Diasabra Maart 9 2013
Pagina 8
Becado di Aruba Scholarship Foundation
University Of Central Florida (UCF) lo honra Shari-Michelle Nahr cu e Founders’ Scholar Award
STA. CRUZ -- Durante e Founders Day Ceremony cu ta tuma lugar un biaha pa aña cerca di final di e a aña escolar, UCF ta honra e studiante- y docentenan pa nan logronan academico excepcional. E Founders’ Scholar Award ta un di e premionan mas codicia y mas dificil pa un studiante ricibi di UCF. Solamente e studiante cu ta den e top un porciento di su colegio por bin na remarca pa ricibi tal premio. ShariMichelle tin un GPA di 3.992 cu ta casi yega perfeccion y Aruba Scholarship Foundation ta orguyoso di anuncia cu nan becado a keda nombra pa haya e premio e aña aki. E Founders’ Day Ceremony lo tuma lugar dia cuater di April, pero di awor caba Aruba Scholarship Foundation ta manda
nos felicitacion pa Shari-Michelle y su mayornan Marcel y Hilde di Bubali 96D. Shari ta studiando na Rosen College of Hospitality di University of Central Florida y e ta major den Event Management. Previamente nos a raporta cu Shari a keda nombra miembro di e sociedad honorifico Phi Theta Kappa (ΦΘΚ). Cu un recomendacion di Aruba Scholarship Foundation, Shari Nahr ta participa den e Latin America/ Caribbean (LAC) Scholarship Program cu ta spaar su famia mas di 16 mil dollar pa aña den gastonan na UCF. Desafortunadamente e LAC/ASF program ta yegando na su fin. Si bo kier sa mas di Aruba Scholarship Foundation, skirbi mi na clydeharm@ yahoo.com
Polis di Sta. Cruz controlando Colegio San Hose STA. CRUZ -- Diarazon prome cu mey anochi Polis di Sta. Cruz a bay Colegio San Hose. Aki un persona a bisa Polis cu aparentemente nan a mira hende den e school. Polis a controla pero no a haya ningun persona.
UN VISION DI BERDAD
Dia Internacional di hende muher 8 di Maart, kico ta e significacion di e dia aki? Nos lo por us’e como un dia pa reflexion interno y puntra nos mes e siguiente preguntanan: -Con realmente mi ta pensa y sinti tocante mi papel como hende muher? -Con sociedad ta mira mi papel como hende muher? Mayoria di e contestanan nos sa caba, pero nos a yega di haci nos mes e pregunta kico ta vision di Dios tocante nos papel di hende muher? Di hecho vision di Dios ta totalmente diferente cu di nos. Como nos Tata Supremo, E ta mira nos manera nos ta realmente, sernan puro yen di calidadnan igual cu di dj’E. Como sernan completo nos ta hunga papelnan diferente. E no ta experencia nos como hende muher of hende homber, pero como Su yiunan, kendenan ta sernan di luz spiritual, yena cu paz, amor y felicidad y tur otro calidadnan cu nos mester den nos bida diario. Sabiendo esaki nos por solamente respeta otro pa e papel cu nos ta hunga, sin e sentimento cu un ta mas of menos cu e otro, cada un den su papel di hende homber of hende muher ta mes importante. Pero den e tempo special aki den historia, un tempo di transformacion grandi, Dios tin mester di esnan cu tin e papel di hende muher pa yud’E cu su tarea. Hende muher a desaroya cierto calidadnan, manera tolerancia, pasenshi, kietud, intuicion, amor y resistencia di un manera mas natural pavia di su papel. Esakinan ta calidadnan cu ta sostene y cu ta hopi necesario pa trece atrobe balance den mundo. Nos mester di tur dos: nos cabes y nos curazon. Vision di Dios ta vision di Berdad pa medio di cual E ta “mira” nos como completo. Asina p’E cada un di nos tin mes vision cu E tin. Pesey nos ta capaz pa yud’E transforma mundo cu awor ta yen di tristeza y dolor, den un mundo di berdad, paz y felicidad. Brahma Kumaris Aruba