Selected Khutba Sama

”Oh kam saga manusiyah, magmataw kam ma Tuhan bi, ya bai magpapanjari makaam min dikayuh manusiyah (ADAM) saltah pinapanjarihan eh Tuhan limbang (Hawwa) min sabab sigma duwa pina niyah eh Allah sa hekaheka kalallahan maka kadendaha; mag mataw kam ma Allah saltah nunay parsugpatan maka kasilasa. Bunnal bunnal toongan kaniyaan Allahutaala sangat ngan jagahan kaam.“ (4:1) O saga Muslim! Magmatawu kam ma Allah, Tuhan Sangat Nimulliya, maka magtaat kam ma Iya supaya kam makadawhat paruntungan maka kalasigan ma kallum Dunya itu maka ‘Llaw Ahirat. O saga hamba Allah! Hati-in bi adapun Agama topot para ma Allah Tunggal maka Iya angahukum ma ay-ay kinahandak eh Na. Allah bay amabeyah Nabi Muhammad sartah angahinang iya sataas-taas Imam maka Nakurah maka Iya (Tuhan) ‘mbal anaimah iman (pamaratsaya) min dangan manusiah sahingga subay sigam angandalil tiap-tiap parkalah ma Agama min hukuman maka pituwa Nabi Muhammad .

Saga danakan l’lla maka d’nda barhurmat ma Agama Islam! Subay pat’nnah tabi ma pikilan tabi tattap adapun kaanakan tabi saga anak mullah ma ‘llaw itu, nianakan asal taga upaya batin para kahapan maka sampay kalaatan. Kitabi, kamattoahan Muslim, subay magsangsah angahinang poonan para pagpanduh saga kaanakan itu nihinang kahapan maka amuwan sigam pangaddatan nijari iya parsababan manjari tahinang sigam kanakuraan ma ummat Muslim ma song-sinong sartah tahinang mattan manusiah amuwan kamumpaatan ma ginhawa baran sigam maka ma ummat Muslim kamemon.

Saga anak mulah ma ’llaw itu, manjari botang mattoa ma ‘llaw pahalu. Sigam amakkotan maka tangan sigam pakaradjaan song sinong ma kawman maka lahat heya. Song du sigam pagantih min saga kanakuraan ma ‘llaw itu. Song du sigam pinag amanatan maka saga kawajiban pananggungan jawab buwat saga sipat asal patut ma saga kanakuraan maka rahyat ahap.

Angkanna, saga anak mulah subay amaruli pahap-hap parkalah song-sinong; subay sigam maglugtuh toongan; subay ‘mbal sigam angalaan asa-asa subay sigam amandang kawajiban maka pananggungan jawab ma pagkahi manusiah ma song-sinong.

Saga danakan l’lla maka d’nda, kamattoahan saga anak mulah ma ‘llaw itu, Islam angawajib ma kitabi maglugtu-an sigam ameyah ma hinang kahapan maka kamatto-ahan amuwan ma saga anak mulah tattap pamanduh ni kabontolan, supaya kahekaan pakaradjaan ma katilibutan ‘mbal makabuwan kabengkokan ma pikilan, pangatayan maka kakahinang sigam tudju ni kahalan makasusa, makasigpit.

Ma itu, ma daira (region) tabi, kasakupan tabi kaanakan maka saga anak mulah tampal magsaddi-saddi ma kahekaan pangaddatan, mula-mula ma parkalah pagpeneh limaya ma saga nianakan mareom gaos mattoa sigam maka pagpeneh landuh sigpit pajatu sadja ma saga kaanakan mareoman pamilya landuh miskin.

O kaam, saga anak mulah maka kaanakan ma ‘llaw itu! Entomun bi ma pikilan adapun paglugtuh, niyat gaogot maka maksud tattap makaraug kamiskin tartantu ma saga sasuku amanda esog amiha kasab’nnalan ya nihinang labayan tudju ni paruntungan. Saga kakissakissahan landuh aheka buwat hantang s’llog sapah pasalan kal’llahan maka kar’ndahan palahil min asal pangkat areyoh, ya angandaug angalaan kamiskin bilang agpang ma pagdawhat mukarnah ma kallum na, sinabab min pamaratsaya, niyat maka maksud gaogot.

218 | Khutba Bai Tapeneh: Padduman Ni Kasambuhan Ma Kallum Saga Kawman Kamusliman Ma Pilipinas