Pagina 3
Diasabra 8 Juli 2017
Dangui Oduber di MEP:
Futuro briyante pa deporte cu MEP den gobierno!
Deporte di Aruba y deportistanan a wordo neglisha y lubida por completo pa e gobierno di AVP. Por mira den ki estado complehonan deportivo ta. Varios di nan den estado deplorable, luznan ta casi cay riba deportistanan. Luznan no ta funciona y asina por keda menciona con deporte a wordo poni un banda. Ta casi tur siman bo ta mira muchanan riba caya bendiendo rifa pa haya fondo pa por representa Aruba den exterior. Ta un lastima con AVP a maneha tur e entradanan di lotto pa deporte y kico tur nan a haci cu e fondonan aki. Canadian Bank Note a bira doño di Lotto pa Deporte y awor envez cu e entrada di lotto pa deporte wordo inverti den deporte na
Aruba ta e grupo canades y nan shareholdernan ta ricibi e ganashi aki. Anto pa haci e situacion mas peor bo ta haya miembronan di e bestuur di lotto ta fiesta y viaha cu e placa y te hasta casa di parlamentarionan di AVP ta cumpra camera di seguridad cu e entradanan di lotto pa deporte. Recientemente mes lotto pa deporte a genera masha hopi entrada cu e venta di Lotto Mini Mega cu a keda aden pa varios siman, E pregunta di oro ta, kico ta wordo haci cu tur e entradanan aki. MEP a bisa cu nos tin un vision pa deporte unda nos kier mira deporte den futuro. En todo caso nos kier Lotto pa Deporte bin bek den man di Aruba y pa tur pero tur entrada wordo inverti den deporte di Aruba. Nos lo construi
complehonan deportivo nobo y nos lo mantene complehonan deportivo existente y tambe nos lo percura pa e facilidad- y clubnan deportivo haya artificial turf. Nos kier pone artificial
turf pa haci’e atracitvo pa e muchanan yega veld y duna nan un motivacion extra pa haci nan deporte facvorito. Nos mester inverti den educacion y deporte pa asina por guia e muchanan cu ta nos futuro den e direccion
corecto. Deporte ta importante den desaroyo di un mucha y nos mester duna deporte e atencion cu merece. Cada voto pa MEP ta un voto na fabor di deporte y un voto pa mas placa wordo inverti den deporte!
Orario di biblioteca den vakantie grandi Biblioteca ta adapta su orario pa vakantie grandi entrante dialuna awor. Biblioteca NO ta cera. Den vakantie grandi biblioteca na Oranjestad ta habri 5 dia pa siman non-stop di 9’or am pa 5’or pm; tambe diarazon anochi di 5’or pm pa 7’or pm. Ademas, durante vakantie grandi miembronan di biblioteca cu ta entrega buki, NO ta paga boet. Pa tur miembro di biblioteca cu tin buki na cas basta dia caba, esaki ta un oportunidad ideal pa evita paga boet. Y e ta atractivo pa studiante y muchanan di school cu a caba nan aña escolar. Ultimo dia cu esaki por ta diabierna 25 di Augustus. Un y tur ta bon bini.