SMB Grillplausch

von Chantal Heiniger, Trompete / Fotos: Mischa Vasylyev

Nach ere sehr länge Summerpouse isch d’Stadtmusig und ds Jubis miteme Grill-Alass, Mitti Ougste, i die nöi Saison gstartet. D Felicitas und d Barbara hei das Ganze organisiert und gluegt, dass mirs denn de ou chöi dürefüehre. Z’Wätter het denn super mitgspiut und äs isch schön warm gsi. Vorem Ässe si die meischte no ä chlini Abchüelig go näh und si i See gumpet. Nähär heimer langsam Hunger brcho und dr Bössu het gluegt, dass aues parat isch zum Grilliere.

Dr Bund het ja denn no äs Füürverbot usgsproche und darum heimr nid dusse, sondern dinne müesse grille. Das isch natürlech nid z’Gliche gsi wie schüsch aube, aber äs isch trotzdäm gange. Schlussändlech hei aui öpis ufem Täuer gha und si z’fride gsi. Nachem z’Nacht, wo aui scho ä voue Buch hei gha, hets när no verschidnigi sehr feini Desserts gäh. Äs isch schön gsi aui wieder mau z’gseh und anenander z’verzeue, was me ide Summerferie aues so gmacht und erläbt het. Nach däm glungnige Start id Saison isch d`Stadtmusig jetzt scho wieder vou im Autag dinne und duet sech für die nöchschte Konzärt vorbereite.