1 minute read
Lífrænt Ísland
Next Article
Lífræn framleiðsla á Íslandi er talsverð en mætti vera meiri.
Þegar litið er til nágrannalanda okkar og þeirra landa sem við kjósum að bera okkur saman við sýnir tölfræðin það svart á hvítu að eftirspurn eftir lífrænt vottuðum vörum fer mjög ört vaxandi og eykst framleiðslan í takt við það. Kannanir sýna að helstu ástæður þess að neytendur velja lífrænt eru fyrst og fremst umhverfismál, gæði, hollusta og dýravernd.
Verkefninu Lífrænt Ísland var ýtt úr vör vorið 2020. Viðbrögðin hafa verið góð og ljóst að eftirspurn eftir lífrænni framleiðslu eykst hér á landi líkt og annars staðar í heiminum. Markmið Lífræns Íslands er að vekja athygli á lífrænni framleiðslu og fræða neytendur um kosti hennar.
Berglind Häsler, verkefnastjóri Lífræns Íslands.
Lífræn framleiðsla er vottuð af þriðja aðila. Evrópulaufið er alþjóðlegt vottunarmerki sem staðfestir að staðli um lífræna framleiðslu, samkvæmt reglum, sé fylgt. Hún vottar til dæmis það að framleiðandi:
Noti lífrænt áburðarefni úr nærumhverfi
Gefi búfé lífrænt fóður
Tryggi að aðföng standist markmið um sjálfbærni
Noti náttúrulegar varnir í stað eiturefna gegn skordýrum og illgresi
Tryggi að öll aukaefni sem notuð er í vinnsluna séu af lífrænum uppruna
Á Íslandi eru um 60 framleiðendur með lífræna vottun. Á heimasíðu verkefnisins lifraentisland.is má sjá lista yfir framleiðendur
„Það kom aldrei neitt annað til greina en að vera með lífræna vottun. Það skiptir okkur gríðarlega miklu máli að bjóða upp á vörur sem eru ræktaðar á sem heilnæmasta hátt. Við vildum geta ræktað án eiturefna og tilbúins áburðar og þannig verndað heilsu fólks. Þá skiptir okkur líka máli að rækta jörðina á sem umhverfisvænastan hátt fyrir komandi kynslóðir.“ - Sunna Hrafnsdóttir, lífrænn bóndi að Ósi í Hörgársveit.
„Með því að velja lífrænt þá velur þú að sleppa við allskonar aukaefni sem enginn venjulegur neytandi kann deili á. Þú færð líka staðfestingu á því að varan sé framleidd á umhverfisvænan hátt og að ekkert fúsk sé í gangi.“ - Svavar Pétur Eysteinsson, lífrænn framleiðandi á Karlsstöðum í Berufirði.
„Ég kaupi lífræn matvæli fyrst og fremst vegna heilsu minnar og barnanna minna, en einnig til að styðja við umhverfisvænustu og hreinustu matvælin sem eru á markaðnum. Að velja lífræn matvæli er umhverfismál sem viðkemur mér á hverjum degi, alla ævi. Með þeim hætti get ég raunverulega stýrt umhverfislegum áhrifum fæðuneyslu fjölskyldu minnar og haft hreinni samvisku gagnvart börnunum mínum og komandi kynslóðum.“ - Anna María Björnssdóttir, lífrænn neytandi í Reykjavík.
„Ég byrjaði með hefðbundinn búskap og fór svo að rækta lífrænt grænmeti til heimilisins. Þá fann ég strax muninn, á gæðum og á bragði. Lífræn ræktun er líka náttúruvernd. Sem ræktandi vinnur þú með náttúrunni og hennar aðferðum í stað þess að örva hana með efnum. Ég hef aldrei efast eftir að ég byrjaði á þessu fyrir 25 árum.“ - Eymundur Magnússon, lífrænn bóndi á Vallanesi í Múlaþingi.
