D kurrikulu erk iha eskola

DEZENVOLVIMENTU KURRÍKULU EDUKASAUN RELIJIAUN KATÓLIKA IHA ESKOLA Crisogno Soares Freitas Pereira Dosente Instituto Católico para a Formação de Professores Diocese de Baucau A. Saida mak kurríkulu Sigifikasaun kurríkulu bazeia ba terminolójia mai hosi sentidu ho língua Gregu ‘curir’ no ‘curere’ katak distánsia ne’ebé tenke liu hosi hosi ema atleta halai hahú hosi start to’o finish atu hetan medalia ka prezente ruma. Sentidu ida ne’e tuir mai aplika fali ba iha mundu edukasaun ne’ebé fó sentidu katak lisaun sira be tenke liu hosi hosi estudante sira hahú hosi inísiu to’o remata atu hetan diploma.

Hosi sentidu rua iha leten, iha mós elementu importante tolu be bele sai nu’udar baze hanoin atu kompriende sentidu kurríkulu.

1. Lisaun sira: ne’e mak konteúdu kurríkulu ne’ebé tenke estudante sira aprende, atu nune’e bele hetan esperiénsia estuda nian (kompeténsia) ne’ebé espera, hodi nune’e iha última programa prontu atu simu diploma ka prezente apresiasaun.

2. Atividade sira: ne’ebé iha formula sentidu iha leten ne’ebé dehan ‘ne’ebé tenke liu hosi/tama’ ne’e mak prosesu be tenke hala’o hosi estudante sira atu estuda lisaun sira, hodi nune’e iha kapasidade kompeténsia no finalmente prontu atu simu no hetan sertifikadu apresiasaun ka diploma.

3. Apresiasaun ka diploma: ne’e mak evidénsia ida-ne’ebé identifika katak estudante ne’e hala’o ona prosesu edukasaun, hodi nune’e nia iha dever atu hetan apresiasaun hanesan ho forma diploma ka sertifikadu ne’ebé deklara katak estudante ne’e to’o ona iha kompeténsia ne’ebé determina tiha ona.

Tuir peritus edukasaun, hanesan Peter F. Oliva fó sentidu ba kurríkulu katak “curriculum is the plan or program for all experiences which the learner encounters under the direction of the school” (sita 1|Pájina

iha Izuegbu, 2011, p. 40). Sentidu ne’e kontein kestaun rua ne’ebé importante no tenke kompriende.

(1) katak kurríkulu mak programa ka planu be tula projesaun ne’ebé sei hala’o hosi institusaun edukasaun. (2) kurríkulu nu’udar esperiénsia hotu (all experiences). Ida ne’e fó ejizénsia katak kurríkulu iha sentidu ne’ebé luan duké sentidu dahuluk, signifika katak iha parte seluk nu’udar planu, kurríkulu mós nu’udar esperiénsia hotu ka atividade sira-ne’ebé akontese nu’udar realidade hosi programa ka planu ne’ebé plania tiha ona antes.

Iha parte importante ne’ebé tenke tau atensaun mak dimensaun haat métodu haree ba kurríkulu.

Tanba ne’e haree jeralmente no ho matenek ne’ebé luan tuir Said Hamid Hasan iha kurríkulu no aprendizajen, halo klasifikasaun ba sentidu kurríkulu bazeia ba dimensaun haat mak, “1) kurríkulu nu’udar idea, 2) kurríkulu nu’udar planu eskrita, 3) kurríkulu nu’udar atividade, no 4) kurríkulu nu’udar rezultadu” (Hasan, 2009, p. 7).

1. Kurríkulu nu’udar idea ka hanoin: Fundamentalmente nu’udar idea sira-ne’ebé tau hamutuk be hanoin hamutuk atu dezenvolve kurríkulu be di’ak iha eskalaun ki’ik (micro), no bele ho eskalaun luan (macro).

2. Kurríkulu nu’udar planu eskrita: Mak atitude ativa ne’ebé kontinua hodi sentidu kurríkulu dimensaun primeiru (idea). Ezemplu molok hanorin mestre/a presiza halo dahuluk preparasaun eskritamente, hanesan planu aula.

3. Kurríkulu nu’udar atividade: Tanba atividade hotu ne’ebé mestre/a no estudante sira hala’o hamutuk ho ema sira seluk ne’ebé iha ligasaun ba mundu edukasaun hodi servisu ba edukasaun iha área sira, nivel no variedade edukasaun.

4. Kurríkulu nu’udar rezultadu: Inklui buat hotu ne’ebé iha ligasaun ho forsa atu hetan ninia alvu ka objetivu ne’ebé planiadu. Normalmente aspeitu primeiru mak rezultadu (ézitu) be haree hosi sesaun hotu atu to’o kompeténsia hotu ne’ebé tenke estudante sira iha (kompeténsia akadémiku no nonakadémiku).

Iha mós elementu sira-ne’ebé mak nu’udar komponente prinsípiu kurríkulu, ne’e mak: 1. Komponentu objetivu: Objetivu nu’udar figura esperansa, ne’ebé sai nu’udar alvu ba atividade hotu ne’ebé hala’o hodi to’o objetivu ne’e rasik. Objetivu ne’e mak ‘kompeténsia.’

Kompeténsia mak formula kapasidade ne’ebé iha relasaun ho aspeitu siensia, atitude, no jeitu ne’ebé tenke reflete ba iha hanoin no hahalok ne’ebé mak konsistente. Iha mós objetivu 2|Pájina

ne’ebé diferente hahú hosi ida-ne’ebé jerál to’o espesífiku, ne’e mak: objetivu edukasaun nasionál, objetivu edukasaun institusionál, objetivu kurríkuler, objetivu instruksionál (objetivu aprendizajen).

2. Komponentu konteúdu: Nu’udar matéria ka lisaun ne’ebé tenke estuda hosi estudante atu to’o kompeténsia ne’ebé espera. Konteúdu kurríkulu nu’udar lisaun sira-ne’ebé atu fó hanorin di’ak liu dezenvolve hosi rekursu oin-oin ne’ebé luan no variedade (média emprime, web ka nonemprime), tantu ida-ne’ebé finzi prepara (by design) ka ida-ne’ebé bele aproveita (by utilization).

3. Komponentu métodu/estratéjia: Aproximasaun, estratéjia no sistema prosesamentu edukasaun ka aprendizajen ne’ebé hala’o iha institusaun, tan ne’e programa ka kurríkulu ne’ebé determina tiha ona bele la’o efetivu, efisiente no akuntabel.

4. Komponentu avaliasaun: Instrumentu avaliasaun atu hatene prosesu programa no nivel susesu ne’ebé to’o tiha ona no relasaun ho planu ne’ebé determina tiha ona iha kurríkulu.

Instrumentu ne’e tenke determina validamente no bele valoriza aspeitu hotu kurríkulu nian (prosesu no rezultadu).

Relasaun entre komponentu kurríkulu (objetivu, konteúdu, métodu no avaliasaun) nu’udar uniaun ida-ne’ebé iha integrasaun ba malu, influénsia malu, no determina atu to’o ba objetivu ne’ebé determina tiha ona. Tan ne’e kurríkulu bele dehan nu’udar sistema ida, hanesan bele haree iha diagrama tuir mai ne’e:

OBJETIVU

AVALIASAUN

KONTEÚDU

MÉTODU

Figura 1. Relasaun komponentu kurríkulu 3|Pájina

Pozisaun kurríkulu iha sistema edukasaun ka aprendizajen iha eskola primária. Kurríkulu nu’udar instrumentu atu realiza esperansa ka objetivu edukasaun. Kurríkulu iha papel ne’ebé importante liutánba iha funsaun atu organiza no prosesa programa edukasaun. Kurríkulu nu’udar programa eskrita (document curriculum) ka hanaran kurríkulu ideál (ideal curriculum) ne’ebé laiha influénsia ba alvu edukasaun ka aprendizajen molok kurríkulu ne’e rasik aplika iha programa realiadade (actual curriculum). Aktividade ril aplika kurríkulu ne’e mak iha forma ‘aprendizajen.’ Tanba ne’e, atu haree to’o iha-ne’ebé ona kurríkulu la’o efetivu no efesien tenke haree hosi prosesu no rezultadu aprendizajen iha eskola. Atu bele klaru liután oinsá relasaun entre edukasaun, kurríkulu no aprendizajen bele haree iha diagrama tuir mai ne’e:

Estudante Edukasaun (eskola) Apredizajen

Rezultadu

kurríkulu Ambiente

Figura 2. Diagrama relasaun edukasaun, kurríkulu no aprendizajen B. Baze dezenvolvimentu kurríkulu Kurríkulu la’ós sasan ne’ebé maten no la’ós mós biblia ka buat ruma ne’ebé labele atu muda.

Kurríkulu halo atu mundu edukasaun bele hakonu ejizénsia ne’ebé dezenvolve iha sosiedade.

Kuandu sosiedade muda, kurríkulu mós tenke tuir mudansa. Kuandu kurríkulu lamuda, nia konsekuénsia mak servisu edukasaun só de’it rezulta produtu edukante ne’ebé miis. Parte nesesidade ida-ne’ebé tenke taumatan iha kurríkulu mak dezenvolvimentu siensia koñesimentu no teknolójia nune’e mós atitude moris sosiedade no sidadaun.

4|Pájina

C. Papel dezenvolvimentu kurríkulu Dezenvolve kurríkulu iha ninia papel, mak tuir mai ne’e: 1. Papel konservativu: Iha papel nu’udar instrumentu ida atu konserva kultura nasaun ida nian.

Lahodi kurríkulu ne’ebé di’ak, kultura nasaun nian mós sei lakon tanba laiha institusaun ida mak haburas nia.

2. Papel krítiku no avaliativu: Bele ho krítiku atu avalia no valoriza ezisténsia kultura beala sira atu hatene valór sira-ne’ebé kontein iha kultura ne’e rasik.

3. Papel kriativu: tenke bele kria kreasaun sira-ne’ebé foun. Ho kultura ne’ebé dezenvolve iha sosiedade nune’e kultura ne’e rasik tuir lo-loos dezenvolvimentu tempu no ejizénsia hosi sosiedade.

D. Prosesu inovasaun kurríkulu 1. Sentidu inovasaun kurríkulu Tanba sá kurríkulu tenke uza? Kurríkulu bele haree nu’udar livru ka dokumentu ne’ebé uza hosi mestre/a nu’udar livru manuál iha prosesu hanorin no aprende. Kurríkulu bele mós haree nu’udar produtu ida, ne’e mak saida mak ita espera bele fó sentidu oinsá estudante to’o no oinsá prosesu atu to’o. Kurríkulu mós nu’udar buat ida be moris no vigór durante tempu ruma no persiza halo revizaun tuir dezenvolvimentu tempu.

Kurríkulu mós bele haree nu’udar realidade ne’ebé akontese iha klase. Iha kontestu ne’e, mestre/a iha oportunidade ne’ebé boot atu sai ida-ne’ebé dezenvolve kurríkulu ba klase ne’ebé nia hanorin ba. Kurríkulu ne’e iha relasaun ho personalidade mestre/a sira-nian. Iha kontestu ne’e mós kurríkulu nu’udar realidade ida-ne’ebé fó sentidu ba totalidade moris labarik sira-nian durante eskola.

Inovasaun kurríkulu mak muda buat hotu ne’ebé inklui iha laran, mestre/a, estudante, diretór/a, kordenadór/a inan-aman, no sosiedade ne’ebé iha nesesidade iha mundu eskola nian. Ne’e signifika katak mudansa kurríkulu mak mudansa sosiál ka curriculum change is a social change.

2. Inovasaun no dezenvolvimentu

5|Pájina

Inovasaun lahanesan ho dezenvolvimentu, maibé dezenvolvimentu nafatin kontein inovasaun.

Dezenvolvimentu mak hasa’e valór ka kualidade. Inovasaun mak mudansa pozisaun, fatin tuur ka kondisaun ne’ebé posibel lori buat di’ak ka bele mós lori buat ne’ebé ladi’ak.

Dezenvolvimentu nafatin hakait ba avaliasaun. Dezenvolvimentu hala’o atu hasa’e kualidade. Atu hala’o bazeia ba kritériu ruma. Diferensia kritériu sei fó diferensia opiniaun konaba vantazen no dezvantazen inovasaun ne’ebé iha.

Kurríkulu labele fó prinsipál liu ba aspeitu ida, maibé ba aspeitu hotu: labarik, sosiedade, nune’e mós siensia ne’ebé balansu.

3. Oinsá mosu inovasaun Tuir peritus sosiolójia, inovasaun akontese iha fase tolu. (1) inisiasaun, ne’e mak idea dahuluk mudansa atu hala’o, hodi esplika lisan, objetivu, no buat hotu ne’ebé iha relasaun ba prosesu mudansa ne’ebé hakarak atu to’o, (2) lejitimasaun, baihira ema hahú atu simu mudansa ida, (3) congruency, bainhira ema adopta mudansa ruma no halo hanesan ba ninia opiniaun ho hanoin sirane’ebé mai hosi peritus sira, hodi nune’e lahamosu diferensiasaun valór entre ida-ne’ebé hasai opiniaun ho peritu mudansa sira.

Métodu atu hamosu idea ne’ebé hanesan hosi lider eskola ba mestre/a mak tuir mai ne’e: a. Fó motivasaun b. Promesa hasa’e vensimentu ka graun c. Hetan kreditu d. Hatudu atitude respeitu e. Hamaluk ka sai maluk f. Pasiénsia g. Buka kompriende h. Husu atu partisipa hotu no i. Konvida atu hamosu mudansa sai nu’udar problema ne’ebé persiza atu rezolve hamutuk

6|Pájina

Maibé di’ak liu mak mudansa ka inovasaun sai susesu kuandu hosi parte mestre/a sente presiza duni inovasaun ne’e rasik, atu nune’e mosu hakarak ne’ebé boot hosi mestre/a rasik hodi hadi’a nia-an ba nesesidade komum.

4. Inovasaun mestre/a Inovasaun kurríkulu sei labele hala’o kuandu lahodi inovasaun hosi mestre/a nia-an tanba mestre/a mak xave hosi susesu iha inovasaun kurríkulu. Kuandu inovasaun ne’e rasik mestre/a konxiénte nu’udar nesesidade atu rezolve problema no dezvantazen ne’ebé nia iha, mak lahodi dudu hosi kotuk mós nia sei haka’as-an atu buka métodu hodi rezolve problema ka dezvantazen ne’ebé nia iha.

Iha tempu ne’e mak mestre/a nakloke-an ba mudansa.

Ema ne’ebé iha hakarak boot atu halo mudansa persiza esforsu-an atu hasa’e ka hamoris nesesidade inovasaun ne’e ba personazen mestre/a ida-idak. Ne’e katak inovasaun persiza akompaña hosi esperiénsia konkritu. Tan ne’e iha prosesu ne’e persiza esforsu-an hamosu nafatin komunikasaun ne’ebé nakloke, hodi nune’e mosu atmosfera respeitu malu no fó fiar ba malu iha mestre/a sira leet hodi hato’o idea ka hanoin ne’ebé mak iha. Tanba mestre/a mak lider importante no prinsipál liu iha nia aula laran. Ema ne’ebé ho papel nu’udar inovatór kurríkulu tenke bele servisu hamutuk, influésia ema seluk no fó inspirasaun. Nia tenke iha sensibilidade sosiál, nakloke ba ema seluk nia hanoin no mudansa. Nia tenke sai ema ne’ebé profesionál, maibé nafatin haraik-an no lahatudu-an.

5. Inovasaun institusaun ka organizasaun Ema ida-idak nia atitude ba mudansa ka inovasaun ne’e diferente. Iha ema ruma ne’ebé mak prontu atu simu, iha ema ruma seluk ne’ebé kontra, iha ema ruma ne’ebé nonok de’it, no iha ema ruma mós ne’ebé mak tuir de’it maibé laiha komitmentu ida no ema ruma mós tuir de’it atu buka protesaun tanba ta’uk hasoru konsekuénsia. Iha prosesu habelar inovasaun persiza prevene mós polarizasaun nia mosu, ne’e mak sizmu entre parte rua. Inovasaun ne’e mosu no susesu só de’it kuandu ema hotu hola parte no servisu hamutuk. Tanba ne’e presiza matenek ka sabedouria no sensebilidade sosiál.

6. Inovasaun iha edukasaun ne’ebé neneik liu Iha kauza balun hosi inovasaun edukasaun ne’ebé mak neneik liu iha mundu edukasaun. a. Edukasaun, inklui kurríkulu ne’ebé mak sidauk iha baza akadémia 7|Pájina

b. Edukasaun, inklui kurríkulu, laiha ema ida-ne’ebé responsabel no espesífiku be prontu atu fó tulun iha tempu ne’ebé de’it. c. Laiha apresiasaun espesífiku ba mestre/a ka se de’it mak hadi’a kurríkulu. d. Mestre/a barak mak sei hamrik metin iha métodu sira-ne’ebé tuan. e. Kurríkulu ne’ebé uniform ka hanesan limite mestre/a nia movimentu atu halo mudansa Problema sira ne’e hamate mestre/a nia motivasaun no hakarak atu hamosu mudansa iha kurríkulu. Persiza hatene katak hanorin ne’e nafatin nu’udar viazen ida-ne’ebé nakonu ho segredu be dada ema nia atensaun atu hanoin no hanoin ho krítiku no kriativu.

E. Sentidu Edukasaun Relijiaun Katólika (ERK) ERK nu’udar forma komunikasaun fiar katólika nian, entre estudante katólika no mós estudante be iha relijiaun no fiar ne’ebé lahanesan, atu bele ajuda estudante sira espesífiku estudante katólika sai ema relijiozu/a, iha morál, nakloke, no bele sai autór inovasaun sosiál atu hamosu sosiedade ne’ebé hakmatek bazeia ba valór universál, hanesan domin, hakmatek, paz, justisa, onestu, sakrifisiu, sensibel, no amizade.

ERK iha eskola nu’udar esforsu atu hametin fiar ba Maromak ida de’it tuir relijiaun katólika, hodi nafatin fó respeitu no sentidu ba relijiaun seluk atu kria toleransia entre relijiaun no hametin unidade nasionál.

F. ERK nia fusaun no objetivu Persiza hatene katak ERK iha eskola importante mak ninia moris relijiozu/a, la’ós relijiaun. Tan ne’e, funsaun ERK iha eskola mak: 1. Realize objetivu edukasaun nasionál liuhosi hametin unidade nasionál ne’ebé ho espíritu amizade be loos.

2. Apoia relijiaun seluk hodi halo sira-nia kna’ar atu haklaken Maromak nia liafuan no realiza iha sira-nia moris nu’udar sidadun iha nasaun no sosiedade.

3. Apoia família sira hodi dezenvolve atitude relijiozidade estudante be sira taumatan iha sira ida-idak nia família, atu nune’e sai ema relijiozu/a, iha morál no nakloke.

4. Apoia estudante sira hodi dezenvolve komunidade umana ne’ebé dinámika liuhosi atividade komunikasaun esperiénsia fiar nian.

8|Pájina

Objetivu hosi ERK iha eskola mak: 1. Dezenvolve atitude neon estudante sira atu bele haree Maromak nia di’ak iha sira ida-idak nia-an, ema seluk, no ambiente ne’ebé sira hela atu nune’e sira kuda iha sira-an sensibilidade iha moris sosiedade.

2. Ajuda estudante deskobre no realiza valór universál sira-ne’ebé relijiaun hotu-hotu luta atu hetan.

3. Dezenvolve koperasaun entre relijiaun no fiar ho espíritu amizade ne’ebé loos.

G. Baze hanoin 1. Saudades ba salvasaun ne’e dezenvolve hosi jerasaun ba jerasaun to’o agora no futuru.

Saudades ba valór universál sira-ne’ebé ema fiar nain barak luta atu hetan ba moris nia di’ak.

2. Pontudevista fiar ne’ebé moris nian (tuir relijiaun ida-idak) realiza iha moris hamutuk, ihane’ebé moris hamutuk ne’e, komunidade relijiaun nune’e mós nu’udar komunidade umana be moris hamutuk ne’ebé iha saudades be hanesan, ne’e mak salvasaun ba ema hotu.

H. Aproximasaun aprendizajen Aproximasaun ne’ebé uza iha ERK mak komunikasaun fiar nian ne’ebé bazeia ba esperiénsia moris no fiar estudante sira-nian, no la’ós indoktrinasaun.

Komunikasaun fiar ne’e kompostu privadu estudante ho estudante, estudante ho mestre/a, estudante ho testu, estudante ho atmósfera, no estudante ho Maromak. Komunikasaun ne’e akontese iha prosesu ne’ebé iha diresaun loos no kompleta malu atu reflete, interpreta, aplika doutrina fiar nian hosi relijiaun no fiar ne’ebé nia iha, iha nia moris realidade hodi nune’e sai ema ne’ebé nafatin ba oin iha fiar nu’udar ema fiar nain.

ERK uza aproximasaun liuhosi eduka ho reflesaun (paradigma pedagojia refletivu [PPR]) reflesaun kompostu hosi elementu tolu ne’ebé prinsipál liu, nu’udar unidade ida iha prosesu aprendizajen, ne’e mak: esperiénsia, reflesaun no asaun.

Bazeia ba PPR ne’e, elementu sira-ne’ebé importante atu tau atensaun mak: 9|Pájina

1. Estudante. Estudante nu’udar sujeitu iha prosesu aprendizajen, persiza: a. Aprende no hakle’an doutrina relijiaun no fiar b. Iha atitude nakloke (simu, respeita) c. Ativu no kriativu iha prosesu aprendizajen: 1) Brani atu fahe esperiénsia moris no doutrina relijiaun no fiar 2) Brani atu ekspresa talentu ne’ebé iha, iha prosesu aprendizajen. d. Reflete no fó sentidu ba esperiénsia moris no fiar e. Realiza rezultadu reflesaun iha hahalok ne’ebé reál 2. Mestre/a: esforsu-an luta ba estudante atu bele: a. Hato’o Maromak nia di’ak no valór universál sira iha nia-an rasik, ema seluk, no ambiente moris. b. Fó hanoin lesuk ba Maromak nia di’ak no valór universál sira iha moris loron-loron. c. Halo koperasaun entre relijiaun no fiar seluk ho espíritu amizade nu’udar habitus foun d. Kostuma-an hodi reflete ba esperiénsia moris, tan ne’e presiza: 1) Mestre/a ne’ebé ho papel nu’udar fasilitadór/a no formadór/a 2) Mestre/a be iha atitude demokrátiku no partisipativu 3) Mestre/a be iha espíritu kriativu, nakloke, no hakarak atu aprende buat foun sira 4) Mestre/a be bele reflete no fó sentidu ba esperiénsia moris no fiar 5) Mestre/a be bele observa dezenvolvimentu pribadu estudante, no servisu hamutuk ho ema seluk ne’ebé iha relasaun ba dezenvolvimentu edukasaun integrál, nu’udar rezultadu aprendizajen liuhosi ninia atitude ne’ebé livre no spontania (haree kapasidade haat iha leten).

3. Métodu: iha prosesu aprendizajen persiza taumatan ba métodu ne’ebé ho lisan: a. Variativu, dinámiku (kriativu), partisipativu b. Interesante c. Eksplorativu: buka, dezenvolve, hariku informasaun nafatin.

4. Meiu

10 | P á j i n a

a. Optimiza meiu tuir situasaun no ajuda prosesu aprendizajen, hanesan: livru, jornál, revista ka materiál imprime sira selu, kasete audio, audio vizuál, programa telivizaun, slide, ambiente. b. Kria meiu tuir nesesidade no ajuda prosesu aprendizajen, hanesan: halo kántiku, puizia, figura, poster, karikatur, slogan.

5. Tempu a. Presiza halo hanesan ba nesesidade, labele foka de’it ba alokasaun tempu ne’ebé prepara tanba buat importante la’ós matéria nia finalidade maibé nia prosesu. b. Nakloke atu iha posibilidade hodi mistura matéria iha oportunidade ruma c. Matéria bele halo hanesan ba tempu ne’ebé relevante ho akontesimentu relijiaun no fiar nian.

6. Rekursu matéria no materiál a. Livru manuál b. Rekursu matéria ne’ebé bele ajuda (livru referénsia sira, telejornál, artigu/opiniaun hosi revista ka jornál, figura, informasaun hosi internet) c. Rekursu matéria ne’ebé iha relasaun ho doutrina relijiaun ka fiar ruma tenke mai hosi referénsia ne’ebé bele responsabiliza ho.

7. Rekursu aprende a. Estudante b. Mestre/a c. Sosiedade d. Ambiente e. Biblioteka I. Prosesu aprendizajen Prosesu aprendizajen ne’ebé iha bazeia ba aproximasaun PPR: 1. Introdusaun: Prefásiu (kontein ho apresepsaun no prosesu atu lori tópiku dezenvolvimentu ne’ebé sei prosesa iha aprendizajen be sei hala’o); Orasaun hahú (nakloke): bele hosi estudante ka mestre/a ne’ebé ho lisan universal.

11 | P á j i n a

2. Dehan sai esperiénsia: Narasaun-istória (istória povu ka moris ka biblia ne’ebé iha relasaun ho tópiku. Narasaun istória nu’udar media reflesaun inísiu, tan ne’e bele ho lisan uza media, filme, artigu, kómiku, figura nu’udar meiu atu hakle’an reflesaun esperiénsia); Hakle’an narasaun (narasaun ne’ebé prepara bele koko iha apresiasaun hamutuk ka hakle’an liuhosi interpretasaun no kompriensaun kontinua atu hetan valór ida) 3. Reflesaun ba esperiénsia: Bazeia ba média no fahe esperiénsia, konvida estudante atu hetan valór sira iha esperiénsia ne’e nia laran. Valór sira ne’e kompostu hosi reflesaun krítiku ba esperiénsia ne’ebé mak iha no to’o iha valór umanidade universál sira.

4. Dezenvolve reflesaun relijiozidade: depoizde estudante hetan ona valór sira iha ninia reflesaun, konvida estudante atu fahe valór sira-ne’ebé nia reflete ho valór transendentál no orientasaun vizaun no tradisaun relijioza ne’ebé sai fundamentu estudante sira-nia esperiénsia aprendizajen. Estudante komunika malu no diálogu inter-subjective konaba rikusoin ideolójia tradisaun relijiaun nian, konaba tópiku ne’ebé hatuur nu’udar baze dezenvolvimentu.

5. Hametin no rezumu: reflesaun ne’ebé hetan tiha ona ninia valór umana sira no orientasaun relijioza hosi estudante bele rezumu no hato’o iha plenária atu to’o ba iha ema hotu nia haka’as-an atu hametin fiar ne’e rasik iha nia-an no ema seluk.

6. Pra-asaun no asaun: nu’udar atividade konkretu ne’ebé bele sai bee-matan atu hametin no forsa internalizasaun valór ba reflesaun ne’ebé halo hamutuk. Pra-asaun (nu’udar atividade iha enkontru ne’ebé bele sai parte hosi estudante iha haka’as-an atu ekspresa sira-nia reflesaun ne’ebé mak sira hetan. Ekspresaun sira ne’e bele liuhosi: Dinámika grupu, ekspresaun movimentu, ekspresaun kántiku no ritmu, ekspresaun vizuál, ekspresaun eskrita).

Asaun (nu’udar atividade grupu ka pribadu be iha implikasaun sosiál konkretamente. Asaun formula nu’udar parte hosi esforsu atu hala’o reflesaun iha realidade nia laran ka iha moris loron-loron).

7. Avaliasaun nu’udar bee-matan responsabilidade to’o iha-ne’ebé prosesu aprendizajen ne’e susesu no kona estudante sira-nia objetivu aprendizajen. Avaliasaun latenke haree ho avaliasaun ne’ebé ho lisan kuantitativu ka formula númeru, maibé mós bele haree nu’udar avaliasaun ne’ebé ho lisan kualitativu. Siginifika katak avaliasaun la’ós de’it atu tetu aspeitu kognitivu maibé mós adapta esforsu hodi hato’o reflesaun nu’udar parte avaliasaun

12 | P á j i n a

8. Takan: finalidade hosi prosesu aprendizajen mak ho lisan hametin prosesu ka dezenvolve enkontru. (orasaun takan: bele ho lisan universál).

J. Avaliasaun aprendizajen Avaliasaun ERK atu tetu susesu ba indikadór rezultadu aprende nian. Iha avaliasaun eskrita, iha mós avaliasaun ne’ebé mak uza modelu avaliasaun bazeia ba atitude (performance based assessment), fó kna’ar (project), produtu (product), ka portofoliu (portfolio).

Avaliasaun ne’e tenke taumatan ba aspeitu tolu ne’ebé mak importante: Kongnitivu, afetivu no psiko motorik.

Konkluzaun 1. Kurríkulu iha nia komponentu haat ne’ebé prinsipál mak objetivu, konteúdu/material, métodu no avaliasaun.

2. Komponentu haat ne’e iha ligasaun metin ba malu no fó influénsia malu nune’e mós determina no hala’o prosesu atu to’o ba nia objetivu.

3. Relembra kada komponentu ne’ebé iha kurríkulu iha relasaun ba malu no sai determinante, tanba ne’e kurríkulu mós bele hanaran sistema.

4. Kurríkulu la’ós buat ida-ne’ebé estátiku. Kurríkulu iha atu mundu edukasaun bele hakonu no hatán ba ezijénsia ne’ebé nafatin avansadu iha sosiedade nia laran. Kuandu sosiedade muda, kurríkulu mós tenke muda.

5. Atu dezenvolve kurríkulu ida presiza atu halo, tanba tuir duni ninia papel ne’ebé iha, ne’e mak: papel konservativu, krítiku no avaliativu, no kriativu.

6. ERK nu’udar matéria edukasaun iha kurríkulu ne’ebé ho objetivu atu kria komunikasaun fiar nian iha eskola durante prosesu aprendizajen.

Referénsia Hasan, S. H. (2009). Evaluasi kurikulum (Cet. 2). Bandung: Rosda.

Izuegbu, V. E. (2011). Students as designers of their own life curricula: The reconstraction of experience in education. United States of America: Information Age Publishing Inc.

13 | P á j i n a