SIDRA CONTRUECES

Sidra Contrueces, el saborgu de la tradición

El Clú de LA SIDRA escomienza la so andaura llagarera con una visita de lluxu, el xixonés Llagar de Contrueces, onde mos recibe y guía’l propiu llagareru Iván Rubiera

Esti llagar cuasique centenariu, aniciáu en 1928 por Manuel de Ángel Rubiera, bisgüelu de Iván Rubiera, baxó de Mareo a Contrueces en 1940, cuando se construyó la nave de piedra onde s’afaya’l llagar, los toneles y el mazaneru, y que práuticamente caltiénse intauta anguañu. Namás entrar pel portón del llagar, imprégnamos l’arume a bona sidre, y quedamos arremellaos namás ver los toneles, y al pocu Iván Rubiera, el llagareru de Sidra Contrueces, úfremos el primer culín col qu’entramos yá nesta impresionante esperiencia sidrera. Lo primero que llama l’atención ye qu’el llagar caltién la mayoría de toneles de maera, lo que non solo ye guapo de por sí, sinon que-y apurre una maxa especial. En 1998 introduxeron dellos toneles d’acieru, pero agora mesmo la so filosofía ye siguir trabayando con maera, respetando los toneles colos que cunta. Trátase d’un llagar con una capacidá aprosimao d’un millón de llitros, y que sigue apostando poles prenses tradicionales, por más que la ellaboración ye muncho más llaboriosa “paga la pena pola calidá” desplica Iván Rubiera. Agora mesmo cuenten con ocho prenses de maera, con una capacidá d’alrodiu

los 10.000 Kg. Nel momentu nel que visitamos el llagar, tovía ta la sidre sobro la madre, pendiente de trasegar, procesu qu’emplega p’algamar el saborgu que ye tan carauterísticu de Sidra Contrueces, calteniendo un equilibriu y homoxeneidá añu tres añu que la fai reconocible al primer culín. Como pue suponese la esperiencia ye única, porque ca tonel tien un saborgu peculiar, y la sidre ta n’estremaes fases de formientu, lo que fai que ca culín que tomamos tea una presonalidá increyible, que podemos valorar tovía munchu más gracies a les oportunes desplicaciones que mos va dando Iván Rubiera, col qu’intercambiamos les impresiones que mos produz la so sidre y que va retrucando a les dubies que tenemos. Anguañu’l llagar Contrueces produz sidre natural tradicional ‘Sidra Contrueces’, y dende 2018 ellaboren sidre acoyío a la DOP Sidre d’Asturies ‘Contrueces DOP’.

Col bon gustu de los culinos na boca, col arume a espicha y alcordances de prau, visitamos l’hestóricu mazaneru del llagar, una auténtica ayalga sidrera, que se caltién práuticamente idéntica dende 1940 y que si bien agora tamos fuera temporada de mayanza, sí que mos permite faemos una idega de lo que tien de ser velu apináu de mazana, el colloríu, los arumes... Dempués de la visita al mazaneru, tovía tien gracia Iván de damos a prebar sidre de más toneles. Festival de saborgos nel nuesu paladar, ca tonel coles sos particularidaes, sintiendo’l saborgu tradicional y rial a sidre auténtico, de verdá, valorando l’equilibriu ente l’amargu y l’ácidu, del secante que t’invita a seguir bebiendo... A la fin Iván rétamos a escoyer el tonel que más mos prestó, hai unanimidá a la hora de decidir el tonel ¡esta sidra ta pistonuda, lista pa corchar! Pasu ente pasu la sidre Contrueces foi namorándomos, sentimos los sos raigaños, la tradición, la maña y el curiáu col qu’ellaboren la so sidre. El ciñu col que la familia Rubiera vien depositando en tantos años de tradición percíbese en ca requexu del llagar, en ca culín, nel aire qu’alendamos... Y ye que ya lo canciaba ‘El Presi’ a ritmu de tonada asturiana: “la meyor sidra ye la de Contrueces!”. Gracies a toos ellos, pol llabor que fain, y por supuestu, por recibir tan afayaízamente al Clú de LA SIDRA