Upacara
8
Redité Pon, 17 Juli 2016
Bebantenan Kawangén, Sarana Cihna Tri Aksara, Tri Angga Sarira, miwah Palemahan HINDU sinalih tunggil agama sané sarat antuk upacara yadnya miwah banten utawi upakara pinaka saranannyané. Sarana sané kanggén gumanti madué smerti miwah tetujon nganutin yadnya sané kalaksanayang. Sarana pamuspan Hindu ngawit sané mawentuk sederana kantos sané dahat rimit. Tios ring canang, sinalih tunggil sarana pamuspan sané kabuatang pisan ri sajeroning pamargin upacara miwah pamuspan inggih punika kawangén. Kawangén kacihnayang pinaka lambang aksara suci Om Kara (aksara suci Ida Sang Hyang Widhi), taler pinaka lambang angga sarira, miwah lambang palemahan. Kawangén Yéning selehin ring wit krunané, kawangén mawit saking kruna wangi, polih pangater ka- miwah pangiring –an, manados kawangian. Ri sampuné kasandiang raris manados kawangén, sané madué teges keharuman. Punika nyihnayang kawangén pinaka sarana kanggén nyuksmayang Ida Sang Hyang Widhi Wasa sané luih, miik, tur suci, gumanti setata kasuksmayang miwah kasembah. Kawangén kacihnayang pinaka simbolis Ida Sang Hyang Widhi Wasa, punika awinan kawangén kakaryanin antuk lakaran miwah wentuk sané becik tur miik. Indiké puniki janten madué smerti mangda krama setata éling, ngacep, tur ngwangiang Ida Sang Hyang Widhi Wasa. Kawéntenan kawangén mabuat pisan ring sajeroning panyangkep upakara Panca Yadnya, minakadi sajeroning Déwa Yadnya kawangén kawigunayang pinaka panyangkep banten tebasan, prascita, miwah saluiring sesayut. Sajeroning Rsi Yadnya pinaka panyangkep banten tebasan. Sajeroning Pitra Yadnya kawangén kawigunayang sajeroning upacarasimbolisasi nangiang layon sané pacang kaupacarain. Ring upacara Manusa Yadnya kawigunayang ri kala upacara ngotonin, mapandes, pawiwahan. Sajeroning Bhuta Yadnya kawigunayang ri kala ngamargiang upacara mamakuh, macaru, miwah sané lianan. Parindikan sarana miwah wentuk sané wénten ring kawangén samian madaging smerti. Kojong kawangén, kakaryanin antuk daun pisang sané mawentuk segitiga lancip, pinaka cihnan Ardhacandra. Salanturnyané Plawa, punggelan daun kayu minakadi, endong, pandan arum, kemuning, miwah sané lianan, pinaka cihnan katreptian. Porosan, kakaryanin antuk kalih bidang daun basé sané kadagingin pamor miwah buah (pinang), raris kagulung antuk tegak nungkayak tur malinggeb raris kajangkepang. Porosan punika kawastanin porosan silih asih, pinaka cihna hubungan timbal balikmanusa sareng Ida Sang Hyang Widhi Wasa. Kembang Payas utawi cili, kakaryanin antuk jejaitan janur sané karinggit tur kawentuk, pinaka lambang Nadha. Reringgitan janur nyihnayang rasa lascarya krama majeng Ida Sang Hyang Widhi Wasa. Salanturnyané Sekar, kautamayang sané kantun seger tur miik, pinaka cihna kasucian ring sajeroning ngamargiang yadnya. Miwah Jinah Képéng, pinaka cihna Windu. Jinah nyihnayang sesari, sarining manah. Tios punika jinah taler mawiguna pinaka panebus saluiring kakirangan.
SETRA- Ring Désa Bayung Gedé, Kecamatan Kintamani, Bangli, ari-arin raré sané wau embas nénten kapendem ring pakarangan umah, nanging kagantung ring genah sané kawastanin sétra ari-ari. BPM/ist
Ring Bayung Gedé, Ari-ari Magantung ring Sétra KRAMA Bali pamekasnyané sané magama Hindu ri kala madué raré sané wau embas pastika mendem ari-ari raré inucap ring pakarangan paumahan soang-soang. Yéning sang raré maraga lanang, ariarinnyané pacang kapendem ring sisi tengen genah raréné merem utawi sisi tengen balé metén. Yéning sang raré maraga istri, ari-arinnyané kapendem ring sisi kiwa balé metén. Nanging, parindikan inucap matiosan pisan yéning ring wewidangan Désa Bayung Gedé, Kecamatan Kintamani, Bangli. Ring désa puniki, wénten dresta sané tawah sané wantah kamargiang ring désa inucap kémanten. Dresta inucap ngeninin indik pula-pali nguratiang ari-ari raré sané wau embas. Ring Désa Bayung Gedé, Kintamani, ari-ari raré sané wau embas inggian lanang utawi
istri nénten ja kapendem ring pakarangan paumahan, nanging kagantung ring sétra sané kawastanin Sétra Ari-ari. Sétra puniki magenah ring tebén Désa Bayung Gedé. “Mendem ari-ari ring pakarangan paumahan sawewidangan Désa Bayung Gedé ngawi pakarangané leteh. Mawinan iriki, krama sané madué anak alit, ari-arinnyané kagantung ring Sétra Ari-ari,” baos Jero Kubayan Mucuk, sinunggil panglingsir sané kasinggihang ring Désa Bayung Gedé. Manut Jero Kubayan Mucuk, pula-pali ngantung ari-ari pateh sakadi pula-pali nguratiang ariari sané pacang kapendem. Kapertama kabersihang, nglantur kagenahng ring tengah kelapa kadangingin anget-angetan, abu, arum-aruman. Sané matiosan wantah, ari-ari puniki kaiket antuk tali sané kawastanin
salang tabu antuk wentuk tapak dara. Salanturnyané wawu kagenahang ring taru bungkak. Tatkala genahang taler patut ngedaslemahang, mangda nénten wénten sané nguningin, tios punika sadurung suryané endag kabaosang galah sané becik. “Ari-ari wantah dados kagantung ring taru bungkak,” Baos Jero Kubayan. Parindikan sané pateh taler kabaosang Jero Bendésa Adat Bayung Gedé, Jero Mangku Gedé Sriman. Manut Jero Mangku Sriman, taru bungkak kabaosang madué kawigunan nyerep ambu sané metu saking ari-ari inucap. Kabaosang, taru bungkak kawigunannyané pateh sakadi taru menyan sané wénten ring Desa Trunyan. “Tatkala makta ari-ari ka sétra taler mangda kabakta olih reraman anaké alit sané lanang utawi bapannyané antuk
tangan kiwa, tangan tengen makta arit kanggén munggal carang bungkak sané pacang kanggén ngantung ari-ari sané kabakta. Wus punika dané nénten dados malih matolihan kaungkur sawus ngenahang ari-ari inucap,” Jero Mangku Sriman nlatarang. Kawewehin malih, yéning wénten krama sané mendem ari-arin anak alitnyané ring pakarangan paumahannyané, krama inucap kakeniang denda naur jinah bolong satak kéténg. Tios punika, krama inucap taler patut makarya banten pabersihan ring pakarangan genah ari-ari punika kapendem. “Santukan yéning wénten
ari-ari sané kapendem ring pakarangan, pakarangan inucap kabaos leteh. Ri kala krama inucap madué karya, Jero Kubayan taler pamucuk désa nénten dados ngranjing ka pakarangan inucap santukan kantun leteh. Krama punika patut ngamargiang pabersihan,” Jero Mangku Sriman ngwewehin. Indik danda sané kakeniang majeng krama sané mendem ariari ring pakarangan paumahan pacang kaserahang ka désa. Dresta puniki wantah tetamian saking panglingsir sané sampun kamargiang saking nguni. Kaaptiang dresta puniki tetep kalestariang olih parajana pamekasnyané ring Désa Bayung Gedé. (uma)
Satua
Dresta Mendem Sawa ring Bayung Gedé
Lanang Marep Pertiwi, Istri Marep Akasa SATIOS dresta ngantung ari-ari ring Setra Ari-ari, ring Bayung Gedé taler wénten dresta mendem sawa sané matiosan sareng désa lianan. Ring Désa Bayung Gedé, ri kala wénten krama sané padem, tatacara mendem sawa pantara lanang sareng istri matiosan. Parindikan inucap kapatutang olih Jero Kubayan Mucuk taler Jero Mangku Sriman, panglingsir taler Bendésa Adat Bayung Gedé. Manut Jero Kubayan Mucuk, tatkala wénten krama sané padem, yéning krama inucap istri, ri kala mendem sawannyané kagenahang nungkayak utawi marep langit. Yéning krama lanang sané padem, ri
kala sawannyané kapendem kagenahang malinggeb mangda marep ka pertiwi. “Yéning krama istri, sawannyané kagenahang nungkayang santukan istri wantah niyasa pertiwi, mawinan setata marep ka akasa. Yéning lanang, sawannyané kagenahang marep pertiwi santukan anak lanang pinaka niyasa akasa mawinan setata marep pertiwi,” Jero Kubayan Mucuk nlatarang. Sajeroning mendem sawa taler matiosan sareng désa lianan. Manut Jero Kubayan Mucuk, tatkala kapendem sawa nénten madaging kain napi-napi malih. Malalung, samian sané neket ring ang-
gané kalepas. “Iriki krama ngangken, iraga embas malalung, mawali ka sunia taler malalung,” dané negesang. Parindikan sané pateh talar kabaosang Béndesa Adat Bayung Gedé, Jero Mangku Sriman. Manut dané, lanang istri pinaka lambang pertiwi akasa, mawinan ri kala mawali ka sunia taler kagenahang marep akasa miwah pertiwi. Sané lanang marep pertiwi, sané istri marep akasa. Tios punika, yéning wénten krama sané padem sangkaning salah pati utawi ulah pati, taler sané cacat, sawannyané kapendem ring sétra nampek tukad sané magenah ring Desa Peludu, boya ring sétra utama. (uma) Olih : Madé Taro
Pan Cubling Ngubuh Nyawan PAN Cubling seken-seken kéweh ngitungang para bojog ané ngrusuh di tegalné. Suba pang liu Pan Cubling nyabat bojogé ento baan batu, kéwala bojog ané ngusak-asik ento tusing nawang jejeh. Ngancan makelo, ngancan ngliunang bojog ané teka bareng ngrusuh di telagné Pan Cubling. Makejang entikentikané Pan Cubling lesag ulian para bojogé ento. Ditu lantas Pan Cubling makeneh, kénkén carané ngulah bojog-bojogé ento. Metu lantas dayané Pan Cubling masang latih anggona ngejuk para bojogé ané sabilang wai ngaé rusuh di tegalné. Di tongosé ané silib Pan Cubling masang latih. Di tongos pepasangan latihé gantungina buah jagung lan biu ané
nged. Pangawitné, liu bojogé ané kena latih, bakat baana ngejuk. Kéwala, makelo-kelo para bojogé ngeh yén buah ané magantung ento mayanin awakné. Ulian pepasangan latihné Pan Cubling suba tawanga tekén para bojogé, para bojogé aluh buin ngusak entik-entikané Pan Cubling. Pan Cubling tusing nyak kalah, jengah kenehné. Jani Pan Cubling buin mesuang dayané, ia masang kawat ngiterin pagehan tegalné ané pepes ambahina tekén I Bojog macelep ka tengah tegalné. Asilné, liu pesan bojog ané bakat baana ngejuk. Bojogbojogé ento kurunga baan Pan Cubling. Ada ané ngeling pacruét, ada ané kaik-kaik ngidih tulungan. (Masambung)
Rédaksi nerima reriptan marupa artikel (paling akéh 3500 huruf), satua ringkes (paling akéh 6000 huruf), puisi, geguritan miwah sané siosan. Reriptan mangda kakirim ring alamat: Bali Post Jalan Kepundung 67 A Dénpasar. Taler dados ring email: bali_orti@balipost.co.id.