Eystrahorn
www.eystrahorn.is www.eystrahorn.is
Fimmtudagur 29. mars 2012
13. tbl. 30. árgangur
Frumútgáfur af verkum Þórbergs Þórðarsonar komnar heim í hérað Ritstjóri lagði leið sína í Þórbergssetur sl. sunnudag ásamt fleira fólki eða milli 80 og 90 manns. Tilefnið var að árlega er boðið uppá menningarlega dagskrá í mars í tilefni af afmælisdegi Þórbergs. Samkoman stóð fyllilega undir væntingum ritstjóra. Þorbjörg Arnórsdóttir hafði orð fyrir heimamönnum og Karlakórinn Jökull hóf dagskrána með kórsöng þar sem meðal annars voru sungin lög við texta eftir Þórberg og Megas og endað á frægu Eurovison lagi með texta og tilvísun í Hornafjörð. Sigurður Pálsson skáld og rithöfundur fór á kostum þegar hann las úr Bernskubók sinni og fór yfir tilurð hennar. Var honum afar vel fagnað og hann klappaður upp til að fá meira að heyra. Soffía Auður fjallaði um Lækningabók Jónassen og Þórberg og kom þar enn einu sinni fram hversu mikið ólíkindatól Þórbergur var og hvernig hann var alltaf með skrifum sínum í raun að setja raunveruleikann í skáldlegan búning. Í máli Þorbjargar kom fram að fyrir nokkru bauðst til sölu stórt safn af frumútgáfum af verkum Þórbergs Þórðarsonar, alls 46 bækur, allar mjög
Þorbjörg og Gunnar Ásgeirsson stjórnarformaður Skinneyjar - Þinganess á innfelldu myndinni.
heillegar og vel með farnar. Skinney-Þinganes keypti safnið og færði það Þórbergssetri að gjöf. Í þessu safni er frumútgáfa af Bréfi til Láru sem aðeins kom út í 300 eintökum árið 1924 og er mjög fágæt. Í fyrstu útgáfu af Bréfi til Láru voru bækurnar allar númeraðar og áritaðar af Þórbergi, sérkennileg hönnun vekur athygli en bækurnar eru eins og umslög í laginu og ritað er utan á þær eins og þær séu tilbúnar til sendingar með póstinum. Eintakið í Þórbergssetri er
númer 109. Innihald Bréfsins olli sem kunnugt er miklu umróti og deilum í samfélaginu. Þórbergur gaf Bréf til Láru út sjálfur og veðsetti eigur sínar fyrir útgáfunni, en bókin seldist strax upp og var aftur gefin út árið 1925 í stærra upplagi. Þorbjörg sagði að bókagjöfin hefði mikla þýðingu fyrir safnið og þakkaði forsvarsmönnum SkinneyjarÞinganess sérstaklega fyrir þessa verðmætu gjöf. Einnig kynnti Þorbjörg sýningu á styttunum hans Sobeggi afa sem Lilla Hegga
gaf honum alltaf á afmælinu hans, og á afmælinu hans Jesús þ.e. á jólunum. Alls 43 styttur, gjöf frá Helgu Jónu Ásbjarnardóttur til Þórbergsseturs. Bæði söfnin hafa verið sett upp í skápa í sýningarsal Þórbergsseturs ásamt þeim bókum sem til voru fyrir á Hala. Þorbjörg bauð síðan gestum að líta báðar sýningarnar augum áður en sest var að rausnarlegu kaffihlaðborði. Í samtali við ritstjóra sagði Þorbjörg að alltaf væri eitthvað nýtt að sjá í Þórbergssetri og búið að vera gestkvæmt í vetur. „Síðast komu konur úr Kvenfélagi Kirkjubæjarhrepps í heimsókn og nutu veitinga og fór um sýningar og fjöldi erlendra ferðamanna hefur komið að Hala á þessum vetri. Norðurljósin, náttúran í vetrarríki og einstök menning dregur nú æ fleiri ferðamenn til Íslands yfir veturinn og er það afar ánægjuleg þróun. Eitt af meginmarkmiðum með starfsemi Þórbergsseturs er að hafa opið allt árið, leggja sig fram í þjónustu við ferðamenn á lágönn, og jafnframt að stuðla að framþróun menningarferðaþjónustu á Íslandi.“ sagði Þorbjörg að lokum.
Konukvöld
á Hótel Höfn föstudagskvöldið 13. apríl kl 20:00 Fordrykkur • Sushi og sticks • Frábært kvöld og glæsileg sýning, happadrætti o.fl. • Miðaverð kr. 3.500,-
Veislustjóri verður Sigríður Klingeberg Opinn dansleikur á eftir • Guggurnar spila fram á nótt Borðapantanir í síma 478-1240
Hótel Höfn