issue 16
03
Tēnei au, tēnei au E noho ana I te roro o tōku whare Ka titiro whakarunga Ki te kāhui whetū e kānapa mai rā Ngā mate kua wheturangitia Haere atu ki te mahanatanga o Hine-nui-te-pō Whaka-arahia ake ngā pou O to whare o Ngāi Tauira Ko te pou tāhū Ko te pou tokomanawa Ko Tāne-te-waiora Te whakaputa nei ki te ao mārama. Tāne-te-wānanga Tāne-te-pūkenga Nāna i kake ki te titoko o te rangi Ringihia ai ngā kete Ka tiritiria, ka poupoua Ki a Papatūānuku Te hihiri i te mahara e! Tiwhatiwha te pō, kāniwhaniwha te pō Tahuri te pō ka ao, ka ao, ka awatea, Ko Te Ao Mārama, e tū!
Ka tū whakahīhī au i raro i te tomokanga, i te waharoa a Te Apa Maareikura a Maui Tikitiki a Taranga. Ko te kore, ko te kore-terawea, ko te kore-te-wiwa. Ko au, ko Papatuanuku anake i tēnei ao. Nā te tūngāwiri o te kiri, nā te ānini o te ūpoko ka noho i te makariritanga o te pō. Ka koekoe te tui, e ketekete te kākā, e kuku te kereru. Ka rangona e au te tiotio o te manu e karanga mai ana i te whare nui. Ko te reo o ngā manutaki ka whakawhārikitia i tōku haerenga i runga i te maraeātea.Ka takoto ōku tapuwae ki te wāhi o Ruka, o Paaka hoki. E hīkoi whakamua ana au ki runga i te kāinga tapu o Tū-matauenga, nā he Pō-uriruri, he Pō-nakonako, he Pō tangotango tōnu. Ka tae au ki te paepae ka titiro whakamua ki te whare tipuna e whakamaru ana i ngā taonga mai i ngā rangitūhāhā. Ka tatari au i runga i te mahau o te whare, te wāhi o te Pō-tahuri-atu-ki-te-taiao. Ko te nekehanga mai i waho, ki rō whare ko te pō-tahuri-ki-te-taiao ki te Ao Mārama. Ka tūhono ngā pou i te tāhūhū me te tuāpapa o te whare. Hei runga, hei raro. Kārohirohi ana te wairua i te mahanatanga o Te Tumu Herenga Waka. Ki rō tēnei whare ka tū ake te pou tāhū, te pou tokomanawa, ā, ko te pou tūārongo. Kei tēnei whare, kei tēra whare ō rātou ake whakairo, ō rātou ake tukutuku me ō rātou ake kōwhaiwhai. Ko te wharenui te pataka iringa kai, iringa kōrero hoki, he kāinga mō te ngakau, mō te wairua o te tangata. Kei ia piko o te whakairo he kōrero tuku iho mai i ngā mātua tipuna. Ka noho te māramatanga i tōku ao i waenga i ēnei taonga kāmehameha. Ko te whāriki o te whare he tuāpapa, he tūrangawaewae. He whare tō tēna tō tēna, he māramatanga tō tēna tō tēna. Nā reira, he aha te māramatanga i tō Ao? Nā Te Pō Marie Hawaikirangi Etitā o Te Ao Mārama 2015 editor@salient.org.nz