RETNINGSLINER OG PRAKTISERING AV FORVALTNINGA
Brattefjell-Vindeggen landskapsvernområde er delt inn i 3 sonekategoriar: Vernesone, brukssone og kulturlandskapssone. Det er utarbeidd retningsliner for handsaming av ulike sakstypar knytt til kvar enkel sone. Det betyr altså at verneforskrifta gjeld likt for alle sonane, men at forvaltningspraksisen kan vera ulik. Avgrensing av sonene går fram av vedlegg 2.
Vernesone (Sone 1) Vernesona omfattar dei sentrale høgfjell-/fjellskogområda. Her finst villmarksprega område med få spor etter menneskelege inngrep. Store verneverdiar ligg her. Områda er særleg viktige som leveområde for villreinen både som beite-, trekk- og kalvingsområde. I høgfjellet finn ein viktige vinterbeiteområde for villreinen. Kvar rein bør om vinteren ha om lag 1 km2 beiteareal i høgfjellet, med andre ord er vinterbeite flaskehalsen for villreinstamma. Overgangssona mellom høgfjell og fjellskog er også særlig viktig i samband med kalving og fostringsflokkane sitt vårbeite. Høgfjellet i Brattefjell-Vindeggen inneheld i dag ein rik fauna. Med unnatak av jerv og fjellrev finst alle artar som inngår i eit høgfjellsøkosystem. Overgangssona mellom skog og fjell er også særleg artsrik med representantar frå to økosystem. Den gamle fjellskogen der gran i mange høve dannar skoggrense, er svært artsrik og viktig i samanheng med vern av biologisk mangfald.
Forvaltningsmål for vernesona – Vernesona skal oppretthaldast som eit verdifullt naturområde rikt på biologisk mangfald. – Bereevna for villrein skal oppretthaldast på dagens nivå ved å taka vare på viktige beiteog kalvingsområde. – Ein skal vere særleg restriktiv i høve til å dispensere for nye tiltak/anlegg og motorferdsel i Vernesona. – Vernesona skal bevarast utan ny tilrettelegging for skigåing og fotturisme. – Hausting i form av jakt, fangst og fiske skal kunne halde fram i Vernesona som tidlegare.
Brukssone (Sone 2) Brukssona omfattar område som vert nytta i samband med jordbruk, skogbruk og husdyrhald, som ikkje er med i kulturlandskapssona. Denne sona er definert som element i det grønfarga området (det vil seie fjellskogområda) på eit N50-kart. Brukssona omfattar og tyngre tilrettelagte stiar, godkjente merka skiløyper, kjøretrasear og vegane inn til dei regulerte vatna Sandsetvatn, Skjesvatn og Vindsjåen. Brukssona har stor verdi for fjellgardane rundt Brattefjell-Vindeggen, og det er her vi finn potensial for framtidig verdiskaping. Brukssona omfattar i hovudsak områda som i dag er nytta til ekstensive driftsformer i landbruket m.a. husdyrbeite, skogsdrift og jordbruk. Dei fleste driftshusværa ligg i brukssona, i tillegg ligg òg fleire driftshusvære innanfor kulturlandskapssona. Brukssona er einskilde stader viktige som leveområde for villrein og anna vilt i heile eller delar av året.
34