0806 - Manifest Elettorali għall-Elezzjonijiet tal-Parlament Ewropew 2024

manifest elettorali

GĦALL-ELEZZJONIJIET TAL-PARLAMENT EWROPEW 2O24 PARTIT LABURISTA

1

2

“

F’dawn l-aħħar snin, kull sfida li kellna quddiemna, flimkien irnexxielna ndawruha f’opportunità.

Stajna nagħmlu dan għax konna magħqudin bħala poplu. Ħdimna bħala tim wieħed: Tim Malta - biex nissalvagwardjaw l-interessi tal-Għawdxin u l-Maltin kollha.

3

Dan għamilnieh kemm f’pajjiżna u anke lil hinn minn xtutna. B’mod speċjali fil-laqgħat f’istituzzjonijiet tal-Unjoni Ewropea, fejn spalla ma’ spalla, il-Gvern u l-Ewroparlamentari tal-Partit Laburista dejjem ħadmu biex l-interessi ta’ pajjiżna jiġu qabel kollox. Għaliex sodi ma’ dak li nemmnu fih, konna dejjem konsistenti f’dak li ħdimna għalih – politika li tpoġġi fiċ-ċentru tagħha lin-nies u li tagħti sostenn liċ-ċittadini. Eżempju ċar ta’ dan hi l-politika tagħna tal-enerġija li nżommu l-prezzijiet stabbli – għaliex nemmnu li din hi miżura ġusta soċjalment u li qed trendilna ekonomikament.

“

Aħna sodi wkoll dwar il-valuri tagħna.

Nemmnu li l-promozzjoni tal-paċi bid-djalogu u d-diplomazija hi ċ-ċavetta għall-prosperità, is-sigurtà u l-istabbiltà tal-popli tagħna.

4

Fis-snin li ġejjin ser inkomplu nibnu fuq dak li ksibna diġà. Ser naħdmu biex ikollna konnettività aktar b’saħħitha – għaliex din tgħaqqadna mal-kontinent u tiftħilna opportunitajiet ġodda kummerċjali u għan-nies tagħna. Bl-istess mod ser naraw li Malta tkun aktar kompetittiva, u li s-suq tal-Unjoni Ewropea jkun wieħed li jagħmel ġustizzja ma’ kulħadd.

Irridu wkoll nassiguraw li l-Unjoni Ewropea ta’ għada, li possibbilment tkun Unjoni akbar minn dik kif nafuha sal-lum, tkun waħda li tirrifletti verament dak li jridu n-nies. Unjoni li tipproteġi l-interessi ta’ kulħadd u li ma tingħalaqx fiha nnifisha, iżda li tkun ukoll preparata għall-isfidi preżenti u futuri – b’investimenti biex niġġieldu t-tibdil fil-klima mingħajr ma ngħabbu piżijiet ġodda fuq in-nies.

L-għan tagħna u tal-kandidati li qed inressqu ‘l quddiem bħala Partit Laburista hu li nibqgħu naħdmu biex Malta tkompli miexja ‘l quddiem, li nsostnu s-suċċess li qed jagħmel pajjiżna mis-sħubija fl-Unjoni Ewropea.

Li naħdmu biex nagħtu s-Saħħa lill-Għawdxin u s-Saħħa lill-Maltin.

Robert Abela

Prim Ministru u Mexxej tal-Partit Laburista

5

o1 MALTA L-EWWEL SODI MA’ DAK LI NEMMNU FIH Ewropej u konvinti: naħdmu favur Ewropa li tħares il-ġustizzja soċjali, Ewropa dejjem aktar solidali iżda dejjem bl-interessi ta’ pajjiżna fuq quddiem nett. Għalina Għawdex u Malta l-Ewwel.

Qatt daqs dawn is-snin ma ħarġet biċ-ċar l-importanza li Malta jkollha rappreżentanti li jġibu l-interessi tal-Maltin u l-Għawdxin l-ewwel u qabel kollox.

Malta żammet sod meta iffaċċjata bi pressjonijiet internazzjonali biex inbiddlu l-mudell soċjo-ekonomiku tagħna li joffri stabbiltà, prosperità u li jsostni l-familji u n-negozji.

Eżempju ċar ta’ dan kien fejn jidħlu l-prezzijiet tal-enerġija. Għamilna dan għax nemmnu li din hija miżura ekonomika daqskemm hi soċjali.

Il-prinċipju li jiggwidana huwa li naraw li nipproteġu l-għejxien tal-familji, iż-żgħażagħ, l-anzjani u n-negozji Maltin u Għawdxin, li naraw li l-ekonomija tagħna tibqa’ tikber. Hekk biss nistgħu nibqgħu nsostnu u nsaħħu l-qafas soċjali ta’ pajjiżna. L-għan aħħari tagħna jibqa’ li noħolqu l-ġid biex dan ikun jista’ jitqassam b’mod ekwu.

Il-Membri Parlamentari Ewropej f’isem il-Partit Laburista ser jimxu fuq dan il-prinċipju, fejn anke meta iffaċċjati minn pressjonijiet li jmorru kontra dak li huwa ta’ interess għal Malta u Għawdex, inżommu sodi. L-interessi tal-familji u n-negozji Maltin u Għawdxin jiġu l-ewwel.

6

o2 MALTA: LEħEN IL-PAċI Malta kienet, għadha u ser tibqa’ promotur ewlieni tal-paċi fl-Ewropa, u f’kull rokna tad-dinja. Dan nippromovuh b’saħħitna kollha kullimkien, inkluż fil-Parlament Ewropew u fl-istituzzjonijiet kollha Ewropej.

F’ċirkostanzi ta’ instabbiltà wara l-invażjoni Russa fl-Ukrajna, u l-kunflitti f’Gaża u l-Lvant Nofsani fost l-oħrajn, rajna l-effett traġiku li jista’ jkollu diskors prematur u mhux maħsub f’ċirkostanzi li jirrikjedu kawtela u sforzi diplomatiċi.

Kburin bin-newtralità ta’ pajjiżna. Filwaqt li ser nibqgħu niddefendu u nippromovu dan il-prinċipju, ma jfissirx li aħna indifferenti, jew li ma niħdux pożizzjonijiet ċari fil-konfront ta’ dak li hu ħażin.

Il-Membri Parlamentari Ewropej f’isem il-Partit Laburista ser jaħdmu sabiex bl-ebda mod l-Ewropa li nagħmlu parti minnha ma tkun aġent tal-kunflitti u l-gwerer, iżda tkun pont ta’ paċi u djalogu għall-benefiċċju tal-popli kollha madwar id-dinja.

7

o3 MALTA KOMPETITTIVA F’SUQ WAħDIENI ĠUST Il-kompetittività tal-Unjoni Ewropea hi kruċjali biex jinħoloq il-ġid u jitkattar ix-xogħol. Ir-regolamentazzjoni trid issir b’mod li jintlaħaq l-għan li għalih tkun qed titfassal u fl-istess ħin ma tkunx ta’ xkiel għan-negozji.

Għan-negozji Maltin u Għawdxin hu kruċjali li r-regoli li jsiru jkunu mfassla b’mod li jagħmlu sens għalihom ukoll. Is-sinsla tal-ekonomija tagħna huma n-negozji żgħar u medji, u għalhekk il-ħtiġijiet tagħhom iridu jkunu mħarsa sabiex ikunu jistgħu jibqgħu kompettitivi.

Irridu naraw ukoll li jiġu rikonoxxuti r-realtajiet ta’ stat membru gżira fil-periferija tal-Unjoni Ewropea biex in-negozji tagħna jkunu jistgħu jikkompetu b’mod ġust, u jibbenefikaw mill-benefiċċji tas-suq waħdieni.

Il-Membri Parlamentari Ewropej f’isem il-Partit Laburista ser ikunu fuq quddiem biex il-leġiżlazzjoni Ewropea taħseb f’dawn ir-realtajiet. Għandu jkun hemm evalwazzjoni sistematika tal-impatt fuq stati membri żgħar u stati membri gżira bħalna fi kwalunkwe analiżi tal-impatt li jsir qabel tiġi adottata kull leġiżlazzjoni.

Barra minn hekk, ser ikunu qed jaċċertaw li l-wegħda li titnaqqas il-burokrazija b’mod sostanzjali tiġi implimentata biex l-għajnuniet tal-Unjoni Ewropea jkunu aċċessibbli aktar faċilment.

8

9

o4 IT-TIBDIL FIL-KLIMA It-tibdil fil-klima hija sfida globali li rridu nsarrfuha f’opportunità.

Għalhekk neħtieġu politika li tkun imfassla b’għaqal u b’reqqa fuq livell Ewropew. Politika li tkun realistika u adattata għar-realtajiet ta’ kull Stat Membru.

Matul is-snin, pajjiżna għamel investimenti li naqqsu drastikament l-emmissjonijiet. Mill-qasam tal-enerġija fejn rajna l-qalba miż-żejt li jniġġes għall-gass u s-sorsi rinnovabbli waqt li żammejna t-tariffi stabbli, sal-iskart u t-trasport li fihom saru investimenti li qatt ma rajna bħalhom qabel.

Dan anke permezz ta’ skemi li jinċentivaw ix-xiri ta’ vetturi elettriċi, investiment f’modi alternattivi ta’ trasport kif ukoll it-trasport pubbliku b’xejn għal kulħadd fuq l-art u l-baħar – u dan mingħajr ma żidna ebda piż fuq in-nies.

Gvern Laburista qiegħed jaħdem bla heda biex jindirizza l-isfidi kbar u orizzontali li jeżistu f’dan is-settur għall-ġid tal-ġenerazzjonijiet futuri u anke fid-dawl tal-kontribut lejn il-mira kollettiva li ġiet maqbula fuq livell Ewropew sabiex nilħqu n-newtralità mill-karbonju sal-2050.

Il-Membri Parlamentari Ewropej f’isem il-Partit Laburista ser ikunu qed jaħdmu favur riformi ambjentali li jikkumplimentaw il-ħolqien tal-ġid, b’leġiżlazzjoni ambizzjuża li tikkunsidra wkoll iċ-ċirkustanzi speċifiċi tagħna bħala stat membru gżira fil-Mediterran.

10

o5 L-IMMIGRAZZJONI Il-Partit Laburista jemmen fid-drittijiet fundamentali tal-bniedem u fil-protezzjoni umanitarja li għandha tingħata lil dawk li ħaqqhom.

Il-politika li ħaddem Gvern Laburista matul l-aħħar snin wasslet messaġġ ċar li m’għandhomx ikunu t-traffikanti tal-bnedmin li jiddeċiedu min jidħol fl-Unjoni Ewropea.

L-isfidi f’dan is-settur huma kontinwi u vasti, iżda rnexxielna nnaqqsu l-wasliet.

Il-Membri Parlamentari Ewropej f’isem il-Partit Laburista ser jibqgħu jaħdmu sabiex l-Unjoni Ewropea jkollha sistema ġusta tal-ażil u mhux waħda bbażata fuq il-populiżmu u l-mibegħda li jwasslu għar-razziżmu u l-politika tal-lemin estrem.

Is-soluzzjoni ta’ din l-isfida hija l-prevenzjoni. Irridu politika soda kontra t-telf ta’ ħajjiet fuq il-baħar. Il-ġlieda kontra t-traffikar tal-bnedmin trid issir bil-koperazzjoni ma’ pajjiżi terzi ta’ tranżitu u ta’ oriġini. Dan qed nimplimentawh ta’ kuljum, anke għaliex naħsbu li ma nistgħux niddependu fuq is-solidarjetà ta’ Stati Membri oħra biex titqassam ir-responsabbiltà.

Permezz ta’ tisħiħ tal-għodod legali u diplomatiċi, naħdmu sabiex l-immigranti li ma jkollhomx dritt jibqgħu fl-Unjoni Ewropea, jintbagħtu lura lejn il-pajjiż tal-oriġinu tagħhom. Għandu jkun hemm aktar inċentivi li jattiraw ħaddiema kwalifikati lejn l-Unjoni Ewropea, b’rispett sħiħ lejn skemi nazzjonali li jħaddem pajjiżna diġà.

11

12

o6 KONNETTIVITÀ B’SAĦĦITHA Konnettività b’saħħitha hi ċ-ċavetta għall-ħolqien tal-ġid u t-tkabbir ekonomiku.

B’investiment fil-konnettività nistgħu wkoll intejbu l-moviment tal-persuni u l-prodotti, filwaqt li noħolqu opportunitajiet ġodda ma’ pajjiżi oħra, kemm fl-Unjoni Ewropea u anke lil hinn minnha. Fl-aħħar snin rajna kif il-leġiżlazzjonijiet tat-trasport u l-klima affettwaw il-konnettività direttament.

Bħala stat membru gżira, għalina l-oqsma tal-avjazzjoni u l-marittimu għandhom relevanza aktar minn pajjiżi oħra. Għandna dipendenza totali minn dawn l-oqsma għall-mobbiltà, għal kull ħaġa li nimpurtaw u nesportaw, u kif ukoll għaliex it-turiżmu huwa pilastru ekonomiku li jikkontribwixxi b’mod sostanzjali lejn l-ekonomija ta’ pajjiżna.

Fil-qasam marittimu, pajjiżna għandu reġistru u bandiera li għandha reputazzjoni b’saħħitha mad-dinja kollha, u huwa mgħaqqad sew ma’ pajjiżi oħra li jfornu l-ekonomija bl-importazzjoni ta’ provvisti u materja prima meħtieġa u neċessarji għall-manifattura u l-konsumaturi Maltin. Dan is-settur għandu jkun protett u promoss b’mod adegwat biex strateġikament jgħin l-Unjoni Ewropea tikber ekonomikament, b’inċentivi għad-dikarbonizzazzjoni u biex ikunu fornuti rotot li jgħaqqduna ma’ kontinenti oħra.

Il-Membri Parlamentari Ewropej f’isem il-Partit Laburista ser jaħdmu biex filwaqt li tkompli d-dikarbonizzazzjoni f’dawn l-oqsma, naraw li l-leġiżlazzjoni tkun waħda li tassigura l-interessi ta’ gżejjer żgħar bħal Malta.

13

o7 GĦAWDEX GŻIRA TA’ VILLAĠĠI Fl-aħħar snin, il-gżira Għawdxija trasformat ruħha f’mutur ekonomiku, b’rekord fiż-żieda ta’ impjiegi. L-ammont ta’ ħaddiema fis-settur privat irdoppja.

Għall-ewwel darba, Gvern Laburista kkometta proporzjon rekord ta’ fondi Ewropej esklussivament għal Għawdex, li kienu strumentali għall-kwalità ta’ ħajja aħjar għall-Għawdxin, b’titjib kbir fl-iskejjel, fl-infrastruttura u fis-servizzi mediċi. Għawdex ser ikun il-mudell tal-qalba ambjentali ta’ pajjiżna. Ser naħdmu biex proġetti ambjentali fi gżejjer ċkejkna bħal Għawdex jingħataw prijorità fejn jidħol finanzjament.

Prijorità oħra għal Għawdex hija d-diġitalizzazzjoni, li hija kruċjali mhux biss f’termini ta’ konnettività, imma wkoll biex jiġu kkreati opportunitajiet sostenibbli għaż-żgħażagħ u n-negozji Għawdxin. L-insularità doppja hija sfida, li ma waqqfitniex milli nġibu r-riżultati.

Il-karatteristiċi u l-potenzjal tal-gżira Għawdxija jagħmluha ideali biex tibqa’ tkun il-katalista li minnha jiskattaw inizjattivi li jmexxuna fit-tranżizzjoni ekonomika li jinsab fiha pajjiżna.

Għawdex Gżira ta’ Villaġġi hija l-istrateġija distinta li ser tmexxina ‘l quddiem sabiex Għawdex ikun fuq quddiem fi proġetti ewlenin, l-ewwel carbon neutral zone – gżira ta’ opportunitajiet għall-familji u n-negozji Għawdxin.

Il-Membri Parlamentari Ewropej f’isem il-Partit Laburista ser jaħdmu f’din id-direzzjoni b’mod li nisfruttaw il-vantaġġi distinti li gżira bħal Għawdex jista’ jkollha.

14

15

o8 FONDI EWROPEJ Il-Prim Ministru Robert Abela nnegozja allokazzjoni rekord ta’ fondi Ewropej għall-perjodu 2021-2027, li ser twassal biex isiru investimenti li jikkumplimentaw dawk li saru minn baġits passati u minn fondi nazzjonali.

Fit-tfassil tar-regolamenti Ewropej dwar kif jintefqu l-flejjes tal-Unjoni Ewropea, pajjiżna jrid jiżgura li dan isir bis-sens u b’mod li jiggarantixxi li dawn ikunu aċċessibbli għal kulħadd, inkluż għal Stati Membri żgħar bħal Malta.

Matul dawn l-aħħar snin pajjiżna ħa deċiżjonijiet kuraġġużi u qed jistabbilixxi miri li ser ikunu strumentali fost l-oħrajn għal aktar sostenibbiltà u tnaqqis fit-tniġġis. Dan kollu filwaqt li ħaddieħor kien impenjat jagħmel dak kollu li jista’ biex ixekkel il-fondi għal pajjiżna.

Il-Membri Parlamentari Ewropej f’isem il-Partit Laburista ser ikunu parteċipi f’kull diskussjoni dwar fondi Ewropej biex jaraw li nisfruttaw bl-aħjar mod possibbli l-potenzjal ta’ pajjiżna f’dak li għandu x’jaqsam mal-allokazzjonijiet, l-aċċessibbiltà u l-użu ta’ fondi Ewropej.

16

o9 L-AGRIKOLTURA U S-SAJD Gvern Laburista kien spalla ma’ spalla mal-bdiewa, ir-raħħala u s-sajjieda fl-isfidi li iffaċċjaw minħabba fatturi internazzjonali.

Minkejja dan, kellna stejjer ta’ suċċess fil-biedja u s-sajd li servew ta’ mudell għal operaturi oħra.

Ser inkomplu nassistu l-bdiewa, ir-raħħala u s-sajjieda tagħna sabiex jimmodernizzaw l-operat tagħhom u jagħmlu l-prodott tagħhom aktar kompetittiv. Fl-istess waqt irridu noffru aktar inċentivi lill-bdiewa biex jinvestu fi prattiċi sostenibbli u organiċi.

Konxji mill-karba tal-bdiewa Maltin u dawk Ewropej sabiex ftehimiet kummerċjali ma’ pajjiżi terzi jkunu sensittivi għas-settur tal-agrikoltura u s-sajd. Għalhekk ser inkunu qed naraw li fi ftehimiet ġodda li jkunu qed jiġu nnegozjati mill-Unjoni Ewropea, ikun hemm analiżi mistħoqqa dwar l-impatt soċjo-ekonomiku fuq is-settur u li dawn ma jkunux ta’ detriment għall-produzzjoni fis-swieq Ewropej.

Nagħrfu l-importanza li nsaħħu l-ħidma favur is-sigurtà tal-ikel li tiddependi minn setturi tal-agrikoltura, is-sajd u l-akwakultura sostenibbli.

Flimkien mal-Gvern Malti, il-Membri Parlamentari Ewropej f’isem il-Partit Laburista ser jaħdmu mill-qrib mal-bdiewa, ir-raħħala u s-sajjieda Maltin biex ikollna suq li jgħinhom ikunu kompetittivi billi jittaffew il-piżijiet amministrattivi, u jiġu żgurati kundizzjonijiet ekwi u ġusti għall-Ewropej.

17

18

1o L-UNJONI EWROPEA TA’ GĦADA Fil-leġiżlatura li jmiss huwa mistenni li d-diskussjoni ser tkompli tiżvolġi b’għadd ta’ deċiżjonijiet sensittivi li jridu jittieħdu dwar il-futur tal-Unjoni Ewropea.

Bħala l-iżgħar pajjiż tal-Unjoni Ewropea, pajjiżna għandu realtà unika li tirrikjedi ħidma koordinata li timxi id f’id mal-isforzi tal-Gvern sabiex nassiguraw li pajjiżna jkollu l-aqwa riżultati minn dan l-eżerċizzju.

Nemmnu li hekk kif l-Unjoni Ewropea qed tkompli tevolvi u tintegra, iż-żamma ta’ diviżjoni ċara tal-kompetenzi hija vitali biex jitħarsu l-prinċipji tas-sussidjarjetà u l-proporzjonalità.

Ma nemmnux li għandu jipprevali l-prinċipju tal-one-size-fits-all.

It-tkabbir tal-Unjoni Ewropea huwa suġġett li qed ikun diskuss b’mod intensiv wara l-aggressjoni Russa fuq l-Ukrajna. Filwaqt li nemmnu bis-sħiħ li l-Unjoni Ewropea għandha tibqa’ impenjata f’diskussjonijiet ma’ dawn il-pajjiżi, dan il-proċess għandu jkun wieħed li jħares lejn il-merti ta’ dawn il-pajjiżi u l-kwalità tar-riformi li qed jimplimentaw.

Il-Membri Parlamentari Ewropej f’isem il-Partit Laburista ser ikunu fuq quddiem biex jiġu promossi diskussjonijiet ma’ sħab strateġiċi oħra lil hinn mill-Unjoni Ewropea. Nemmnu li dan huwa ta’ benefiċċju dirett għaċ-ċittadini tal-Unjoni Ewropea u biex jiġu indirizzati temi bħall-kummerċ, l-immigrazzjoni u t-tibdil fil-klima fost l-oħrajn.

19

IL-KANDIDATI TAL-PARTIT LABURISTA

claudette abela baldacchino

GĦALL-ELEZZJONIJIET TAL-PARLAMENT EWROPEW 2O24

THOMAS BAJADA

20

jesmond bonello

Steve ellul

alex agius saliba

DANIEL ATTARD

jesmond marshall

mariJa sara vella gafa

CLINT AZZOPARDI FLORES

21

22

23

partitlaburista.org 24