Lox tat cub caw kuad song meung vax plak lai wa 04

HAK BAUX (2) MEUNG Si muTIEX grawng kaingNONG ku ceu (Ran tix shiao) MAN

CUB CAW JHAWP BEEN LHAK HAING PUI MEUNG, MEUNG VAX.

Si mu grawng kaing ku ceu (Ran tix shiao)

Cub caw jhawp been lhak haing meung pui vax Lum cub caw bang kum rom ting.

2013 num, khix 2-25 ngaix.

Cub caw jhawp been lhak haing Meung Vax

Mhai shiao cub jhawp been lhak haing pui me1.

2.

3.

4.

5.

ung, Meung Vax Sim uing: raoh–Pati rob rom nham Meung Vax. Gawng/nyiex – Pang Veng/ Pang Yaong.

Kak khaox kia – Krax yien yawg.

Maox luat- cub jhawp been lhak haing.

Rhang Cag- pui yuh kaing ku cub.

2

Si mu grawng kaing ku ceu (Ran tix shiao)

Haktiex baux nong (2) Meung Man Cub caw jhawp been lhak haing pui meung,

Meung Vax. Simu ggrawng kaing ( Ran tix shiao ) Grawng blawng kaing ku ceu.

Kawn rai pui meung pa koe daux Meung Vax, daux bawg yam hoik rheeng, giex kah kraing naing yuh krax tieh feen been mai: yuh krax cox khre sang haktiex, Pati Rob Rom Nham Meung Vax, thong bung cub pui meung, cub ceu pui ku ceu, cub pui krub beenli ku ceu, pui pa yuh krax yien yawg haok huan mai: pui yuh kaing ku kaux, kawn rai pui meung MeungVax, awm lox hoik krai ceu pui ku ceu 3

Cub caw jhawp been lhak haing Meung Vax

daux meung Man ku dah, mawh pa viex sidawng son sang mawh tix cub tix caw mai: giex kuang haktiex cao: tix, in kix hoik mawh T ab Rom Ting pui moh kah meung tix, pa moh kah Meung Vax tix cub.

Daux num: simu grawng kaing Meung Vax, mawh Pati Rob Rom Nham Meung Vax, pa thong kawn rai pui meung ku cub, pa kleuk tix laig daux cub caw lhak haing been haktiex, num: tix hoik dawg rheeng tee niied tix haok huan hu sivoe.

Cub caw jhawp been lhak haing pui meung Meung Vax in, mawh T ab Rom Ting pui meung ot daux haktiex Vax, pui moh kah Meung Vax mawh tix cub tix caw, mawh Pati Rob Rom Nham Meung Vax pa thong bung, son sang pon kleuk kawn rai pui meung ku ceu tix viex kah daux mai: yuh mawh cub caw pa ting ceu, son giex jhawp been haktiex tix cub. Baux ju kaing haktiex Meung Vax, son sang toh been Demogresi, kieh yuh mawh cub caw pak peung 4

Si mu grawng kaing ku ceu (Ran tix shiao)

pa ting ceu tix cub. Son sang grum kah nham rom mai: Demogresi mawh kaing bak cub caw jhawp been lhak haing pui meung Meung Vax ra grawng. 1992 num, khix 4 - 18 ngaix, hoik pon yuh bang kum rom ting daux kaung: Moeg Nu. Beeh glawm vawng Meung Vax khankix, hoik pon klawm hoik, kheu mawh rhawm rhi kawn rai pui meung Meung Vax, hoik pon lih tix kieh mawh buan son, son been kaing haktiex.

Daux cub kawn rai pui meung Meung Vax, awm pa hoik ah- kieh sidu paox, ih rhawm rhi paox, ralai joh jhan teem: paox tix, lih kieh mawh pa haok huan plak sitoe tix yuh paox meed paox tawng kah paox tix. Can cub pui ot daux beenli ku cub khankix kawx, daux kaing cox khre tix sang Meung Vax, kix viex rhawm riien rhawm haing tix laig yuh, daux baux ju been tix baux, tab rom ting Demogresi pui meung Meung Vax baox niied tix haok huan kaux cong, mawh kheu krax grum rhawm rhi kawn rai pui meung Meung Vax tix yuh, son sang tang 5

Cub caw jhawp been lhak haing Meung Vax

pon giex jhawp glawk meung cao: tix, mawh kraing naing shiang: pa ngawh pa rah tix ceu, ceu an khankix baox nie kaux cong, baox nie rug haok huan kah tete. Khaix hoik pon sang kah sibrawm pui meung Meung Vax, cub caw jhawp been lhak haing pui meung Meung Vax, baox yuh kaing been haktiex, kaing nyoi pui meung, krax moh rhawm tix yuh paox kah pui plak praix, hoik pon yuh kaing ting ceu khankix. 1989 num, khix 4 - 17 ngaix, Meung Vax guieh tix lih khaing Kungmyunit Pati Meung Man, veh kah grawng lud been guiex deuh nong, sang kah sibrawm grum rhawm pui meung (Demogresi ) viex kah been paoh krax ku plak mai: pon sang tix yuh krax yien yawg, son sang haok huan plak lah lai daux pa lhak haing tix.

Ceu pa tuk tiak ting pa prieb Meung Vax yam in, mawh grang lih haoh hum jung pui tix ngaix hoik tix ngaix, baux been yungyi ot pui, mawh baux bawg yam dah khaix, kheu ang 6

Si mu grawng kaing ku ceu (Ran tix shiao)

pon plih riang rao kaing sinax in khankix.

Baux bawg yam ot kawn rai pui meung Meung Vax daux been khraox yam in, kaing ceu pa caw tix yuh ku ceu khankix, khawn taix tix plak caw tix yaog thong jhi yien yawg pak tom: lhaong, khawn taix tix plak an, giex tix pak kah kraung naing thong jhi pa tieb tie kah tocao: tix tom: lhaong, co ca tix yuh daux pa taug mao kha rhawm rhi tix, son sang yien yawg tix haok huan mai: hu daux krax siviex pa hoik paoh daux Meung Vax, kieh pon yuh ma kaung: kah cag, krax tawng grawng cuyi pingnya naing khankix, kieh krup awm bawg yam haok huan, kieh lih yuh Meung Vax khraox daux been Demogresi pa awn. Cub caw jhawp been lhak haing pui meung Meung Vax, hawt tix yuh greem pa thong bung Pati Rob Rom Nham Meung Vax sidawng kaux cong, kaing pa yuh daux Meung Vax ku blawng, viex rhawm riien haing tix joh jhan. Grawng pa grum rhawm rhi pui meung Meung Vax in, tieb tie tom: kriem son ang lai 7

Cub caw jhawp been lhak haing Meung Vax

goh gaing, awm hoik koe riang rao cao: tix, son sang haok huan kaux cong cub caw tab rom ting, so kaoh kah can ceu pa koe daux blawng ku ceu, can pui pa pon kraix khrawm khan kix, kraix khrawm mawh tix cub, tieb tie son kaing been haktiex, kieh nhim yien haok huan daux pa grum rhawm grum rhi, daux cub pui hak tiex, son sang pon nyheet tix hu yuh ka daux been Demogresi mai: sinax been prawng see pa rah, kieh ex plih riang rao tix, son sang pon pang pon phaw kah beeh glawm kaing kawn rai pui meung Meung Vax. Cub caw jhawp been lhak haing pui meung Meung Vax, awm lox hoik nhie pa thong bung Pati Rob Rom Nham Meung Vax, daux Meung Vax ceu pui Vax, awm ang lai chix guieh kah ceu pui tang ceu, pui tang ceu khankix kawx, ang lai doh pon guieh tix khaing ceu pui Vax. Kawn rai pui meung khankix, naok riang rao pa grum rhawm rhi tix, son sang pon rheung kleuk tix ot tau mai: ralai jhak priex paox 8

Si mu grawng kaing ku ceu (Ran tix shiao)

tix, mhawm tau - caox tau, pa koe buan son mai: pa tang phi map khankix, awm pa hoik koe krax blawng, caw tix kham geu tau, ih sidu tau. Daux haktiex Meung Vax, krax blawng ting pa hu ex mai: daux baux ju pa ot kawn rai pui meung, ceu pa tuk tiak pa ting khankix, caw tix yuh daux krax kum kawng daux kaing haktiex, tawx krax keud krax sawn mai: ne raw kah paox tix, in kix mawh pa pang phaw tix yuh daux been jhawp Demogresi.

Can ceu kaing pa suh siah cub caw jhawp been lhak haing pui meung Meung Vax tix yuh khan kix, hoik mawh num: tix daux been krax blawng hoik deuh Pati Rob Ron Nham Meung Vax. Lawg ( 1 ) Grawng blawng kaing ku ceu Cub caw jhawp been haktiex pui meung Meung Vax, cub caw baux meung mai: cub caw 9

Cub caw jhawp been lhak haing Meung Vax

baux eeng mawx eeng an khankix, awm lox pa hok tat tix deuh daux simu grawng kaing, blawng kaing ku ceu, sibrawm beeh glawm pui pa viex daux mai: cub caw pa viex khankix caw tix pon tieb tiex kah son kix.

1. Cub caw jhawp been lhak haing pui meung Meung Vax cub caw baux meung mai: cub caw baux eeng mawx eeng an khankix, awm pa hoik tat tix deuh daux simu grawng kaing kah blawng kaing ku ceu, awm mhai bak deuh cub caw jhawp been lhak haing pui meung Meung Vax, caw tix hawt yuh daux been simu pa hoik tat tix deuh.

2. Beeh glawm ting pa caw cub caw baux meung mai: cub caw eeng mawx eeng an khankix tix yuh, daux been kaing haktiex, laig tix kum kawng, joh jhan laig kieh koe daux been Demogresi mai: laig tix kum kawng daux kaing haktiex.

Grawng laig tix kum kawng kaing haktiex in, mawh been kied ting ceu mai: pa jhi blawng 10

Si mu grawng kaing ku ceu (Ran tix shiao)

kaing Meung V ax. Pa tuk tiak suk sag ting plak kaing haktiex, plak lah lai, plak pingnya cuyi mai: krax ot krax koe pui, ka ang nyang tat lox, caw tix kum kawng daux bawg yam ka ang nyang phaw tix tat tud, mawh kum kawng kah ceu pa tuk tiak ting khankix, cub caw jhawp been lhak haing baux meung mai: cub caw eeng mawx eeng an, lox ah lox tang Pati Rob Rom Nham Meung Vax mai: lox tang cub caw pui meung khankix, bang kum viex pui pa koe beeh glawm daux cub caw pui meung mai: ceu pui ku ceu, pui pa dex dawt daux beenli sasana khankix, caw tix kum kawng ( phan ang mawh nan ) daux cub caw pa hoik krai plak piang caw tix tang kah kaing pa tuk tiak ting khankix, caw tix kum kawng kah.

Been pa giex jhawp Deomgresi ah ex,mawh caw tix shiao daux been num: riah simu grawng kaing Meung Vax mai: simu pa deuh eeng mawx eeng an khankix, mawh pa jhi kah been blawng kaing ting ceu, yam pang yam 11

Cub caw jhawp been lhak haing Meung Vax

phaw tix shiao, can cub lum pa koe daux Meung Vax mai: kaing yuh cao: yuh kaing pa dex dawt mai: kaing an khankix caw tix pon jhak tix tawx krax keud mai: ne raw kah kix, in mawh kaing pa pon tix yuh.

Laig tix kum kawng daux kaing been haktiex in, mawh daux kaing been haktiex, plak lah lai, plak cuyi pingnya, plak krax nyawm ot si u koe mai: krax ot krax koe pui khankix, kaing pa tuk tiak suksag ting mai: kaing tuk tiak pa laig rhawm kawn rai pui meung khankix chawk tix tawng kah, krax blawng pa koe eeng mawx eeng an mai: daux rhawm rhi pui meung pon laig viex tix kum kawng kah.

Kaing chawk cheng yuh tix tawng khankix, pon tang, pon tawx krax keud ( phan ang mawh nan ) kah krax blawng tang ceu kah cub caw num: Pati Rob Rom Nham Meung Vax mai: lum vawng Meung Vax awm pa keud pa yaox tix khankix.

3. Pui laig baux cub caw meung, baux cub 12

Si mu grawng kaing ku ceu (Ran tix shiao)

caw eeng jhawp been haktiex khankix, ka daux krax blawng ku ceu, pon laig tix kum kawng pa mawh kaing Meung Vax mai: kaing ting ceu daux eeng khankix.

4. Cub caw jhawp been lhak haing pui meung Meung Vax mai: cub caw pa viex daux eeng khankix, caw tix krai pui mhong krax blawng kaing mai: son sang hawt yuh daux been simu deuh Meung Vax. Riang rao pa koe daux cub caw pui meung pa mawh pak peung lhaong krax yungyi mai: yam yuh son sang kaux cong rhawm rhi khankix, can lum Meung Vax mai: baoh ku dah ku dee, pui pa krox yuh pa lud pa loe mai: pa sang yuh kaing laux lak pak leeing khankix, caw tix teem: pui tib tie kah.

5. Cub caw jhawp been lhak haing pui meung Meung Vax mai: cub caw pa viex baux eeng khankix, caw tix sitoe yuh tix meed tawng kah pui ku glawk ku cub. Awm pa dex pa dawt mai: pui in kix, mawh krax pa yaox mai: pa simie pui meung mawh khankix caw tix 13

Cub caw jhawp been lhak haing Meung Vax

tang. Ka piang cao: yuh kaing lum, daux lum Meung Vax tang tix tawx krax keud sawn, ne raw pa dex mai: kaing yuh kix, krax blawng yuh kaing lum Meung Vax mai: yuh kieh luan khaing been kaing nong, son sang silhao vieh kaing lum tix yuh.

6. Cub caw jhawp been lhak haing pui meung Meung Vax mai: cub caw pa viex baux eeng khankix, can pa sitoe Demogresi tab rom ku blawng mai: ka daux cub caw jhawp been haktiex pui meung Meung Vax, caw tix yuh khaw son kaing ting ceu pa rom tix yuh khankix.

7. Cub caw jhawp been lhak haing pui meungMeung Vax, cub caw jhawp been lhak haing baux meung mai: cub caw jhawp been lhak haing baux eeng khankix, daux krax blawng ku ceu, ceu pui, meung, pui meung, kaing yuh, krax tawn krax yung mai: krax ot koe, eei rhawm rhi son sang koe krax moh krax rhawm, kaing bak tieh loh ting, pa rah see mai: pa koe simu khankix, kieh mawh hawm keud 14

Si mu grawng kaing ku ceu (Ran tix shiao)

pa krup baux bawg yam, caw tix koe rhawm hain rhawm riien tix, tawx krax lhak, pao: pui tawng blawng kaing pa yuh tix.

8. Cub caw jhawp been lhak haing pui meungMeung Vax, pa viex baux meung mai: cub caw viex baux eeng khankix, been paoh siviex blawng sang hu mai: cuyi krax lhak haing, son sang haok huan plak yungyi ceu pui, caw tix giex jhawp kaux cong, Meung Vax mai: sinax cub caw tang dah, kaing haktiex, plak lah lai, simu been, pon gau pyinnya baux ju tix, krax lhak krax tawng cuyi, lig lai been yungyi, plak krax nyawm ot koe, plak klieh lin mai: plak ku ceu khankix, kleuk rom tix yuh tau, chawk cheng tix tawng mai: ralai kum pa yaox pa prieb pui, grawng kaing yuh Meung Vax krax pa ot koe pui meung haok huan, son sang pon yuh cub pui meung ku cub ku caw, co ca theen tawx pui rom tix yuh.

9.

Cub caw jhawp been lhak haing pui meung Meung Vax, cub caw eeng glawk mawx 15

Cub caw jhawp been lhak haing Meung Vax

glawk an mai: pa laig cub ku glawk khankix, jhak kia tix chawk cheng krax ot koe pui meung mai: chawk kah rhawm rhi kix, grawng sang ex haktiex ku blawng, daux pa ot koe pui meung, yuh tix tawng ka ceu pa tuk tiak ting khankix, tawx krax keud krax tawng kah cao: giex bung cub caw Meung Vax mai: daux cub caw tang dah khankix.

10.

Cub caw jhawp been lhak haing pui meung Meung Vax, cub caw pa viex baux meung mai: cub caw pa viex baux eeng ku glawk, kaux mawx tang num: kah rhawm rhi to kaux cao: tix kraix khrawm, chawk tix tawng pak peung awn mai: pak peung been, krax grawng daux meung, grawng meung plak praix, kaing haktiex, lah lai, lig lai mai: been yungyi, krax lhak krax tawng mai: kieh kix yuh tix tawng kah pinnya cuyi, son sang pon yuh kix kaing son Meung Vax, yuh tix kieh kaing chix kaing tawng kix baox haok huan ting lhaong.

11. Cub caw jhawp been lhak hain pui me16

Si mu grawng kaing ku ceu (Ran tix shiao)

ung Meung Vax, cub caw baux meung mai: cub caw baux eeng khankix, krax pang phaw Meung Vax krax yien yawg, kieh koe tix mawh tix cub tix caw ngie, awm krax blawng pa hoik jhi, son sang mawh pa pon giex jhawp kah meung cao: tix, viex rhawm haing krai kah pui ot daux meung, ot meung plak praix, pa mawh paox grawm paox grux pui ot daux cub caw ku cub, pa ot daux beenli sasana ku cub, yam yuh kaing haok huan son krax ot koe pui Meung Vax caw tix yuh krai pui tawng kah.

12. Cub caw jhawp been lhak haing pui meung Meung Vax, cub caw baux meung mai: cub caw baux eeng ku glawk khankix, caw tix yuh krax tieb tiex son pui koe pinnya, pui tawng cuyi, son sang koe akhuang kix tix pon tiem pon phaw tix yuh, grawng krax sang kah Meung Vax ku blawng, can ceu riang rao pon viex kix daux kaing ting ceu, caw tix kieh kix tawng mai: pon shiao kix kah.

13. Cub caw jhawp been lhak haing pui me17

Cub caw jhawp been lhak haing Meung Vax

ung Meung Vax, cub caw baux meung mai: cub caw baux eeng ku glawk, pa mawh grawng been son pui Meung Vax, caw tix krai pui tawng, grawng yaox rhawm keud pui meung, yuh tix tawng tang kah plak piang.

Caw tix priex khrawm tix tieb tie kah buan haok huan krax ot koe mai: pa caw kawn rai pui meung tix pon khankix, krax pa meed tix sitoe kah kawn rai pui meung, baox niied tix kieh mhawm, son sang baox nie ih pui meung rhawm rhi si mau paox tix, caw tix yuh tawx kah kix.

14. Cub caw jhawp been lhak haing pui meung Meung Vax, cub caw baux meung mai: cub caw baux eeng khankix caw tix hawt pang hawt phaw yuh been krax krub pui meung beenli kieh kix tawng, kraix khrawm pui ot daux cub caw an kix, ang guieh ceu pui, beenli caw tix pon sivat krub, sigaxbeenli daux kaing haktiex, yuh ceu tieh feen kah kaing giex jhawp kah haktiex khankix, pui meung ot daux Meung Vax, been 18

Si mu grawng kaing ku ceu (Ran tix shiao)

prim pa dawg ot pui, pa tuah kah singaix tang ingaix mhawm khankix, kieh kix yuh son sang pon yuh kix awm pa hoik yuh tix lhai lhai, tieh feen tieb kah pui yuh beenli kieh kaing haktiex suksag khankix,krax sivat krub kah beenli nong nong, yuh mai: giex kieh kaux kaux cong cong.

15. Cub caw jhawp been lhak haing pui meung Meung Vax, cub caw baux meung mai: cub caw baux eeng khankix been sitoe kah meung pui plak praix, caw tix pang phaw tix yuh.

Caw tix tang: pon yuh kah rhawm sivat ot cao: tix, giex kaux kaux cong cong daux pa nhim grawng pa sitoe tix kah pui plak praix, beeh glawm kaing yuh Meung Vax ku blawng, num: tix daux pa kaux pa cong, caw tix moh rhawm kleuk tix yuh mai: pui meung ot rawb reem tix, tang pon tat kah rhawm rhi sivat tix, son sang pon ot tau daux pa yien yawg, daux grawng ot cao: pui tix kaux, ang khaw tix laig suksag mai: ang hoek krox aux, aux hu krox nawh ang koe, ....... ]] phan laig hoek tix krox ex, ex kawx tee 19

Cub caw jhawp been lhak haing Meung Vax

deeh tieh feen }} awm hoik koe been yuh nan, caw tix hawt yuh awm an.

16. Cub caw jhawpbeen lhak haing pui meung Meung Vax, cub caw baux meung mai: cub caw baux eeng khankix cub caw T ab Rom Ting pui meung, num: kah pa tang siyox, been baux ju Meung Vax dix, daux meung Man mai: krax grawng been mawh baux yam in, caw tix khrawm yuh tix tawng sidawng.

17. Cub caw jhawp been lhak haing pui meung Meung Vax, cub caw baux meung mai: cub caw baux eeng khankix sinax daux cub caw mai: paox sitoe tix hu ing, ralai kum kah kaing pa yaox pa prieb tix mai: lai ling yuh tom: tawng tix, pak peung kaing tuk tiak suksagpa sidu awm paox tix khankix caw tix sang lang hoik.

20

Si mu grawng kaing ku ceu (Ran tix shiao)

Lawg ( 2 ) Simu yuh cub caw ku blawng 18. Cub caw jhawp been lhak haing pui meung Meung Vax, pang tix deuh kah cub caw baux meung mai: cub caw baux eeng. Cub caw jhawp been lhak haing pui meung Meung Vax, cub caw baux meung mawh pa thong krax, pa sitoe cub caw eeng mai: cub caw greem: nawh khankix.

19. Cub caw jhawp been lhak haing pui meung, pang tix yuh kah cub Pati Rob Rom Nham Meung Vax, cub caw pui meung khankix, tang to son pui meung ku cub mai: tang to pui yuh kaing beenli mai: pui pa khaw tix viex khankix.

Cub caw jhawp been lhak haing pui meung Meung Vax, yam pang kah cub caw baux eeng khankix, mawh kheu ang baux eeng sidu awm paox, tat tix yuh kah pa awm yuh cub caw baux meung.

21

Cub caw jhawp been lhak haing Meung Vax

20. Grawng blawng k aing an ku ceu, pui pa rieb tix joh, pa hoik koe ju ( 18 ) num, daux cub caw pui meung, pui pa yuh kaing cub mawx cub an, pui yuh kaing plak pinnya cuyi, pui yuh kaing sasana khankix, ang guieh ceu pui ang guieh sime - bun, ang guieh kah been viex rhawm tix krub, pui ao: min ao: ceu blawng mawx blawng an, pui koe rhawm moh meung tix ceu pui tix, can pui pa moh kah Meung Vax, awm pa hoik kum cub caw jhawp been lhak haing pui meung Meung Vax, koe akhuang tix pon laig daux cub caw jhawp been lhak haing pui meung Meung Vax. T ang to cao: pui tix kaux, phan cub caw jhawp been lhak haing pui meung ghaok kah pui mawx pon tix laig. Cub caw pa viex baux eeng khankix kawx, pon akhuang tiag tix yuh awm pa hoik tat plak piang in.

21. Cub caw jhawp been lhak haing pui meung Meung Vax, cub lum mai: pui viex daux cub caw baux meung (phan ang mawh nan) cub caw baux eeng khankix, koe beeh glawm tix hawt 22

Si mu grawng kaing ku ceu (Ran tix shiao)

yuh awm pa koe daux been simu grawng kaing in.

22. Cub caw jhawp been lhak haing pui meung Meung Vax, cub caw baux eeng khankix, lox tat cub caw son meung, cub caw greem: baux eeng khankix, koe beeh glawm tix hawt yuh awm lox hoik tat cub caw plak piang.

23. Cub caw jhawp been lhak haing pui meung Meung Vax, cub caw baux meung mai: cub caw baux eeng khankix caw tix moh kah Meung Vax, moh kah meung tix, joh jhan kah pa thong bung Pati Rob Rom Nham Meung Vax mai: kaing pa yuh khankix. Caw tix priex rien kah hoik grum rhawm rhi pui meung mai: son sang mawh Meung Vax tix cub tix cum:, Num: simu grawng kaing Meung Vax mai: simu pa hoik tat tixdeuh khankix. T ang to pui pa viex bawg in, tang koe akhuang, daux cub, daux caw koe sibrawm pon laig tix kum kawng kaing been haktiex, sitoe tix meed tawng kah pui meung, rhawm keud mai: pa simie kix mawh khankix, 23

Cub caw jhawp been lhak haing Meung Vax

caw tix tawng, pon tang kah. Caw tix kum kawng mai: yuh kaing daux cub caw pa viex tix.

24. Cub caw jhawp been lhak haing pui meung Meung Vax, cub caw baux meung mai: cub caw baux eeng khankix, lox pa tat daux bang kum, phan pui haok bang kum tix plak khaw rhawm, hoik mawh lox kriem, cub caw mai: pui haok bang kum koe beeh glawm tix hawt lox tat bang kum. Phan ang sidu pa keud pa yaox, caw tix hawt greem: num: simu, rhawm deuh kaux cao: mawx, koe akhuang tix priex plih pui mhong.

25. Cub caw jhwap been lhak haing pui meung Meung Vax, Pui laig cub caw baux meung mai: cub caw baux eeng khankix, ka daux bang kum cub caw koe akhuang tix sau salak, koe akhuang tix ghaok mai: koe akhuang laig tix laug. Kaing pa yuh daux cub caw tix, pon tix ne raw mai: koe akhuang tix tawx krax keud.

26. Cub caw jhawp been lhak haing pui meung Meung Vax, cub caw mai: tang to pui viex 24

Si mu grawng kaing ku ceu (Ran tix shiao)

daux cub caw baux meung mai: cub caw baux eeng khankix, pon plih rhawm keud pa yaox tix khaing daux bang kum mai: daux cub caw, blawng krax been kaing pa dex dawt mai: Meung Vax, kaing pa ting ceu daux baux eeng, koe akhuang viex tix laig kum: daux bang kum. Ka piang kaing lum vawng mai: pui yuh kaing Meung Vax pon tix tawx krax keud mai: ne raw, pui pa lud tieh thiang kah simu grawng kaing koe akhuang tix chawk cheng mai: plih kah.

27. Cub caw jhawp been lhak haing pui meung Meung Vax, cub caw mai: pui mawx ang ah, pa viex daux cub caw baux meung mai: cub caw baux eeng khankix, koe akhuang pao: grawng lih tix khaing daux cub caw.

28. Cub caw mai: tang to kaux pui pa laig daux cub caw baux meung mai: cub caw baux eeng, daux cub caw jhawp been lhak haing pui meung Meung Vax, phan nawh rug sidaing krax phit lud kah tieh thiang tix simu grawng kaing mai: (phan ang mawh nan) lox kum hoik 25

Cub caw jhawp been lhak haing Meung Vax

tat cub caw jhawp been pui meung Meung Vax, koe kah piang krax phit nawh tawx satix, pon plih nawh lih khaing daux cubcaw baux meung (phan ang mawh nan) khaing cub caw baux eeng.

Daux cub caw ( phan ang mawh nan ) tang to kaux pui pa kham kah phimap phit lud an kix, phan ang fah rhawm kah, caw tix koe akhuang tix tang, kieh deeh ciied kah.

Lawg ( 3 ) Cub caw baux meung 29. Hawt kah bawg mawx bawg an, cub caw, simin kaux pui pa viex daux cub baux meung, daux cub caw jhawp num: been kaing lhak haing pui meung Meung Vax mai: jung pui pa laug pui hun, caw tix mawh pa hoik ciied khaw rhawm daux bang kum cao: jhawp kaing: cub caw baux meung, tat lox daux bang kum cub caw pa viex sijheeng.

Hawt kah bawg mawx bawg an, daux 26

Si mu grawng kaing ku ceu (Ran tix shiao)

bawg yam tat kah pa caw tix loh mai: baox naok kah pui daux cub caw bang kum cao: jhawp kaing: yam in, kum kawng tix tat daux cub caw pa viex sijheeng.

30. Baux bawg yam giex cub caw baux meung kah cub caw jhawp been lhak haing pui meung Meung Vax mawh (5) num. Phan prieb ceu pa tang siyox khankix, cub caw pa giex sijheeng ( phan ang mawh nan ) tat kah daux pa grum rhawm jung pui laig daux cub caw loe son tix son, pon tix baox naok bawg yam. Daux bawg yam tix bawg ngie, phan pon tix laug, caw tix baox teei beeh glawm tix yuh.

31. Cub caw jhawp been lhak haing pui meung Meung Vax, pon tix yuh cao: teei beeh glawm cao: jhawp kaing: baux meung tix kaux, cao: teei beeh glawm jhawp kaing: - 2, mawh miex kaux mai: cao: bung kaing ku ceu tix kaux mai: cao: bung kaing dia ceu mawh miex kaux.

32. Bang kum cub caw baux meung, cub caw jhawp been lhak haing pui meung Meung 27

Cub caw jhawp been lhak haing Meung Vax

Vax, yuh tix num tix bawg. Bang kum: cub caw viex sijheeng, chix tix kok yuh awm pa koe nawh.

33. Sibrawm akhuang bang kum cub caw baux meung cub caw jhawp been lhak haing pui meung Meung Vax mawh in kix plak greem:.

(1) Jhak tix giex kuang son sang hawt yuh mai: cox kah been simu grawng kaing cub caw jhawp been lhak haing pui meung Meung Vax. (2) Laug kah cao: jhawp kaing:, cao: jhawp kaing:-2, cao: bung kaing ku ceu mai: cub caw pa viex sijheeng daux cub caw baux meung.

(3) Ciied, nghiet kah lox lai tang cub caw viex sijheeng khankix.

(4) Kum kawng tat kah blawng jhi kaing ting mai: beeh glawm cub cawkhankix.

(5) Kum kawng tix tawx krax keud kah krax blawng jhi kaing pa ting ceu Meung Vax. 28

Si mu grawng kaing ku ceu (Ran tix shiao)

34. Yuh kah cub caw viex sijheeng, thong kix yuh kaing cub caw baux meung, cub caw naih num: been haktiex pui meung Meung Vax. Yuh cub caw viex sijheeng baux meung kah cao: jhawp kaing:, cao: jhawp kaing:- 2, cao: bung kaing ku ceu mai: cub caw pa viex sijheeng khankix. T ang to pui dha tix laug khankix, cub caw jhawp been lhak haing pui meung Meung Vax, daux cub caw baux meung, pui ot daux cub daux caw khankix, pui meung khankix mai: pui ku cub ku caw, tang kah ceu kaux kix, caw tix laug daux bang kum: rom ting cub caw baux meung.

35. Cub caw baux meung, cub caw jhawp been lhak haingpui meung, koe sibrawm tix pon yuh kaing in kix plak greem:.

(1) Paoh deeh bleeh simu grawng kaing mai: jhakjhawp kah pang phaw tix yuh simu gut kang cub caw jhaw p been haktiex pui meung Meung Vax. (2) Thong bung tix kok bang kum rom 29

Cub caw jhawp been lhak haing Meung Vax

ting baux meung, cub caw jhawp been lhak haing pui meung Meung Vax, ka: ang nyang yuh bang kum rom ting bawg ( 1 ) ku bawg, pui viex daux cub caw khawm uik dha tix yuh bang kum, laug kah pui pa caw tix ngawm giex jhawp bang kum, son sang thong bung bang kum rom ting bawg (1).

(3) Giex jhawp jhak kia kah pang phaw tix yuh simu grawng kaing cub caw jhawp been lhak haing pui meung Meung Vax. (4) Pang phaw tix hawt yuh lox hoik tat bang kum cub caw baux meung.

(5) Daux bawg yam laux bang kum rom ting cub caw baux meung, lai pa tang pa tawx krax keud pa ting ceu kah Pati Rob Rom Nham Meung Vax mai: vawng pui meung Meung Vax, caw tix ciied tat rug.

30

Si mu grawng kaing ku ceu (Ran tix shiao)

(6) Awm lai tang cao: bung kaing ku ceu, laug kah cao: bung kaing ku ceu ra kaux tix kaux ( phan )plih lih.

(7) Pon tix tat lox yuh cub caw pa yuh kaing, cox tix lai: loh mai: ghaok tix tawx beeh glawm cao: giex kaing ( phan... ) plih lih khaing daux cub caw baux meung, cub caw jhawp beenlhak haing pui meung Meung Vax. 36. Cao: jhawp kaing: baux meung, cub caw jhawp been lhak haing pui meung Meung Vax, thong bung tix yuh kaing ting ceu pa koe daux cub caw ku ngaix, caw tix sang lang kah kaing cub caw viex sijheeng ku ngaix, cao: jhawp kaing: -2 mai: cao: bung kaing ku ceu, caw tix teem: kaing yuh cao: jhawp kaing:.

37. Beeh glawm cao: bung kaing ku ceu ra kaux tix kaux daux cub caw baux meung, cub caw jhawp been lhak haing pui meung Meung Vax, yuh cub caw kah pui tix blah, yuh cub caw 31

Cub caw jhawp been lhak haing Meung Vax

plak kaing beenli ceu pui meung khankix, greem: kaing thong bung cao: bung kaing ku ceu, cao: bung kaing ku ceu ra kaux tix kaux caw tix laig teem: kah.

38. Koe kah krax krawng mai: kaing, son sang pon yuh kaing lum tix blah, pon tix paoh lum yuh cub caw, ka daux lox pa hoik tat bang kum cub caw giex viex sijheeng baux meung, cub caw jhawp been lhak haing pui meung Meung Vax. Lawg ( 4 ) Cub caw baux eeng 39. Cub caw pa viex daux cub caw baux eeng ku bawg, tang to cub caw miex kaux mai: pui pa viex khankix, cub caw plak piang, pa mawh cub caw viex baux eeng sjheeng, caw tix kum tix tat. Ka daux baux bawg yam baux eeng ku bawg, koe kah cub caw, tang to cub caw mai: pui viex miex kaux khankix, phan 32

Si mu grawng kaing ku ceu (Ran tix shiao)

simie tix loh, cub caw baux eeng bawg an kix, pon kum: tix tat.

40. Cub caw jhawp been lhak haing pui meung Meung Vax, cub baux kaung:, veng, veng nong khankix, baux bawg yam beeh glawm kaing tix bawg mawh ( 5 ) num. Phan pui baox deeh laug, caw tix baox pon teei beeh glawm.

41. Cub caw jhawp been lhak haing pui meung Meung Vax, pang cub caw eeng mawx eeng an kah cao: jhawp kaing:, cao: jhawp kaing: - 2 tix blah, cao: bung kaing keu ceu (1) kaux. .

42. Cub caw jhawp been lhak haing pui meung Meung Vax, cub caw eeng mawx eeng an khankix caw tix yuh bang kum rom, tix num (1) bawg.

43. Cub caw jhawp been lhak haing pui meung Meung Vax, bang kum rom cub caw baux eeng khankix, koe akhuang tix pon yuh kaing pa koe plak greem: in kix33

Cub caw jhawp been lhak haing Meung Vax

(1)Laug ghaok kah cao: jhawp kaing:, cao: jhawp kaing:-2, cao: bung ka ing ku ceu mai: pui laig daux cub caw khankix.

(2) Lai tang cub caw viex sijheeng bawg an, caw tix ciied nghiet tat rug.

(3) Kum kawng grawng lox tat bang kum rom, bawg an khankix.

(4) Kaing ting ceu pa dex dawt mai: Meung Vax, pon tix chawk cheng tix tawng, ne raw mai: tang krax keud.

44. Cub caw baux eeng, cub caw jhawp been lhak haing pui meung Meung Vax, yuh cub caw lum pa viex sijheeng, thong tix yuh kum mai: pon tix yuh kaing ku ngaix.

Cub caw pui giex sijheeng, yuh cub caw kah cao: jhawp kaing: baux eeng, cao: jhawp kaing: - 2, cao: bung kaing ku ceu mai: cub caw khankix, ceu kaux tang to pui dha tix laug khankix, kum cub caw pa viex mai: pui meung, pui yuh kaing plak sasana, ghaok laug plaik lox 34

Si mu grawng kaing ku ceu (Ran tix shiao)

bang kum rom, yuh cub caw baux eeng pa viex sijheeng kah.

45. Cub caw viex sijheeng baux eeng, daux cub caw jhawp been lhak haing pui meung Meung Vax, pon akhuang tix yuh kaing in kix pa koe plak greem:(1) Thong bung tix yuh bang kum rom baux eeng khankix.

(2) Beeh glawm pa hoik tat daux simu grawng kaing cub caw jhawp been lhak haing pui meung Meung Vax mai: lox hoik tat cub cawbaux meung son meung, lox tat cubcaw plak piang son eeng khankix kraix khrawm pang phaw tix yuh.

(3) Hawt yuh lox hoik tat bang kum rom cub caw baux eeng khankix.

(4) Daux sinax bang kum rom baux eeng, lox tang ting ceu, cub pa sidu glawk awm baux eeng, kum kawng tix tat rug.

(5) Awm lox plaik cao: bung kaing ku 35

Cub caw jhawp been lhak haing Meung Vax

ceu, cao:bung kaing ku ceu ra kaux tix kaux, ghaok(phan) tik. T at lox kah grawng naok tix yuh cub caw baux eeng mai: ghaok (phan) tik kah cao: giex kaing tang dah khankix.

46. Cub caw jhawp been lhak haing pui meung Meung Vax, cao: jhawp kaing:, cao: jhawp kaing: - 2, cao: bung kaing ku ceu baux glawk mawx glawk an khankix, kok bang kum cao: jhawp kaing:, thong bung tix sang lang kaing ting ceu cub caw viex sijheeng ku ngaix, tat deuh kah bawg yam, krax grawng kaing pa yuh khankix, caw tix deeh pawk, tawx hoek kah pa sidu glawk baux eeng khankix.

47. Cub caw jhawp been lhak haing pui meung Meung Vax, cub caw eeng mawx eeng an, koe kah grawng kaing, caw tix pon tawx beeh glawm cao: bung kaing ku ceu ra kaux tix kaux mai: teem: kah cao: bung kaing ku ceu.

48. Baux kaung:, veng, veng nong khanix, pon tix tawx beeh glawm cao: bung kaing lum 36

Si mu grawng kaing ku ceu (Ran tix shiao)

mai: cao: bung kaing lum ra kaux tix kaux kah kaux mawx kaux an. Paoh tix deuh lum tang dah khankix, mawh kheu cud cha son grawng kaing cub caw baux mawx baux an, daux lox pa kum cub caw viex sijheeng baux mawx baux an tix tat, tang kah cub caw plak piang, pon tix yuh daux akhuang pa sidu rhawm kix.

49. Cub caw jhawp been lhak haing pui meung Meung Vax, cao: jhawp kaing: baux meung, cao: jhawp kaing: baux eeng khankix, caw tix thong bung kaing cub caw viex sijheeng glawk mawx glawk an, cao: jhawp kaing: - 2, cao: bung kaing ku ceu, caw tix joh jhan teem: kaing yuh cao: jhawp kaing:. Yuh bang kum, tat kah kaing ting ceu cub caw viex sijheeng khankix ku ngaix.

50. Bang kum cao: jhawp kaing:, awm hoik ap cub caw viex sijheeng beeh glawm, caw tix kok bang kum rom dha tix yuh son bawg khaix.

Meung Man, haktiex baux nong (2) Meung 37

Cub caw jhawp been lhak haing Meung Vax

Vax cub caw jhawp been lhak haing, cub caw pa cox khre bang kum rom ting bawg ( 2 ) pa tat rug kriem. Simu grawng kaing in, mawh cub caw Pati Rob Rom Nham Meung Vax pa hoik ciied tix tat rug kriem daux bang kum 2012 num, khix 6 - 17 ngaix ( ngaix phuan ).

Cao: jhawp kaing: Cub caw jhawp been lhak haing pui meung Meung Vax, Lum cub caw bang kum rom ting bawg (2), Meung Vax. Haktiex baux nong -2, Meung Man. 2012 num, khix 6 - 15 ngaix.

38

Si mu grawng kaing ku ceu (Ran tix shiao)

39