SERMERSUAQ

Kalaallit Nunaanni sermersuaq nunarsuarmi sermersuit annersaannut tulliuvoq, taamaallaat Qalasersuaq Kujalleq anginerulluni.

Europap Kippasissuanut sermeq suikkaasoq 3 km-isut issutigisoq inissinneqarpat, taava Danmarkimit Gibraltari angullugu qallissavaa, Kalaallit Nunaata sermersuata angissusaa missiliorlugu. Kalaallisut aamma naleqquttumik ateqarpoq ’Sermersuaq’. Sermersuarujussuaq piviusumik sermiuvoq iigartartoq, annertussutsinili pissutigalugu sermersuartut taaneqartarpoq, soorlu Qalasersuarmi Kujallermi sermersuaq. Malinneqarsinnaasoq tassaavoq sermit iigartartut 50.000 km2-imit annerusut sermersuarmik taaneqartarmata. Aalajangiinermut tunngavik taanna, sermersuup 1.800.000 km2-imik arealeqarluni, sinnilimmik naammassivaa. Sermersuarmi sermeq ima annertutigaaq, tamakkerluni aassagaluarpat, nunarsuarmi immat tamakkerlutik 7,4 meterimik qaffassagaluarput.

Pisoqaq nutaarlu

Sermersuarmi sermeq pilerfimminit immap tungaanut ingerlaartuartuuvoq. Sermip nutaap sermersuup qeqqata tungaaniittup, sermeq pisoqaq ammut tamatumalu kingorna sinerissap tungaanut naqittarpaa, tassani naggataatigut iigartarpoq imaluunniit aalluni. Taanna isumaqarpoq, massa sermersuaq ukiuni millionini arlalinni uninngasimagaluartoq, taamaattoq sermeq sermersuarmiittoq taama pisoqaatiginngilaq. Sermeq nassaarineqarsimasuni pisoqaanerpaaq, ukiut 250.000 missaannik pisoqaassuseqarpoq. Soorlu timitsinni sananeqaatit, inuunerput tamaat sananeqaatinik nutaanik taarserneqartartut, Sermersuarmi sermeq sermimik nutaamik taarserarneqartuartarpoq, sermip pisoqqap sinerissami aannera malillugu. Sermersuaq taamaammat sermiuvoq annertuumik aalajuartoq, piffissaq tamakkerlugu ingerlaartoq.