El pigazu, una vieyera saludable

La Federación Asturiana de Conceyos llanzó va yá un tiempu un proyectu en collaboración cola Conseyería de Salú que lleva por nome No me llames soledad, col envís de promover una vieyera activa y con salú pa los nuesos mayores y facer visibles les situaciones de soledá qu’afecten a les persones d’edá avanzada. Ente les iniciatives qu’esti proyectu tan guapu desendolca ta la convocatoria d’un concursu de rellatos sobre’l procesu d’avieyar o vivir en soledá como nuedu temáticu. Esto cuntó, amás, col sofitu de les Conceyalíes de Servicios Sociales de los conceyos asturianos.

A esti concursu, destináu a persones mayores de 65 años, presentóse un total de cincuenta obres. El rellatu del escritor Xuan Miyar, vecín de Xixón (anque ye natural de Seloriu), foi’l que resultó finalmente ganador. Ye un testu escritu n’asturianu, que lleva por títulu El pigazu, y que se centra nuna escena cotidiana d’un home que, mientres paez apigazar énte la televisión del so salón, remembra los tiempos de la so mocedá cola muyer, que ta mirándolu.

Xuan Miyar, con 69 años, representa de bona manera lo qu’esta iniciativa de la Federación Asturiana de Conceyos pretende motivar. Ello ye que Miyar descubre esta faceta de so, hasta entós atapecida en dalgún requexu del so interior: la capacidá pa escribir rellatos na vieyera, calteniendo vezos activos dempués de munchos años dedicaos a trabayar nos autobuses. L’autor escribe tamién nel diariu dixital de Villaviciosa, villaviciosahermosa.com, onde collabora de manera avezada con testos de calter lliterariu dende l’añu 2016. Amás, ye un reconocíu activista llingüísticu que milita na asociación Iniciativa pol Asturianu.

Tres ganar l’escritor esti concursu de rellatos, la Federación Asturiana de Conceyos propúnxose llevar El pigazu a la gran pantalla. Esta nueva iniciativa nacía col envís de que la historia nun quedara namás nel papel y tuviera, d’esta forma, la so merecida pieza cinematográfica acordies cola so calidá lliteraria.

Pa la puesta n’escena d’El Pigazu, Cuatro

Gotes Producciones encargóse de la producción y realización del curtiumetraxe que, tres d’un casting, cuntó coles actuaciones de los actores Lluis Antón González nel papel de Pepe y Carmen Gloria García nel de Dulia.

La producción d’esta pieza supunxo un trabayu bien duru, col oxetivu de componer una obra col mayor averamientu posible a la realidá lliteraria y cola busca de llocalizaciones que fueran asemeyaes a les presentaes nel rellatu. Pa ello, l’equipu de grabación movióse hasta’l valle de Turón, nel conceyu de Mieres, onde’l personal de producción alcontró una casa que representaba vierbu a vierbu lo narrao por Xuan Miyar nel so rellatu. Tratábase d’una casa de pueblu tradicional, pero remocicada y habilitada pa usu de vivienda con vistes al valle y que daba la posibilidá de desendolcar toles escenes de manera óptima, al mesmu tiempu qu’ufría la posibilidá d’amosar la bayura de la cultura y el paisaxe asturianos.

El rodaxe d’El Pigazu desenvolvióse asina nesti allugamientu a lo llargo de dellos díes, nun ambiente de trabayu agradable nel que los actores amosaron una profesionalidá induldable cola dirección del equipu de Cuatro Gotes Producciones y con un resultáu escelente, que queda espeyáu nel trescursu del propiu curtiumetraxe.

Sicasí, el trabayu nun aparaba ehí. Tres la correspondiente grabación, mesmo l’equipu como los actores treslladáronse al estudiu de Xixón pa la grabación de les voces, yá que ye una pieza que namás cunta con voces n’off, y que se fixo nuna xornada. A lo último, llegó’l momentu que naide ve, pero que quiciás seya ún de los más importantes: el montaxe. Asina, per dellos díes l’equipu de Cuatro Gotes dedicó’l tiempu a facer un montaxe cuidáu qu’amirara por una representación emotiva de la obra.

El pigazu, con rellatu de Xuan Miyar y entamáu por Cuatro Gotes Producciones, ye la meyor representación d’esi proyectu qu’anició la Federación Asturiana de Conceyos.