Literary booklet 2015

Ang misteryo sa likod kang mga ngirit ni Bingka Ni E/C Jose Mico C. Tambalo Sa pagbutlak kang adlaw, abaw diyan dun tana Ga sagi ka ngirit, itsura na daw bruha May ginakaptan nga papel kag anang ginabasa Kag maglumpat-lumpat nga daw nakatumar marijuana.

“Ay abaw Bingka, na ano ikaw? Ano natabo kanimo?”

Pamangkot ni Nanay samtang galibog ana nga ulo Pero si Bingka wara nagsabat, naghipos lang, nagpakuno-kuno Para ‘di mahalata ang makaduruda na nga opisyo.

“Bingka pagsabat daan, palukpan ko guid bagul mo!”

“Oki ah,” sabat ni Bingka, “pero ermat, kalma lang dughan mo” “Nagdaug kita sa lotto, lima ka milyon kag may paaman nga kaldero!”

“Hambala si tatay claim ta run ang prize, tara let’s go!”

Kag si ermat daw mapatay guid sa kasadya Nagpin-ot ang dughan kag nabudlayan mag-ginhawa Daw ginakulang sa hangin kag nagaparamula Daw atakehon kang high blood nga daw nagutman sangka semana.

“Bingka, my daughter, manggaranon dun kita!”

“Yes mother earth, goodness! Mapa-party dun guid ta!”

“League of Legends ang concept, Clash of Clans kag DOTA” “Sosyalon ta guid ang handa, puro cosplayer mga bisita.”

Sa sobra nga kalipay daw mabuang guid si Bingka, Kay maabot dun ang adlaw kang andang ginahulat nga grasya Milyones ang blessing, kag may free nga kaldero pa ‘Mu ra nga pwerti guid anang ngirit nga daw sa piranha.