1116. tbl - 24. árg.
30. maí 2024
Smíði nýrrar Bjargar gengur vel Þeir Viðar Páll Hafsteinsson og Halldór Kristinsson gerðu sér ferð á dögunum til Kokkola í Finnlandi fyrir hönd Björgunarbátasjóðs Snæfellsness. Var ástæða ferðarinnar að skoða nýsmíðina á nýju björgunarskipi í skipasmíðastöðinni KewaTec í Kokkola en þessi nýja Björg er sú fjórða í röðinni. Með þeim í för voru einnig Kristján Þór Harðarson framkvæmdastjóri Slysavarnarfélagsins Landsbjargar og Guð-
jón Guðmundsson, stjórnarmaður Slysavarnarfélagsins Landsbjargar. Smíðin er komin vel á veg, komið er að því stigi í skipasmíðinni að vélarnar verða settar í á næstunni en áætlað er að skipið komi til landsins og afhendist Björgunarbátasjóði Snæfellsness fyrir lok 2024. Stórt og krefjandi verkefni er framundan en báturinn kostar 324 milljónir króna. Íslenska ríkið borgar helming þeirrar upphæðar og Landsbjörg fjórð-
ung en þá sitja eftir 81 milljón sem Björgunarsveitin Lífsbjörg greiðir. Með góðu baklandi er björgunarsveitinni allir vegir færir, verkefni sem þetta er stór biti fyrir litla sveit en lítill biti fyrir öflugt samfélag. Nú þegar hafa komið
styrkir frá félögum, fyrirtækjum og einstaklingum í samfélaginu en söfnunin hjá Lífsbjörgu mun fara á fullt seinna í sumar. Myndirnar eru af Facebooksíðu Lífsbjargar. SJ
Fyrsta skemmtiferðaskip sumarsins
Fyrstu skemmtiferðaskip sumarsins hafa lagst við festar í Grundarfirði þetta sumarið. Í ár var það Sylvia Earle sem kom fyrst í höfn fimmtudaginn 23. maí á 10 nátta hringferð sinni um Ísland. Skipið er 104 metrar að lengd, 8000 tonn og tekur 132 farþega. Strax daginn eftir lagði næsta skip festar í Grundarfjarðarhöfn en það var Deutschland, 175 metra og 22,000 tonna skip sem tekur 650 farþega og 260 starfsmenn.
Deutschland lagði af stað í 18 daga hringferð frá Bremen í Þýskalandi þann 17. maí með viðkomu í 8 höfnum á Íslandi, þar á meðal Grundarfjarðarhöfn. Von er á næsta skemmtiferðaskipi til Grundarfjarðar 1. júní og svo 71 skipi til viðbótar í sumar. Áætlað er að flest skip munu leggja festar í júlí en þá verða heimsóknirnar 32 talsins. Koma síðasta skemmtiferðaskipsins er áætluð 28. september. SJ