thrift shop (Ni Putu Asriani Putri

Satua Cutet

thrift shop

Ni Putu Asriani Putri

“Lakar kija ento Plug?

Semengan jeg suba nyetil,”

serasa kondén kedat matan

ainé I Kaplug saget suba

mapayas rapi.

“B

éh mémé petakoné, kéné suba bagusné tiang, lén tekén magaé kija men tiang bin?” Ngebris kedék méméné, “Hahaha, sajan yoh Plug kija men cai bin, nah kemu malu mabakti ka sanggah ingetang nyakupang lima satondén majalan, suba kéto nasiné suba gantung mémé di motoré apang tusing ensap cai ngaba cara dugas ibi.”

Makenyem ngenjor I Kaplug, “Mih mémén tiangé baik sajan, ija bin tiang ngalih mémé cara kéné bin.” Ngadésem méméné, “Bihh perjani kéto mamunyi, nahh lamun kéto adéng-adéng bénjep di jalan, lakar kalin mémé malu ka carik ngalih babiah.”

Disubané pragat makejang I Kaplug laut majalan magaé, pejalan motorné adéng-adéng pesan boya ja krana suud hujan jalané belig ané makada ia adéngadéng, nanging krana motorné motor tua, mimbuh tusing taén piarana. Suba liwat tengan jam neked masih I Kaplug di kantorné satondén ia tuun uli motorné I Kaplug misi masuluh di kaca spioné ngamikmik ia padidina.

“Pihh kéné bagus awaké dedari dija maan bakat kejitin sing kal léb,” sedek iteh masuluh teka timpalné kedék uli duri, “méméh hahaha kéto gén gaginan cai Plug, bagus dong suba bagus sakéwala cai resem kéné jeneng motor masusut sing taén, jeg bok gén prétél cai.”

“Iri gén cai Plis, semengan cai suba ngidang ngawalék nok heran ati bana.”

“Ngudyang cang iri? Soléh-soléh gén cai hahaha... kéné-kéné Plug cang nak pedalem sebenarné ngajak ci, tolih ci naé motor ci suba jelék mimbuh sing taén masusut sing lek ci nyén ngandéng céwék?”

Gedeg basangné I Kaplug semengan suba walékna kedenga baong bajuné I Cuplis.

“Kénkén maksud cainé Plis? Ada gén orang ci semengan mai mejaguran mih.”

“Wééé... wééé santai nak malu jeg semengan suba ngajak majaguran, cang ngomong kéto ulian lakar ngajak ci berbisnis, ané jani bisnisné sangat

menjanjikan sing dot ci motoré pang luungan bindik? Sing dot ci céwék-céwék pang neket jak cai men suba ci kayangné liu ngelah pis.”

Mesaut ngambrés I Kaplug, “Nyak lah ngudiang sing, men bisnis cara kénkén modélné menjanjikan?”

“Ci kal mejoh-johan to ngomong jak cang? Nu ci gedeg? Men gedeg buung cang nyelasang.”

Matungked bangkiang I Kaplug maekin I Cuplis, “Nah-nah bisnis apa ané orahang ci to?”

“Né nawang ci? Ené cara kéné madan thrift shop.”

Seken nylektekang I Kaplug nolih HP né Cuplis, “apa to maksudné thrift shop?”

“Thrift shop ento iraga ngadep barang-barang bekas biasané ané booming jaman jani to anak ngadep baju bekas.”

“Méméh déwa ratu ada anak nyak meli baju bekas nyen Plis?”

“Jelas ada lah liu nak nékéto jani lais maseluk......”

Kondén pegat I Cuplis mamunyi sagét suba nyetater motor I Kaplug.

“Lakar kija cai, adi énggal-énggal? Tondén cang suud nyelasang.”

“Nah bénjep bin télfon cang ci.”

Di jalané I Cuplis kenyem-kenyem liang asané kenehné ngemikmik ia padidina, “mimih yin saja cara kéto, énggal awaké sugih liu ngelah pis, ngudiang belog-belogan iba ling pidan magaé sales panas-panasan di jalan, hahaha jani ba awaké kal sugih mendadak baju bekas liu di jumah ento kal adep icang.”

Tusing marasa sagét I Kaplug suba jumah, ané jani makejang penganggoné gebura baju ané bekas-bekas suba tusing maanggon punduhanga, tusing ja baju ia dogén nganti neked baju bapan méméné jemaka lakar fotona uploadna ka instagram. Mara teka méméné uli carik nelik méméné nepukin I Kaplug ngura baju.

Wayan Jengki Sunarta

“Wééé cai ngudiang né? Ngudiang baju ura cai? Penganggon mémé suba apik-apik gebur cai, sajan jelema sing ngelah gaé cai né.”

“Endén malu mé.. eda mémé énggalan mamedih, né baju makejang lakar adep tiang, nak suba aluh jani carané maan pipis, madagang baju bekas tinggal upload kirim ka instagram kirim ka facebook jeg liu anaké meli.”

Mesaut bangras méméné, “Apa kal orahang ci to? Ngudiang baju bekas adep cai? Kadén ci ulah aluh kéto nekang hasil, jeg cara jelema belog-belogan, pokokné apikin bin baju méméné, jeg selegan apa iba nyemak gaé tetegan awaké apang seken maan nepuk hasil.”

“Nah pokokné mémé siep gén eda lebian munyi, tolih gén nyanan mémé pasti kal bangga ajak tiang.” Méméné tusing masaut basangné suba gedeg, bandingan tekén ia masauh munyi ané tidong-tidong adénan ia magedi.

Kacerita ané jani suba ada limang dina bajuné I Kaplug tusing ada anak meli, marasa déwékné uluk-uluka lantas I Kaplug ka umahné I Cuplis.

“Cupliss.... Cuplisss pesu cai énggalan.”

Kauk-kauk I Kaplug di rurungé, tondén ada limang menit sagétang suba pesu I Cuplis.

“Kénkén Plug? Ada penting apa ci tumbén ka umah icang.”

Gedeg basangné I Kaplug ditu lantas ia ngedeng baong bajuné I Cuplis sambilanga nuding-nuding muané Cuplis.

“Wé jelema demen nguluk-nguluk ci o? Cai ngorahang madagang thrift shop liu lakar nak meli, neked jani suba limang dina apa sing ada not.”

I Cuplis kesyab milu ia masaut jengat, “wéé cai jelema lengeh to, dugasné kondén icang suud nyelasang ngudiang cai magedi? Kaden ci baju bekas jelékjelék di jumah to adep? Nak iraga yin lakar ngadep thrift shop, yén dot laku ci harus meli baju malu, yén ngidang bajuné bermérk beli anggon adep bin, kéwala sing ja baju baru bermérek beli, anak baju bekas kéwala sing dadi masih ngawagin harus jenengné luung apang kedas. Yén ané kéto adep mara kanggo, patuh cara jani yén ci ngelah baju merék Uniqlo suba taén anggon cai,

jani makeneh ci lakar ngadep umbahan malu pang kedas pang luung masih jenengné ané kéto mara kanggo, sing ja ngawagin anaké ngadep baju jelema lengeh ci nok.”

Masaut ngenduk I Kaplug lantas ngelésang limané di baong bajuné I Cuplis, “Mimih déwa ratu adi mara cai ngomong? Jeg dadi mamocol awaké jani, bakat grasa-grusu makejang sing payu. Di kantor bakat suud awaké magaé ulian nguberin pipis tusing ngenah, men kénkén cang jani né plis?”

“Mani-mani dingehan malu munyiné, yén suba suud anaké ngomong mara berpikir mara lantas bertindak, kondén berpikir apa jeg suba mageres majalan. Nahh eda to sebetina kudiang men suba terlanjur mai bareng-bareng ajak cang jani berbisnis. Sajan-sajan mula jelema lengeh ci nok, yén orahang pedalem nak pedalem cang nolih cai kéwala mekita kedék gén cang bana hahaha.”

Ngadésem I Kaplug, “Jeg misi kedék bin cai, nah-nah awas gén ci ulukuluk, ajak pokokné cang berbisnis ajin-ajin cang ling jani. Krana cai cang pepes opaka tekén mémén cang jumah, jani apa orahang cang sing bani mulih cang jani.”

Kedék bungker I Cuplis, “Urus gén suba iban ci ditu hahaha ngudiang batak nékéto sing bani mulih hahaha, masalah ci opaka jak mémén ci cang tusing milu-milu hahaha.”

I Kaplug milu kedék ningehang I Cuplis kedék, ulian marasa nu grimetan agigis timpuga I Cuplis baan sandal ngajak I Kaplug, tusing ja ia pedih, ditu keduané jani saling kedékin.

Ni Putu Asriani Putri

Mahasiswa Jurusan Pendidikan Bahasa dan Sastra Agama, Fakultas Dharma Acarya, Universitas Hindu Negeri I Gusti Bagus Sugriwa Dénpasar