Emri i Shërbimit
ALTERNATIVA TË PËRKUJDESIT MBASDITE PËR FËMIJËT E NËNAVE VIKTIMA TRAFIKIMI DHE VIKTIMA TË DHUNËS NË FAMILJE “SHTËPIA E GJYSHES / SHTËPIA TJETËR” Ofruesi i Shërbimit Organizata “Të Ndryshëm & Të Barabartë” Informacion Kontakti Adresa: Rr. “Fortuzi“, Godina 24, H. 4, Ap. 4, Tiranë Telefon: 00355 (0) 4 2221892 Email: different&equal@icc-al.org Website: www.differentandequal.org Përshkrimi i Shërbimit Alternativa të përkujdesit mbasdite për fëmijët e nënave viktima trafikimi dhe viktima të dhunës në familje “Shtëpia e Gjyshes / Shtëpia Tjetër” është një shërbim komunitar që ofrohet në Bashkitë Tiranë (dy shtëpi), Kamëz, Elbasan dhe Shkodër. Alternativat funksionojnë si qendra ditore që ofrojnë përkujdesje për fëmijët e nënave viktima të trafikimit dhe dhunës në familje përtej orarit zyrtar të funksionimit të çerdheve, kopshteve dhe shkollave publike nga e hëna në të shtunë. Gjatë periudhës së qëndrimit në “Shtëpinë e Gjyshes” për fëmijët ofrohet përkujdesje e specializuar, ushqim, aktivitete të personalizuara edukative dhe argëtuese në përputhje me moshën, zhvillimin e tyre dhe nevojat e identifikuara social–edukative, psikologjike dhe mjekësore. Për fëmijët që janë në moshë shkollore ofrohet mbështetje nga një staf i specializuar mësuesish për 022
përgatitjen e detyrave të shtëpisë, çka i ndihmon fëmijët të përmirësojnë rezultatet e tyre dhe të rrisin aftësitë për të punuar detyrat në mënyrë të pavarur. Si shërbim komunitar, “Shtëpitë e Gjyshes” janë vendosur në zona të përzgjedhura me kujdes për të qënë sa më pranë familjeve të fëmijëve, në mënyrë që të jenë lehtësisht të aksesueshme prej tyre. Në rastet kur është e nevojshme, për të ngushtuar distancën midis “Shtëpisë së Gjyshes” dhe familjeve të fëmijëve, shërbimi siguron dhe transport të sigurt për fëmijët nga kopshti /çerdhja në shtëpitë e gjyshes dhe kthim. Fëmijët që frekuentojnë “Shtëpitë e Gjyshes” i përkasin grupmoshave nga 6 muaj deri në 9 vjeç. Koha mesatare e përfshirjes në shërbim të një fëmije është 40 orë në javë. Nuk ka një limit kohor për përfitimin e shërbimit, ai ofrohet për gjithë periudhën që vlerësohet e nevojshme për fëmijën dhe për nënën. Profesionistët që ofrojnë shërbimin Stafi i “Shtëpive të gjyshes” përbëhet nga 16 profesionistë, prej të cilëve 10 janë mësuese (5 mësuese kryesore/1 për secilën shtëpi dhe 5 mësuese ndihmëse/1 për secilën shtëpi); 5 punonjës socialë /1 për secilën shtëpi në rolin e administratorit/menaxherit; 1 psikolog dhe 1 mjek me kohë të pjesshme dhe shofer kur ka nevojë për transport të fëmijëve. Historiku i zhvillimit të shërbimit Dy alternativat e para të përkujdesit mbasdite për fëmijët janë hapur nga organizata “Të Ndryshëm & Të Barabartë” në Bashkinë Tiranë, në maj 2017. Ideja për hapjen e tyre lindi nga nevoja për të adresuar vështirësinë në mbajtjen e një vendi pune nga përfitueset e organizatës, viktima trafikimi dhe të dhunës në familje, të cilat ishin edhe nëna. Duke qënë nëna të vetme dhe pa një rrjet mbështetës, procesi i riintegrimit për ato bëhej tejet sfidues, duke i ekspozuar jo rrallë herë fëmijët e tyre drejt neglizhimit dhe abuzimit. Alternativat u ngritën për të adresuar pikërisht këtë aspekt dhe për t’ju dhënë mundësi nënave të punonin, ndërkohë që për fëmijët e tyre ofrohej përkujdesje në një mjedis të sigurt dhe të shëndetshëm.
