Eystrahorn
Fimmtudagur 12. desember 2013
22 verkefni styrkt um eina milljón eða meira
Heildarfjárhæð styrkveitinga á vegum SASS á þessu ári, til eflingar atvinnulífs og nýsköpunar á Suðurlandi, nemur samtals 80 milljónum króna. 50 milljónum króna var nú úthlutað í síðari úthlutun ársins til 39 verkefna. Áherslur við mat á verkefnum byggja á stefnumörkun SASS í atvinnuþróun í landshlutanum. Markmið SASS í atvinnuþróun eru m.a. að efla og styðja við nýbreytni og almennan fjölbreytileika í sunnlensku atvinnulífi, að unnið sé út frá svæðisbundnum styrkleika og að sótt sé fram á við og inn á nýja markaði þegar tækifæri eru fyrir hendi. Þessu náum við fyrst og fremst með samþættingu í ráðgjöf, verkefnastjórnun og fjármögnun nýsköpunarverkefna. Styrkveitingar sem þessar geta og eiga að hjálpa til við að grípa og nýta þau tækifæri sem til staðar eru, með fjármagni sem dregur um leið úr áhættu tiltekinna verkefna, þar sem þau eru þá betur fjármögnuð. Í sumum tilvikum eru styrkveitingar grundvöllur þess að farið er af stað í upphafi. Þannig deilum við ábyrgðinni að hluta, við að ná fram sameiginlegum markmiðum í atvinnumálum fyrir svæðið, við að skapa fjölbreyttari atvinnutækifæri. Atvinnustigið eitt og sér er ekki helsta viðfangsefnið, heldur fábreytni atvinnulífs í dreifbýli. Að því leyti þarf atvinnulíf á landsbyggðinni stuðning við að nýta tækifærin í samkeppninni við náttúrulega segla höfuðborgarinnar, eins og þekkist um heim allan. Alls bárust SASS 140 umsóknir að þessu sinni og hafa þær aldrei verið fleiri. 39 verkefni fengu styrk. Þar af voru 22 verkefni sem fengu styrk að upphæð yfir 1 m.kr. og var stærsta einstaka styrkveitingin að upphæð 8 m.kr. Matsferlið var langt og umfangsmikið. Að því komu 21 einstaklingar, innan og utan svæðis, við yfirferð, mat og endanlegt samþykki þeirra verkefna sem við fylgjum nú úr hlaði. Niðurstaða þessi er mjög ánægjuleg. Hin hliðin er auðvitað sú að það eru 101 verkefni sem ekki fékk styrk að þessu sinni. Mörg þeirra verkefna munu engu að síður verða að veruleika, sum hver eiga erindi við aðra sjóði eða annar farvegur talinn líklegri til árangurs. Öllum sem sótt hafa um styrki verður boðin aðstoð frá ráðgjöfum SASS. Styrkveitingar þessar á vegum SASS eru fjármagnaðar með Vaxtarsamningi Suðurlands, Sóknaráætlun Suðurlands og með fjármunum frá SASS. Ákveðin óvissa ríkir um fjármögnun styrkveitinga fyrir árið 2014 en styrkveitingar á vegum SASS til eflingar atvinnulífs og nýsköpunar eru áætlaðar tvisvar á ári. Stefnumörkun um áherslur styrkveitinganna eru endurskoðar við upphaf hvers árs. Styrkveitingar sem komu í hlut verkefna í Austur-Skaftafellssýslu: • Markaðssókn á höfuðborgarsvæðinu Hornafjarðar heitreyktur makríll Sólsker ehf., Kr. 600.000 • Humarklær - Nýsköpun í sjávarútvegi Haukur Ingi Einarsson, Kr. 500.000 • Vatnajökull Photo - Markaðssetning ljósmyndaferðaþjónustu Rannsóknarsetrið á Hornafirði, Kr. 1.000.000
Seljavallakjötvörur Það verður opið á fjósloftinu laugardaginn 15. desember frá kl. 13:00 - 16:00. Verið velkomin, Ella og Eiríkur
3
Jólamót yngri flokka laugardaginn 14. desember
Jólamót Knattspyrnudeildar Sindra í yngri flokkum verður haldið í Bárunni laugardaginn 14. desember nk. 7., 6. og 5. flokkar drengja og stúlkna keppa kl. 10:00 – 12:00. 4. og 3. flokkar drengja og stúlkna keppa kl. 12:00 – 14:00. Mætum nú öll og höfum gaman af. Foreldrar eru líka hvattir til að mæta og fylgjast með. Munið að klæða ykkur vel. Síðustu æfingar fyrir jól verða miðvikudaginn 18. desember og æfingar byrja aftur 6. janúar samkvæmt stundaskrá. Yngriflokkaráð og þjálfarar óska öllum iðkendum og fjölskyldum þeirra gleðilegrar jólahátíðar.
Menntaverðlaun Suðurlands Samtök sunnlenskra sveitarfélaga veita árlega verðlaun fyrir framúrskarandi framlag á sviði menntunar á Suðurlandi sem um leið er hvatning til frekari dáða. Verðlaunin verða veitt í sjötta sinn nú í vetur. Allir þeir sem koma að skólastarfi með einhverjum hætti geta fengið verðlaunin; grunnskólar, leikskólar, framhaldsskólar, símenntunarmiðstöðvar, háskólastofnanir, kennarar, einstaklingar eða hópar, skólaskrifstofur, sveitarfélög/skólanefndir, foreldrafélög o.fl. Veitt verða peningaverðlaun sem nýtt verði til áframhaldandi menntunarstarfs. Jafnframt fylgir verðlaununum formleg viðurkenning. Verðlaunin verða afhent við formlega athöfn í tengslum við hátíðarfund Vísinda- og rannsóknarsjóðs Suðurlands í janúar nk. Hér með er óskað eftir tilnefningum til verðlaunanna. Rétt til að tilnefna til verðlaunanna hafa allir þeir sem tengjast skóla- og menntunarstarfi með einhverjum hætti, sveitarfélög, skólanefndir, foreldrar, kennarar og starfsfólk skóla og annað áhugafólk um menntun og skólastarf. Tilnefningum skal fylgja ítarlegur rökstuðningur. Tilnefningar skulu hafa borist til Samtaka sunnlenskra sveitarfélaga, Austurvegi 56 Selfossi, eigi síðar en 3.janúar nk. Samtök sunnlenskra sveitarfélaga