Brannvernreglar

-For utstillarar

Alle må ta ansvar for branntryggleiken på eigen stand og området rundt.

Som arrangør har vi ansvar for branntryggleiken på plassen, vi har kompetente brannmannskap med brannbil og brannutstyr. Dyrsku’n er stor, det er mykje utstyr, mange standar og mykje folk, som kan gjera det problematisk ved utrykking inne på plassen. Det er viktig at alle utstillarane fylgjer reglane. Særleg viktig er det å halde seg innan tildelt område slik at evt. utrykkings-køyretøy kjem fram.

BRANNMANNSKAP

Brannvernleiar og brannfolka vil gå brannvernrundar på plassen under rigging av stand og under Dyrsku’n. Alle utstillarar må rette seg etter eventuelle pålegg som blir gjeve av desse. Har de spørsmål om bruk eller oppbevaring av brannfarleg utstyr/materiell – spør brannfolka om faglege råd.

RØYK-/GASSVARSLARAR OG SLØKKJEUTSTYR

Alle utstillarar må ha godkjent brannslokkar apparat på standen, på pulverapparat er kravet 6 kg ABC. Alternativt er 6 kg literskumapparat, effektivtitetsklasse 21 A.

Dersom overnatting i campingvogna på standen, skal det være montert røykvarsling i campingeininga. Dette er først og fremst for eigen tryggleik, ein røykvarslar vil varsle deg tidleg nok til at du og naboane kan koma i sikkerheit.

BRUK AV OPE ELD

Det er ikkje tillate med ope eld på plassen utan godkjenning. Grilling kan bare skje ute og etter at utstillinga er stengt for kvelden. Det skal vere minst 1 meter avstand frå telt/campingvogn. Forlat aldri ein gassgrill i drift. Bruk av kol og eingongsgrill er ikkje lovleg på Dyrskuplassen.

PROPANLEKKASJE

Dersom du oppdagar propanlekkasje, skal hovudkrana straks stengast og reguleringsventilen koplast frå flaska. Stans all bruk av open eld. Lokaliser lekkasjen, er den frå flaska, bring straks flaska vekk frå campingvogner og telt. Varsle brannvesenet.

VED BRANNTILLØP

Alle tilløp til brann må meldast til vaktene. Det er normalt brannvakter på plassen. Vår beredskapstelefon er bemanna og i direktekontakt med brannfolk. Opplys namnet ditt, kvar du er – standnamn/ nr. og kva som har hendt. Prøv å slokke og hugs å varsle dei som er truga av brann.

BRENNBART AVFALL / PAPP OG PAPIR

Det er viktig at det ikkje blir lagra brennbart avfall, spesielt papp og papir, inne på eller rundt standen. Søppelbilen vil samle inn papp, papir og plast kvar morgon. Alt svært brannfarleg materiale må fjernast.