MEDIDA 4.3.2. Fomento do asociacionismo en comercialización Xustificación da medida Para xustificar a medida abonda coa presentación de dous exemplos: A produción de kiwi ecolóxico, malia o potencial detectado, non atravesa o seu mellor momento. Os produtores que queiran vender o seu produto máis ou menos directamente tropezan cos problemas da clasificación do produto e a súa conservación. Existe ademais unha gran carencia de formación comercial dos produtores. A proposta vai entón no senso de promover unha mellora das condicións de presentación e conservación do kiwi e proxectar a posibilidade de mellorar a renda asociada, mediante a agrupación da oferta. Existe tamén necesidade de reconducir o labor realizado no ámbito da produción de castaña. Trátase dun cultivo tradicional que na gran maioría dos casos non precisa modificacións culturais para recibir o aval de produto ecolóxico. No entanto, é importante sinalar unha recente tendencia á intensificación mediante o emprego de herbicidas nas plantacións. O souto é un elemento definitorio da paisaxe e cultura galegas, á vez que unha boa medida de prevención de incendios. É polo tanto necesario apoiar a reconversión á certificación ecolóxica. A reconversión debe dar lugar á xeración do valor engadido para os produtores agrarios. Actualmente as vendas son individuais, con moita variabilidade de prezos e calidades. De aí a necesidade de combinar o fomento da certificación co fomento do artellamento do mercado correspondente, que debe pasar por unha organización efectiva dos produtores. Descrición Fomento do asociacionismo comercial en zonas de gran produción, en especial a zona suroeste para o kiwi ou a zona centro de Ourense para a castaña, por poñer dous exemplos con posibilidades por tratárense de zonas de ampla produción. Trátase de exemplos, posto que a medida está aberta a outras orientacións. Priorización no acceso a liñas de axudas para a compra e emprego en común de maquinaria de recolección, se é o caso, selección, clasificación, conservación e envasado para a súa venda posterior en común.
209