Cesadejan 16 by Istitut Cultural Ladin "Cesa de Jan"

periodico dell’Istitut Cultural Ladin “Cesa de Jan”

Cesa de Jan Anpezo - Col - Fodom periodico trimestrale - direttore responsabile Stefano Lorenzi - iscr. trib. Belluno n. 5 del 08.04.2009 - stampa Tipografia Piave Srl Belluno Poste Italiane SpA - Sped. in A.P. D.L. 353/2003 (conv. in L. 27/02/2004 n.46) art. 1 comma 2 DCB BL

n. 16 - febbraio 2015

Fodom, atività nte la scola

a lege 482/99, lege de riferiment per la tutela e valorizazion del ladin, la nconsent de promuove nost descore de mendranza incia nte le scole. N articol de chesta lege, l numer 4, l dis che l legaz de mendranza, l ladin nte nost caso, l pobe ester duorà nte le scoline per dute le atività metude a jì con i tosac e nte le scole elementari coche strument de insegnament. Ja doi agn l é peada via na colaborazion inanter le autorità scolastiche provinziai e i referenc culturai prejenti sul teritorio, anter chis incia l Istitut Cesa de Jan. S’à scomenzé a descore, auna, de ceche se podarave mete a jì per nconsentì de valorizà del vars l ladin, con atività che no siebe n valch che se finis via nten momento ma n laor che pobe ester portà navant di per di. Da cheste consideraziogn l é po nassù n proget che, n grazia de dute le colaboraziogn bude, à nconsentì de mete man a na atività ntel teritorio de Fodom, ajache l se prejenta coche l pi adato per na concreta valorizazion del ladin nte la scola. Sul teritorio l é ncora dute le scole: scolina, elementare e media, incia se ades, per dert, i à poben n auter inom. Po l ladin ven ncora descorest nte maor

part de le famee e i tosac i lo cugnes ncora da picui. Ai 14 de otobre a S. Martin de Tor, luoch a mesa via e saurì per duc, s’à binà l professor Mario Baldasso, responsabile del Istitut Comprensif de Ciaurì, l dr. Roland Verra, sorastant de la Intendenza Ladina de Bolzan e l dr. Luca Agostini, president del Istitut Cesa de

Jan, per mete ju e firmà na Convenzion a na moda da nconsentì na colaborazion formal per la valorizazion del ladin nte la scola. Nte chesta Convenzion duc chiche à firmà s’à ciot su na part de responsabilità: l Istitut Comprensif de Ciaurì l s’à cruzié de sostignì l proget per sue competenze, l Istitut Cesa de Jan l s’à cru-

zié de organizà l dut e de binà auna i finanziamenc, l’ Intendenza Ladina de Bolzan l à metù a disposizion strumenc e competenza n materia. L obietif de chesta Convenzion e de le colaboraziogn portade navant l é chel de fà si che l proget l vade navant per pi agn e l posse dà n resultant concret n cont de l’obietif prinzipal che l é mpo chel de valorizà l ladin nte le generaziogn pi joene. L’inciaria de portà navant le atività nte scola, per l’an 2014 / 2015, l é stada data a la dotora Erica Roilo de Fodom che l à perferì sua disponibilità n merito. De sigur no sarà n laor saurì ajache l é l prim viaz, nte nosta realtà, che se proa a mete n pe na tal atività... ma de sigur se mai no se pea via mai se ruarà... L é incia la volontà de fà la medema atività n Ampez e nta Col ma l é de autre situaziogn n cont de la scola e no l é saurì binà auna na derta soluzion a chest problema. N gramarzé nfin da part del Istitut Cesa de Jan al professor Mario Baldasso e al dr. Roland Vera per la sensibilità, colaborazion e disponibilità desmostrada. N gramarzé incia a la Region Trentin Sud Tirol per l sotegn finanziar dat a chest proget.

Ladinia

1914. L’Austria chiamò alle armi

zento ane da ra Prima Guera, el Prof. Paolo Giacomel l à scrito el libro “1914. L’Austria chiamò alle armi”: ‘na publicazion de r’UldA vorùda dal Comun de Anpezo, con diarie, letres e fotografies ruade da ra Galizia agnó che tante dei nostre melitare ladis i é stade ciamade a conbate e a morì. Un libro che parla anche de cuanto che à padì ra śente da Anpezo: ra guera r’à desfato families, r’à canbià el modo de pensà, no podon gnanche se imajinà cuanto. Un libro che fesc pensà sora a ra guera, ai valore dei nostre vece: a ra lealtà, al respeto e a ra solidarietà. Ai 18 de luio da res 21 inze ra sala Cultura de Anpezo el libro l é stà prejentà inze ra manifestazion “Una montagna di libri”: el libro l à abù un

gran suzeso che l é stà stanpà danoo e l é stà domandà del el voltà par todesco! El dì dapò l é stà daèrto ‘na mostra storica “Ampezzani in Galizia - Centenario Grande Guerra 1914-2014”, al Alexander Girardi Hall, fin ai 2 de noenbre. Gouja el gran suzeso se podarà śì a ra vede fin ai 6 de aprile del 2015 (orario: 1012.30 e 16-19.30 / r’ é sarada del lunes foraché ai 16 de febraro e ai 6 de aprile / dal 23 de febraro al 3 de aprile r’ é daerta solo dapomeśodì e da bonora su apuntamento al n. 0436/881812). El Prof. Paolo Giacomel l à menà i studentes a vede chesta mostra e el me disc che chiste tośate i é restade a vede chesta fotografies che es parlàa soles... Elena Salvagni Gaspari

Anpezo

I laboratorie de ra Regoles “al cuadrato”

a noa filosofia dei muśee de ra Regoles l é chel del i fei deentà al “cuadrato”: l é ‘na “piattaforma multimediale” che se ciama MQUADRO (mquadro.regole.it) e ra dà ra poscibilità ai pize e ai tośate de vede cuadre e colezios in modo “creativo”. In chesta maniera i pó fei sù algo, fei teatro, sonà e soralduto inparà e śuià. Al Muśeo Etnografico con el laboratorio BATTI IL FERRO FINCHÉ È CALDO i tośate i podarà saé ce che suzede inze ‘na fujina e cemodo che se fesc a fei el fouro: coscita i fejarà anche lore ‘na pizora opera de fer de ra besties de ra Mostra Il Bestiario. Ma l é anche ra besties del Parco Naturale delle Dolomiti d’Ampezzo fotografades da Mario Barito: cà l é un laboratorio OCCHI IN ASCOLTO agnó che i pize i inparerà a conosce i verse.

Al Muśeo Paleontologico l é el laboratorio PERCHÉ NON CHIAMARLE SAUSSURRITI: se podarà conosce i secrete de ra croda che r’à dà el gnon a ra Dolomites senza śì fora dal Muśeo, con un percorso “multimediale” de ra mostra D-ROCCIA, dedicada a Déodat de Dolomieu e Rinaldo Zardini. Al Muśeo de Arte Moderna Mario Rimoldi l é el laboratorio CON LA TESTA TRA LE NUVOLE, ispirà a ra mostra My private fog: cà i pize i podarà ruà pi pede a r’arte contenporanea e śì a ra rizerca de ra mascora dolomitiches del artista Michael Fliri. Chiste laboratorie i vienarà fate via par l inverno anche par i pize de ra scores d’Anpezo. Par informazios: Tel. 0436/2206 www.musei.regole.it e-mail: didattica.musei@regole.it Elena Salvagni Gaspari

Storia e cultura del mercui

al 23 de luio al 3 de setenbre del 2014 r’Union dei Ladis de Anpezo r’à organiśà i “Mercui de ra Cultura Ladina”: “Cortina Cultura”, l Istitut Cultural Ladin Cesa de Jan e el Comun de Anpezo i à colaborà par chesta bela idea scomenzada e betuda in pes del 2012. Come senpre el Prof. Paolo Giacomel l à fato conosce a nosoutre e ai sciore cuanta storia e cuanta cultura vecia pì de mile anes che on in Anpezo e, con chel bel placato con ra foto de Maurizio Dadiè Bechìn con el zeleste del ziel, el bianco de ra Tofana de Rozes e sote el verde del prà, l é vegnù fora ra bandiera ladina che r’à fesc nasce tropo intarese par “ciatà fora el bon e el meo de ra cultura del popolo ladin d’Anpezo”. Ogni ota che se se ciataa el grupo de śente el scotaa el Profesor, ma el fajea anche domandes de pì sortes e pì i domandaa e pì deentaa bel stà là a in saé de pì de storia, arte, architetura e anche calche fato curios. Sto an i à podù vede: - i reste del Castel de Zanna e ra Capela de ra Ss.Trinità agnó che i à parlà anche el gastaldo e el

monego de chesta jejeta; - el monumento ai Melitare de ra Guera 1914-1918: gouja che el pioea i é śude de inze inze ra Capela del porteà par lieśe danoo dute i morte anpezane e scotà cuanto che i à padì; - ra jeja de S. Nicolò a l’ Ospedà: chesta r’é ra jeja pì vecia de Anpezo documentada da ‘na pergamena del 1226. De inze tanta operes d’arte e r’architetura gotica, de fora ra strada regia e i poste agnó che l é stà ra I° Guera; - al Alexander Hall ra mostra con fotografies su ra Guera in Galizia e Serbia del 1914: tanta parsones es śia a vede de i suoi de ciaśa o calchedun che i conoscea... - ra jejes e i vilaje de Śuel, Alverà e Cianpo: inze chesto ultimo posto i ‘s à ciatà al Hotel Tiziano agnó che l é stà interesante spiegà parcè el gnon Tiziano a Cianpo. Calchedun del vilajo l à portà fotografies e cartes con scrito “Casa nativa di Tiziano 1477” : da cà l é moesc un discorso par conosce meo ra radijes de un dei pì grei e conosciude pitore del XVI secolo. De chesta śornada podé vede el video su You Tube https://www.youtube. com/watch?v=o8no6I08AP8 Con chiste apuntamente se se rende conto de cuanto che chiste poste i see preziosc e cuanto amor che i à i gastalde, i monege à tiegnì senpre lustres e in ordin chesta jejetes che ‘ś é da secui intorno a ra Basilica Minore dei Sante Felipo e Iaco e che fesc de Anpezo non solo “Patrimonio dell’Umanità” par ra natura che r’é duta d’intorno. Elena Salvagni Gaspari

Ladinia

La Rocia

I tosac e i poec salvarà i lengac de mendránza Apel a genitori, scole e istituzion n ocajion de la premiazion del concors “Mendránze n poejia”

“I

tosac e i poec salvarà i lengac de mendránza”. Andrea Nicolussi Golo, un dei giurac del concors “Mendránze n poejia”, l à douré chëste parole ntánt la zerimonia de premiazion, che s’à tegnù ai 6 de setember ntel slef dei congresc de Reba per conté del gaist che anima la scomenciadiva, ruada bele a la VIII edizion. Volù e pensé da la maestra Teresa Pezzei (rechia), l concors, da sto ann deventé bienal, l à tres bù n gran suzes de partecipazion nánter i poec che scriv ntei lengac de mendránza. Nte chësta edizion i é stei ben 179 i componimenc ruei al Istitut Cesa de Ján, che à organisé l concors auna al Comun da Fodom, n raprejentánza de dute dodesc le mendránze recugnisciude da la lege cuadro nazional 482/99, che va dai Francoprovenzai de la Provinzia de Cuneo, ai Ladins e ai grichi de Calabria. Da n valgugn agn l concors l é dalviert ence a le scole, che le pò prejenté siebelo poejie che componimenc n proja. E ence chilò l é sté responù polito con 14 istituc che à tout pert. Na ocajion per “fè scuadra” per le mendránze d’Italia, tres plu n dificolté ntel laour nia saurì de tignì su suo lengaz, ence percieche i scioldi che l Stato mët a disposizion per i progec de la 482/99 i é tres de mánco. Per chëst no n é mancé l apel da pert dei raprejentánc de le associazion culturai a genitori, scole e istituzuion a douré l lengaz de mendránza.

Ence la prescidenta de L’Union Generela di Ladins dla Dolomites Elsa Zardini l à sotlineé l’importánza de scrive ma, souradut, de descore l idiom de la mere. L Capocomun Leandro Grones l a recordé i scric che l’Union dei Ladins e l Comun i à biné pro e che i testimonieia le storie de vita de paisc. Luca Agostini, prescident del Istitut Cesa de Jan, ntel se riferì a la jent ruada ntel self de Reba per la premiazion, l à dit che “l concors l no tira la fola de jent percieche no n é l tendon e la bira. Ma l é de gran mportánza chël che fajon, – l à dit encora – percieche son che coion su trope testimoniánze de cultura che le deventarà preziose n domán”. Ntra le autorité che à tout pert e che l é jù sun palco per premié i partezipánc, l eva ence l Capocomun da Col Oscar Troi e la prescidenta de l’Union dei Ladins da Fodom Manuela Ladurner. Prejentada da Gianpaolo Soratroi, la zerimonia l’é juda n avánt co la premiazion dei componimenc n proja e n poejia de le scole e dei trei poec che à vadagné la “Naghena da Mont” e che no n à podù ester ilò per desvalive motivazion. La sëra l’é stada acompagnada n mujica dal grop ampezán dei “Armonauz” che à prejenté cover de toc de mujica pop e rock co le parole per ampezán. Lorenzo Soratroi

NOST SIGNOR CHE NASC Nadel creatif a La Rocia

ncia chest ann l é delongo rué Nadel e nte l comun de La Ròcia l é vegnú metú n pe come i agn passei “Un percorso di presepi”, na bela scomenciadiva de l Comitato Manifestazioni Marmolada auna a l Consorzio Operatori Turistici. Bel per la jeint de l luoch, che co bona vuoia la se da da fè per fè su de biei prejepi, da chi pi classici a chi n cin pi creativi e diversi da l solito, ma encia per la jent che vegn da fora nte nuosc paisc per se passé l periodo de le feste o per sté n cin de teinp chilò. Bel l é donca se fè l giro de i paisc per ji a vedei i biei prejepi njignei ca e encia per i foresti l é na bela ocajion per podei ciaté fora de biei luoch nte l paisc, magari n cin sconui, ulá che senza sta rejon magari no i fosse gnanca passei da chela. I prejepi i é stei metui fora da l 6 de dezember a l 6 de jenèr nte dut l Comun de La Ròcia. Ndut l é sté metù su 41 prejepi: 3 nta La Malga, 13 a Staguda, 1 a l Pian, 1 a Le Palue, 2 a l Bosco Verde, 8 a l Col, 5 a La Ròcia, 1 a Savinei, 1 a Digonèra, 1 a Laste, 4 a Santa Maria e 1 a Bramezza.

41 l é de segur n bel numer. Se ciaté a fè su n prejepio magari encia co autra jeint de l paisc l po encia eser vedú come n muot per sté auna, per fè velch de diverso co chi auter, per mete auna le idee de ogni un per rué a fè su velch de originale in ocajion de Nadel: l di che l é nasciú l Signor. Nteressante l é encia vedei la creativitá de la jeint, come che nte desvalive maniere se rue a fè velch de bel.. da chi che á lauré co l legn, chi co la cherta, co la lana, co muc de massarie vege, chi che á fat su n presepio naturale co la roba che se ciata nte bosch, musćio, pitole, fuoie… a chi che á fat ceze de pi classico… de gregn e de picoi, da chi delongia la strada a chi che se mossa fè doi vare per i vedei, chi sot l teinp e chi a sosta… Nsomma da no se n pierde nianca un! Speron che chest proget l vegne metú n pe encia nte i agn che vegn, percié che vel la pena de l fè vive! Co chest ve sporjon n augurio de n bon 2015 a duc!