O GALEGO NA PRENSA DIXITAL

Queda moito que estudar e dicir, xa que logo, de Rosalía de Castro, comentábame estes días o meu colega e amigo Anxo Angueira, concordas, Teresa?

Concordo de todo. Rosalía é a gran poeta da Galiza e aínda queda moito que estudar e que dicir dela. Ás veces estes grandes creadores que xorden de cando en vez no mundo, como Rosalía, que teñen unha visión tan fonda da alma e do espírito do país no que naceron, son os máis difíciles de entender.

Galicia, Euskadi e Catalunya son negadas sistematicamente polo “totalitarismo español”, tanto de dereitas como da patética esquerda, aliada do neoliberalismo económico como da barbarie capitalista, desa globalización absurda máis que desesperante. Cal é a túa opinión verbo desta miña breve reflexión?

Levamos séculos de que se queira impor unha idea monolítica de España que fixo moito dano. O dogma da “España unida” é moi forte, pero a España de verdade non é esa senón a outra, a que quedou afogada e esmagada polos dogmas políticorelixiosos. Toda a historia de España precisa estudo e interpretación. A interpretación máis lóxica é a de que España funcionaría mellor cunha Galicia, Euskadi e Catalunya independentes.

Nós-outros, Teresa, máis que soñar, aspiramos a unha República Socialista Galega, independente, internacionalista e solidaria… Cal é a a túa opinión, o teu posicionamento? É unha aspiración que comparto, pero paréceme esencial que non se pense que con proclamar a república abonda e que iso vai traer milagres. O magnífico da segunda república española foi que se propuxo facer todo doutra maneira e mudar radicalmente o sistema de educación e ensino.

Por iso a esmagaron.

Derrogado o anterior Decreto de Normalización Lingüística, consensuado e asinado por todos os partidos con representación parlamentar, agora o goberno do PP (español) bota abaixo ese Decreto ben de mínimos, e establece polo “ordeno e mando” un “Decretazo”, que non é máis que un auténtico disparate, que pretende coar por bos a estolidez e os seus acólitos… Que che parece a ti…?

Paréceme que é un desatino. Pero a miña opinión nestes asuntos non concorda coa de case ninguén, porque coido por exemplo que se ensinan moi mal as linguas e que o habitual é que case todo o mundo saia do ensino español (chámolle así porque non hai un sistema galego de ensino) sen saber ningunha lingua a pesar de telas “estudado” moitos anos.

Trilingüismo oficial, na situación do galego, no é outro disparate máis?

Isto paréceme froito da ignorancia máis terríbel en cuestión de linguas. Dá moita vergoña.