-phiⁿ hō͘ tho̍k-chiá tha̍k--khí-lâi ū tīⁿ móa-móa ê hoaⁿ-hí,

him-sióng he tan-sûn ê chng-kha-lâng, sui-bóng tī chhân-hn̂g jīn-lō͘ choh sit-thâu, mā ē siūⁿ beh ū ki-hōe tio̍h chióng thang

kái-piàn, hoan-sin. Chok-chiá iōng chióng-kǹg an-chhah hi-bāng,

tho̍k-chiá mā ē-tàng chhim-chhim kám-siū hit-khoán bí-biāu ê

kî-thāi. Choh-sit-lâng mî-nōa jīn-hūn ê sèng-keh, koh ū hiah-nī sio-thīn ê ko͘-niû hun-sek kap kó͘-lē, tì-sú bô tī chióng-kǹg ê lī-ek bê-sit, soah tian-tò tio̍h chi̍t ê tōa-chióng.

文學選 “A-chhûn”

Khí-thâu to̍h ùi phiⁿ-miâ chit jī (Hàn-jī) chhûn--jī kóng khí, kàu lō͘-bóe, mā bô chhōe tio̍h chhûn--jī Hàn-jī sī tó chi̍t jī. Chia

chok-chiá ū nn̄g ê ì-sù. It--lâi, A-jîn sian sī Hàn-lô ha̍p-iōng ê si̍t-chiān-chiá, àm-sī tho̍k-chiá tui-kiû Hàn-jī sī bô-bóe-hāng.

Jī--lâi, i siáu-soat soah-kó͘ ê sî tiāⁿ-tiāⁿ ē chhàng chi̍t-kóa ōe-gí, hông kám-kak ū tām-po̍h-á ûi-hām. A-chhûn hián-bêng

cha-bó͘-lâng tī thoân-thóng siā-hōe--ni̍h siū chē-chē ap-le̍k koh bô só͘-chāi thang tháu-pàng. Sim--ni̍h ê ōe, kan-na thang chià ba̍k-sái kap koa-siaⁿ kóng chhut chhùi.

“Ia-so͘ Êng--á ê Hun-in”

Chit-phiⁿ siáu-soat, tú khí-kó͘ to̍h ē-tàng chai-iáⁿ, kò͘-sū ián-piàn

kòe-têng, ū 3 ê chú-kak, 1 ê sī Ia-so͘, tē 2 ê sī Êng--á, koh ū lâm-lú kè-chhōa ê hun-in tāi-chì.

Sìn-gióng sī múi chi̍t ê lâng, sim-bo̍k-tiong ê chú-sîn, tī ji̍t-siông seng-oa̍h tiong, a̍h-sī tiōng-iàu ê ji̍t-chí, tāi-ke lóng ē chò-hóe

chū-hōe, kóng chhut lāi-sim ê pi-ai hí-lo̍k, te̍k-pia̍t sī ut-chut ê

sî-chūn, kín khì kàu-tn̂g kóng chhut sim-lāi ê ai-siong, hō͘ lāng chêng-sū thang siau-tháu.

Lán lóng chai-iáⁿ Êng--á sī 1 ê tan-sûn láu-si̍t ê choh-sit-lâng, tùi

hun-in ê khòaⁿ-hoat, to̍h sī “In-iân thiⁿ chù-tiāⁿ”, chhin-chhiūⁿ

koa-á án-ne chhiùⁿ, “Ū-iân bô-iân, sio-chiú lim--chi̍t-poe, ho͘ ta--lah! Ho͘ ta--lah!”

陳明仁台語文 篇章簡介 “Lāu-hòe-á-lâng”

Bêng-jîn siăn-sé kā “Ip-á peh ê Kè-ta̍t-koan” kái pian chò

“Lāu-hòe-á-lâng” chit-chhut kio̍k, 2009 nî 3 goe̍h 13 tī Khoân-a Pn̄g-tiàm siú-ián.

Chi̍t-tīn lāu-hòe-á-lâng tòa chng-kha, pêng-sò͘-sî phah kûn-thâu liān sin-thé, kiat-sok liáu-āu khai-káng kóng chèng-tī, le̍k-sú.

Chng-kha choh-sit kan-khó͘, siàu-liân--ê lóng khì to͘-chhī, in

chia̍h-lāu khì óa siàu-liân--ê. In chò-hóe gō͘, la̍k cha̍p tang--ah, kóng sòaⁿ to̍h sòaⁿ, sim-lāi chin m̄-kam. A-chúi--á beh khì Bí-kok, o̍h Eng-gí o̍h liáu chin sim-sek, hoat-kiàn bô kāng-khoán ê gí-giân

ū kāng-im ê hiān-siōng. Kiat-á peh khì Tâi-pak tòa bē tiâu, kóng lán-lâng-ōe lâng thiaⁿ bô, koh Tâi-pak-lâng ê siūⁿ-hoat bô-hó lí-kái. Bóe--á tńg-khì chng-kha tòa.

文學選 “Jī-jī-pat Sin-niû”

228 sin-niû sī kō͘ kio̍k-pún hêng-sek siá--ê, chit chhut kio̍k-pún

mā tī tiān-tâi hòng-sàng--kòe. Kò͘-sū teh kóng--ê, sī chi̍t-tùi

siàu-liân-lâng tng beh tēng-chhin, chhut-kok liû-ha̍k, thài chai-iáⁿ bī-lâi hó kong-kéng soah hō͘ gōa-lâi chèng-koân chián-tn̄g. 228 sī gōa-lâi chèng-koân tùi Tâi-oân-lâng tōa tô͘-sat. Chū 228 khí,

tô͘-sat, kàm-sī, pak-siah, kàu-taⁿ iáu sī teh chìn-hêng, chin

chió Tâi-oân-lâng jīn-bat 228 le̍k-sú. Thâu-pái kō͘ Tâi-gí, khiā

Tâi-oân-lâng ê kak-tō͘ khì khòaⁿ 228 ê bûn-ha̍k chok-phín, chiâⁿ ta̍t-tit tāi-ke lâi tha̍k.

學員閱讀心得 Ngô͘ Khu-lī 吳秋莉

Tùi kū-nî hioh-kôaⁿ khai-sí o̍h Tâi-gí liáu-āu, góa tē 1 phō

chiap-chhiok ê bûn-ha̍k chok-phín to̍h sī ùi tô͘-su-koán chioh lâi kúi-nā chi̍p ê “Pha-hng ê Kò͘-sū” kap siaⁿ-im tòng. Ta̍k-kang

e-àm khang-khòe chò soah to̍h kín beh khì tha̍k Bêng-jîn lāu-su

ê chheh, góa koàn-sì seng tha̍k 1 pái bûn-jī chiah koh thiaⁿ 1 kái im-tòng. Kin-nî hioh-joa̍h, chiok hēng-ūn ē-tàng chham-ka

Táⁿ-káu Tâi-gí Khai-káng-siā pān ê tha̍k-chheh-hōe hâm chin chē iú-chì chò-hóe thó-lūn Bêng-jîn lāu-su ê chok-phín, hō͘ góa o̍h tio̍h koh khah hong-hù ê sû-lūi, mā khah chhim-ji̍p liáu-kái lāu-su tùi siā-hōe ê koan-hoâi. Góa chin kah-ì lāu-su i tiāⁿ-tiāⁿ

iōng oa̍h-thiàu-thiàu ê sio̍k-gí kap chiâⁿ iù-lō͘ ê chhiú-hoat kā kio̍k-chêng pho͘-pâi kah hō͘ góa kín-tiuⁿ kah sim-chōng kiông-kiông-beh chih-chài bē tiâu, i tī góa ê sim-bo̍k-tiong bē-su sī sè-kài tōa hì-kio̍k chok-ka Shakespeare kāng-khoán, chiok gâu biâu-siá jîn-bu̍t kéng-tì kap tāi-chì hoat-seng ê siông-sè kòe-têng.

Lūn-chin kóng, góa kám-kak lāu-su i ê chhòng-ì, khoe-hâi kap

iōng keng-thé piáu-ta̍t tùi siā-hōe bô kong-gī ê khòng-gī lóng sī it-lia̍p-it--ê. Phì-lūn kóng tī i siáu-soat lāi-té siá tio̍h i sè-hàn phó͘

得 chúi-ke-á tō͘ kap o̍h chò tiān-iáⁿ piān-sū ê kì-tî, A-chhûn sī i chiâⁿ chò Tâi-gí chok-ka ê goân-thâu, “Lāu-hòe-á-lâng”

kio̍k-pún lāi Âng Khan hâm lāu-pêng-iú kek-khoe-hâi

ê súi-khùi bûn-jī, “228 Sin-niû” kio̍k-pún lāi Haruko kap Masao ê pi-chêng, Chheng--á kap bē chióng-koàn

ko͘-niû ê hó in-iân, “Khan-ang-î” lāi-té koài-kî ê A-chiáng jîn-seng, ūi-tio̍h Ia-so͘ ê tōa ài beh kè hō͘ A-êng ê Ba̍k-lī

kap Chú-im. Nā beh mn̄g góa khah kah-ì tó 1 ê kò͘-sū?

Góa chin-chiàⁿ bô-hoat-tō͘ hôe-tap--neh! Ta̍k ê kò͘-sū lóng

ū bô-kāng ê te̍k-sek, chiok khip-ín góa it-ti̍t tha̍k, sīm-chì tha̍k kúi-nā piàn mā bē ià-siān.

學員閱讀心得 Ông Éng-tang 王永東

Tân Bêng-jîn sian-seⁿ soán A-chhûn chit-ê kò͘-sū, góa kám-kak siāng tiōng-iàu ê chi̍t tiám to̍h sī kì-lio̍k i sī án-chóaⁿ ē kiâⁿ chiūⁿ siá-chok Tâi-gí-bûn chit-ê tāi-chì. I sī in-ūi beh siá-chok A-chhûn chit-ê kò͘-sū, chiah lâi kiâⁿ

chiūⁿ Tâi-gí lō͘. A-chhûn kò͘-sū ê pho͘-pâi ū kàu súi-khùi

to̍h sī i iōng chok-chiá tha̍k kok-sió chêng-āu ê sî-kan, i kap chú-kak A-chhûn to̍h tòa chhù-piⁿ, thàu-kòe lóng ài thiaⁿ liû-hêng-koa se̍k-sāi. Bóe--á koh khan-sia̍p tio̍h kóng A-chhûn i kap i chi̍t ê chiok hó ê pêng-iú bē-iô-kó͘--ê, i

mā chiok ài chhiùⁿ-koa, khó-lêng ū teh chhiùⁿ chit tiâu “Si-chêng-loân-bāng”, chok-chiá ū pho͘-pâi tio̍h chit-ê

tāi-chì. Góa kám-kak chò liáu ū kàu súi-khùi, jîn-bu̍t ê khan-sia̍p mā siá liáu chiok téng-chin chiok hoa̍h-phoat.

Chit phiⁿ khòaⁿ--khí-lâi to̍h pi-siong pi-siong, m̄-koh mā sī chiâⁿ tiⁿ-bi̍t ê kám-kak, jîn-seng ū-tang-sî-á ū pi-siong, ū-tang-sî-á tiⁿ-bi̍t tiⁿ-bi̍t, che to̍h sī jîn-seng.

得

Ông Khêng-chu 王瓊珠

Tē 1 pái chham-ka “Tân Bêng-jîn Tâi-gí Bûn-ha̍k Soán” si̍t-thé ê tha̍k-chheh-hōe, góa ū 2 ê siōng-tōa ê kám-siū. Tē 1

sī chē lâng sio-kēng chiah ū-la̍t. Góa ka-tī khòaⁿ chheh mā

sī lia̍h ū chok-chiá ê ì-sù, m̄-koh tāi-ke chò-hóe tha̍k ē-sái koh khah chhim-ji̍p. Chìn-chêng góa lóng iōng ba̍k-chiu khòaⁿ niā-niā. Tha̍k-chheh-hōe sī tāi-ke lûn-liû lóng-tho̍k, chit-sî ku-kha to̍h sô--chhut-lâi-ah. Chi̍t-tiám-á lóng bē-sái

ló-chhó, má-má-hu-hu. Thiaⁿ tio̍h chhōa tha̍k lāu-su

chiàⁿ-pān koh iu-bí ê lóng-tho̍k, lí ē tùi Tâi-gí ê súi ū khah

chhim ê thé-hōe. Tē 2 sī tha̍k A-jîn lāu-su ê bûn-chiuⁿ mā sī teh o̍h chò-lâng ê gī-lí. A-jîn lāu-su pit-hā ê jîn-bu̍t chiok

chē sī kó͘-ì ê chng-kha-lâng. In tan-sûn, gōng-ti̍t ê kò-sèng sī lán hiān-tāi-lâng khiàm-khoeh--ê. Tī chit-ê pe̍h-chha̍t-ōe

móa-móa-sī ê siā-hōe, sī-tōa lóng kà lán ài sè-jī, hoân-sū

ài chim-chiok, chiah bē chhiàⁿ kúi thiah io̍h-toaⁿ, hō͘ lâng hāi kah thoa-sái-liân. M̄-koh lâng kap lâng nā lóng bô sìn-jīm, án-ne sī beh án-chóaⁿ oa̍h? A-jîn lāu-su ê kò͘-sū sī 1

ê thê-chhíⁿ. Chin-sim chiah ū hēng-hok. Kó͘-ì m̄-sī gōng, sī chò-lâng ê 1 khoán soán-te̍k.

學員閱讀心得 Tân Iū-úi 陳宥瑋

Góa sī Tân Iū-úi, góa chin hoaⁿ-hí ē-tàng tī chit kúi-ê lé-pài-ji̍t ê

ê-po͘ tī Ko-hiông Bûn-ha̍k-koán chham kok-ūi iú-chì lâi gián-thó

Tâi-gí siáu-soat, Tân Bêng-jîn lāu-su ê chok-phín. Góa chin kah-ì chit-ê kòe-têng, iā èng-kai kóng sī hióng-siū. In-ūi tī teh goán 1

lâng tha̍k 1 pha, ah lō͘-bóe chiah iû hōe-gī chú-chhî-jîn lāu-su lâi kā lán pó͘-chhiong, kiù-chèng. Chit-ê kòe-têng tang-tiong, góa ē-tàng o̍h tio̍h chin chē sin ê sû-lūi, koh ū iōng-hoat. Kèng-ka

tiōng-iàu--ê sī góa kám-kak ē-tàng kiù-chèng góa goân-pún

chi̍t-kóa khó-lêng kóng liáu ū têng-tâⁿ--khì, m̄-koh ka-tī bô kak-chhat--tio̍h ê só͘-chāi. Che sī tùi góa chin hó ê pang-chān.

To-siā chú-pān tan-ūi kin-nî ū chit-ê hoa̍t-tōng, to-siā.

得

Tân Khêng-gio̍k 陳瓊玉

Góa sī siūⁿ-beh hō͘ ka-tī ê Tâi-gí lêng-le̍k koh khah chìn-pō͘ chiah siūⁿ-beh lâi chham-ka tha̍k-chheh-hōe. Tī teh

tha̍k-chheh-hōe lāi-té, tāi-ke ē lûn-liû tha̍k 1 pha bûn-chiuⁿ ê lāi-iông, nā tha̍k m̄-tio̍h ê só͘-chāi lāu-su ē chhut-siaⁿ kā goán thê-chhíⁿ. Tông-o̍h mā chin jia̍t-sim ē tàu-saⁿ-kāng

kóng chèng-khak ê liām-hoat, tha̍k chhut-siaⁿ hō͘ góa chham-khó. Ha̍k-oân tha̍k liáu lāu-su ē kap goán thó-lūn

kóng tó-ūi khòaⁿ-bô, su-iàu kái-soat. Liáu-āu lāu-su ē koh

tha̍k 1 piàn hō͘ tāi-ke thiaⁿ. Ū chi̍t-kóa iù-lō͘ ê só͘-chāi, góa sī kám-kak kóng nā-sī ka-tī chi̍t-ê-lâng tī chhù-lāi tha̍k,

chhìn-chhái to̍h thiàu--kòe, làng--kòe-ah, kan-taⁿ chai-iáⁿ tāi-khài ê lāi-iông sī siáⁿ niâ. M̄-koh tī tha̍k-chheh-hōe, tāi-ke ē-sái thó-lūn, tó-ūi khòaⁿ khah bô, tông-o̍h ē mn̄g,

lāu-su mā ē kái-soat. Ū-ê tông-o̍h thiaⁿ lāu-su ê kái-soat

liáu-āu, i to̍h ē ū sè-hàn ê sî-chūn seng-oa̍h ê kì-tî tńg--lâi.

I ē hun-hióng hō͘ tāi-ke chai-iáⁿ, góa siūⁿ che to̍h sī tha̍k- chheh-hōe tin-kùi ê só͘-chāi.

講者閱讀分享 Î Gio̍k-ngô͘ 余玉娥

Kám-siā Ko-hiông Bûn-ha̍k-koán tn̂g-kî iōng-sim chi-chhî Tâi-oân bûn-ha̍k, kó͘-lē chhī-bîn chham-ú bûn-ha̍k hoa̍t-tōng.

Koh thê-kiong hiah-ni̍h sù-sī ê tiûⁿ-tē hō͘ bîn-chiòng sú-iōng.

Tī chit-khoán tiûⁿ-só͘ tha̍k-chheh ū-iáⁿ lo̍k-thiòng.

Tha̍k-chheh thó-lūn-hōe ê ha̍k-oân ùi siàu-liân-lâng kàu lāu-hòe-á lóng ū. Siàu-liân-ke m̄-nā kut-la̍t, koh phah-piàⁿ

ha̍k-si̍p, kiàn-pái lóng chhiúⁿ thâu-hiuⁿ, mā tha̍k kah chin ku̍t-liu. Nî-hòe khah tōa ê ha̍k-oân, chū sè-hàn chiū thiaⁿ, kóng

Tâi-gí, tùi bûn-jī khah chheⁿ-so͘. Put-jî-kò, ha̍k-oân tāi-to-sò͘ ū bé chheh, tiàm chhù--ni̍h mā ke-kiám tha̍k--kóa, tán kàu lâi

hiān-tiûⁿ tha̍k ê sî-chūn, to̍h jú tha̍k jú sūn-chhùi. Jî-chhiáⁿ

ha̍k-oân mā ē-hiáu lī-iōng ChhoeTaigi pêⁿ-tâi chhiau-chhōe bô se̍k-sāi ê gí-sû.

享 Lán nî-hòe khah chē ê pêng-iú mā chiaⁿ-si̍t tah-sim,

chiam-tùi bûn-pún lāi-iông thê-kiong in ka-kī ê seng-oa̍h keng-giām hō͘ tāi-ke chham-khó. Koh ta̍k-ê ha̍k-oân ùi ta̍k

só͘-chāi lâi, khiuⁿ-kháu ū sió-khóa cheng-chha, chhiūⁿ Tâi-lâm khiuⁿ, Gî-lân khiuⁿ, á-sī iōng-sû ū bô kāng-khoán ê só͘-chāi, tāi-ke lóng kám-kak kài sim-sek, mā o̍h tio̍h put-chí-á chē sin iōng-gí.

Chò-hóe tha̍k bûn-ha̍k chok-phín thang chià ín-chhōa

chìn-chi̍t-pō͘ liáu-kái chok-ka in bûn-ha̍k siá-chok ê chhiú-lō͘,

siong-sìn tùi lán ê siá-chok ū tōa pang-chān. Lán mā hi-bāng bī-lâi ū ki-hōe iau-chhiáⁿ Tân Bêng-jîn sian-seⁿ pún-sin lâi Ko-hiông Bûn-ha̍k-koán hun-hióng i ê bûn-ha̍k chhòng-chok sim-siaⁿ.

講者閱讀分享 Tân Ka-chèng 陳嘉正

Chhiau-chhōe Tâi-gí bûn-ha̍k ê chhiú-lō͘. Lán beh án-chóaⁿ iōng chāi-tē ê Tâi-gí khùi-kháu, lâi siá tong-tē ê lâng kap

tāi-chì, beh án-chóaⁿ lâi biâu-siá tāi-chì hoat-seng ê goân-in

kap lāi-iông, chit-ê kòe-têng kap kiat-kó, hō͘ tho̍k-chiá ē-tàng chheng-chhó͘, liáu-kái lán beh hêng-iông ê sè-chiat, khòaⁿ

kah chin chhù-bī, jî-chhiáⁿ siūⁿ-beh chìn-chi̍t-pō͘ gián-kiù chok-chiá, sim-koaⁿ-khut-á bî-sè ê lāi-châi.

Su̍t-sū ê tiong-kan, koh ē an-chhah chi̍t-kóa hiân-gî ê sū-kiāⁿ, hō͘ tho̍k-chiá lâi ioh, chit-chióng kî-biāu hu-hiân ê chhiú-lō͘, to̍h ē ín-jîn-ji̍p-sèng, ta̍uh-ta̍uh-á chhōa lí ji̍p-khì thô-hoe-goân

ê bê-lâng sè-kài, chi̍t-pō͘ chi̍t-pō͘ kiâⁿ ji̍p thian-hoa-loān-tūi ê chheng-sóng khong-kan. Bûn-chiuⁿ lāi-té mā chin chē

siap-kī-koa̍h ê iōng-sû, khah-chá m̄-bat khòaⁿ--kòe, mā m̄-bat thiaⁿ--tio̍h, chhin-chhiūⁿ “kiám-chhái”, “tháu-pàng”,

“làng-káng”, che to̍h su-iàu chià tha̍k-chheh-hōe, ta̍k-ke

chò-hóe lâi thó-lūn, chhōe chu-liāu, chhim-ji̍p gián-kiù liáu-āu, to̍h tit-tio̍h tap-àn--lo͘h.

享

Tâi-gí ài ha̍k-si̍p, chia̍p kóng, chia̍p siá, chia̍p thiaⁿ, chiah ē-tàng o̍h tio̍h chiàⁿ-káng ê Tâi-oân bī, Tâi-gí it-tēng ài

thn̂g-thòaⁿ, chiah ū hoat-tō͘ pó-liû chó͘-kong-á, a-tia, a-niâ lâu hō͘ lán siōng hó ê ûi-sán. Ta̍k-ke chò-hóe lâi phah-piàⁿ, Tâi-gí it-tēng chhut-thâu-thiⁿ.

講者閱讀分享 Tân Kim-hoa 陳金花

Hó ê chok-phín hō͘ lâng ū jú pō͘ jú phang ê khì-bī, chit-khoán

khì-bī tī tha̍k-chheh-hōe chò-hóe hun-hióng, chiok ū sio-tò͘ ê kám-jiám-le̍k, sī chhui-sak Tâi-bûn oa̍t-tho̍k ê hó hong-sek.

Tng tha̍k tio̍h m̄-bat ê gí-sû, chêng-kéng, tāi-ke thê chhut-lâi thó-lūn ê sî, bô-kâng seng-oa̍h pōe-kéng ê lâng, ē-tàng thê-kiong bô-kâng ê keng-giām, chò-hóe kái-tap. M̄-nā

bûn-chiuⁿ lāi-té ê būn-tê, koh ū Lô-má-jī ê sú-iōng kui-chek, mā ē-sái sûi-sî thê chhut-lâi thó-lūn, án-ne hō͘-tōng ē hō͘ lâng siūⁿ-beh kè-sio̍k tha̍k--lo̍h-khì, che to̍h sī tha̍k-chheh-hōe ê bī-le̍k.

Pí-jū kóng, góa chhōa tha̍k “Gōng-chheng--á Bé Chióng-koàn tio̍h Tōa-chióng” kap “Lāu-hòe-á” ê sî, tú-tio̍h “略略仔” chit 3 jī, chim-chiok chêng-āu bûn ê ì-sù, koh hôe-sióng kap pē-bú khai-káng ê gí-kám, hoat-hiān lán ài iōng Lô-má-jī chiah siá ē chhut bô-kāng ê ì-sù. Nā siá lio̍h-lio̍h-á, to̍h sī sió-khóa-á ê ì-sù. Pí-jū kóng: Tê lio̍h-lio̍h-á sio, pak-tó͘ lio̍h-lio̍h-á thiàⁿ.

享 Nā siá chò lio̍h-lio̍h--á, to̍h kái-soat chò, “... to̍h ...”, “nā bô sè-jī to̍h ...”. Pí-jū kóng: Thiⁿ hiah-nī o͘, lio̍h-lio̍h--á to̍h ē lo̍h-hō͘--ah. Tāi-chì nā bô su-sim-á chò, lio̍h-lio̍h--á to̍h cháu-cheng--khì-ah.

Tâi-gí bûn-jī-hòa iáu teh o̍h pê kai-tōaⁿ niâ, hi-bāng khah chē iú-chì chò-hóe lâi khe-khó hiah-ê teh-beh phàng-kiàn

ê gí-liāu, lâi cheng-ka Tâi-gí sû-khò͘. Tha̍k Tâi-gí chheh

liáu-āu, it-tēng ē hoat-hiān Lô-má-jī ê lī-ek, án-ne chiū ài kín lâi o̍h Pe̍h-ōe-jī, chiah ē-tàng siak-phah chham-ka Tâi-bûn tha̍k-chheh-hōe.

指導單位

主辦單位

承辦單位

合作單位