Solo Adoption Guide 2024 (Welsh)

ARWEINIAD I FABWYSIADU AR EICH PEN EICH HUN

RHAGAIR Croeso i daith bod yn rhiant sengl trwy fabwysiadu. Waeth beth yw eich hunaniaeth o ran rhywedd neu statws perthynas, mae cychwyn ar lwybr mabwysiadu fel unigolyn sengl yn ymdrech ddewr sy'n rhoi boddhad mawr. Yng Ngwasanaeth Mabwysiadu Dewi Sant, rydym wedi ymrwymo i sicrhau bod pob unigolyn, waeth beth fo’i statws perthynas, yn cael y cyfle i brofi’r llawenydd o adeiladu teulu trwy fabwysiadu. Yn y canllaw hwn, rydym yn cynnig mewnwelediadau a chymorth wedi’u teilwra’n benodol i fabwysiadwyr sengl. Mae bod yn rhiant, boed ar eich pen eich hun neu fel rhan o gwpl, yn siapio bywyd rhywun yn ddwfn. Fel mabwysiadwr sengl, efallai y cewch eich hun yn cydbwyso dyheadau personol â chyfrifoldebau magu plentyn. Trwy'r tudalennau hyn, fe gewch gyngor ymarferol ar reoli dyheadau gyrfa, adeiladu rhwydweithiau cymorth, llywio cyllid, a meithrin perthynas ystyrlon gyda'ch plentyn.

Yn Dewi Sant, mae ein gweithwyr cymdeithasol profiadol yn ymroi i’ch cefnogi chi drwy bob cam o’r broses fabwysiadu. P'un a ydych newydd ddechrau neu'n wedi profi bod yn rhiant, gwyddoch nad ydych ar eich pen eich hun. Rydyn ni yma i gerdded ochr yn ochr â chi, gan ddarparu'r gefnogaeth a'r adnoddau sydd eu hangen arnoch i ffynnu fel mabwysiadwr.

LLYTHYR GAN Y PRIF SWYDDOG GWEITHREDOL Fel Prif Swyddog Gweithredol Gwasanaeth Mabwysiadu Dewi Sant, rwy'n falch o ailddatgan ein hymrwymiad diwyro i gefnogi'r rhai sy'n mabwysiadu ar eu pen eu hunain. Rydym yn cydnabod heriau a chyfrifoldebau unigryw rhianta sengl ac rydym yn ymroddedig i ddarparu cymorth cynhwysfawr bob cam o'r ffordd. Mae ein cymorth parhaus yn ymestyn y tu hwnt i’r broses fabwysiadu ei hun: mae’n cwmpasu dull cyfannol sydd â’r nod o rymuso mabwysiadwyr sengl i ffynnu ar eu taith yn magu plant.

Trwy ganllawiau wedi’u teilwra, mynediad at adnoddau, a rhwydwaith anogol o weithwyr proffesiynol a rhieni mabwysiadol eraill, ein nod yw sicrhau bod mabwysiadwyr sengl yn teimlo eu bod wedi’u harfogi, eu grymuso a’u cefnogi’n llawn wrth iddynt ymdopi â llawenydd a chymhlethdodau magu plant. Rydym yn deall bod pob teulu yn unigryw, ac mae ein hymrwymiad i gynwysoldeb a chymorth personol yn parhau i fod yn ddiysgog. Yn Dewi Sant, nid gwasanaeth mabwysiadu yn unig ydym ni: rydym yn gymuned sy’n croesawu pob teulu, gan gynnwys mabwysiadwyr sengl, gyda breichiau agored a chefnogaeth ddiwyro.

Jason Baker JASON BAKER, Prif Swyddog Gweithredol

CANLLAW I FABWYSIADU AR EICH PEN EICH HUN 1

RHIANTA EICH HUNAN

2

NODAU BYWYD

3

RHWYDWAITH CEFNOGI

4

MEWN SGWRS

6 7

RHEOLI GYRFA

8

MABWYSIADU BRODYR A CHWIORYDD

9

MEWN SGWRS

11

PERTHYNAS RAMANTAIDD

12

RHIENI SENGL LHDTC+

13

CYFRANWYR

14

CYSYLLTU

gyda Donna

CYLLID

gyda Leeann

RHIANTA EICH HUNAN Nid yw bod yn sengl yn eich atal rhag creu na thyfu teulu trwy fabwysiadu. Mae darparu amgylchedd teuluol sefydlog, meithringar i blentyn yn rhoi boddhad mawr. Er gwaethaf y cyfrifoldeb, mae nifer o unigolion sengl yn llywio taith mabwysiadu fel rhiant sengl yn fedrus.

Yng Ngwasanaeth Mabwysiadu Dewi Sant, rydym yn hyrwyddo ac yn cefnogi unigolion sengl i fabwysiadu heb wahaniaethu. Mae ein hystadegau diweddar yn datgelu bod bron i 22% o’n mabwysiadau dros y blynyddoedd diwethaf wedi bod gan fabwysiadwyr sengl - sy’n rhagori ar gyfartaledd y DU o 11% - ffigwr rydym yn falch iawn ohono.

Mabwysiadwr Sengl neu Fabwysiadwr Unigol Efallai y byddai'n well gan rai unigolion sy'n mabwysiadu plant ar eu pen eu hunain gael eu galw'n "fabwysiadwr unigol" yn hytrach na "mabwysiadwr sengl," gan adlewyrchu arlliw personol a diwylliannol. I rai, mae'r term "mabwysiadwr unigol" yn pwysleisio eu penderfyniad i gychwyn ar y daith fabwysiadu yn annibynnol, gan amlygu eu hunangynhaliaeth a'u cryfder wrth dyfu fel rhiant. Ar y llaw arall, temla rhai fod "mabwysiadwr sengl" uniaethu â'u statws fel rhiant sengl, gan gydnabod heriau unigryw a llwyddiannau magu plentyn ar eich pen eich hun.

Yn y pen draw, mae'r dewis o derminoleg yn hynod bersonol a gall amrywio ymhlith unigolion yn seiliedig ar eu profiadau, eu gwerthoedd, a'u hymdeimlad o hunaniaeth. Yn y canllaw hwn rydym yn defnyddio ‘Mabwysiadwr Sengl’ er cysondeb.

1

NODAU BYWYD Heb os, mae mabwysiadu plentyn ar eich pen eich hun yn dylanwadu’n fawr ar eich nodau bywyd, gan ysgogi ailasesu blaenoriaethau a dyheadau. Mae'n gofyn am ystyriaeth ofalus o sut y gall bod yn rhiant alinio â nodau gyrfa neu nodau personol. Mae'r penderfyniad i fabwysiadu yn golygu aberthu ac addasu, a allai effeithio ar gyflawni uchelgeisiau eraill.

Mae'n hanfodol ystyried a ydych chi'n gyfforddus â goblygiadau emosiynol ac ymarferol cydbwyso bod yn rhiant â'ch nodau presennol. Tra bod mabwysiadu plentyn yn dod â llawenydd a boddhad aruthrol, mae'n bwysig cydnabod unrhyw deimladau o ansicrwydd neu bryder am yr effaith ar lwybr eich bywyd.

Yn y pen draw, mae dewis bod yn rhiant a chofleidio’r newidiadau i fod yn fabwysiadwr sengl yn golygu cofleidio pennod newydd o fywyd, un a all wyro oddi wrth gynlluniau blaenorol, ond sy'n cynnig twf, cariad a phwrpas heb ei ail.

Yn Dewi Sant, bydd eich gweithiwr cymdeithasol penodedig yn cynnig arweiniad trwy gydol eich taith fabwysiadu. Mae gan lawer o aelodau ein tîm gweithwyr cymdeithasol brofiad helaeth o asesu mabwysiadwyr sengl, gan ddarparu cymorth, cyngor ac arweiniad amhrisiadwy wedi'u teilwra i'ch anghenion.

Mae yna hefyd sefydliadau fel Action for Happiness sy'n cefnogi a hyrwyddo gweithgareddau i bobl sy'n ceisio cysylltu ag eraill. Fforwm a allai fod yn ddefnyddiol i rieni sengl.

Gwefan: www.actionforhappiness.org

2

RHWYDWAITH CEFNOGI Mae angen cymorth ar bob rhiant, waeth beth fo'u hamgylchiadau, boed yn rhieni sengl neu'n gwpl. Mae adeiladu rhwydwaith cryf o bobl o'ch cwmpas yn hanfodol ar gyfer llywio heriau bod yn rhiant. Mae'n hanfodol teimlo'n gyfforddus yn estyn allan a gofyn am help pan fo angen. Heb gefnogaeth, gall hyd yn oed tasgau bob dydd fel siopa bwyd neu reoli apwyntiadau droi’n feichus yn gyflym.

Dylai'r rhwydwaith cymorth hwn ymestyn i ddarparu cyfleoedd ar gyfer hunanofal hefyd. Mae dod o hyd i amser i chi'ch hun, boed yn noson ymlaciol allan neu'n wyliau penwythnos adfywiol, yn hanfodol ar gyfer cynnal eich lles fel rhiant. Gall cael aelodau o'r teulu a ffrindiau sy'n cefnogi eich penderfyniad i fod yn rhiant sengl, ac sy'n barod i roi help llaw i ofalu am eich plentyn, fod yn hynod werthfawr. Gall eu cymorth ddarparu seibiannau a rhyddhad mawr eu hangen, gan ganiatáu i chi adnewyddu a bod y rhiant gorau y gallwch fod.

I gael rhagor o gyngor ar greu eich rhwydwaith cymorth a’i bwysigrwydd, mae’r asiantaethau isod yn cynnig adnoddau.

Adoption UK Cysylltu pobl ar draws y gymuned fabwysiadu, cefnogi mabwysiadwyr a’r mabwysiedig, a gweithio gyda nhw i ddylanwadu ar y penderfyniadau sy'n effeithio ar eu bywydau.

Gwefan: www.adoptionuk.org Ffôn: 0800 0119 100 Cymdeithas Mabwysiadu, Maethu a Gofal Perthnasau AFKA Cymru Gwefan: www.afkacymru.org.uk Ffôn: 029 2076 1155 3

MEWN SGWRS

Cawsom sgwrs â Donna, mabwysiadwr sengl drwy Dewi Sant, i glywed am ei phrofiadau. Rhannodd ei syniadau ar lywio'r broses fabwysiadu ac addasu i fod yn rhiant. Mae ei sylwadau yn taflu goleuni ar ddeinameg unigryw rhianta sengl ac yn cynnig safbwyntiau gwerthfawr i eraill sy'n ystyried mabwysiadu.

C: A allwch chi rannu eich taith fel mabwysiadwr sengl trwy Wasanaeth Mabwysiadu Dewi Sant? Beth a’ch arweiniodd at fabwysiadu, a pham y dewisoch chi Dewi Sant?

A: Roeddwn i bob amser yn gwybod y byddai mabwysiadu yn rhan o’m bywyd ryw ddydd. Roeddwn bob amser yn meddwl y byddai gennyf blentyn neu ddau ac yna’n mabwysiadu wrth fynd yn hŷn. Wnaeth pethau ddim troi allan felly, ac ar ôl rhoi cynnig ar IVF am nifer o flynyddoedd a bod yn aflwyddiannus, bod ar fy mhen fy hun a mynd yn hŷn, penderfynais ei bod yn bryd dechrau fy siwrnai fabwysiadu yn 41 oed. Ymchwiliais i ba wasanaeth mabwysiadu roeddwn i eisiau mynd trwyddo, ac roedd Dewi Sant yn sefyll allan i mi am lawer o resymau.

Roeddwn yn gwybod fy mod wedi dewis y lle iawn o’r alwad gyntaf, gyda Dan yn ateb fy holl gwestiynau gan roi mwy i mi ei ystyried, ond yn bennaf oll, yn gallu cefnogi fy mreuddwyd o ddod yn fam. Ac yma, fe ddechreuodd fy nhaith.

C: Sut gwnaeth Gwasanaeth Mabwysiadu Dewi Sant eich cefnogi drwy gydol y broses fabwysiadu fel rhiant sengl? A oedd unrhyw heriau neu bryderon penodol yr oeddech yn eu hwynebu, a sut yr aethpwyd i'r afael â hwy?

A: Fel mabwysiadwr sengl, roedd gennyf sawl cwestiwn ac ofnau yr oedd Dewi Sant bob amser yno i'w hateb.

Roeddent yn rhoi tawelwch meddwl i mi bob cam o'r ffordd gan ei bod yn daith hir ac ymwthiol, ond gwnaethant hi mor hawdd â phosibl. Roeddwn yn poeni, fel person sengl, na fyddwn yn gallu cynnig yr un peth â chwpl, na fyddwn yn ddigon, ac y byddwn yn cael fy ystyried yn analluog i ddarparu'r hyn y gallai fod ei angen ar blentyn, ac ati. ‘Mae Dewi Sant wedi gwneud i mi sylweddoli bod gen i rinweddau gwahanol i gwpl i’w cynnig i blentyn. Fe wnaethon nhw dawelu fy meddwl trwy gydol y broses ac roedden nhw gyda mi yn ystod y paneli hollbwysig, y cyfnodau cymeradwyo a’r paru. Nhw oedd yn fy annog, yn rhesymu, ac yn “arall arwyddocaol” i fownsio pethau a thawelu fy meddwl wrth fy helpu i weld y realiti tu ol i’m breuddwydion o gael fy mhlentyn fy hun. Byddem yn beicio i'r machlud heb unrhyw broblemau! Fe wnaethon nhw reoli fy nisgwyliadau heb gymryd fy mreuddwydion i ffwrdd ar yr un pryd. Roeddwn wedi dioddef o iechyd meddwl gwael cyn hynnyl, ac efallai mai dyma fy rhwystr mwyaf arwyddocaol. Eto i gyd, gydag anogaeth Dewi Sant i fod mor agored a gonest â phosibl, a’u cefnogaeth, gallwn wneud hynny a sylweddoli ei fod yn gryfder yn awr, a gallwn gynnig hynny i fy mhlentyn.

4

C: Pa gyngor fyddech chi'n ei roi i unigolion sengl eraill sy'n ystyried mabwysiadu trwy Wasanaeth Mabwysiadu Dewi Sant? A oes unrhyw adnoddau neu rwydweithiau cymorth a oedd yn arbennig o ddefnyddiol i chi?

A: Rwy'n cynghori unrhyw un sy'n ystyried mabwysiadu trwy Dewi Sant i fod yn hy a chodi'r ffôn a gwneud y cyswllt cyntaf. Gwnewch yr alwad a siaradwch â nhw, s’dim ots beth yw’ch cefndir neu'r rhwystrau sydd gennych yn eich pen. Byddwch yn agored ac yn onest, s’dim ots pa mor anodd ydyw, a bydd Dewi Sant yn eich cefnogi. Roedd Dewi Sant yn gallu fy nghyfeirio at nifer o wahanol gyrsiau ar-lein i'm helpu i ddeall plant mewn gofal, mabwysiadu yn gyffredinol, trawma, galar, ac ati. Roedd Adoption UK hefyd yn gallu fy rhoi ar gyrsiau ac roedd yn gallu fy mharu gyda rhywun a oedd mewn sefyllfa debyg i mi fy hun, y gallwn siarad gyda hi cyn ac ar ôl mabwysiadu. Fe wnaethant hefyd fy rhoi ar grwpiau cyfryngau cymdeithasol lle'r oedd mabwysiadwyr sengl eraill, a gallem ofyn cwestiynau, cael cyngor a chael cyfarfodydd yn lleol. Fe wnes i hyn cyn i mi fabwysiadu fy merch ac roeddwn i'n gallu deall rhai o'r brwydrau sydd hefyd yn cwrdd ar ôl mabwysiadu,. A gallai ein plant chwarae a siarad hefyd.

C: Allwch chi ddisgrifio'r profiad o feithrin perthynas â'ch plentyn mabwysiedig? Sut mae’r asiantaeth wedi hwyluso’r broses hon, a beth fu rhai eiliadau cofiadwy yn eich taith gyda’ch gilydd?

Cysylltodd Dewi Sant fi â The Family Place, gan gynnig adnoddau amhrisiadwy ar gyfer fy merch a minnau ar ôl cael i mi ei mabwysiadu. Fodd bynnag, daeth y gefnogaeth fwyaf amhrisiadwy gan fy ngweithiwr cymdeithasol ymroddedig yn Dewi Sant. Hi fu fy nghefnogaeth gyson ar hyd y daith gyfan, o'r dechrau i'r diwedd. Ar gael bob amser i fynd i'r afael â'm pryderon, ateb fy nghwestiynau, a rhoi arweiniad, mae hi wedi bod yn allweddol wrth lywio cymhlethdodau mabwysiadu. Mae ei phresenoldeb mewn cyfarfodydd gyda gweithwyr proffesiynol ôl-fabwysiadu wedi bod yn arbennig o galonogol.

Mae meithrin perthynas gyda fy merch wedi bod yn daith o uchafbwyntiau ac isafbwyntiau, ond gyda chefnogaeth ddiwyro Dewi Sant, aethom i’r afael â’r heriau yn uniongyrchol. O ystyried bod fy merch yn cael ei chyfrif yn un o’r plant anoddaf i’w lleoli i’w mabwysiadu, darparodd Dewi Sant gefnogaeth ac arweiniad helaeth cyn ein cyfarfod cyntaf. Roedd hyn yn cynnwys gwaith paratoi gyda fy merch a’i theulu maeth, yn ogystal â chyngor ymarferol a gweithgareddau a argymhellwyd gan fy ngweithiwr cymdeithasol. Un foment arbennig o gofiadwy oedd ein cyfarfod cyntaf. Ar ôl cyfnewid fideos a negeseuon ymlaen llaw, cyrhaeddais dŷ ei gofalwr maeth gyda tedi yn fy llaw. Yr eiliad y cerddais drwy'r drws, fe'm cyfarchwyd gan gri afieithus o "MUMMY!!!!" wrth i’m merch i redeg tuag ataf. Roedd hi’n foment annisgrifiadwy o werthfawr wrth i ni gofleidio, gan ddisgyn i’r llawr gyda’n gilydd mewn cwtsh tynn. Mae'n atgof sydd wedi’i ysgythru am byth yn fy nghalon.

C: Ym mha ffyrdd y mae dod yn fabwysiadwr sengl wedi newid eich bywyd, a sut ydych chi wedi ymdopi â heriau rhianta gyda chefnogaeth Gwasanaeth Mabwysiadu Dewi Sant? Beth yw’r llawenydd a’r gwobrau rydych chi wedi'u profi yn y rôl hon?

A: Mae dod yn fabwysiadwr sengl wedi newid fy mywyd yn llwyr. Mae wedi bod yn rollercoaster, ond ni fyddwn yn ei newid am y byd. O fondio i ymddygiad, addoliad i strancio, diffyg cwsg i’w gwylio’n cyflawni cerrig milltir newydd, rwyf wedi cael fy nghefnogi bob cam o’r ffordd gan Dewi Sant. Maen nhw wedi gallu tawelu fy meddwl am rianta “normal” plentyn mabwysiedig, a’m helpu i wahaniaethu rhwng plentyn ifanc a phlentyn fel fy merch gyda’i holl brofiadau a thrawma. Maen nhw wedi gallu rhoi cyngor a’m cefnogi i’w helpu ymhellach, ac maen nhw’n dal yno i mi pan fydd eu hangen arnaf. Mae'r daith gyfan wedi bod lan a lawr a phopeth yn y canol. Roedd gan fy merch rai problemau meddygol sylfaenol y daethom i wybod amdanynt ar ôl y lleoliad a hefyd trawma pellach ddaeth i’r amlwg wrth i’r daith fynd yn ei blaen. Mae'r pethau hyn wedi bod yn anodd eu rheoli ond yn y pen draw wedi gwneud ein taith yr hyn ydyw a'n bond gymaint yn gryfach.

Mae ei gwylio hi'n tyfu bob dydd, cyrraedd cerrig milltir doedden ni byth yn meddwl y byddai hi’n eu cyrraedd, a dysgu caru ac ymddiried a dechrau teimlo'n ddiogel wedi bod y profiad mwyaf gwych, a fyddwn i ddim yn newid dim ohono. Mae hi wedi achub fy mywyd fwy nag y bydd hi byth yn gwybod, ac rwy’n diolch bob dydd i Dewi Sant am roi hyn i mi a’i wneud yn bosibl.

5

RHEOLI GYRFAOEDD .

Gall mabwysiadu plentyn ar eich pen eich hunan fod â goblygiadau amrywiol i’ch gyrfa, ac mae angen eu hystyried yn ofalus. Mae’n bosibl y bydd cydbwyso cyfrifoldebau gwaith â gofynion bod yn rhiant, yn enwedig fel rhiant sengl, yn gofyn am addasu eich llwybr gyrfa neu gydbwysedd bywyd a gwaith. Gall trefniadau gweithio hyblyg, megis opsiynau gweithio oddi cartref neu oriau hyblyg, ddod yn hanfodol i’ch galluogi i gwrdd â chyfrifoldebau gofal plant.

Yn ogystal, gallai fod cyfnodau pan fydd angen absenoldeb rhiant neu amser i ffwrdd ar gyfer apwyntiadau sy'n ymwneud â mabwysiadu, gan effeithio ar eich dilyniant gyrfa neu lwyth gwaith. Mae cyfathrebu'n agored â'ch cyflogwr am eich cynlluniau mabwysiadu ac archwilio'r mecanweithiau cymorth sydd ar gael, megis rhaglenni cymorth i weithwyr neu fuddion gofal plant, yn hanfodol i lywio'r heriau'n effeithiol.

Er y gall mabwysiadu plentyn ar eich pen eich hun arwain at heriau gyrfaol, mae llwyddo i adeiladu teulu yn aml yn gorbwyso'r rhwystrau hyn.

Mae Singleparents.org.uk yn cynnig adnoddau gwerthfawr ar gydbwyso gwaith a magu plant yn effeithiol.

6

CYLLID Gall goblygiadau ariannol mabwysiadu plentyn ar eich pen eich hun fod yn sylweddol, ni waeth beth fo'r lefelau incwm neu fudd-daliadau. Er bod sefydlogrwydd ariannol yn hollbwysig, yr hyn sy'n allweddol yw gallu fforddio gofalu am blentyn nes ei fod yn oedolyn. Er nad oes rhaid i chi dalu am yr asesiad, mae cost am y prawf meddygol mabwysiadu, a bennir yn unigol gan eich meddyg teulu, ac unrhyw gostau sy'n cyd-fynd ag unrhyw wiriadau tramor. Mewn rhai achosion, efallai y bydd angen i chi dalu'r costau sy'n gysylltiedig ag asesu ymddygiad a seicoleg anifeiliaid anwes, gan ganolbwyntio'n bennaf ar gŵn.

Yn ogystal, rhaid ystyried y costau rheolaidd sy'n gysylltiedig â magu plentyn, fel bwyd, dillad a gofal plant. Rhaid i rieni mabwysiadol sengl asesu eu sefyllfa ariannol yn ofalus i sicrhau y gallant ddarparu amgylchedd sefydlog a meithringar ar gyfer anghenion corfforol, emosiynol ac ariannol y plentyn.

Mae cynllunio ariannol hirdymor, gan gynnwys cynilo ar gyfer gwyliau teuluol ac amgylchiadau annisgwyl, hefyd yn hanfodol. Gall asesu eich sefyllfa ariannol eich hun i’r dyfodol, ac archwilio a allai fod gennych hawl i gymorth budd-dal ar ôl lleoliad, roi tawelwch meddwl i chi yn y maes hwn. Mewn rhai amgylchiadau gall mabwysiadwyr ofyn i’r awdurdod lleol gynnal asesiad ariannol i ystyried cymorth ariannol, ond bydd derbyn hwn yn seiliedig ar anghenion y plentyn yn unig.

Os bydd pryderon ariannol yn codi, mae’r elusen rhiant sengl Gingerbread yn cynnig cyfoeth o adnoddau ar gyllid personol wedi’u teilwra i rieni sengl, gan ddarparu cyngor ac arweiniad gwerthfawr.

7

Gingerbread: Gwefan: www.gingerbread.org.uk

MABWYSIADU BRODYR A CHWIORYDD Mae mabwysiadu brodyr a chwiorydd fel mabwysiadwr sengl yn cyflwyno taith unigryw a gwerth chweil yn llawn heriau a llawenydd. Mae darparu cartref cariadus a sefydlog i fwy nag un plentyn yn diwallu eu hangen am ddiogelwch a pherthyn ac yn meithrin cwlwm cryf rhwng y plant a all barhau am weddill eu hoes. Fodd bynnag, rhaid i fabwysiadwyr sengl ystyried goblygiadau ymarferol ac emosiynol magu plant lluosog yn annibynnol.

Mae hyn yn cynnwys asesu eu gallu i ddiwallu anghenion amrywiol pob plentyn, rheoli adnoddau ariannol yn effeithiol, a darparu cymorth a sylw digonol i bob plentyn.

Er y gall y daith fod yn un gymhleth, mae’r cyfle i gadw plant o’r un teulu gyda’i gilydd a chynnig amgylchedd teuluol cariadus a meithringar iddynt yn hynod foddhaus a gall greu ymdeimlad dwys o bwrpas a chysylltiad i’r mabwysiadwr a’r plant mabwysiedig. Yn Dewi Sant mae gennym brofiad o leoli grwpiau o frodyr a chwiorydd gyda mabwysiadwyr sengl.

Mabwysiadu Gyda'n Gilydd O fewn ein prif wasanaeth mabwysiadu, mae gennym hefyd wasanaeth o’r enw Mabwysiadu Gyda’n Gilydd.

Mae Mabwysiadu Gyda'n Gilydd yn wasanaeth canfod teulu arbenigol a chymorth therapiwtig. Mae Mabwysiadu Gyda'n Gilydd yn gweithio'n agos gydag Awdurdodau Lleol sy'n nodi plant a allai aros yn hwy i gael eu mabwysiadu am wahanol resymau. Ar adegau, efallai y cewch eich gwahodd i glywed mwy am y plant o fewn y gwasanaeth hwn, neu efallai y byddwn yn siarad â chi amdanynt yn unigol. Os cewch eich paru â phlant drwy Mabwysiadu Gyda'n Gilydd ar ôl cael eich cymeradwyo, byddwch yn cael cynnig pecyn cymorth penodol cyn, yn ystod ac ar ôl i'r plentyn neu'r plant ddod i fyw gyda chi.

Gwyliwch ein ‘Sgwrs’ gyda Sarah, wnaeth fabwysiadu plant o’r un teulu YMA

8

MEWN SGWRS Gadewch i ni siarad â Leeann, mabwysiadwr sengl a gefnogir gan Dewi Sant.

Yn garedig iawn fe gytunodd i rannu eu taith, gan roi mewnwelediad amhrisiadwy i'r daith fabwysiadu a'r trawsnewid i fod yn rhiant sengl. Mae ei sylwadau gonest yn amlygu heriau a gwobrau unigryw rhianta sengl.

C: Sut ddylanwadodd eich profiad gyda Gwasanaeth Mabwysiadu Dewi Sant ar eich taith i ddod o hyd i, a sefydlu, rhwydweithiau cymorth, gan ystyried y newidiadau wedi i'ch plentyn ddod i’ch bywyd?

A: Fel mabwysiadwr sengl heb rwydwaith cymorth helaeth, roedd gennyf amheuon ynghylch sut y byddwn yn ymdopi. Fodd bynnag, rhoddodd Dewi Sant sicrwydd i mi y byddai fy rhwydwaith cymorth yn esblygu ochr yn ochr â chyrhaeddiad fy mhlentyn - ac roedd yn wir. Yn ystod cyfyngiadau symud COVID-19, pan oedd llwybrau cymorth traddodiadol yn anhygyrch, trefnodd Dewi Sant grwpiau cymorth ar-lein yn gyflym, gan ddarparu cymorth hanfodol yn ystod cyfnod heriol.

C: A allwch chi rannu sut wnaeth Gwasanaeth Mabwysiadu Dewi Sant eich cefnogi i wneud penderfyniadau heriol fel mabwysiadwr sengl, a sut y gwnaethoch chi ddarganfod eich gwydnwch mewnol trwy'r profiadau hynny?

A: Rhoddodd Dewi Sant arweiniad amhrisiadwy i mi yn y broses o wneud penderfyniadau, yn enwedig o ran cyswllt â theulu biolegol fy mhlentyn. Fe wnaeth eu cefnogaeth feithrin hyder yn y dewisiadau a wnaed er lles fy mhlentyn, gan feithrin ymdeimlad o wydnwch mewnol ac argyhoeddiad yn fy rôl fel rhiant.

9

C: Ym mha ffyrdd y mae Gwasanaeth Mabwysiadu Dewi Sant wedi eich cynorthwyo i lunio cynlluniau wrth gefn ar gyfer yr adegau hynny pan fyddwch chi a'ch plentyn yn sâl, a sut maent yn hybu hunanofal yn ystod y cyfnodau hynny?

A: Pwysleisiodd Dewi Sant bwysigrwydd hunanofal gydol y cyfnod heriol, gan fy annog i bwyso ar fy rhwydwaith cymorth a blaenoriaethu cyfnodau o seibiant. Roeddent hefyd yn hwyluso trafodaethau ar gynllunio wrth gefn, gan wneud i mi deimlo fy mod yn barod i ddelio â sefyllfaoedd lle'r oedd fy mhlentyn a minnau'n sâl.

C: Sut mae Gwasanaeth Mabwysiadu Dewi Sant wedi eich helpu i fynd i'r afael a’r adegau pan fo'ch plentyn yn dymuno rhiant arall, a pha strategaethau maent wedi'u darparu i atgyfnerthu cryfder eich cwlwm teuluol?

A: Darparodd Dewi Sant le diogel ar gyfer trafod adegau pan oedd fy mhlentyn yn dyheu am rywun arall fel rhiant, gan dawelu fy meddwl am y cariad a'r ymroddiad a roddaf fel unig ofalwr. Trwy eu harweiniad a'u cefnogaeth, rydw i wedi dysgu i atgyfnerthu ein cwlwm teuluol, gan sicrhau bod fy mhlentyn yn teimlo ei fod yn cael ei garu a'i gefnogi.

C: A allech chi rannu unrhyw adnoddau neu ganllawiau gan Wasanaeth Mabwysiadu Dewi Sant sydd wedi eich cynorthwyo i gadw amser personol a hunaniaeth yng nghanol gofynion bod yn rhiant sengl, gan gynnwys technegau ar gyfer dod o hyd i gyfnodau o dawelwch yn eich trefn ddyddiol?

Yn ystod cyfnod heriol pan oedd fy mhlentyn yn saith oed, dechreuodd ei gwaith ysgol a’i hymddygiad ddioddef, ynghyd a breuddwydion drwg ac aflonyddwch cwsg dro ar ôl tro. Fel rhiant sengl, cefais fy hun yn gyson yn cael trafferth i gynnal fy hunan-les ynghanol yr helbul. Daeth yn fwyfwy anodd deall beth oedd wrth wraidd ei thrallod, a theimlais fy hun wedi fy llethu yn ceisio delio gyda hyn fy hun.

Tra'n aros am atgyfeiriadau GIG ar gyfer asesiadau niwroamrywiaeth, camodd Dewi Sant i'r adwy i gynnig dwy sesiwn rithwir gyda seicolegydd. Er na chwrddodd erioed â fy mhlentyn, roedd yn ymddangos bod gan y seicolegydd ddealltwriaeth reddfol o'i brwydrau mewnol. Profodd y sesiynau hyn yn emosiynol ac yn addysgiadol, gan gynnig syniadau ymarferol a strategaethau a gafodd effaith fawr ar fy mhlentyn a minnau. Gyda dwy sesiwn yn unig, fe wnaethom weithredu mân addasiadau ac ymarferion syml a arweiniodd at welliannau dramatig o fewn wythnosau. Yn rhyfeddol, nid oedd angen cymorth pellach arnom gan y GIG, a chefais ddealltwriaeth ddyfnach o stori bywyd fy mhlentyn drwy'r broses hon.

Yn ogystal, anogodd Dewi Sant fi i flaenoriaethu hunanofal a dod o hyd i gyfnodau o seibiant yng nghanol yr anhrefn. P’un ai’n mwynhau darlleniad tawel neu’n mwynhau paned heddychlon o goffi cyn y daith ysgol, daeth y defodau bach hyn yn hanfodol ar gyfer fy nghynnal yng nghanol gofynion bod yn rhiant sengl.

Y gwir yw, darparodd Dewi Sant gefnogaeth ac arweiniad diwyro ar adegau o ansicrwydd, gan fy atgoffa nad oeddwn erioed ar fy mhen fy hun ar fy nhaith. Roedd eu presenoldeb yn sicrhau bod rhywun bob amser yn barod i wrando, cynnig cymorth, a helpu i ddelio gyda heriau bod yn rhiant sengl.

10

PERTHNASAU Gall mabwysiadu fel rhiant sengl gael effaith sylweddol ar berthnasau, gan ofyn am ystyriaeth a chynllunio gofalus. Er efallai na fyddwch yn bwriadu aros yn sengl am byth, mae'n hanfodol cydnabod pwysigrwydd blaenoriaethu anghenion eich plentyn a meithrin bond rhiant-plentyn cryf cyn dilyn perthynas ramantus newydd. Gall jyglo gofynion magu plant â mynd ar ddêt fod yn heriol, gan gynnwys materion logistaidd megis dod o hyd i amser ar gyfer mynd allan ar ddêt a threfnu gofal plant.

Mae cyflwyno partner newydd i'ch plentyn yn gofyn am amseriad gofalus a sensitifrwydd i sicrhau bod eich plentyn yn teimlo'n ddiogel a'i fod yn cael ei gefnogi trwy gydol y broses. Mae cyfathrebu'n onest â phartneriaid posibl am eich taith fabwysiadu ac anghenion eich plentyn yn hanfodol, gan feithrin dealltwriaeth a chydweithrediad wrth gefnogi deinameg eich teulu. Er gwaethaf y cymhlethdodau dan sylw, mae'n hanfodol peidio â gadael i'r ystyriaethau hyn eich rhwystro rhag mabwysiadu os yw gwneud hynny’'n cyd-weddu â'ch dymuniadau a'ch galluoedd. Yn ystod yr asesiad, a’r cyfnodau o ddod o hyd i deulu, paru, a lleoli, mae datgelu unrhyw berthynas newydd yn hanfodol bwysig. Mae bod yn agored fel hyn yn caniatáu ystyriaeth drylwyr, gan y byddai unrhyw ddarpar bartner yn effeithio'n sylweddol ar fywyd plentyn. Gallai dechrau perthynas newydd yn ystod y cyfnod hwn amharu ar y broses asesu a pheryglu’r gallu i ddangos sefydlogrwydd a hirhoedledd, sy’n hanfodol i les y plentyn. .

Er mwyn cynnal integriti y daith fabwysiadu, mae'n ddoeth blaenoriaethu'r broses asesu. Rhaid i bartneriaid fod wedi byw gyda chi am o leiaf dwy flynedd i gael eu cynnwys yn yr asesiad. Felly, mae'n ddoeth ymatal rhag dechrau perthnasoedd newydd tan ar ôl cwblhau'r asesiad a setlo plentyn yn eich cartref. Mae Dewi Sant yn cynnig cymorth ac adnoddau gwerthfawr, gan gynnwys cyfleoedd i gysylltu â mabwysiadwyr sengl eraill a all roi arweiniad a rhannu eu profiadau, gan eich helpu i gerdded y daith yn hyderus a chyda gwydnwch.

11

RHIANTA SENGL LHDTC+ Mae mabwysiadu plentyn ar eich pen eich hun fel aelod o'r gymuned LHTDC+ yn golygu ystyriaethau a chyfleoedd unigryw ar gyfer meithrin amgylchedd gefnogol a chynhwysol i'ch plentyn.

Mae cynnal cyfathrebu agored a gonest gyda’ch plentyn o oedran cynnar yn hanfodol, gan ei helpu i ddeall a chroesawu amrywiaeth strwythur ei deulu. Gall adnoddau fel safle Tiny Happy People y BBC a FFLAG gynnig arweiniad gwerthfawr ar drafod hunaniaeth LHDTC+ o fewn y cyd-destun teuluol.

Gall dathlu eich hunaniaeth ac amrywiaeth trwy lyfrau, y cyfryngau ac adnoddau cymunedol chwarae rhan arwyddocaol wrth gadarnhau ymdeimlad eich plentyn o berthyn a hunanhyder. Mae Booktrust a Stonewall yn cynnig argymhellion defnyddiol ar gyfer blogiau magu plant LHTDC+, llyfrau lluniau, a llenyddiaeth gynhwysol sy’n addas ar gyfer plant o wahanol oedrannau, gan gyfoethogi eu dealltwriaeth a’u gwerthfawrogiad o deuluoedd LHTDC+.

Ers mis Ebrill 2019, mae 29% o deuluoedd Dewi Sant sydd wedi’i cymeradwyo yn LHTDC+, gyda chyfartaledd y DU yn 16.67%.

Mae Dewi Sant wedi sylwi bod mabwysiadwyr LHTDC+ yn aml yn dangos mwy o barodrwydd i ystyried lleoliadau sy'n cael eu gweld yn fwy cymhleth. Mae teuluoedd LHTDC+ yn tueddu i fod yn fwy parod i groesawu grwpiau teuluol, plant pedair oed a hŷn, a’r rhai sydd ag anghenion ac ansicrwydd o’i gymharu â phobl heterorywiol.

Darllenwch ein Canllaw LHTDC+ i Fabwysiadu YMA.

12

CYFRANWYR SHAUN HOUCKE Ymunodd Shaun, hyrwyddwr ymroddedig dros fabwysiadu, â Dewi Sant yn 2023. Mabwysiadodd ef a’i ŵr eu mab trwy Gymdeithas Dewi Sant yn 2020, gan roi mewnwelediad unigryw iddo i’r broses fabwysiadu. Mae Shaun yn dod â phrofiad uniongyrchol i'w rannu gyda’r rhai sy'n ystyried mabwysiadu.

Mae ei daith yn ei ysbrydoli i greu gofod cynhwysol ym myd mabwysiadu, gan gynnig cefnogaeth ac arweiniad i unigolion sy’n cerdded y llwybr i fod yn rhiant sengl. Mae brwdfrydedd ac ymroddiad Shaun yn ei wneud yn adnodd gwerthfawr i'r rhai sy'n chwilio am wybodaeth a chysylltiadau o fewn y gymuned fabwysiadu.

DANIEL WARNER Mae Dan yn aelod ymroddedig o dîm Dewi Sant. Ymunodd â’r tîm yn 2014 ar ôl profiad gwerthfawr gydag elusen faethu a mabwysiadu arall. Yn frwd dros greu deialog cynhwysol, mae Dan yn credu’n gryf mewn annog darpar fabwysiadwyr o amrywiol gefndiroedd i fod yn rhan o’r sgwrs fabwysiadu. Gydag ymrwymiad i feithrin amgylchedd croesawgar a chefnogol, mae Dan yn chwarae rhan hanfodol yn Arweinlyfr Dewi Sant i Fabwysiadu ar Eich Pen Eich Hun, gan sicrhau bod pawb yn teimlo eu bod wedi'u grymuso a bod ganddynt y wybodaeth angenrheidiol am eu taith fabwysiadu.

13

CONTACT St David’s Adoption Service 28 Park Place, Cardiff CF10 3BA 029 2066 7007 or info@stdavidscs.org

STAY IN THE LOOP Follow us on Instagram, Facebook & YouTube

DONATE As a registered Charity you may like to consider supporting the work of St David’s. Your contribution will help ensure that every child with an adoption plan in Wales is placed with a loving family and supported to reach their full potential. HERE

Registered Office: 28 Park Place, Cardiff CF10 3BA St David’s Children Society is registered as a charity with the Charity Commission for England and Wales (Registration No: 509163) and a company limited by Guarantee (Registered Cardiff 1546688) St David’s Adoption Service is the brand name of the St David’s Children Society’s adoption service.

Mae Cymdeithas Plant Dewi Sant wedi ei chofrestru fel elusen gyda Chomisiwn Elusennau Cymru a Lloegr (Rhif Cofrestru: 509163) a chwmni cyfyngedig drwy Warant (Cofrestredig Caerdydd 1546688) Gwasanaeth Mabwysiadu Dewi Sant yw enw brand gwasanaeth mabwysiadu Cymdeithas Plant Dewi Sant. © St David’s Children Society 2024