Diarazon Juli 3 2013
Pagina 11
N.V. ELMAR ta contribui pa instala solar panel na e Casita di Luz na Seroe Preto Lo produci 22.800 kWh pa aña pa ilumina casita pa fin di aña STA. CRUZ -- Ta un tradicion na Aruba cu pa fin di aña, tanto local como turistanan ta bishita Seroe Preto su Casita di Luz pa asina admira e bunita creacion di arte traha cu miles di luznan door di e grupo Hubentud Uni Seroe Preto. E grupo aki ta consisti di bisiña- y amigonan kendenan a lanta un fondo cu e meta di diseña y crea un bunita obra traha cu luznan di color cual ta wordo mustra na publico pa e temporada di Pasco y Fin di Aña. E proyecto aki a inicia 40 aña pasa cu dos cas di carton cu a ser ilumina cu 25 spotlight. Awendia, henter e sero ta wordo decora cu miles di luz di Pasco cu diferente diseño y temanan cual ta dorna e structuranan incluyendo e brug chikito. E costo pa cende e Casita di Luz a resulta den sumanan halto di coriente. Awor N.V. ELMAR huntu cu SETAR N.V. ta bay asisti e comite Hubentud Seroe Preto cu e instalacion di un sistema di panel solar cu ta produci 12.5 kW. E panelnan solar aki lo acumula cu re-coleccion di energia atraves di henter aña lo cual lo contribui na e gran demanda genera pa e proyecto durante e temporada di fin di aña. E instalacion di e panel solar aki a wordo introduci den presencia di Minister di Finanzas y Energia, Ing. Mike de Meza y e director di N.V. ELMAR, Ing.
Robert Henriquez. Ta bon pa menciona cu e sistema di panel solar aki lo produci anualmente un total di 22.800 kWh. E sistema di 12.5 kW PV lo bira suficiente pa cubri e demanda di energia rekeri pa e Casita di Luz na Seroe Preto. N.V. ELMAR
ta hopi orguyoso di por contribui cu un proyecto asina importante haciendo uzo di metodonan innovativo pa spaar coriente. Ademas, cu esaki e compania kier duna un contribucion na mantene bibo e bunita tradicionnan di nos isla.