Сашо Палєнкаш-Пред нами

САШΟ П АЛЄНК АШ

ПРЕД

НАМИ -1-

САШΟ П АЛЄНК АШ

ПРЕД

НАМИ

M AKoff 9

ПРЕД НАМИ: мини-роман у приповедкох Директор Владимир Паланчанин Редактор Борис Варґа Рецензенти Мр Валентина Чизмар Ваня Дула Дизайн и компютерски обробок Иґор Орсаґ Фотоґрафиї: Марияна Павлович Лектор Блажена Хома Цветкович Насловни бок Марияна Павлович Фото: Руснак у гарсци судьби Видава НВУ «Руске слово» Булевар ошлєбодзеня 81/VII Нови Сад Тираж 400 прикладнїки Кнїжка состойна часц часопису МАК 04/2010 и дзевята кнїжка едициї MAKoff

ЗМ И С Т УВОДНЕ СЛОВО 01 САЛАЩАНЬ 02 КОПАЧЕ ЗЛАТА 03 СКРИТЕ БЛАГО 04 ОДКРИЦЕ АТЛАНТИДИ 05 ГЛАС З ДАЛЄКА 06 ВАЛЯНЄ АТЛАНТИДИ 07 КЕРЕСТУРСКИ ШТИРИ ДЗВОНИ БИОҐРАФИЯ

У В ОД Н Е

С ЛО В О

Чловек проґресивне єство – швидко напредує, швидко сце дацо нове, алє вельо раз ''бежи опрез друка'' и то анї нє обачи. Историю, гваря, пишу побиднїки, а хто же пише, односно твори терашньосц и на ким же остава будучносц? Побиднїк вчерайшого дня такой нєшка годзен жобрац скорку хлєба, а уж ютре умрец од гладу, и хто за тото одвичательни? Живот, гваря, творя красни ствари, а хто же твори красу и стара ше же би тота краса крашела и нєшкайши дзень и кому вона остава у будучносци? Краса вчерайшого дня такой нєшка ше може претвориц до пекла, а уж ютре можеме гориц у нїм, и хто за тото одвичательни? Историю, гваря, жили людзе, а хто же жиє терашньосц и хто же будзе жиц будучносц? Чийо дзеци свой живот и свою красу дали за скорку хлєба же би ми могли постац дачийо дзеци, а чом же вец ми правиме пекло нашим дзецом? Хто же пречита нашу историю, хто пред нами? Тота кнїжка нє поволанка на даяку файту централизациї, алє напроцив, поволанка є на зєдиньованє и змоцньованє медзисобних вязох. Тота кнїжка нє песимистичне дожице будучносци, алє релативно сирови способ пробованя освидомиц! Уживайце у кнїжки! Сашо Палєнкаш

-7-

-8-

С А Л А Щ А Н Ь Народзел сом ше 2179. року на салашу оцовей фамелиї. Швидко по моїм народзеню одселєли зме ше до Варошу дзе сом препровадзел єдну часц дзецинства, а школованє сом закончел у Престолнїци. Бабу и дїда сом нїґда нє упознал. Остали на салашу. Пре якеш нєпорозуменє, родичи претаргли зоз нїма контакт. Кажде лєто сом зоз свою фамелию приходзел до Варошу до моїх родичох. Отамаль зме звичайно ходзели на Боґоєво купац ше. На тей релациї перше место на хторе ше наиходзело мало два будинки – єдна стара церква и барз стара хижа зоз амфор-капуру. То ми було нєзвичайне, прето же анї єден салаш котри сом по теди мал нагоду видзиц, нє мал свою церкву. Єдного лєта, кед зме знова пришли до родичох, одлучел сом же тото место нащивим сам. Накадзи сом пришол, перше сом рушел ґу церкви, медзитим, була замкнута. Доокола нїґдзе нїкого, лєм широки гони и прейґ драги гевта стара хижа. Отворел сом амфор-капуру и вошол нука. На штред двора вельки орех, а под нїм стари дїдо. Шедзел и цошка читал. Накадзи ме збачел, весело ме привитал и поруковал ше зо мну. Нє було чежко начац приповедку. Дїдо приповедал и приповедал, як кед бизме ше познали голєм сто роки. Цале пополаднє зме бешедовали. На концу сом ше му питал тото прецо сом и пришол: як то же гевта церква и хижа у штред польох. Дїдови ше такой зармуцела твар. Спущел главу и кущик уцихнул, а вец почал зоз чежкима словами: ''Сину, нє вше ту були поля. Ту бул цали єден валал, алє ше пред даскельо стотки роками людзе почали селїц до варошох, та аж и на други континенти. Шицки пошли! А части вилїви у тедишнї час, -9-

допринєсли же би векшина хижох з роками препадла. Виратовало ше лєм церкву, тоту мою хижу и стари теметов, дас километер ходу оталь. Я го отримуєм.'' Виприповедал ми дїдо цалу историю того валалу и як ше розишол зоз своїм сином бо нє сцел остац на Салашу и предлужиц традицию. Нєзвичайна приповедка ме барз збунєла. Опитал сом ше му: ''Бачи, а як ше волал тот валал?'' Зоз ище боляцшим гласом и слизу у оку, шептаюци гварел: ''Дакеди го волали Руски Керестур...'' Пред заходом слунка сом сцигол пойсц и на теметов и найсц гроб моєй баби. Врацал сом ше до Варошу полни нових, смутних, збунююцих, алє источашнє и веселих упечаткох. У єдним дню ше ми удало одкриц нєзвичайну мистерию, упознац дїда и тото найважнєйше – место моїх предкох, место дзе ше и я народзел.

-10-

-12-

КО П АЧ Е

З Л АТА

Роки помали преходзели и нашо дзеци уж подросли – обидвоме су у интернату, так же жена и я остали сами. После вельо штудираня, ришели зме ище раз нащивиц остатки Руского Керестура. Понеже сом тераз пришол на дакус длужей, дїдови ше указала нагода же би ми поуказовал и поприповедал ище даяки ствари хтори теди такой нє могол. У його обисцу, хторе ше, так повесц, состояло зоз ище двох цалих обисцох, була зачувана цала єдна библиотека! Пoвагу ми прицагла литература вязана за стари Руски Керестур. Там були слики – барз красни валал, могло найсц вельо писаного материялу о подїйох хтори ше ту одбували, писане о людзох хтори були активни у валалє и на яки способ були активни, алє писане и о тим же як то шицко почало, тото висельованє. Сам прадїдо ище єден час водзел ''Валалски календар'', алє уж давно нє мал цо писац, а дїдо го анї нє починал писац. Познєйше, на нашо нєсподзиванє – поводзел нас по улїцох дакедишнього Керестура. Анї єдна хижа нє остала, лєм улїци прекрити зоз одредзеним пасмом жеми котра остала после вилївох, док єдна часц була досц полєгко прекрита лєм зоз коровом. Тото ми дало идею и надїю! Даскельо днї тирвало упознаванє зоз цалу територию Руского Керестура, а з керестурску литературу сом ше одлучел упознавац вечарами – накадзи слунко зашло. А, идея? Одлучели зме зоз жену же ''одгребеме'' Руски Керестур. Од дїда зме подоставали орудиє: мотики, ашови и лопати – як дакеди, и помали зме почали. У гевтей библиотеки сом дзешка нашол и стари план улїцох, думам же зоз -13-

2001. року, то нам помогло же бизме знали кадзи копац. Почали зме од, як ю дакеди волали, Русинскей улїчки, та зме вец скруцели на Циґлашор же бизме розчисцели по теметов, а вец зме ишли шором. Робота наисце була чежка, прето же попри жеми, корова и черякох, на даєдних улїцох виросли и древа. На Циґлашоре прейґа од "троугельника", та по теметовску улїчку повирастали орехи. Понеже нам допил галайк велького варошу, одлучели зме остац ту цали рок! Шицко зме ручно робели, прето же зме сцели видзиц и почувствовац кажди деталь, а спрам мапи хтору зме мали, знали зме же дзе цо маме глєдац – одкривали зме вельки бетонски и асфалтни поверхносци, а даґдзе було позаоставано и бетонски слупи. Тоти слупи углавним були камуфлирани зоз даяким черяком, так же накадзи зме их порубали – шицко почало иншак випатрац. Медзитим, тоти роботи ми почали отверац и нови питаня! Було ми чудне же нє остала анї єдна хижа, анї єдна цегла. Дїдо нам вец потолковал же то концом 21. вику було орґанизоване розберанє хижох по шицких понапущованих валалох. Пре масовни миґрациї людзох до иножемства и варошох, валали ше почали ''гашиц'' ище даскельо децениї скорей, єдноставно ше их престало ''хасновац'', шицко було преселєне до варошох, та було одлучене же би ше валали порозберало! Шицок материял котри ше могло вихасновац, бул позберани. Зоз того материялу ше будовало часци варошох наменєни худобнєйшому жительству и гевтим хтори у вилївох страцели свойо маєтки. Таки часци варошох волаю ''половняки'' – прето же су вибудовани зоз уж хаснованого материялу. Тоти ствари ше нє споминали у историї, та ми прето нїґда нє була ясна тота назва.

-14-

Остали ми ту зоз жену даскельо роки. Лєм же бизме шицки улїчки очисцели требало нам даяки два роки. Робели зме пейц днї у тижню, а викенд зме пошвецовали обовязком коло обисца и фамелиї. Старши хлапец ше уж уписовал и на перши рок студийох. Понеже ту була и тота церква котру дїдо отримовал, помали ю почали и ми ''хасновац''. До церкви зме длуго нє ходзели, а ту тераз була права нагода. Служби нє було прето же нє було анї паноца, алє зме читали даяки виривки зоз Святого Писма и модлєли ше зоз старих молитвенїкох котри були порозподзельовани по шицких столкох празней церкви. То було за нас нове искуство, а на даяки способ и препород – насампредз прето же тота наша робота тераз достала и духовну вредносц. Уж пред законченьом одкопованя, дїдо ше похорел и умар. Остатнї днї, пред його шмерцу, вельо зме приповедали и припознал нам же му мило же ше голєм дахто врацел и пожил тоти остатнї роки зоз нїм. Дзень пред шмерцу замодлєл нас – же най нє охабяме Руски Керестур! Пришагали зме му же ше до Варошу вецей нє врациме, а так и було. Синове ше школовали у Престолнїци, а ми двойо остали отримовац тото цо зме одкопали и преучовац ствари котри зме находзели у библиотеки. Кажди дзень зме одкрили єдну нову информацию и єдну нову часц загребаного Керестура.

-15-

-16-

С К РИ Т Е

Б Л А ГО

Физични роботи уж були при концу, алє ше нїґда нє законча, прето же тераз тото шицко треба отримовац. Мали зме вельо нарубаного древа и черяки, алє пре закон котри на ґлобалним уровню принєшени ище пред дас 100-150 роками пре ґлобалне зогриванє, нє шмело ше без причини спальовац, а за жимски днї шмело ше одкладац лєм одредзени количества. З векших фалатох зме понаправяли лавочки и столи – препатрали зме зоз старих сликох и намагали ше справиц цо вирнєйше. Гевто цо зме нє могли вихасновац, висушели зме, зомлєли и розошали по жемових поверхносцох. То було перше лєто без дїда. Хлапци вєдно зоз своїма дружтвами пришли до нас на розпуст. Остали цали два тижнї. Їх пайташе ше одушевели зоз приповедку котру тот валал приношел. На интернету попробовали найсц даяки конкретнєйши податки о Руским Керестуре, медзитим, безуспишно. Остатня информация вязана директно за Руски Керестур вироятно була унєшена на интернет пред дас скоро двасто роками, а на нєшкайших сайтох лєм информациї новшого датуму, та вироятно пре морйо койяких других информацийох интернетски преглєдовач нє могол пренайсц глєдану информацию. З другого боку, цалком можлїве же пре нє постоянє авторских правох (copyright) шицки информациї вязани за Руски Керестур и подобни теми були под даяку шифру, лєбо псевдонимом, та ширшим масом були доступни лєм тоти основни же кеди є населєни, хто у нїм жил и подобне. Поводзели зме тоти дзеци по остаткох Керестура. И вони були одушевени як и ми кед нас дїдо першираз поводзел по, ище теди нєодгребаних улїчкох.

-17-

Одведол сом их и на место дзе дакеди бул Яраш. Там ище стали ардзави ґоли и трибини. Охабели зме младих, та ту препровадзели остаток пополадня. Накадзи ше врацели назад до хижи, гварели ми же ше вони завежню ушориц Яраш и його околїско. Такой ютре ше лапели до роботи. Ґоли требало ошмирґлац и офарбиц, трибини уж були очисцени, алє их вони надумали префарбиц до фарбох дакедишнього фодбалского клубу ''Русин'' – чарно-било. Терен фино поровнали и о даскельо днї шицко випатрало як нове. Ище єдна добра вистка нам украшела тоти днї. Конєчно зме нашли даяки конкретнєйши информациї о Руским Керестуре на интернету. Випадло же єст єден сайт котри уж ґенерациї отримує єдна фамелия, по походзеню зоз Руского Керестура. То у ствари сайт пошвецени Марийовому святилїщу "Водица". О тей Водици сом читал у литератури цо нам дїдо поуказовал, алє зме ище нє були у гевтей часци хотара прето же оталь од лєса анї нє видно тоту церквочку. На тим сайту зме нашли єдно праве мале богатство информацийох. Гоч ше Руски Керестур загашел и, як сом похопел, престало ше ходзиц до Водици, голєм цо ше дотика Руснацох, тота фамелия и далєй отримовала тот сайт зоз релативно поряднима информациями же кадзи нєшка "Керестурци" (людзе чийо ше предки виселєли з Керестура), голєм тоти визначнєйши. Там єст и форум, примитивна форма виртуелбука, почина дзешка 2012. року и роби и дзень нєшка! Правда, нє роби з истим интензитетом як дакеди, алє роби. Углавним активни людзе котрим потребни даяки информациї вязани за рижни файти святилїщох, историю Водици, а кус менєй и историю Руского Керестура. Даскельо днї зме провадзели актуални теми, а вец зме ше одлучели реґистровац на форум. Уж ютредзень зме ше, у теми пошвеценей Рускому -18-

Керестуру, явели людзом. Кед зме им гварели же одкадз ше явяме и же цо ту єст, перше думали же им циґанїме и же правиме барз нєкрасни франти на рахунок їх народу и валалу, алє кед зме им поуказовали слики и видео-знїмки котри зме понаправяли – були импресионовани. Гоч вони нїґда нє видзели Руски Керестур и думали же вон наисце вецей анї нє постої, бо як дзеци лєм слухали даяки приповедки о Керестуре, нашо явянє их цалком одушевело. Понеже нашим младим госцом остало ище дас тидзень шлєбодного, одлучели зме одгребац и тоту драгу до Водици. Водицу и далєй нє мож було видзиц же кадзи є, прето же нам лєшик зоперал попатрунок, алє зме ше з помоцу мапи ориєнтовали же кадзи маме исц, и же би нас тота драга мала одвесц точно ґу нєй. Требало нам добри пейц днї роботи. Младим було чежко, алє ше им пачело. Вше ше пред врацаньом до "валалу" пошли дакус окупац у рускокерестурским озерку (познєйше сом у архиви нашол же то дакеди бул рибалов). Таке у Престолнїци нє мали, а ту вше була и красна, весела атмосфера. Провадзаци драгу хтору зме одгребовали, пияти дзень зме наишли на криж, алє од Водици анї шлїду. Понеже уж далєй нє могло копац, вошли зме до лєшику и ишли зме намислом. Нє мали зме нїяки ориєнтир же кадзи точно маме исц, та зме даскельо годзини блукали, алє вец хтошка скричал: ''Еееей, тадзи!'' Попровадзели зме глас хтори нас приведол по єдну вельку пажицу, а на нєй церквочка! То була Водица! Обколєшена з лєшиком, а при нєй студня, пещера и єден будинок. Випатрало цалком иншак як на сликох! Тадзи наисце децениями, та и вецей, нїхто нє заходзел! Водицов сайт бул отримовани, и виртуелно Водица ше анї минутку нє пременєла, алє у стварносци – цалком иншак випатрала. Шицки котрим Водица значела, лєбо могла дацо значиц, углавним километрами, лєбо и вецей, були оддалєни од тей локациї.

-19-

Були зме одушевени зоз ''нашим'' одкрицом, алє уж вечаром зме ше мушели врациц назад до ''валалу''. Ютредзень ше млади уж почали паковац, понеже им напоютре рано требало путовац назад до Престолнїци. З нагоди їх одходу, алє и їх нєпреценївей помоци, зорґанизовали зме єдно фодбалске змаганє на Ярашу и закончели зоз старим добрим роштильом. Ютредзень, такой з рана, шицки поодходзели и обецали же до нас приду ознова накадзи буду мац даяки розпуст.

-20-

-22-

ОД К РИ Ц Е

АТЛ А Н Т И Д И

Шлїдуюци даскельо роки прецекали релативно мирно. Ми двойо помали отримовали улїчки Керестура, з тим же ше нам на ''списку'' задлуженьох тераз нашла и Водица. Дзеци поряднє и дзечнє приходзели за викенди до нащиви, вше кед мали шлєбодного часу. Прейґ интернета зме предлужели ''гребац'' далєй. На Водицовим сайту було лєм стари и скромни информациї, так же зме их релативно швидко вичерпали. Людзе на Водицовим форуме дзечнє бешедовали з нами и интересовали их приповедки котри зме мали, и информациї з хторима розполагала наша библиотека. Медзитим, з того шицкого вецей хасну мали вони як ми, а сцели и ми мац даякого хасну и одгаднуц цалу приповедку до конца. Єдно рано нєсподзивано сцигол имейл зоз нам нєпознатей адреси, а цали змист того мейлу була адреса єдного сайту. Адреса сайту була www.atlantida. ru.syn . Зоз жену зме були збунєти. Шицко нам випатрало, так дакус мистериозне. Га, уж нам нє було нїкадзи, кликнул сом на линк того сайту. Кед нам отворело бок, обидвойо зме остали нєми. То бул сайт Керестурцох, точнєйше їх потомкох. Потомки чийо предняки ше повисельовали зоз Руского Керестура и стотки роки скорей, виртуелно ше "сходзели" на тим сайту. Нє сцели же би зоз гашеньом остатнього жридла штредньо-европских Руснацох щезли и його жителє – та достали таку идею же би створели виртуелни Руски Керестур з тим же го наволали Атлантида. Ту людзе каждодньово були у контакту єдни з другима, черали податки, лєбо єдноставно лєм нєобовязно бешедовали. На тим сайту була понукнута и електронска библиотека. Могло понаход-23-

зиц стари кнїжки, школски лектири, твори хтори подписовали Руснаци. Була аж орґанизована и виртуелна школа на руским язику – на таки способ дзецом було лєгчейше научиц свой мацерински язик и директно буц у контакту з другима рускима дзецми зоз цалого швета. Було твори и новшого датума – людзе и нєшка творя по руски! То було ошвиженє за нас, то було тото цо зме глєдали! Нас родичи учели бешедовац, читац и писац по руски, алє нїґда нам нє було ясне же нач нам то будзе хасновац у живоце. Иншак, фамелия хтора отримовала Водицов сайт, и у Атлантиди мала вельку учасц, та сом предпоставел же нам вони и послали тот линк. Такой нам сцигол и други имейл зоз шифру з хтору ше можеме приключиц до ''живота'' Атлантиди. Там уж чули за нас. Привитали нас и з нєсцерпеньом нам ше випитовали о рижних стварох. Векшином вони шицки биваю на других континентох, та шицко сцели подознавац. Вони нам бешедовали ствари о котрих им бешедовали їх родичи, а їх родичом знова їх родичи и так далєй, а вязано за висельованє зоз Руского Керестура, а и Коцура, гоч вон гет скорей дожил свою злу судьбу. Було нам интересантне слухац тоти приповедки. Прешлїдзели зме им найновши знїмки и слики котри зме направели у Водици – нє могли вериц же як шицко иншак випатра. Знали же ту ровнїна, алє по приповедкох хтори им преношели їх стари, коло Керестура нїґда нє бул даяки лєс як тераз. Нє було цо их нє интересовало. Зоз жену зме детально сликовали шицко цо пооставало од старого валалу – бетонски слупи школского будинку, спортских салох, бину, терени у школским дворе, пиячни столки, а окреме им ше пачело як зме реновирали Яраш. Кажди дзень зме им скенирали по єдну кнїжку з нашей библиотеки, а вони то такой предурковали, ушорйовали и поставяли на сайт.

-24-

О тим пренаходку же Керестур ище ''живи'' пообвисцовали шицких хторих могли найсц. Випатрало же тот валал вецей значи им як їх предком и же у ґлобалней историї Руснацох одбавел значну улогу у будованю и отримованю руского идентитета. Кажди дзень ше до розгварки уключел дахто нови. Указали зме им нашо загради. Нє могли вериц же сами себе ховаме желєняву и овоци. Правда же нам требало часу же бизме ше привикли на швижу поживу, алє то наисце дожице. Єдно од найвекших нєсподзиваньох було кед зме им указали же маме руски пец и же знаме правиц капущанїки. Сучасни кухнї єдноставно нє давали тот ''луксуз'' же би ше у нїх могло направиц стари добри капущанїк. Нам дїдо указал стари рецепт и способ як ше успишно правело тото старе руске єдло. Знїмок на котрим приказане як правиме капущанїк такой попрешлїдзовали по имейлох каждому кого познали. Ми ту уж були вецей як пейц роки та зме и забули же то за нєшкайших людзох нєсподзиванє.

-25-

-26-

ГЛ АС

З

Д А ЛЄ К А

У тей цалей еуфориї руского народу ширцом швета, видвоєл ше єден имейл. Бул назначени директно на мнє и мал окремну ознаку. На концу имейла бул подписани паноцец Миколка, а змист того имейлу, понеже є од нєпознатого паноца, звучал досц приватно. Пречитал сом го. Гвари же вон за нашу фамелию чул од свойого прадїда котри ужил тот благослов та досц длуго пожил, а вон напевно мал нагоди упознац ище мойого прапрадїда. Гвари же нашо фамелиї досц длуго були у контакту, алє час и обставини зробели свойо и тот контакт по тоту хвильку бул претаргнути. Иншак, його фамелия уж ґенерациї пестує священїцки шор. Накадзи з "Атлантиди" паноцови Миколкови прешлїдзели имейл за хтори вон перше думал же є франта, а потим кед видзел видео знїмки хтори зме посилали и же ше спомина мойо презвиско – барз ше обрадовал. Шицко цо ми тот паноцец понаписовал, анї ми нє значело даяк вельо, прето же сом тото шицко чул по перши раз. Одвитовал сом му, алє сом му и крашнє назначел же нє знам о чим бешедує, алє же ми мило. Тих дньох наш старши син дипломовал и зоз дзивку нас мали присц нащивиц. Гварел же ма єдну интересантну вистку. Роздумовал сом чи нє упознал даяких ''Керестурцох'' там на студийох, та их тераз сце привесц зоз собу. Зоз жену зме почали рихтац обисце за госцох, понеже пре тото скениранє и интензивне дописованє зоз численима ''Керестурцами'' и Руснацами з цалого швета, нашо обисце було приведзене до ''благого гаосу''.

-27-

Тих дньох нам приведли и краву. Лєдво зме достали дозволу за ню, прето же ше крави вецей нє шмело тримац приватно, алє лєм кед ши фармер, лєбо кед маш даяку фабрику. Краву зме тримали на подручу дзе дакеди була ''економия'' – там зме справели єден фини хлївчок, та зме ю кажде рано и вечар ходзели доїц. Мали зме ю лєм даскельо днї, алє зме ше уж почали цешиц з жену, же накадзи син придзе з госцами та зме их годни понукнуц зоз швижим млєком. Конєчно, пришол викенд и од вчасного рана зме чекали госцох. Медзитим, пришли лєм вони двойо – сами. Збунєли зме ше, алє то нам нє погубело веселе розположенє. Тиж так, ище дополадня нам сцигол мейл од паноца Миколку. Наявел ше нам же нас придзе нащивиц. Вон хвильково у авионє и путує з Нового Зеланду и ютре пополадню будзе уж у Керестуре. Тота нам вистка лєм ище баржей засмачела полудзенок. Синови и його дзивки зме о тим нїч анї нє гварели – сцели зме же би ше нєсподзивали. То нам мал буц перши госц нє з тей держави. Пополадню зме ше пошли дакус прешейтац по беґелю. Дзень наисце бул красни, а з моста ше могло припатрац на заход Слунка. Скорей нам випатрало же слунко заходзи у лєше, алє тераз зме знали же там Водица, та зме заходи Слунка цалком иншак доживйовали. На драги назад, гварели нам же яке нєсподзиванє маю за нас – одлучели ше побрац. То була наисце приємна вистка. Дакус зме ище нє були порихтани за таке дацо, алє зме их без роздумованя потримали. Одлучели ше на таки крочай прето же тримали же су порихтани, гоч ище анї сами нє знали же кеди, дзе и як оконча тоту церемонию. Нєдзеля. Конєчно зме дочекали першого официйного госца. Паноцец Миколка бул одушевени. Гвари же цалком иншаке дожице, як прейґ сликох и -28-

видео знїмкох. Змесцели зме го и под час полудзенку зме ше порадзели же такой од ютра почнєме обиходзиц цали Керестур. Нє могол скриц одушевиє. Понеже млодята нє мали роштудиране же анї дзе ше буду винчац, анї хто их будзе винчац, предложел сом же бизме замодлєли паноца Миколку же би окончел тоту дїю/церемонию. Пристал як зоз пушки. Вечар отримана перша права Служба, та паноцец Миколка такой вихасновал нагоду оглашиц же ше Петро и Ана поберу. И так, док зме обиходзели валал приповедали зме о шицким, а знова и о винчаню. Дискутовали зме ше же церква дакус превелька за нас, гарсцочку, а нє мали зме и нє могли нїкого волац до госцох же бизме ю наполнєли. Пондзелок зме ше од рана позберали и рушели до Водици. Паноцови зме нє гварели же дзе идземе, алє кед зме сцигли – остал нєми. Читал о нєй, познал єй историю, видзел громаду слики, углавним гевти стари и тераз кед ше нашол наисце на тим месце – то було за ньго цошка єдинствене. Охабели зме го дакус же би порозпатрал. Обишол даскельо раз коло церквочки, дас дзешец минути стал при пещери, потим ше напил води зоз студнї и тото цо остало у каблє висипал себе на главу и вец ше обрацел ґу нам: ''Ту направиме винчанє! Останєм з вами кельо треба и помогнєм же би ше ту шицко пооправяло и ушорело же би могло отримац и винчанє и же би заш могло тримац Служби!'' Нєсподзивал нас. Прилапели зме предкладанє и такой зме направели план роботох. Паноцец Миколка тоту ноц остал спац у Водици, а ми ше ютредзень врацели зоз потребним алатом. Прейґ интернета зме шицких у Атлантиди обвисцели же будземе оправяц Водицу и же ше там отрима перше винчанє после хто зна кельо викох! ''Атлантидянє'' такой орґанизовали електронску акцию збераня потребних сред-29-

ствох за реставрацию Водици. То нам барз помогло. Ми мали зоз чим започац тоти роботи, алє би нам нє було досц же бизме шицко и закончели, та ше нам кажди пенєж здал. Барз нам хасновало же и єден паноцец бул з нами, бо вон знал же цо и як треба оправиц, а же би остало у ориґиналним першобутним випатрунку. Роботу зме орґанизовали так же зме перше порихтали простор за винчанє, а вец после шицкого будземе шориц до детальох. Попреплєтано зоз тим шицким, у павзох, паноцец Миколка млодятом тримал виронауку и духовно их пририхтовал за тоту Святу Тайну. И так, з єдного боку хлопи оправяли стару церквочку, з другого боку жени рихтали шицко за винчанє. До помоци нам пришли и други син и його приятелє, так же нас було шумне число у тей историйней роботней акциї. Конєчно, пришол и дзень же би ше тоти двойо млади здружели до святей заєднїци малженства. Присуствовали їх приятелє, а з тей нагоди поприходзели и нашо родичи. Шицко ше одбувало у Водици. Поставели зме даскельо камери и скапчали их зоз компютером же би ''Керестурци'' и Руснаци ширцом швета могли провадзиц першу праву керестурску свадзбу после скоро 200 рокох! Свадзбу провадзели коло 3 000 руски обисца ширцом цалого швета – була то хвилька за паметанє. Такой по винчаню зме подоставали вельке число винчованкох. Барз нам значело же знаме же шицким тим людзом Руски Керестур ище вше дацо значи. Алє вечар нам украшела ище єдна вистка – млодята ше вияшнєли же останю бивац ту з нами, у Руским Керестуре! Роботу найду прейґ интернета, а сцели ше и вони пошвециц старим вредносцом и природи, дакус сцекнуц од швидкосци и штучносци хтору понукал варош. Уж од ютра число жительох ше дупловало – зоз двоїх на штверих!

-30-

-32-

ВА Л Я Н Є

АТЛ А Н Т И Д И

Нашли зме ше на крижней драги! За остатнї даскельо роки ше вельо того поодбувало. Окрем самих хижох, шицко друге зме ''ожили''. Стари архив нам вельо помогнул, а ище вецей нам помогнул контакт з людзми з Атлантиди. Поспишело ше нам ознова ожиц и вирски живот. Було перше винчанє, а потим и паноцец Миколка остал жиц з нами. Питанє котре ше ми вше у думкох круцело – цо далєй?! Валали з причину страцели свойо значенє роки и роки скорей – хто ми, же бизме оживйовали того диносауруса? Живот у варошу ше пременєл и велїм го олєгчал, єдноставно – цо ми то робиме? Тоти питаня ме прицискали уж даскельо днї, людзе ширцом швета станули на наш бок, дали нам потримовку, алє вони нє знаю же яке то чувство найсц ше у такей дилеми. Ми за нїх героє, алє тоти героє випатра одбранєли тото цо мали одбранїц, и тераз инше анї нє знаю и нє маю цо робиц – як то тераз наглас припознац?! Як таке припознац, а нє зрадзиц шицких других? Пошол сом ше висповедац. Паноцови Миколкови сом виприповедал шицко цо ми було на души, шицко цо ме прицискало. Претаргнул споведанє и поволал ме прешейтац ше. Ту зме розпочали єдну наисце глїбоку и вичерпну дискусию. Розпатрели зме проблем з рижних углох и вец ме поцешел: ''Знаш, я ту пришол перше лєм дочасово, медзитим, попачело ше ми ту, а попачела ми ше и ваша фамелия, попачело ми ше на яки способ ше и людзе з Атлантиди уключели до того шицкого. Медзитим, я и далєй нє бул сиґурни же кадзи тото шицко водзи и як ше закончи. Тераз видзим же твойо намиренє -33-

цалком исправне и наисце ше стараш за тото цо сце ожили остатнї даскельо роки. Я на Новим Зеланду мам фамелию. Такой им на вечар пошлєм имейл же най ше помали пакую и приду тадзи. Най живот твоєй и моєй фамелиї на териториї Руского Керестура будзе поволанка шицким ''Керестурцом'' ширцом швета!'' Тото ме приємно нєсподзивало, а и паноцец Миколка нам нїґда скорей нє споминал же ма фамелию. Такой зме ше лапели до розрабяня плану насельованя Руского Керестура. За нашо три фамелиї було места, алє требало розробиц же кадзи будземе змесцовац ''Керестурцох'' накадзи почню приходзиц. Вистку зме официйно виложели и на сайт Атлантиди, визначели зме же зме потримовку достали и з Престолнїци. Дали нам статус ''валалу музея'' и наша єдина обовязка була же бизме архитектонски цо вирнєйше ожили Руски Керестур – так як на старих сликох. О даскельо днї нам уж почали сциговац имейли. Коло двацец фамелиї ше наявели же би творели першу габу. Гваря же им допило ше лєм дописовац, жадали ше уж стретнуц зоз своїм народом. Ми розробели розпорядок приходох и змесцованьох. Поспишело ше нам по старим дизайну подзвигнуц даскельо єдноставни обисца. Дочасови план же би ше могло прияц голєм пейц фамелиї. Вони нам такой помагали правиц нови обисца же би такой було порихтане за нових хтори мали присц. О даскельо мешаци Керестур почал иншак випатрац. Хибело ище вельо того, алє конєчно було видно же ту дахто жиє. Як специялну помоц нам зоз Престолнїци послали студентох етнолоґийного и будовательного факултету – а тото нам и морално и физично вельо значело. Пре нєобчековану помоц тих

-34-

студентох, приход нових фамелийох ше пошвидшал, поспишело ше нам же би шицки обисца достали и свой автентични дизайн. Дас после пол рока, на сайту Атлантиди официйно обявене же ше сайт пременує до сайта "Руски Керестур" .

-35-

-36-

К Е РЕ С Т У Р С К И Ш ТИРИ

Д З В О Н И

Обновйованє валалу швидко напредовало. Людзе наисце були инспировани и барз ше им пачело же ше врацели на место одкаль їх прапрадїдове поодходзели. Понеже зме одлучели врациц стари випатрунок Керестура, зложели зме ше ожиц и даяки стари як обичаї, так и мелодиї. Нашли зме рижни музични кнїжки и нотни записи. Нашли зме и вельо музичного материялу чийо аранжмани були порозписовани за фуяри. То тиж так и єдни од остатнїх нотних записох записаних ту у Руским Керестуре. Остатнї записани ту коло 2030. року и то зоз руку! У архиви зме нашли слики того инструмента – фуяри. Випатра же ше тот инструмент почало хасновац у керестурским оркестру даґдзе коло 2012. року. У часци тей нашей хижи дзе ше чувало рижни стари предмети нашли зме и цошка цо барз здабало на фуяру и то баш на гевту яка була на слики. Нажаль, ми ю нїхто нє знали хасновац. Гоч зме зоз жену ту уж цалу децению, нє поспишело ше нам пошпиртац баш по шицких куцикох, так же ше случовало же зме и далєй находзели даяки нови предмети, алє и информациї. Керестур уж учишлєл и свою стоцету фамелию. То нам розридзело сходи хтори зме мали кажди вечар дзе зме черали дожица дня хтори уж бул на одходзе – та зме ше порадзели же бизме ше сходзели раз тижньово и то внєдзелю после Служби. Нормално, то нє значело же зме ше през тидзень нє дружели. Помали ше почали стваряц ґрупи ширцом Керестура, то дало до-37-

бри резултати, прето же зме ше на заєднїцких сходох могли квалитетнєйше радзиц и порадзиц. Медзитим, гоч кельо шицки були щешлїви, помали ше почало указовац же нам заш лєм цошка хиби. Направели зме єден вилєт до Водици. Вилєт у ствари бул дводньови, так же зме мали досц часу превипитац ше же цо нам то хиби. Так аж дакус здогадовало на духовни вежби хтори шестри Служебнїци дакеди тримали дзецом у Водици, алє то ше теди волало ''Дзециньске лєто''. Були зме розподзелєни по цалей териториї Водици, по сами рубци лєшика и кажде вибрал свойо шлєбодни активносци – даєдним аж нє дало мира, та ше занїмали зоз материялом зоз архиви. Вечар кед зме после вечери мали заєднїцку розгварку, порушало ше и тото питанє нєзадовольства. Нїхто себе у глави нє могол розбистриц же цо нам то ту хиби. Нє жиєме у чаше наших преднякох кед економия була иншак орґанизована и кед чловек завишел од пенєжу – алє ми заш лєм якуш нєлагоду чувствовали. Нараз, розправу нам претаргнул єден млади хлапец хтори иншак по цали дзень нє випущовал з рукох кнїжку ''Фуяра, фуяра'' – кнїжка у хторей були аранжмани руских шпиванкох розписаних специялно за фуяри. Вон ше наисце винїмково заложел за преучованє тих писньох и вше бул цихо, та нам прето нїґда нє прицаговал пoвагу, та його явянє за слово нас збунєло. Почал свою бешеду: ''Видзице людзе, найлєпши и найкрасши опис даякого чловека даваю його власни дїла! Чловек як чловек, придзе на тот швет, пожиє на нїм, алє кед умре и кед ше зяви пред Богом, зоз собу ма лєм дїла хтори охабел ту на Жеми, хтори охабел другим людзом по хторих го тоти людзе буду паметац и споминац. По дїлох хтори тим людзом помогли, олєгчали, унапредзели, пременєли живот! Чловек чию кнїжку нє випущуєм з рукох поробел праве -38-

тото. Гоч анї нє шицки писнї його, вон зоз своїм смислом за аранжиранє тим писньом дал нови живот, нови фарби, нови смисел. Тото и ми треба же бизме зробели! Ожили зме тот валал зоз сликох, алє треба ище же бизме му удихли наш живот, дали даяки наш печац, а же бизме нє погубели смисел уж постояцого!'' Бешеда нас шицких порушала, алє нам и отворела и питаня – на яки способ то зробиц? У пракси зме шицки досц кратко и Руснаци и ''Керестурци''. Ми релативно кратко жиєме на тим подручю, а ище кратше ше медзисобно познаме. Медзитим, млади хлапец нам такой дал єдно предкладанє, а ми го такой и прилапели. Вон видвоєл єдну шпиванку зоз тей кнїжки и потолковал нам же яке значенє єй наслов ма за ньго, и визначел же би таке значенє требало мац як за нас, так и за валал. Шпиванка ше волала ''Керестурски штири дзвони'', а идея була шлїдуюца: же би ше на штирох бокох Керестура, понад драги хтори, водзаци ше по списох з архиви, водзели до Варошу, Вепровачу, Лалитю и Торжи, подзвигли високи слупи скапчани зоз по єдним луком, на верху хторих буду мали турнї зоз по єдним дзвоном и же би турнї були обилєни на било як и церква. Тоти дзвони буду дзвонїц раз у року, на ''Дзень нового насельованя Руского Керестура''. Идею зме барз швидко реализовали и нєодлуга на штирох виходох з валалу ше воздзвиговали штири били капури зоз по єдним дзвоном. Валал достал конєчно и наш печац, алє и нови випатрунок. А гевто цо дакеди було ошпивоване у писньох и ганьблїво скрите у керестурскей турнї – постало нови символ нашей побиди. Грудка жеми, як ю дакеди наволовали, тераз постала прекрасна палата зоз штирома новима турнями и єдну котра ме, насампредз, ту и приведла.

-39-

В аня ДУЛ А

ЧИ ЗМЕ ПОРИХТАНИ ЗА ТОТО ЦО ПРЕД НАМИ Кед же Руснаци (спрам филозофскей терминолоґиї) нє историйни народ, вец им судзени митолоґийни характер. На тим шлїду и перша кнїжка под насловом “Пред нами”, нашого културного дїяча Саши Палєнкаша, у виданю едициї МАКoff9 часопису МАК. Прето мож повесц же вона як така и дружтвено анґажована може послужиц и як єден з ориєнтирох за тото цо наисце “пред нами”. Автор нам у тим дїлу презентує дальшу будучносц з позициї аналитичара, алє тиж и историчара, на способ яґод кед би писал источашнє и о прешлосци и о будучносци як о тоталитету, чийо ше риси у тершньосци нагадую – гоч лєм тому хто их зна и сце видзиц. Тоти визиї о будучносци нє шветли, алє анї нє такой таки чарни, бо автор предпоставя же за дацо менєй як два вики дахто од наших потомкох ище вше будзе знац мацеринску бешеду котра наисце остатнї найчерствейши будинок котри за нами остава. То наисце чудесне же таке цошка етеричне як цо то слово, єдина правдива “душа” народу, котра може прежиц знїщованє “цела” малочисленого народу у чаше и просторе, вельо длужей од самого населєня. Тиж так, кед же симбиоза такого духа и цела длуготирваца, вона вец може зохабиц таки шлїд у историї же вше оможлївює духу воскреснуц свойо цело.

-40-

Може буц парадоксалне, кед же ше Руснаци почню вше вецей пресельовац и до виртуелного швета, тота їх заєднїца вец годна буц и вельо черствейша (од тей яку ю маме тераз) и порихтанша зоз “швета идейох” (метафорично интерпретованого интернета) ознова саму себе зисциц у стварносци. Прето “Пред нами” и иснує надїя же теди придзе до оживйованя традицийного инстинкта при потомкох ґенерацийох котри ше зоз єдного (руралного) штердку розошали по цалим швеце (урбаного), та же у нєпоштредней блїзкосци зоз жему (у так поведзеним Ж. Русоовским врацаню ґу природи), дословно одгребу гоч лєм свойо коренї. Алє тото подняце ше нє шме застановиц лєм на пренаходзеню тих давно зрубаних пнякох, алє подобнє и тим протаґонистом його приповедки, намагац ше дац и якиш свой нови печац – инововац, а нє лєм рестауровац традицию. И сам чловек то уж заєднїца – заєднїца, його як самосвидомого єства и самого язика на котрим вон дума (самосвидоми постава). Прето очуванє язика, у ствари, вше лєм першенствени задаток поєдинца, дзе институциї тому можу лєм помогнуц и як таки треба же би були лєм вираз колективней сцелосци вецей поєдинцох, сцелосци зачувац свой идентитет – а з оглядом на терашнї обставини, могли бизме аж и отворено посумняц до “волї за живот” Руснака (най нє уходзиме тераз до розправи чи ту слово о “забойстве” тей волї, чи о “самозабойстве”). Єдна зоз можлївих причинох, котри анализує тото дїло “Пред нами”, то и проблем урбанизованя и трансконтинентализованя менталитета Руснака, та ше поставя питанє чи ше вон на концу нєобходно муши звесц скоро на исте, дзе ше траци лєбо квантитет, лєбо квалитет. У збиваню традициї и сучасносци вимага приношенє цалком новей културней политики, бо велькому капиталу дробни поштреднїк (як цо то мик-41-

ро язик), медзи продуктом и трошительом, нєпотребни. Нє ма интерес прилагодзовац ше дробному тарґовищу, алє напроцив, прилагодзиц го самому себе, та кед ше му воно найдзе на драги, вон их лїґа, а на заходу випущує як гомоґенизовану (ґлобализовану) “масу”. Єдина можлївосц такей дзивини, кед ше найдзе на його драги проґресу, нє заслупнуц и чекац вдеренє, алє бежац – та кед уж нє по тей истей драги, може аж и напрейґа. Предусловиє за тото мац витримовну конституцию – мускули котри нє лєм економия, алє вєдно зоз духовну компоненту, цала його култура. Нажаль, части зявеня застраньованя як цо то розвити ноги за обегованє, а запшетей глави – цо од того Руснаци (нє)маю, пресудзце сами.

-42-

Б иоґ р а ф и я САШО ПАЛЄНКАШ (1979, Заґреб) музичар, писатель и дружтвени дїяч. Фронтмен рок-ґрупи “Paradox”, єден з орґанизаторох фестивалох “Дньовка” и “Водова фест”. Поезию почал писац пре нєдостаток текстох за музични композициї. Поезию и прозу обявює у “Литературним слове” и часописох МАК и “Шветлосц”. Його писнї обявени у компилациї поезийох “FRAME” у виданю часописа МАК. Року 2009. Сашо достал углядни награди – “Литературного слова” “Мирослав Стрибер” за литературну творчосц, перше место на музичним фесивалу “Фамус” у Сивцу и наймладши є добитнїк награди Културно-просвитней заєднїци општини Кула “Зарї култури”, за позарядово резултати и успихи у култури и образованю.

КН Ї Ж К У М О РА Л Н О И К Р Е АТ И В Н О П О МОГЛИ: - Ксения Макаї Орос, як лектор и консултант - Наташа Регак, як консултант - Владимир Еделински Миколка, як консултант - Марияна Павлович, фотоґрафиї Дзекуєм им!

-44-

CIP – Каталогизација у публикацији Библиотека Матице српске, Нови Сад 821.161.2 (497.11) - 32 ПАЛЄНКАШ, Сашо, 1979 Пред нами : [мини-роман у приповедкох] / Сашо Палєнкаш .

- Нови Сад : Руске слово, 2010 (Петроварадин : Maxima graf). - 50 стр. : илустр. ; 16 х 17 cm. - (Едиция Mak off ; кн. 9) Тираж 400. - Биография: стр. 48.

ISBN 978-86-7105-217-7 COBISS.SR-ID 255546631