Te Kāhui Kaumātua ō Ngāti Awa
Whaikupu Tena koutou Ngāti Awa ki uta, Ngāti Awa ki tai. Me huri tātau ki a koutou, te hunga mate, ngā mate i hinga i te puia o Whakaari, ngā mate i ngā pito katoa o tō tātau motu, o tō tātau ao, haere ki te wehenga ki tawhiti, haere i tua o ngā ihoiho o Paepae Aotea, haere, whakangaro atu. Ki a tātau te hunga ora, tēnā rā katoa, tēnā rā tātau katoa. He matahuhua te manaakitanga i te ao e tino tere hurihuri nei.
Nō reira, me rangatira tātou katoa, me whakariterite tātou me te mea nui rawa atu: me whakaatu e tātou te manaakitanga.
Ko tētahi mata anō ko te tirotiro i ō tātou kuia, koroua hoki me te hunga e aroha nuitia ana e tātou: me whakaaro nui mō ētahi atu.
Ahakoa i pā mai te Mate Korona i waenganui i te hapori he nui tonu ngā kaupapa i tautokongia e te Kāhui Kaumatua o Ngāti Awa i te 2019-2020, me ki anei ētahi e whai ake nei: • Ngā hui a ngā Kāhui Kaumatua; • Ngā hui a Te Rūnanga o Ngāti Awa • Auahatanga Wānanga a te iwi; • Karanga Wananga a te iwi; • Reo Wānanga a iwi; • Whakawhitiwhiti Kōrero Wānanga a te iwi; • Ngā Whakawā a Te Kooti Rangatahi; • Ngā pōhiri i Te Mānuka Tūtahi; • Ngā tangihanga i waenganui a tātau; • Ngā hui a hapū; • Te Toki Kapa Haka o Ngāti Awa; • Te Whakamaumahara a Tiriti o Waitangi;
Ko tētahi wāhanga o te whakariterite mō te anamata ko te titiro whakamuri kia mau i a tātou ngā āhuatanga o mua. I te wā i pā mai te mate urutā ki Aotearoa, manomano ngā tāngata i hinga. I tipihaurarotia ngā hapori Māori. Hei tā te Pirimia nei: me whakakaha tātou kia kaua e heipū mai anō aua āhuatanga ki a tātou.
Kaua tātau katoa e wareware, mā te tokomaha, ka kā te ahi o Ngāti Awa.
8
TE RŪNANGA O NGĀTI AWA | 2020 ANNUAL REPORT
