DIARANSON 14 MEI , 2014
6
Presidente di UEA a trece varios preocupacion dilanti
Mester stop ponemento di klinkler y evalua prioridadnan prome cu bin cu medidanan Elmar “kier hende sabi so di scol halto”, segun sindicalista Coby Geerman
Sindicalista Coby Geerman.
Ayera trahadonan representa dor di sindicato Union di Electricista Aruba (UEA) bou presidencia di sindicalista Coby Geerman, a reuni urgentemente entre otro pa defende
cierto beneficionan, entre nan ora cu casa di un trahado bira malo e trahado ta haya 10 dia liber. Sindicalista Geerman tabata masha desapunta cu awor e exigencia a bira mas pisa, ya cu e trahadonan mester presenta un carta di doctor caminda e persona mester ta practicamente malo pa muri pa e trahado di Elmar por haya su 10 dia liber. “Awor si ta bon! Ki social tin pa cu e trahadonan di Elmar, unda nos ta bay...”, sindicalista Geerman a bisa. E ta haya cu gerencia di Elmar no tin respet pa sindicato ya cu sindicato a yega di gana nan 8 caso, y un so nan a perde, y apesar di esey nan no ta respeta sindicato, ni dialoga nan no kier dialoga. E ta kere cu a yega momento pa sindicato cera cabes hunto, paso ora cu esaki
ta sosode lo tin un cos grandi, pero nan no kier yega di e leu ey, el a declara na ArubAwe. El a bisa cu niun compania no por funciona si no tin trahado, ya cu ta e trahado esun cu ta hiba e compania dilanti. “Sin trahado no tin nada”, el a declara. Pesey nan a reuni ayera mainta dilanti di sede di Elmar na Oranjestad, ya cu EUA ta considera cu gerencia di Elmar ta neglisha trahado. Tambe EUA ta scucha cu gobierno ta bin cu mas medida keto bay, y aunke nan no ta contra nan pero sr. Geerman ta haya cu gobierno mester convence e trahadonan riba e necesidad pa introduci medidanan. El a bisa cu nan a laga di bay Dialogo Social, ya cu den un reunion importante varios minister pa keda sin bay. Igualmente presidente di UEA
ta basta contento cu e trabou cu gobierno ta bin haciendo pariba di brug ya cu niun otro gobierno den pasado a pone asina tanto atencion pariba di brug. Pero e ta haya cu mester tin cierto prioridad, pues logicamente “no por kita kende di trabou pa pone klinker”. E sindicalista ta haya cu si gobierno kier bin cu medidanan ta bon pa wanta prome e ponemento di klinker y evalua kico tin prioridad. E ora ey e ta considera cu sindicato por bay di acuerdo cu mester bin cu algo pa regla un situacion. “Pero bo no por bin cu medida pisa den enseñansa tambe, anto bo kier bin cu klinker tur caminda, no por!...”, el a indica. Otro punto cu e sindicalista Coby Geerman a trece cu hopi preocupacion ta cu antes e studiantenan cu a bay LBO-
scol tabata haya trabou lihe na Elmar y despues nan tabata sigui curso y asina sigui scala y profesionalisa su mes. Pero ya e oportunidad aki no ta existi mas na Elmar, ya cu “nan kier hende sabi so di scol halto”. E ta haya cu e mayornan mester reacciona riba e situacion aki, ya cu pakico nan ta manda nan yiunan na scol, mientras cu ora scol caba nan no tin caminda pa bay traha. Presidente di UEA a indica cu e preocupacion aki a ser treci dilanti di Utilities y gobierno pero te ainda nan no a reacciona. El a bisa cu Elmar ta tumando keto bay e trahadonan nobo cu a bay scol halto, mientras cu esunnan cu ta bay scol tecnico no ta haya trabou. “Algo mester sosode...”, asina presidente di UEA a bisa.