cinta(apakah butuh isyarat?)--I Gusti Lanang Sutéja Naréndra

Isin Gumi

cinta

(apakah butuh isyarat?)

I Gusti Lanang Sutéja Naréndra

T

iang negak marepan. Paliat paningalané macepuk, nadi tatit makaplug ngaranayang kerug macedar di tangkahé. Enu cara ipidan, paningalané buleh ning nundunin kita ngelangi ditu.

“Kénkén kabaré?” Matakon tiang simalu, tuara ngelébang telekteké ka paningalané. Ia tusing masaut, kenyem dogen anggona pangawales.

“Séhat?” Buin patakon tiangé basa-basi dogénan. Wiréh suba tepuk ia negak di maluné, pastika suba ia séhat. Ia manggutan, ngalingus kipekanga muané apang tusing telektekang tiang. Ah... limané mejek bucun tikeh ané tegakina. Miribké patuh ketug bayué buka tiang?

Sagét kenangané pidan teka ngulgul. Cara kelir wayang, saka besik ngenah marawat lawat-lawatné.

“Bli, tiang ada anak ngalih. Nyakin tiang laut gih?” Raosné ento buin bakat pireng di kupingé. Dugasé ento ia ajak tiang negak di dagang és campuré. Suba marencana tiang, dinané ento lakar nekedang isin kenehé tekén ia. Uli ibi petengé tiang malajah ngarikrik lengakara apang nyak pangus ngorahang demen tekén déwékné.

“Luh, Bli demen tekén Nyai. Nyak ké Nyai mademenan ngajak Bli?”

“Luh, sujati keneh Bliné tekén Nyai. Bli nawang, awak Bliné tuara pantes nyandingin Nyai. Ping kuda kadén Bli mautsaha ngalipekang keneh, ber sing nyidang. Berat... Berat sajan nahanang tresnané ené. Mawanan jani Bli ngorahang papojolan tekén Nyai. Aé lop yu, Luh!”

Kéto tiang di malun mekané, ngapalang raos ané lakar tekedang. Sambilang makenyem padidi, menghayal ia lakar nerima tresnan tiangé . Piiih... pang gondong tiang buka anaké buduh kelés belagbag. Ber ngindeng kejengat kejengit sing karuan unduk.

Jani di galahé teka lakar ngempahang isin kenehé, ia nutur kéto. Koné ia ada ané nemenin, lantas jani ia ngalih tatimbang tekén tiang. Mimih... buyar makejang rencana tiangé. Skénario berubah total!

“Kénkén, Bli? Nyakin laut?”

Tiang bengong. Ngesop és asinduk, rasa kebus bonglor di bibihé.

Paningalané nelektek, nagih kepastian.

“Nah masalah ento, serah tekén Nyai dogén. Lamun Nyai demen, dong jalanin!”

Katos pesaja tiang mesuang raos. Sujati bakat pisuhin déwéké, ngudiang lagas ngaraos kéto.

“Lamun demen, sing orahang anaké? Ngudiang nyerah buka kéto? Ah... Cai Yan, muani méntal muluk! Panesin gigis suba éncéh!”

Ia nguntul. Pabaliha jembungé, aduk-adukanga isiné, kéwala paliatné kambang nerawang.

“Bagus ia?”

Ia mangutan.

Tiang sayan ngalemet, cara oncor kuangan lengis, ngalier endihné tambis mati.

“Nah, lamun kéto raos Bliné, ia ané lakar enyakin tiang!” Masaut ia enu sambilanga ngaduk-ngaduk és di jembungé. Tusing pesan ia nolih tiang, sedih cara raré tungkasin meli kembung-kembungan.

Tiang mendep. Ia masi mendep. Pada-pada mabalih jembung, yén apa kadén alihin ditu!

Galah majalan, enu buka biasané. Sabilang semengan ia enu inget nundunin tiang léwat SMS, dingelahné pulsa bisa nélpun. Sabilang tengai ia enu inget nakonin tiang suba madaran apa tondén. Sakéwala, keneh tiangé suba mati. Ah... Boya mati. Jelap matiang tiang, wiréh ia ngaku lakar ngenyakin muani lénan. Pang berek, tresnan tiangé buka api saang balemané kabyosin yéh, mati nadak nyisaang abu lan andus mekbek mespes yéh paningalané ngarécék!

Tiang ngantén malunan. Ada anak luh ané ngenyakin, nerima ukudan tiangé tanpa syarat. Ia masi enu buka biasané. Ganti tepuk matakon, basa basi ngaraos kangin kauh. Tusing pesan ia ngenahang rasa sebet. Ento mawanan tiang makeneh,

“Ah, mirib saja ia tusing ada keneh tekén tiang. Mirib muaniné ento ané piliha.”

Galah majalan. Suba roras tiban, suba pada nyaluk matua, jani buin tiang matemu. Negak marepan, bibihé mendep, paningalané nutur. Sagét ia bani nelektek paningalan tiangé. Di bucu-bucu paningalané, ada yéh mata ngelanting ngatut sing nyak pegat. Kisi-kisi ia ngaraos, “Kau lelaki yang tak peka! Tak pernah mampu membaca isyarat!”

Suud ngaraos kéto, ia ngalingus lantas magedi.

Tiang bengong, kamplegan nyaruang nyiup kopiné kebus, rasa ngemkem és tok...

(Macang Rumah Cinta Seribu Jendela)

I Gusti Lanang Sutéja Naréndra

magenah ring Macang, Bebandem, Karangasem. Satuanyané prasida kawacén ring facebooknyané.