Te Auahatanga

Poia te kākano, kia tupu ai

Ko te auahatanga e ai ki ētehi tirohanga he mea herekore kia tuku ai i ā tātou tamariki ki tō rātou e pai ai. E pua ai te hua auaha, me waihanga i tētehi āhuru mōwai kia poipoi ai te tamaiti me tōna ake auahatanga. Kia whakaarohia te kākano, ka whakatō ana te kakano ki te māra, ko tā tātou mahi he whāngai paruparu kia manaaki ai i te taiao o tōna tupunga, kia tupu kaha ia ki roto i tōna ake mana. Waihoki, me tau te ngākau o te kaiako kia tuku i te mana whakahaere o ngā mahi ki a rātou ngā ākonga, ahakoa te aha. Ka pō, ka ao, ka awatea Kei te pō ngā mea katoa e taea ai. Me whai wā te tamaiti ki te noho i te pō raruraru, koinā ko te poipoitanga o te whakaaro. Nāwai nāwai, ka puta ki te whei ao me ngā tīmatatanga whakaaro, e raruraru tonu ana, engari, e kite ana i ētehi huatau e pai ai ki a ia. Ā, hei te wā kua tau, kua puta ia ki te ao mārama. Ko tētehi pōhēhētanga nui ka puta i te tangata, ko te pōhēhē ka noho rawa ki te ao mārama. Whakaarohia te whitinga me te hekenga o te rā, ka hoki te ao ki te pō, te pō ki te ao he hurihanga māori tērā, e rite ana mō tātou te tangata. Me whai wā kia noho i te pō, i te ao hoki, tē taea te tangata te noho i te ao i ngā wā katoa. • Mā whea ngā herehere o te akomanga e motu ai kia puta atu ā tātou ākonga ki tētehi taiao ako, hei akomanga ora e taea ai ngā mea katoa? • Mā whea tātou e tukuna ai ā tātou ākonga kia whai wā ki te noho i te mīharotanga o te whakaaomāramatanga? • Mā whea te taiao haumaru e hanga tika ai, kia wehi kore nei te whakapuakitanga o te ākonga me tōna katoa? • E wātea ana te ākonga ki te tāpiri atu i ōna ake kitenga ki te rōpū whānui i roto i tōna ake mana? • Mā whea te ākonga e kimi ai, e hura ai i ngā pūrākau, i ngā pakiwaitara i te ara nā rātou anō i tohu ai.