Eystrahorn
www.eystrahorn.is www.eystrahorn.is
Fimmtudagur 15. september 2011
32. tbl. 29. árgangur
Fylgst með gróðri á Skeiðarársandi Í síðustu viku fóru nemendur úr NÁT103 í dagsferð út á Skeiðarársand. Tilgangurinn með ferðinni var að rannsaka merkta reiti og athuga breytingar og mæla vöxt plantna. Þetta er í þriðja skipti sem nemendur í þessum áfanga fara í ferð til að rannsaka gróðurframvindu á þessu svæði. Á sandinum í nánd við gömlu réttina fylgist FAS með fimm 25 fermetra afmörkuðum reitum. Í hverjum reit eru taldar trjáplöntur, þær flokkaðar eftir tegundum, hæð þeirra mæld svo og lengsti árssproti. Nemendur þurfa líka að áætla hlutfall gróðurþekju í hverjum reit og greina þær háplöntur sem þar eru. Ferðin gekk ljómandi vel. Í nyrstu reitunum var þó áberandi mikil aska sem gæti haft áhrif á niðurstöður. Í þessari viku vinna nemendur úr mælingum þessa árs og bera saman við upplýsingar fyrri ára. Þó er hægt að segja að lengsti mældi árssproti var 47 cm og hæsta plantan er 161 sentimetri. Hækkun á plöntum frá fyrra ári er ekki mikil en þeim fjölgaði mikið, einkum víðiplöntum. Myndun rekla hefur einnig aukist og áberandi aukning er á ummerkjum eftir skordýr. Á leiðinni heim kom hópurinn við í Skaftafelli og borðaði nesti og einnig var stoppað við Kvíármýrarkamb til að skoða hop jökulsins og tína ber. Eyjólfur Guðmundsson og Hjördís Skírnisdóttir
Hornfirðingar sigruðu
Sigursveit Hornfirðinga. Fremri röð f.v. Óli Kristján Benediktsson, Gestur Halldórsson og Guðmundur Borgar. Aftari röð f.v. Guðmundur Kr.Guðmundsson, Gísli Páll Björnsson, Héðinn Sigurðsson, Sævar Gunnarsson. Á myndina vantar Magnús Jónasson.
Sveitakeppni golfklúbba á Austurlandi var haldin hér á Hornafirði 10.- 11. september með þátttöku allra golfklúbba á Austurlandi. Keppt var í tveimur riðlum. Í A-riðli sigraði sveit Golfklúbbs Hornafjarðar en Golfklúbbur Neskaupsstaðar í B-riðli. Þessar sveitir léku svo til úrslita þar sem leikar stóðu jafnir eftir 18 holur. Jafnt var líka eftir tvær holur í bráðabana þar sem Guðmundur Borgar og Héðinn Sigurðsson léku fyrir heimamenn. Þá var gripið til þess að slá eitt högg af 100 metrum og sigurvegari yrði sá sem væri nær holu og tryggði Héðinn Sigurðsson þá heimamönnum sigurinn. Glæsilegt afrek eftir hörkuleik við mjög sterka sveit Norðfirðinga. Gestur Halldórsson liðsstjóri Hornfirðinga sagði að leikmenn klúbbanna hefðu dásamað bæði umgjörð og aðstöðu hér á frábærum Silfurnesvellinum. Varð sumum á orði að það ætti að spila hér á Silfurnesvelli annað hvert ár því þetta væri örugglega besti golfvöllurinn á Austurlandi. Gestur vildi þakka öllum kylfingum þátttöku í mótinu og sagðist vonast til að sjá sem flesta að ári.