o, wakoenai
AAWAKADALIKO
10
Lhinaanaa koame kadanakoka matsia phétakani Lhiehe poopa ñame lirhionika littawalhepe lhie pedaliakani ima neeni dali minikatsani, poadzatsa naadza nhaaha haiko kainakaperi irhiokape koame kadanakoka matsia nhaa. Kadzoxoopa koame kadanakoka tsa paamani paakatsa phetani, metsa phéta kadanakoni palhiotsa phétaka kaanheka tsa lhiatsa lhie pedaliapi wadee painoaka nhaaha lienipepipe itawiñakape ttoawa emiperi ttoa.
Koadzo lihanipaka phétaka lhie poopa Lhiehe poopa, ñametsa panheenika koadzokaroka padeenhika liyo metsa koame katsa lihanipaka lhiehe padeenhiri liyo. kadzoaha padeenhikadaa apadapana pantti tsoodapana tsa phéta tsakhaa watsa tsootsa likoawale metsa padeenhi kadaa makadapana palhiotsa watsa phétaka tsakhaa manope likoawale. Lhia mitha apaita kadaatsa ideenhika liyo tsootsa mitha lhitakani, metsa padeenhi kadaa liyo phaa apadami dzakalee oo phiome phaa iemakape linomapi riko lhiehe Iniali, hore tsakhaa mitha phéta kani ima pakoamikatsa mitha phéta kani.
Pawakaa pakapa koadzoka padeenhika liyo Apaita newiki ideenhikadaa mitha apada pana pantti irhiokada 10m x 5m limakadalika lirhio tsamitha lhitaka 12 pi poopa. Aapapi poopa limotto 7 ita popaita pamodzoaperi imakaitepeka. 12 pi poopa x 7 ita popaita limotto 84 ita popaita pamodzoaperi, ikatsa mitha apada pana pantti ikoaka lhie kadzodali imakadalika nokaite kapidzo. Apakoa dzakalee neeni kaawa 9 kainoperi nakoamitsa nalhioka madalipanape naapana irhiokape 10m x 5m: 9 kainoperi nheette nalhiomitsa 3 dapanape naapana neeni mitha 27 pantti aaha dzakalee riko. 12 pi poopa nheette x 27 pantti naamitha 324 pi poopa. Nadeenhi kadaa mitha apadapanape pantti nhaaha Iniali rikoperi irhio kadapanape mitha 10m x 5m namakadalipeka: 66 dzakaleepe neenika aaha Iniali riko nheette nalhio apadapanape naapana neeni mitha 66 pantti. 66 pantti 12 pi poopa naamitha kadzo 792 pi poopa nhétanhi Iniali riko. 792 pi Poopa, nheette 7 ita liakawa lhie patshawaka aapapitsa neeni mitha natsawa kadanakoina nhaa namottomitha kadzo 5.544 ita popaita nakoawale nhaa 66 pantti.
14 fichas baniwa 28set11ADEY curvas.indd 23
Koadzoka mitha pandza nhaa poopa ikali phiome nhaa panttinai Inialitta: Apada dzakalee neenikawa 9 kainoperi ikoami, nhaa mitha ideeri 324kha poopaitape panttinako, (kadzotsa waniweetakapidzo dzenoorhe). 324 iota poopa/dzakalee x 66 dzakaleenai = 21.384 poopaitape itali phiome nhaa panttinai inialiriko. Metsa wapiñeetaka wadeepe pamodzoa 9 kainoperi/ dzakalee ikoami.
Waanheenipe maatshikatsa padeenhika Waakaka poopa kinikirikoperi. Makadamikatsa padeenhikana. Paakaka nhaaha itawikapettoawa.
Liyo lhiehe paakeeta pakapaka ñameka hore kanhe nhaaha poopa. Lhia mitha hamoli ikoami kadaa nadeenhika naapanawa apadapanape nhaaha Iniali rikoitta nakoamitsa wadeepe mitha ñame pakapa poopa.
Ikatsa nhaaha waanhenipe maatshikatsa padeenhika, phéta kadanako poopa. Lhiehe ñametsa mitha nadeenhenika phiome nhaaha dzakaleepenai Iniali rikoperi. Lhiapepe ñamepiatsa nadeenhenika kadzodali nhaaka wawherinaipe. Imali lhiawalhi manakaipiatsa poopa nalhio.
Koame pakapa pandzadaape lhie poopa aaha dzakalhee idalipatsa
Waanheenipe matsiakatsa padeenhika
Oopittoa aaha tsoometsa liodza lhiehe Apidzaapimi neenipia hore poopa. metsa kadzoaha opikoe kapidzotsa lhiehe dzakalee, nheette horetsakha nhaaha dzakaleepe tsoometsa liodza, imali pandza oopi pakapa naameena kanakaika nhaaha poopa aha tsoometsa neeni karomipiana oopittoa. Lirikottawalhe lhiehe ikametsa paakeetaka poopa aaha heeñami riko nheette eedzawa liko tsakha. Neeni nerikoda nhaaha dzamaaphi ñameetsa pakapa hore poopa nakoawale nhaa nawikinai neeniperi. Metsa liyo lhiehe nodeenhikale nookeeta nokapa kadzoaha ikadzekataaka kaitadzo nanako, lhie ñameetsa hore nhaa ima ñame kapoa nhéta nhaa kanheeka khatsa mitha, hoiwikapoa nainoaka nhaaha emiperittoa.
Matsia karotsa peemaka paapidzawaaka padzakalepenai riko wadee phepondataakakawa liikheete Matsia karotsa paapidzawaaka phaa palhiotsa padeenhika nhaaha: • Ñame paaka phéta maakonaatsa poopa apakoa dzakakeenai inewite yaanhikaawa liko. • Palhiotsa pattathaka naapidzawali inai pattaitakaro panhikawa naanhikaawa liko. Ima kadzopia neemaka naapidzawaaka nhaaka wawherinaipe. Matsiakarotsa naapidzawaaka nhaaha newikinai, nalhiotsa nheepaka koameka matsiakaro nadeenhika wadee, namatshikeetaka manheekhatsa lhiehe poopa.
Nhaa matsiperi padeenhika ikatsa nhaaha: • Ñame paakaka pakinikirewa aaha popalima liko. • Ñame paakaka nhaaha poopa ñameperittoa pedaliape. • Waaka kadanako poopa walhio wamaka wapheta kalhekawa ñame pakapa nhaaha poopa tsoperitoa.
28/09/2011 10:43:56