Grafarvogsbladid 3.tbl 2011

2

GV

Fréttir

Graf­ar­vogs­blað­ið Útgefandi: Skrautás ehf. Netfang: gv@skrautas.is Ritstjóri og ábm.: Stefán Kristjánsson.

Netfang Grafarvogsblaðsins: gv@skrautas.is Ritstjórn og auglýsingar: Höfðabakki 3 - Sími 587-9500 / 698-2844. Útlit og hönnun: Skrautás ehf.

Auglýsingastjóri: Sólveig J. Ögmundsdóttir - solveig@skrautas.is Prentun: Landsprent ehf.

Ljósmyndari: Pjetur Sigurðsson.

Dreifing: Íslandspóstur.

Grafarvogsblaðinu er dreift ókeypis í öll hús og fyrirtæki í Grafarvogi.

Einnig í Bryggjuhverfi og öll fyrirtæki í póstnúmeri 110 og 112.

Reiði á leynifundi Í Grafarvogi ríkir heiftarleg reiði í garð meirihlutans í Reykjavík í kjölfar opins fundar í Rimaskóla á dögunum þar sem kynnt voru áform meirihlutans um sameiningar og niðurskurð í leik- og grunnskólum hverfisins.

Reiðin er annars vegar tilkomin vegna þeirra tillagna sem meirihlutinn virðist ætla að þvinga í gegn á sem skemmstum tíma. Hins vegar vegna þeirra furðulegu vinnubragða sem einkenna allt varðandi málið. Fólki í Grafarvogi er ofboðið þegar litið er til vinnubragða menntasviðs með Oddnýju Sturludóttur í broddi fylkingar. Þá hefur þeim fjölgað stórlega í Grafarvogi undanfarna daga sem telja Jón Gnarr ekki starfi sínu vaxinn sem borgarstjóri.

Fundurinn í Rimaskóla var svo sannarlega leynifundur og bar öll merki þess að þeir sem til hans áttu að boða en gerðu það ekki var illt í samviskunni. Greinilega von þess fólks að sem fæstir myndu mæta og fundurinn yrði alls ekki áberndi í fjölmiðlum.

Jón Gnarr og Oddný Sturludóttir vita ekki að í okkar hverfi er gefið út blað sem heitir Grafarvogsblaðið. Okkur barst ekkert boð um fundinn frekar en mörgum öðrum. Þau skötuhjú höfðu ekki einu sinni fyrir því að láta Hverfisráð Grafarvogs vita af fundinum frekar en marga stjórnendur leik- og grunnskóla í hverfinu enda líklega best að hafa sem minnst af slíku fólki, bæði á fundinum og í vinnu hjá skólum borgarinnar. Í upphafi leynifundarins reyndist fundarstjórinn, Hjálmar Sveinsson, ónýtur og engin dagskrá var til um fundinn. Fór svo að fundarmenn tóku fundarstjórn yfir og var formaður Íbúasmtaka Grafarvogs kosinn fundarstjóri. Þegar við á Grafarvogsblaðinu fréttum af leynifundinum var skammur tími þar til prenta átti blaðið. Af þeim sökum og leyndarinnar sem yfir fundinum hvíldi er umfjöllun um fundinn og málið í heild ekki ítarlegri í blaðinu en hún er. Nánar verður fjallað um þetta mál í næsta blaði 14. apríl. Því hefur verið haldið fram að aðalástæða þess að núverandi meirihluti í borginni ákvað að ráðast að leikskólum og grunnskólum væri fjárhagslegur sparnaður. Það verður að teljast undarleg ákvörðun að veitast að afar nauðsynlegu og frábæru starfi sem unnið er í leikskólum og grunnskólum. Margir halda því fram að leikskólastigið sé besta menntastigið í okkar landi í dag. Þar hafa leikskólastjórnendur og starfsfólk unnið þrekvirki á launum sem eru þeirra vinnuveitendum til ævarandi skammar. Setja ætti borgarstjóra og formann menntaráðs á þau sultarlaun strax í dag.

Gífurleg reiði var á meðal 350 fundarmanna í Rimaskóla og það skildi enginn halda að þessu máli sé lokið. Svona aðför lýkur ekki með ónýtum leynifundi. Slíkur fundur gerir ekkert nema afhjúpa lélegan málstað borgaryfirvalda og vankunnáttu í boðun funda og skorti á sjálfsögðum og kurteislegum samskiptum við fólk og fjölmiðla.

Nú síðast bárust svo fréttir af því að borgarstjórinn og formaður menntaráðs borgarinnar hefðu ekki verið viðstödd þegar þessi árás á leik- og grunnskólana var tekin fyrir í borgarstjórn. Mun borgarstjórinn vera að kynna nýja kvikmynd um hann sjálfan erlendis en ekkert er vitað um formann menntaráðsins. Þetta er líkast til eitt heitasta málið í umræðunni í dag og verður því að teljast með hreinum ólíkindum að höfuðpaurarnir stingi af þegar ræða á málið í borgarstjórn.

Hvernig er hægt að treysta svona fólki fyrir heilli höfuðborg?

Stefán Kristjánsson, ritstjóri Grafarvogsblaðsins

gv@skrautas.is

Þessi mynd er frá íbúafundi í Rimaskóla en ekki þeim sem fréttin er um hér að neðan enda um leynifund að ræða og þeir sem áttu að boða til fundarins gerðu það ekki enda málstaðurinn ömurlegur. Um 350 manns mættu á fundinn, aðallega foreldrar leik- og grunnskólabarna.

Leynifundur í Rimaskóla - mikill hiti í fólki í Grafarvogi vegna sameiningar í leik- og grunnskólum

Jón Gnarr borgarstjóri og Menntasvið borgarinnar með Oddnýju Sturludóttur í broddi fylkingar héldu fund í Rimaskóla um liðna helgi þar sem ætlunin var að kynna fyrirhugaðar sameiningar í leikog grunnskólum borgarinnar.

Fundurinn spurðist út meðal foreldra og um 350 foreldrar mættu á fundinn.

Mjög illa var staðið að boðun fundarins og fréttum við á Grafarvogsblaðinu af honum þegar hann var afstaðinn. Mjög margir aðilar hafa kvartað undan því að hafa ekki vitað um fundinn. Þar má nefna stjórnendur leikskóla og grunnskóla í Grafarvogi.

Geta má þess að Hverfisráð Grafarvogs hafði ekki hugmynd um fundinn og hefur ráðið ekkert verið haft með í ráðum varðandi sameiningar og niðurskurð í leik- og grunnskólunum. Verður það að teljast undarlegt og alveg forkastanleg vinnubrögð.

Elísabet Gísladóttir, formaður Íbúasamtaka Grafarvogs hafði þetta um málið að segja þegar við höfðum samband við hana skömmu fyrir útgáfu blaðsins: ,,Þjóðin er búin að lifa erfiða tíma og fundið fyrir rótleysi og óöryggi í einu og öllu. Því má segja að það sé ekki tímabært að róta við málefnum barnanna á eins afgerandi hátt og um ræðir. Það má

vel endurskoða alla þætti skólamálanna en þá þarf það að gerast innan hverrar einingar fyrir sig. Ef um heildarstefnu þá þarf að ígrunda hana miklu betur og gefa fólki tíma til að aðlagast hugmyndunum. Þetta hefur valdið vanlíðan og ótta hjá fjölda fólks en ekki síst geysilegri reiði þar sem fólk upplifir börnin sín sem þátttakendur í rússneskri rúllettu. Á fundinum var samþykkt tillaga foreldra og hafa Íbúsamtök Grafarvogs nú tekið undir hana, þeim til stuðnings. Við í stjórn ÍG teljum að í tillögunni felist alltof róttækar breytingar m.t.t. þess sparnaðar sem henni er ætlað að ná fram og að í henni felist of margir óvissuþættir til að réttlætanlegt sé að fólk samþykki þetta með svo stuttum fyrirvara.

Við leggjum til að menntasvið vinni málið betur áður en breytingum er hrundið í framkvæmd því eflaust má finna innan um tillögur sem eiga rétt á sér. Í heild sinni hafnar stjórn Íbúasamtaka Grafarvogs þessari tillögu.

Við köllum eftir umræðu um þessi mál. Við vorum að opna síðu á Facebook ibuasamtok grafarvogs og svo er alltaf hægt að hafa samband við okkur á ibuasamtok.com og www.ibuasamtok.com “ sagði Elísabet.

Hér er ályktun fundarins sem samþykkt var af öllum fundarmönnum nema einum: ,,Fundur foreldra leik- og grunnskólabarna í Grafarvogi, sem borgarstjóri og borgarfulltrúar Besta flokks og Samfylkingar boðuðu til þann 12. mars 2011, hafnar fyrirliggjandi tillögum um sameiningar í leik- og grunnskólum Grafarvogs. Þá átelur fundurinn vinnubrögð starfshóps undir forsæti Oddnýjar Sturludóttur og telur niðurstöðu starfshópsins órökstudda og illa ígrundaða.

Fundarmenn telja að engan veginn sé sýnt fram á faglegan eða fjárhagslegan ávinning í tillögum starfshópsins. Einnig áréttar fundurinn að á meðan borgin sóar umtalsverðum fjármunum í ólögbundin gæluverkefni, séu ekki forsendur til frekari skerðinga í skólastarfi en orðnar eru.

Fundurinn hafnar alfarið tillögum starfshópsins um sameiningar skóla í Grafarvogi. Við krefjumst þess að Reykjavíkurborg forgangsraði fjármunum sínum í þágu lögbundinna verkefna, hætti gæluverkefnum og sýni ábyrgð í meðferð fjármuna að öllu leyti. Við viljum ekki frekari niðurskurð og höfnum öllum breytingum sem gerðar eru í andstöðu við skóla- og foreldrasamfélagið.”

ÓDÝRARI LYF Í

SPÖNGINNI

–einfalt og ódýrt Opið: Mán-fös: 9.00 -19.00 • Lau: 11.00 -16.00

Grafarvogsblaðið -Ritstjórn og auglýsingar - Sími: 587-9500