Nunatsinni sumiiffippassuarni assigiinngitsutigut suliffeqarnitsigut najukkani angivallaanngitsuni inuinnaat pitsaasumik suliffeqarsinnaanerat ajornanngilaq - soorlu uattut ittunut. Suliffiup iluani ilinniartitaanerit pitsaasut siunnerfeqarluartumik ingerlanneqartut sulisunik anguniagaqartitsilluartarput, sulisullu taama ilillutik nunatsinni tamarmi suliffimminni qaffassariartorsinnaanerinik periarfissinneqarlutik. Taamatut periarfissiisoqarsimanera uannut ilaquttannullu pitsaasuuvoq – aamma nunatsinnut tamanna iluaqutaassasoq isumaqarpunga.
Henriette Josefsen
KNI-MI SULIFFIMMI QAFFAKKIARTORNEQ Allaffimmiutut aallartikkami nunap immikkoortuani pisortanngortoq Henriette Josefsenimik ateqarpunga Alluitsup Paanilu peroriartorlunga. Inuunerma sivisunersaa Alluitsup Paamiormiuuvunga. 2018-imi Nanortalimmut nuuppunga. Nunaqarfigisannut, ilaquttannut, ikinngutinnut pinngortitatsinnullu assut qanillunga inuuvunga. Aappara ateqarpoq Benjamin, sisamannguanik meeraqarpugut illoqarfimmilu imaqarluartumik inuuneqarpugut. Immaqa inuit ilai eqqarsassapput inuuneq tamaat sumiiffimmi ataatsimi inuusimagaanni taava unittoortoqarsimassasoq. Uanga taamatut isiginngilara. Uanga nammineerlunga nunatsinni kujataarmiuuvunga, taamaattumillu tamaani najugaqarniarlunga aalajangernikuuvunga. Aammali ineriartornissannik pikkorinnerulernissannillu assut pisariaqartitsivunga. Taamaattuaannarnikuugunarpunga. Tamanna aamma angajoqqaanni takusarpara. Meeqqat atuarfianni atuareerama Qaqortumi NI-mi ilinniartooreerlunga HK allaffimmiutut 2004-mi naammassivunga. Ukiut siulliit pingasut Alluitsup Paani assigiinngitsunik suliffeqartarpunga, ilaatigut atuarfimmi timelæriusarlunga, aalisakkerivimmi sulisarlunga kommunnillu allaffiani allaffimmiuullunga. Piffissami tassani aamma ilaqutsiorpunga - taamaattumik uummatiga inuuneralu tassaniissimallutik.
2007-imi Pilersuisoq allaffimmiussarsiormat qinnuteqarama atorfinitsinneqarpunga. Atorfinikkama piffissaq siulleq suliassakka ulluinnarnilu nunaqarfimmi pisiniarfimmi sulineq ilinniaqqaarpakka. Kingorna suliassanik nutaanik misileerusuttalerama allaffimmiikkunnaarlunga pisiniarfimmut nuuppunga. Pisiniarfimmiuulerama atortussaarniarfimmi sulilerpunga kingornalu akisussaaffigilerlugu. Aatsaat tassa suliffik uannoortoq. Pisisartut naapittarnerat ikiorlugillu nuannareqaara, pisiniarfillu qanoq pitsaanerusunngortissinnaanerlutigu suleqatikkalu pilersaarusiortarnerput assut kajumigisarpara. 2017 – 2018-imi KNI-mi niuertunngorniarlunga ilinniarpunga, kingorna ilaquttakkalu Nanortalimmiunngorpugut ukiunilu sisamani pisiniarfimmi pisortaallunga. Nanortalimmi pisiniarfimmi pisortaatillunga KNI-mi aqutsisunngorniarnermi ilinniarpunga, ullumikkullu nunap immikkkoortuani nunatta kujataani pisiniarfiit pisortaaffigaakka.
25
