НАШО МЕСТА ВИБЕРАНКИ ЗА СОВИТ МЕСНЕЙ ЗАЄДНЇЦИ РУСКИ КЕРЕСТУР
ЛЄМ ЄДЕНАЦ КАНДИДАТИ
П
Керестурсци внєдзелю, 8. юлия, на порядних виберанкох гласали за нове зволанє Совиту Месней заєднїци на штиророчни мандат
онеже на єдней спомедзи схадзкох Скупштини општини Кула пременєни Статут о месних заєднїцох (МЗ) котри ше одноши на шицки месни заєднїци у рамикох локалней самоуправи, до Совиту МЗ можу буц вибрани лєм єденац члени, а нє петнац як цо то була скорейша пракса. Ришенє о утвердзованю виберанковей лїстини, составеней з єденац кандидатох, прилапене на схадзки Виберанковей комисиї Општини Кула, отриманей 27. юния. Гласало ше за єденац членох, спомедзи єденац кандидатох з истей лїстини „Прето же любиме Руски Керестур”, та шицки по автоматизму и були вибрани, без огляду на число гласох. Виберанки прешли без змагательного духу, без инцидентох и пригваркох як на виберацких местох, так анї познєйше нїяки пригварки нє доручени Виберанковей комисиї, алє зоз чудованьом дзепоєдних гражданох же як гласац кед исте число членох и кандидатох. З того мож заключиц же медзи гражданами превладала велька нєзаинтересованосц за кандидатуру, понеже ше кандидовац могол кажде з валалу хто назберал потримовку од найменєй трицец особох. Велї гражданє и на тот завод зауважовали же поволанки-обвисценя о гласаню, з меном и презвиском, и информацию о виберацким месце достали лєм на сербским язику. Понеже у Општини Кула урядови язик и руски язик, тото препущенє идзе на терху Општинскей управи Кула котра задлужена за їх пририхтованє, а иста ситуация и проблем коло того була на виберанкох за Совит МЗ пред штирома роками. До виберацкого списку у Руским Керестуре уписани 3 939 гражданє, и мали нагоду гласац на двох виберацких местох – у Доме борцох и пензионерох и у ЯКП „Руском”, з вкупного числа гласачох на виберанки вишли 989 особи, цо 25,11 одсто, а лєм 14 лїстки були нєважаци.
10 РУСКЕ СЛОВО
ВИХОДНОСЦ ПОДОБНА ЯК И ПРЕШЛИ РАЗ На прешлих виберанкох за Совит МЗ котри були отримани 15. юния 2014. року зазначена виходносц од 25,48 одсто. Теди на гласанки вишли 1 032 Керестурци, медзитим до виберацкого списку були уписани 4 049 особи. Велька розлика у односу на терашнї виберанки, то число кандидатох спомедзи котрих ше виберало нови Совит, и просекове число гласох по кандидату. На лїстини кандидатох було 36, перши мал 605 гласи, остатнї 67, а нововибрани члени у просеку коло 350 гласи, цо вельо менше число у поровнаню з терашнїма виберанками.
До нового зволаня Совиту МЗ вибрани Михайло Фейди (профе сор математики у пензиї, 837 гл.), Владимир Олеяр (информатичар, 835 гл.), Желько Папуґа (польопривреднїк 834 гл.), Михайло Пашо (поднїматель, 831 гл.), Тихомир Медич (поднїматель, 822 гл.), Дюра Сабадош (польопривреднїк, 814 гл.), Славко Бучко (поднїматель, 814 гл.), Илона Заруби ца (спорт ски тренер, 799 гл.), Єлена Сивч (профе сор ґеоґрафиї, 790 гл.), др Златана Надь (дохтор общей пракси, 768 гл.) и Марина Преґун (фахови воспитач, 678 гл.). Звит Виберанковей комисиї бул обявени на огласней табли Месней заєднїци, а у наиходзацим периодзе шлїдзи конститутивна схадзка Совиту. Як цо то узвичаєне, у периодзе пред виберанками у валалє могло замерковац же у цеку предвиберанкова кампаня, по обисцох дзелєни летки з менами кандидатох и подобне.■ Марина Джуджар 13. ЮЛИЙ 2018.