IslaOnline 16 Mei 2024

CONSTRUCCION DI HOTEL SECRETS TA AVANSANDO HOPI LIHE

“Meta ta pa habri e prome 300 cambernan pa fin di aña”

Diaranson mainta 15 di mei, Prome Minister Evelyn WeverCroes hunto cu representantenan di DOW, a bishita e sitio unda cu Hotel Secrets ta wordo construi na San Nicolas. Motibo di su bishita tawata pa observa con e proyecto ta avansando. For di e repesentantenan di Hotel Secrets, Prome Minister a haya splicacion amplio di e diferente fasenan di e proyecto. Tambe nan a notifica Prome Minister cu pa fin di 2024, nan lo kier keda cla cu e construccion di e prome 300 cambernan y habri esakinan prome cu aña caba.

Prome Minister a indica cu e Proyecto ta progresando bastante bon y ta mustra cu lo logra nan meta pa fin di aña. Apesar cu e Proyecto aki a sufri hopi tardansa pa motibo di e diferente discusionnan cu tawata tin su rond, mester a coregi varios asunto na caminda pa asina acapara e preocupacionnan di tur hende.

“Sinceramente, Hotel Secrets na San Nicolas ta un proyecto sumamente grandi pa Aruba en general pero specialmente pa San Nicolas. Cu e inversionistanan priva a mira un luga pa nan pone nan riesgo, inversion y nan placa pa trece un desaroyo pa Aruba, ta algo cu nos ta aprecia hopi, especialmente pasobra esaki ta bay trece e progreso y bienestar pa esnan cu ta biba paribi’brug, cu ta algo cu ta haci ami hopi contento. Mi ta hopi impresiona con lihe e construccion ta bayendo y mi ta sigur tambe cu pa fin di aña e hotel ta keda cla pa habri su prome 300 camber”, Prome Minister a expresa.

Prome Minister Evelyn Wever-Croes:

PRESIDENTE DI FUNDACION AUTISMO ARUBA A REUNI CU PROME MINISTER

Lo crea un maneho nacional na bienestar di e comunidad autista

Diaranson 15 di mei, Presidente di Fundacion Autismo Aruba (FAA), señora Carolina Thiel-Span a reuni cu Prome Minister Evelyn Wever-Croes pa un motibo hopi special. Presente pa e ocasion aki tawata Minister di Salud Publico y Turismo, señor Dangui Oduber y Minister di Husticia y Asuntonan Social, señor Rocco Tjon.

Durante e atardi aki, e Comision Nacional di Autismo, cu a wordo lanta un par di aña pasa, a wordo re-institui cu cambionan importante y a apunta e presidencia na Fundacion Autismo Aruba.

E Comision Nacional di Autismo lo tin varios profesional formando parti di dj’e, entre otro, profesionalnan di e area di salubridad y den e area social y hunto lo crea un maneho nacional na bienestar di e comunidad autista. Esaki ta un logro grandi cu a wordo haci posibel door di e interes grandi di Prome Minister di Aruba y otro ministerionan y departamentonan di Gobierno.

Durante e encuentro aki Prome Minister a enfatisa cu ta wordo calcula cu na Aruba tin entre 3000 pa 5000 persona cu autismo. Gobierno ta bay traha riba un plan nacional hunto cu Fundacion Autismo Aruba. E fundacion recientemente a participa na un foro internacional titula “Call to Action” na Nacionnan Uni, New York cu e meta pa boga pa un miho futuro pa personanan autista na Aruba. E biahe aki a duna bon resultado y awo FAA tin mas y miho contacto y colaboracion cu stakeholders internacional.

“E colaboracion aki sigur ta contribui pa por crea un miho plan y asina Aruba por mehora e calidad di bida di nos ciudadanonan cu autismo, promoviendo mas inclusion den nos comunidad y logra un miho sociedad pa biba den dj’e. señora Carolina Thiel-Span ta na cabes di Fundacion Autismo Aruba y ta esun cu awo lo dirigi e Comision Nacional di Autismo y mi tin tur confiansa cu den su man nos lo ta exitoso”, Prome Minister a expresa.

OLA DI CALOR TA PELIGROSO PA

ADULTONAN MAYOR

Ministerio di Adultonan Mayor a yama un reunion pa evalua e peliger cu un of mas ola di calor (“heat wave”) lo trece pa adultonan mayor den e temporada nos dilanti.

“Como Minister di Naturalesa mi ta sali for di e punto di bista cu cambio climatico ta un realidad,” Minister Arends a bisa, indicando cu Nacionannan Uni a confirma cu 2023 a kibra tur record mundial pa loke ta temperatura halto, no obstante cu 2023 a cumpli 10 aña consecutivo di aumento di temperatura.

“Ciencia ta bisando nos cu aña 2024 lo kibra tur record mundial di temperatura halto,” Minister Arends a bisa. “For di mi ministerio nos ta mira e impacto di e cambio climatico den diferente parti di nos naturalesa, pero loke ta preocupa mi mas cu tur ta e impacto cu esaki por tin riba nos adultonan mayor.”

“Como minister di adultonan mayor mi ta preocupa pasobra

calor sofocante por bira fatal pa esnan mas vulnerabel, entre nan nos adultonan mayor lo ta e promenan pa sinti e efecto,” segun Minister Arends. E minister ta enfatisa cu e asunto aki mester atencion serio.

Aunke Gobierno no por trece cambio den temperatura mundial, nos mester haci tur esfuerso pa mitiga e impacto di esaki riba esnan mas vulnerabel. Pa e motibo aki Minister a yama un reunion di urgencia cu diferente instancia cu ta atende di un of otro forma cu adultonan mayor. Meta di e reunion ta pa hunto cu tur instancia yega na un plan di accion y cooperacion. Tur esnan cu ta atende cu adultonan mayor mester traha hunto pa evalua e peligro y prepara un plan con pa mitiga esaki.

Ministerio di Adulto Mayor y Naturalesa ta dunando espacio pa discusion riba e peligernan di Cambio Climatico, pero sigur riba e peliger cu un heat-wave lo trece pa nos adultonan mayor.

MINISTER ARENDS DI BISHITA CERCA

UN MAINTA YENA CU ESNAN CU CURASON PA

YUDA NOS COMUNIDAD

Minister Arends hunto cu su ekipo a bishita recientemente

Stichting Ambiente Nobo, un pasadia cu ta ofrece servicio na adultonan cu limitacion mental. E bishita aki a lanta consientisacion tocante e rol importante cu e fundacion ta hunga pa enrikece bida y fortalece un sentido di comunidad pa su clientenan.

Pa casi dos decada, Stichting Ambiente Nobo ta mas cu simplemente un luga pa pasa dia, den un ambiente vibrante unda tanto adulto mayor como adulto menor por entretene nan mes, haya compania, y un oportunidad pa keda mentalmente y fisicamente activo. E clientenan ta motiva pa tuma parti den actividadnan cu ta mantene nan alegre y conecta, haciendo asina cada dia significativo.

Durante e bishita, e fundacion a comparti algun di nan preocupacionnan, particularmente e necesidad urgente pa mas personal. Cu 36 cliente actualmentamente bou di nan cuido y un lista di espera cu ta creciendo, ta claro cu tin mester di mas man y curason pa duna e atencion necesario. Gobierno di Aruba ta reconoce e pasonan crucial cu mester tuma pa atende cu esaki, asegurando cu e miembronan mas vulnerabel di nos comunidad ta haya e atencion y cuido cu nan merece.

Stichting Ambiente Nobo ta dedica pa atende e necesidadnan diverso di nan clientenan, ofreciendo un enfoke holistico pa nan bienestar. Di 8’or di mainta te cu 4:30 di atardi, e fundacion ta brinda un ambiente di cuido, preveniendo cu e cliente keda

na cas sin net nada pa haci. Sin e opcion di pasadia aki, hopi lo ta enfrenta mas limitacion y isolacion.

Nos a keda profundamente movi pa e gran colaboracion di e fundacion cu varios partnernan, incluyendo Trampolin pa Trabou, Sonrisa Aruba, y otro organisacionnan cu ta duna sosten. Nan esfuersonan combina ta crea cadena di sosten cu ta trece alegria y proposito na bida di cada cliente.

Palabra di gradicimento ta bai na ful e bestuur, lidernan, y stagairenan di E.P.I. y EPB pa nan trabou extraordinario pa sirbi nos comunidad. Minister Arends a expresa su aprecio pa e bon trato y experiencia positivo cu e clientenan ta ricibi. Un dia yena cu sonrisa, speransa den nos comunidad y un compromiso firme pa haci un diferencia.

Minister Ursell Arends:

MINISTERIO DI NATURALESA

TA YUDA SCOL BASICO

DORNASOL CU UN HARDIN DI ALIMENTACION

Diasabra awor 18 di mei 2024, Ministerio di Naturalesa lo percura pa Scol Basico Dornasol haya un hardin di alimentacion. Esaki ta den cuadro di e proyecto agroforesteria na scolnan basico cu tin como meta e promocion di agricultura sostenibel bou muchanan. Diasabra awor maestro, alumno y boluntario nan lo bini hunto pa tuma un paso den e esfuerso pa fomenta un futuro mas sostenibel pa Aruba.

Henter comunidad ta invita pa duna un man, pa asina planta un variedad di fruta y berdura den cura di scol diasabra awor di 7’or di mainta te cu 1’or di merdia. Esaki ta duna inicio na un herment educativo, unda alumnonan por siña mas tocante e importancia di siguridad di alimentacion y alabes balora nos sector primario.

Ademas di e plantamento inicial, e proyecto den su totalidad ta inclui varios workshop destina pa siña maestronan tocante mantencion di e hardin como tambe su inclusion den e curiculo escolar. E iniciativa ta un esfuerso colaborativo cu tin como meta pa trece un cambio positivo den e manera cu nos comunidad ta mira y trata e tema di siguridad di alimentacion y sostenibilidad.

Awor ta yegando e final di e proyecto di agroforesteria na scolnan basico cual a inicia na januari 2024. Ya caba 7 scol

a haya un hardin di alimentacion cu Scol Basico Dornasol participando como e di ocho scol.

E exito di e proyecto ta refleha e dedicacion y esfuerso conhunto di e comunidad escolar, boluntarionan, y partners di proyecto. Minister Ursell Arends, kende ta encarga cu Sector Primario, a expresa su orguyo y gratitud pa e participacion y apoyo ricibi. E ta encurasha e comunidad pa duna nan aporte y participa na e eventonan di plantamento. Hunto nos por percura pa un futuro unda nos ta sostene nos mes cu locual nos ta cosecha.

A REUNI CU PAHO DEN CUADRO DI E AVANSENAN

PA CU SALUD MENTAL NA ARUBA

Diaranson a tuma luga un reunion, entre Ministerio di Husticia y Asuntonan Social, directie volksgezondheid como tambe directie buitenlandse betrekkingen y dr. Gabriel Vivas Franccesconi kende ta e representante di PAHO pa nos region, acompaña pa su ekipo. E reunion tawata basa riba e topico di Salud Mental y con Aruba ta atende cu e fenomeno aki.

Manera ta conoci dos aña pasa, PAHO a asisti den diseña e roadmap pa Aruba, di con tin cu bay atende cu e aspecto di Salud Mental, cual ta un plan cu ta core di 2021 te cu 2031.

Actualmente Aruba tin su “steering committee” cu ta consisti di tur stakeholders di e veld, pa di e forma ey por traha riba e diferente “building blocks” manera legislacion, financiamento, desaroyo profesional di tur e profesionalnan cu ta traha den e veld, pero tambe tene cuenta cu e parti di prevencion. A duna un presentacion amplio di tur e pasonan cu Aruba ta tumando, di cual e feedback cu a ricibi for di PAHO tawata uno positivo, caminda nan ta sumamente satisfecho cu con e ehecucion ta bayendo, compara cu otro paisnan den nos region.

A traha riba diferente palabracionnan, mirando e desaroyo no solamente na Aruba pero internacionalmente tambe, lo bay evalua e roadmap actual, hunto cu PAHO, pa adapta esaki na tempo, mirando cu ta trata di un plan di maneho pa e dies añanan nos dilanti. Banda di esaki, tin un investigacion cu a wordo conduci cu yama “STEPS”, e investigacion aki a tene cuenta cu aspectonan di Salud Mental, y a base di e resultadonan aki, lo bay traha un plan di accion di con Aruba lo bay atende cu e diferente hayazgonan cu a wordo treci padilanti.

Un reunion sumamente positivo caminda a haci palabracion cu PAHO pa sigui asisti Aruba den e parti di desaroyo profesional. Pues, e “steering committee” lo haci un “needs assessment” y a base di esaki lo acudi na PAHO pa asina nan por asisti nos cu diferente otro cursonan y opleiding pa ful e veld. No solamente pa esunnan cu ta atende cu e parti di Salud Mental, pero manera ta conoci e fenomeno aki ta rekeri un atencion multi-sectoral, pa cual motibo e diferente training lo bay pa e sectornan social, hudicial, salubridad publico y tambe di enseñansa.

BUITENPROJECTEN DI KIA TA UN TRAYECTO PA YUDA

E PRIZONERONAN REINTEGRA Y RESOCIALISA

EXITOSAMENTE DEN NOS COMUNIDAD

Den transcurso di otro siman e prizoneronan di KIA lo termina di verf Stadion GPT na Dakota

Minister di Enseñansa y Deporte Endy Croes hunto cu colega Minister di Husticia y Asuntonan Social Rocco Tjon a bishita Compleho Deportivo Guillermo Prospero Trinidad na Dakota. Esaki ta en conexion cu e trayecto di Buitenprojecten di Instituto Coreccional KIA cu a inicia siman pasa, unda ta brinda e prizoneronan un oportunidad di traha pafo di KIA. Un colaboracion entre Ministerio di Enseñansa y Deporte y Ministerio di Husticia y Asuntonan Social, den cual e detenidonan di KIA lo percura pa e mantencion y diferente trabou di e facilidadnan deportivo y scolnan.

A inicia cu e trabounan na Compleho Deportivo Guillermo Prospero Trinidad, comokiera cu dia 8 di juni proximo e wega clasificativo di CONCACAF entre Seleccion di Aruba y Seleccion di Curaçao lo tuma luga den e stadion na Dakota. Esaki ta un desaroyo sumamente positivo, mirando cu e ta contribui pa e resocialisacion y reintegracion di nos prizoneronan den nos comunidad ta mas exitoso, consecuentemente disminuyendo recidivismo. Ademas di esaki, e ta disminui e gasto di diferente facilidad deportivo y di scol. Ta premira cu den transcurso di otro siman, nan lo termina di verf Stadion GPT na Dakota.

E mandatario di Enseñansa y Deporte a gradici colega Minister di Husticia y Asuntonan Social Rocco Tjon pa e colaboracion aki, personal di KIA pa nan cooperacion y e prizoneronan cu ta haciendo un excelente trabou. Alabes, ta felicita e prizoneronan pa e gran trabou cu nan ta haciendo y lo sigui haci den nos comunidad. Hopi exito den futuro.

CONSUL MERICANA DI BISHITA CERCA

MINISTER THIJSEN

Recientemente Minister Plenipotenciario mr. Ady Thijsen a haya bishita di Matthew Carroll, Consul pa Asuntonan Politico y Economico di Estados Unidos pa Caribe Hulandes. Consul Carroll a wordo acompaña pa Byron Hartman di embahada di Merca na Hulanda.

Sr. Carroll a bisa cu su funcion na e Consulado General di Merca na Curaçao ta uno nobo y cu su tarea ta pa mira unda e por logra haya inversionistanan Mericano pa Aruba, cu no ta activo den e sector turistico. Mas bien sr. Carroll ta pensa den direccion di agricultura y energia sostenibel. Minister Thijsen a bisa cu e pensamento aki ta bin net na un momento crucial pa Aruba cu despues di Covid a realisa cu elo mester diversifica su economia. E atencion lo mester ta riba engrandese y profesionalisa e sector primario, cu ta conta tanto pa plantacion, como pa cria di bestia y pesca.

Sr. Thijsen a bisa cu di su banda su vision y maneho ta pa drenta den contacto cu inversionistanan Hulandes cu lo por aporta na diversificacion di economia di Aruba.

Tambe durante di e bishita a papia di stimula mas entrepreneurship na Aruba; traha riba un maneho pa mas di nos hendenan bai bek Aruba. Un combersacion segun e mandatario ta conta tanto pa e sector publico como priva. Tambe lo mester purba na stimula exportacion di productonan netamente Arubiano pa por ehempel Europa y Merca.

Riba e tereno di energia, Minister Thijsen a bisa cu Aruba ta trahando pa bin cu un Hydrogen Valley na San Nicolas y conhunto cu LNG gas, gradualmente reduci e uso di energia fosil na Aruba.

Consul Carroll a bisa cu Aruba tin un bon producto turistico, sinembargo lo mester tene cuenta cu e deseo di e turista Mericano di awendia cu e ta busca pa experencia mas cosnan local, specialmente riba e tereno culinario.

Finalmente sr. Carroll a gradici Minister Thijsen pa e bon recepcion y a bisa cu Aruba por conta cu su sosten y yudansa unda por.