DIAHUEBS 13 FEBRUARI 2014
PAGINA 21
DIARIO
Minister Paul Croes:
Seminario organiza pa CBS y CedeAruba ta hopi importante pa fiha maneho pa nos hubentud
ORANJESTAD (AAN) – Diaranzon 12 di Februari CBS y CedeAruba, a organiza un
seminario, unda a trece hunto tur stakeholder cu ta traha riba tereno social, NGO’s,
pero tambe educativo, cu participacion di diferente departamento cu ta dirigi riba maneho di mucha y adolescentenan. Den entrevista cu Minister drs. Paul Croes, titular di Asunto Social y Asuntonan di Hubentud, el a menciona cu diferente NGO’s y departamentonan cu ta cay bao di su ministerio a presenta datonan. E dignatario a subraya cu ta hopi importante, pa na momento cu tin datonan for di schoolnan of otro instancianan den veld, nan por intercambia esakinan cu otro departamentonan, pasobra na momento cu tin datonan por fiha maneho. Asina por dirigi maneho riba kico ta e retonan cu tin pa nos mucha y hobennan, y pesey e ta aplaudi e iniciativa aki. CBS ta purba di acumula tur dato di diferente organizacion pa intercambia esakinan cu otro departamentonan, pa asina informa y aconseha
gobierno den ki direccion e mester dirigi su esfuerzonan. Datonan ta verifica den cual skina mester bin cu mas atencion, segun e mandatario. Minister drs. Paul Croes a indica cu nos situacion social y di nos hobennan ta den bon man. Tin hopi experto cu ta trahando, ya pa hopi aña caba, pa nos hobennan por destaca y esaki ta un ehemplo cu na momento cu tur organizacion ta bin hunto, a forma un sinergia di informacion, y e forma mas eficaz pa bin cu maneho ta asina aki. Minister drs. Paul Croes a indica cu e lo sigui duna siguimento na e datonan cu bin afo for di e seminario aki, y na momento cu e datonan aki ta accesible y tin intercambio y e datonan wordo interpreta
pa gobierno, por dirigi e maneho riba e problematica mas grandi cu tin bao di nos muchanan. E dignatario a expresa cu e Tratado Universal di Derecho di Mucha ta stipula cu derecho di nos muchanan mester wordo respeta, cu nan tin derecho riba educacion, libertad di expresion, di tin un dak riba nan cabes, etc., y tur esakinan mester wordo respeta y pa haci esaki mas eficaz ta treciendo tur e partnernan hunto pa crea e infrastructura pa e proteccion di nos mucha y hobennan ta na prome lugar. Esaki ta e meta di e seminario aki y gobierno lo dirigi su maneho a base di e datonan y consehonan di e NGO’s y demas departamento concerni.